Yozhanq Saw 12 - Gij Baujcingq Moq Caeuq Geij Bonj Gij Baujcingq Daeuzdaeuz

Majliqyaq cat youz rang hawj Yehsuh

¹ Aen ciet Bienqgoqbae dih roek ngoenz gaxgonq de, Yehsuh bae daengz Bwzdaqniz, couh dwg de heuh hawj Lahsajluq daj rai ndaej dauqlix dih aen mbanj mwnq.

² Yiengq ndaw ranz Lahsajluq rox de daeuj le, couh loengh haeux loengh byaek cingj de gw, hoeng, Majdaq guh loengh he, Lahsajluq guh buenx Yehsuh gw he.

³ Majliqyaq nej, Majliqyaq dawz bingz youz naqdaz cwnz he rang fwtfwt cienfanh bengz he, bingz de dwg miz gaen he, dawz daeuj cat gij ha Yehsuh. Cat le, caiq aeu gij byoem bonjfaenh de ma swk hawj de, guh hwj ndaw ranz gyoengqde cungj rang fwtfwt bae.

⁴ Yiengq Yehsuh miz boux lwgsae he, couh dwg boux ijvanh buenqduz cuzmaiq de he, Youzdaq, dwg Gyahloz vunz he, de dauq doiq Majliqyaq naeuz:

⁵ “Mwngz vihmaz mbouj dawz gij youz rang neix bae hai—gij youz rang neix gijmaj hai ndaej sambak gaiq ngaenz—aeu gij ngaenz de faen hawj vunz gungz nej?”

⁶ Youzdaq yienghneix naeuz gaenhbaenj mbouj dwg naeuz gvansim vunz gungz; gizsaed de dauq dwg boux caeggeq he lah. De dwg guh boux guenj gij ngaenz Yehsuh gyoengqde he; de siengzseiz dam aeu gij ngaenz daixgya.

⁷ Yehsuh dingq le, couh naeuz: “Ajcaih de lo! De louz gij youz rang neix, baenjlaiz caemh dwg vih ij youq moek gou hih cihsenz aeu ma cat gou lah.

⁸ Gangj daengz vunz gungz, youq seiqhenz faenhsou siengzseiz cungj miz vunz gungz, hoeng, gou mbouj ndaej seiqseiz caeuq faenhsou youq hah.”

⁹ Yiengq miz haujlai vunz rox naeuz Yehsuh youq Bwzdaqniz le, couh bae mwnq yawj de; mbouj danhcij naeuz bae yawj de, caemh vanzlij ijsiengj yawjyawj dauqlix dih Lahsajluq.

¹⁰ Sojhij doengh goengjsae dajbwiz he couh giqvaq daiqlienz Lahsajluq cungj ij gaj,

¹¹ aenvih miz haujlai vunz cungj vih Lahsajluq dih yienzyouz hwj mbouj caeuq gyoengqde, dauq bae gaen Yehsuh lah.

Yehsuh gwih duz lawz haeuj Yehluqsajlaengj bae

¹² Yiengq daengz daixngeih ngoenz, miz haujlai vunz bae Yehluqsajlaengj goq ciet. Gyoengq vunz rox naeuz Yehsuh ij bae Yehluqsajlaengj le,

¹³ couh dawz mbaw rong bae ciep de, angq hwj hemq naeuz: “Vanqseiq! Vanqseiq Cangqdiq baij daeuj dih! Vanqseiq! Vanqseiq Hijswzlez dih vuengz!”

¹⁴ Mwhde Yehsuh dwg gwih duz lawz heijvunz bae he, cingq luj ndaw Singqgingh ndaw de sij naeuz:

¹⁵ Yehluqsajlaengj dih vunz hax, faenhsou gaejyungh lau; goengjvuengz faenhsou gwih lawz daeuj lo.

¹⁶ Mwhde, gij lwgsae Yehsuh gaenhbaenj mbouj rox fatseng youq dangqnaj gyoengqde hih saeh, itcig daengz Yehsuh dauqlix le, cij ngeix daengz ndaw Singqgingh soj sij naeuz hih dwg ceij de sij he, caemh dwg youq gwnz ndang de lingz okdaeuj lo.

¹⁷ Doenghheij vunz caenra raen Yehsuh heuh hawj Lahsajluq dauqlix daj ndaw moh byaij okdaeuj hih doenghheij vunz mwnq cungj mbouj dingz hih cenzgangj cingqmingz gij saeh neix.

¹⁸ Yiengq haujlai vunz dingq daengz Yehsuh guh hih gij geizmiuj neix le, cungj bae ciep Yehsuh.

¹⁹ Gajlaeng doenghheij gaep haeuj Fazliqcaiq baij hih vunz cungj naeuz: “Gyoengqraeuz mij'z yungh huh! Yawj veiq, baenx cenz lajmbwn hih vunz cungj gaen de liux lo!”

Yehsuh gangj daengz bonjfaenh de rai

²⁰ Mwhde, bae Yehluqsajlaengj goq ciet hih vunz miz geij boux Hihlaz vunz.

²¹ Gyoengqde bae cimh Feihliz (Feihliz dwg Gyahliqliq Saengj Bwzcaiqdaq hih vunz), bae gouz de naeuz: “Goengjau hax, gyoengqraeuz siengj cimh Yehsuh.”

