Yozhanq Saw 13 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh swiq ha hawj lwgsae

¹ Ijvanh daengz aen ciet Bienqgoqbae, Yehsuh rox bonjfaenh de couh ij caeuq lajmbwn doxbiek, maj daengz daxboh de Cangqdiq mwnq bae lo. De soqlaiz cungj dwg aiq gij vunz de he, caemh dwg itcig aiq roengzbae.

² Yehsuh caeuq gyoengq lwgsae de gw haeuxcaeuz hih mwhde, fangzvuengz gaenq dawz gij ij cuzmaiq Yehsuh hih naemjfap coengq haeuj ndaw sim Youzdaq, daeglwg Sihmaenz, Gyahloz vunz bae lo.

³ Yehsuh caemh rox Cangqdiq Bohmbwn gaenq dawz sojmiz hih gienz gyau hawj bonjfaenh de liux lo, caemh rox bonjfaenh de dwg daj Cangqdiq mwnq daeuj he, couh ij dauq maj Cangqdiq mwnq bae lo le,

⁴ couh daj henz daiz gw haeux mwnq ndwn hwnjdaeuj, couh duet diuz buh baixrog de, caiq aeu mbaw sujbaq he ma cug rwet hwj,

⁵ couh bae aeu buenz raemx he ma swiq ha hawj gyoengq lwgsae de, caemh aeu mbaw sujbaq cug rwet mwnq ma swk ha hawj gyoengqde.

⁶ Gajlaeng ij swiq daengz Sihmaenz-Bijdwz lo. Yehsuh bae daengz dangqnaj Bijdwz le, Bijdwz cam naeuz: “Bouxcawj gou hax, mwngz ij bang gou swiq ha haj?”

⁷ Yehsuh han naeuz: “Mwngz seizneix mbouj rox gou soj guh hih, hoeng, baezneix mwngz gaengjdingq rox.”

⁸ Bijdwz dingq le, naeuz: “Gou gyenhgyez mbouj hawj mwngz swiq gij ha gou!” Hoeng, Yehsuh dauq han de naeuz: “Hauhnaeuz gou mbouj swiq gij ha mwngz, yiengq mwngz couh caeuq gou mij'z maz gvanhaeh lo.”

⁹ Sihmaenz-Bijdwz dingq yienghneix le, couh naeuz: “Bouxcawj hax, hauhnaeuz dwg yienghneix nex, mwngz mbouj danhcij ij gag swiq gij ha gou nej, daiqlienz gij fawz ndaek raeuj gou cungj ij swiq cij ndaej!”

¹⁰ Gajlaeng Yehsuh naeuz: “Famz swiq ndang goq hih vunz baenx cenz ndang cungj dwg cengh hih. Cijaeu swiqswiq ha couh ndaej lo. Faenhsou dwg cengh hih, hoeng, mbouj dwg bouxboux cungj cengh.”

¹¹ (Yehsuh gangj gawq “Mbouj dwg bouxboux cungj cengh” gawq vah neix dwg aenvih de gaenq rox byawz ij cuzmaiq de lo, sojhij de cij yienghneix gangj he.)

¹² Yehsuh swiq ha hawj gyoengqde liux le, couh doiqyungz daenj diuz buh baixrog de, caiq dauq maj henz daiz mwnq gaxgonq de, couh cam naeuz: “Gou daxbaenh bang faenhsou soj guh hih, faenhsou rox lwi?

¹³ Faenhsou heuh gou ‘Lauxsae’ heuh gou ‘Bouxcawj,’ faenhsou heuh ndaej deng hih, aenvih gou baenjlaiz couh dwg.

¹⁴ Gou dwg faenhsou hih cawj, dwg faenhsou hih lauxsae, hoeng, gou vanzlij bang faenhsou swiq ha; faenhsou engqgya ij wnggai doxbang swiq ha lo.

¹⁵ Gou guh bangjyangq hawj faenhsou dwg vih ij hawj faenhsou ciuq gou soj guh hih bae guh.

¹⁶ Gou saedsaeh naeuz sou ni, bouxhoiq mbouj ndaej beij bouxcawj ak, baij daeuj hih boux mwnq caemh mbouj ndaej beij boux baij de daeuj mwnq ak.

¹⁷ Yiengq, hauhnaeuz faenhsou rox gij dauhleix neix caemh ciuq gij dauhleix neix bae guh hih, couh miz fuk lo.

¹⁸ “Gou gangj doenghgij vah neix mbouj dwg doiq faenhsou sojmiz hih vunz gangj law. Gou doiq gou soj senj hih vunz cungj rox cingsuj, cingq luj ndaw Singqgingh ndaw de sij naeuz: Caeuq gou caemh daiz gw haeux, hoeng, dauq aeu ha ma dik gou. Gawq vah neix gaengjdingq ij lingz okdaeuj hih.

¹⁹ Gou youq gij saeh neix mijyaengz fatseng cihsenz sien naeuz sou ni, hawj faenhsou daengz gij saeh neix fatseng hih mwhde, faenhsou couh sinq gou dwg boux gag miz he lo.

²⁰ Gou caiq saedsaeh naeuz faenhsou ni, famz daih boux gou baij daeuj hih, caemhdangq daih gou lo; famz daih gou hih, caemhdangq daih boux baij gou daeuj hih lo.”

Yehsuh naeuz bonjfaenh de ij ngaiz buenqduz cuzmaiq

²¹ Yehsuh gangj gij vah neix le, cungj siengsim hwj ij rai bae, couh naeuz: “Gou saedsaeh naeuz sou ni, faenhsou ndaw neix miz boux he ij cuzmaiq gou.”

²² Yehsuh yienghneix gangj le, gyoengq lwgsae de cungj boux yawj boux hwj mbouj rox hih de naeuz hih dwg bouxlawz.

^23-24 Yiengq Sihmaenz-Bijdwz couh yawj haeuj [23]boux lwgsae Yehsuh haenjheiq he bae, boux de naengh youq henz ndang Yehsuh, [24b]yiengq de vaekvaek raeuj, yaepyaep ra hawj de cam Yehsuh, cam de dauqdaej dwg byawz ij cuzmaiq de.

²⁵ Boux lwgsae mwnq raen yienghneix le, couh ngeng roengz aen aek Yehsuh bae, couh cam Yehsuh naeuz: “Bouxcawj hax, dwg byawz ij cuzmaiq mwngz lah?”

²⁶ Gajlaeng Yehsuh han naeuz: “Gou aeu aen bingj he demj ciengq hawj bouxlawz, bouxlawz couh dwg lo.” De gangj gawq vah neix sat le, couh dawz aen bingj he demj ciengq hwj aeu hawj Youzdaq daeglwg Sihmaenz, Gyahloz vunz.

²⁷ Yiengq Youzdaq couh aeu ma gw. Gw le, Sajdanq fangzvuengz couh majcangq doz hwnj gwnz ndang de bae lo. Gajlaeng Yehsuh couh doiq Youzdaq naeuz: “Mwngz vaiq bae guh gij saeh mwngz ij guh he bax!”

²⁸ Youq mwnq caemh daiz gw haeux hih vunz cungj mij saek boux rox Yehsuh doiq Youzdaq gangj hih doenghgij vah neix dwg gijmaz iqswh,

²⁹ aenvih Youzdaq dwg guenj ngaenz he, guh hwj miz mbangj lwgsae naemqnaeuz Yehsuh raengq de bae cawx doenghgij ij goq ciet yungh he, cixnaeuz hawj de bae aeu ngaenz faen hawj vunz gungz lah.

³⁰ Couh yienghneix, Youzdaq gw aen bingj mwnq le, couh ok bae lo. Mwhde dwg doengxhaemh he.

Gij mingqlingq moq

³¹ Youzdaq ok bae le, Yehsuh couh naeuz: “Seizneix Vunz dih Daiqbiuj ndaej najrongh lo; Cangqdiq youq gwnz ndang Vunz dih Daiqbiuj caemh ndaej najrongh lo.

³² Cangqdiq giqyienz dunghgoq Vunz dih Daiqbiuj hwj ndaej najrongh, yiengq de caemh ij dunghgoq bonjfaenh de hwj hawj Vunz dih Daiqbiuj najrongh, caemh dwg couh majcangq ij hawj de najrongh lo.”

³³ Yehsuh vanzlij caiq naeuz: “Lwg hax, gou caeuq faenhsou youq mbouj geij caez haem lo. Baezneix faenhsou gaengjdingq ij cimh gou, hoeng, gou soj bae hih deixfueng, faenhsou mbouj ndaej bae. Gawq vah neix gou doiq gij lingjdauj Youzdaiq gangj goq; seizneix gou caemh gangj naeuz sou ni.

³⁴ “Gou caemh miz gij mingqlingq moq he hawj faenhsou, couh dwg naeuz faenhsou ij doxaiq; gou baenzlawz aiq faenhsou, faenhsou caemh ij baenzlawz doxaiq.

³⁵ Hauhnaeuz faenhsou doxaiq nex, lajmbwn hih vunz couh rox faenhsou dwg gij lwgsae gou lo.”

Yehsuh sien naeuz Bijdwz gajlaeng mbouj nginh de

³⁶ Sihmaenz-Bijdwz dingq Yehsuh yienghneix naeuz le, couh cam naeuz: “Bouxcawj hax, mwngz ij bae mwnqlaw hax?” Yehsuh han naeuz: “Gou ij bae hih deixfueng, mwngz seizneix mbouj ndaej gaen bae, hoeng, baezneix mwngz gaengjdingq ndaej gaen gou bae hih.”

³⁷ Bijdwz dingq le, caiq cam naeuz: “Bouxcawj hax, vihmaz seizneix gou mbouj ndaej gaen mwngz bae nej? Gou nyienh'eiq vih mwngz vwt mingh hah.”

³⁸ Yehsuh dingq le han de naeuz: “Mwngz cingqcaen nyienh'eiq vih gou hwj vwt mingh mah? Gou saedsaeh naeuz mwngz ni lo, ngwnzneix gaeq mijyaengz haen haem, mwngz ij miz sam mbat mbouj nginh gou.”