²² Feihliz dingq le, couh naeuz Anhdwzlez ni, gajlaeng song boux de couh bae naeuz Yehsuh ni.

²³ Yehsuh dingq le couh naeuz: “Vunz dih Daiqbiuj ndaej najrongh hih mwhde couh ij daengz lo.

²⁴ Gou saedsaeh naeuz sou ni, ceh mienh he mbouj doek roengz doem cungj dwg ceh he; hoeng, hauhnaeuz ceh de doek roengz doem bae, couh ndaej did hwnjdaeuj, couh ndaej ok baenx haujlai mienh lo.

²⁵ Caemh doxdoengz, it boux vunz hauhnaeuz de cij rox baux diuz mingh bonjfaenh hih, dauq ngaiz vwt mingh; doengh boux mbouj yawjnaek diuz mingh bonjfaenh hih, dauq ndaej baux mingh—mbouj danhcij naeuz ndaej baux, vanzlij ndaej baux daengz seiqseiz.

²⁶ Gou youq mwnqlaw, bouxhoiq gou caemh ij youq mwnqlaw. Couh dwg naeuz byawz siengj daeuj swqhaeuh gou hih, couh bietdingh ij daeuj gaen gou. Swqhaeuh gou hih vunz, daxboh gaengjdingq hawj de ndaej najrongh.”

²⁷ Yehsuh vanzlij caiq naeuz: “Seizneix gou simnyap ij rai bae, mbouj rox hih ij gangj gijmaz ndei. Gou wnggai gag naeuz: ‘Boh hax! Gouz mwngz gouq gou mbouj hawj gou ngaiz souh daengz gij saeh mwnq!’ maz? Hoeng, gou cingq dwg vih gij neix hwj daeuj hih lah.”

²⁸ De yienghneix naeuz le, couh hemq naeuz: “Boh hax! Muengh mwngz najrongh miz mingz!” De hemq sat le, couh miz sing daj gwnzmbwn cenz roengzdaeuj naeuz: “Gou gaenq najrongh lo, gaenq ok mingz lo; gou vanzlij ij najrongh haem, ij miz mingz haem.”

²⁹ Yiengq ndwn youq mwnq hih vunz dingqri gij sing neix le, miz mbangj hih vunz naeuz: “Byajraez lo!” Miz mbangj hih vunz naeuz: “Miz bouxcai Cangqdiq caeuq de gangj vah hwj!”

³⁰ Hoeng, Yehsuh doiq gyoengqde naeuz: “Gij sing neix mbouj dwg vih gou yiengj nej, dauq dwg vih faenhsou hwj yiengj lah.

³¹ Seizneix dwg aen seiqgyaiq neix hih vunz souh daengz saemjbuenq hih mwhde lo. Aen seiqgyaiq neix hih vuengz, Sajdanq, couh ij ngaiz luetgyeuq lo.

³² Gangj daengz gou, gou daj lajdoem ij ngaiz yingx hwnjdaeuj hih mwhde, gaengjdingq ndaej hawj baenx cenz lajmbwn hih vunz daeuj gvi haeuj gou.”

³³ Yehsuh gangj gij vah neix dwg ceij bonjfaenh de ij baenzlaw ngaiz rai.

³⁴ Gyoengq vunz dingq le, couh cam naeuz: “Gyoengqraeuz rox daengz ndaw Singqgingh ndaw de sij naeuz Gihduz dwg seiqseiz lix hih, hoeng, mwngz vihmaz naeuz Vunz dih Daiqbiuj ij ngaiz yingx hwnjdaeuj rai nej? Mwngz naeuz hih dwg byawz nej?”

³⁵ Yehsuh dingq le, dauq yungh gij beijgangj he ma han naeuz: “Rongh youq faenhsou dineix mbouj geij caez lo; faenhsou ij domh gij rongh vanzlij youq, couh ij vaiqdi byaij lo, mienx daengz laep le, yawj mbouj raen roen, mbouj rox hih ij byaij goq mwnqlaw bae lo.

³⁶ Sojhij, faenhsou wnggai domh vanzlij miz rongh couh ij sinq gij rongh neix; yienghneix faenhsou couh ndaej bienqbaenz gij lwg rongh lo.” Yehsuh gangj sat gij vah neix le, couh bae lo, mbouj hawj vunz raen de lo.

Gij vunz Youzdaiq vanzlij mbouj sinq Yehsuh

³⁷ Yehsuh gannaeuz youq dangqnaj gyoengqde guh baenx haujlai geizmiuj hih saeh hwj ndaej cingqmingz naeuz de dwg byawz lah, hoeng, gyoengqde vanzlij mbouj sinq de.

³⁸ Yienghneix ngamq lingz ok gij vah Hijcaiqyaq boux cenz gij vah Cangqdiq neix gangj goq he naeuz: Cangqdiq hax, miz byawz sinq raeuz soj cenz hih siuhsiz nej? Gij rengz mwngz gaenq yienh hawj vunz raen lo, hoeng vunz mbouj sinq hah.

³⁹ Vunz vihmaz mbouj ndaej sinq dwg aenvih boux de caemh vanzlij caiq miz gawq he naeuz:

⁴⁰ Cangqdiq hawj gyoengqde rafangz, hawj aen sim gyoengqde gyeng, mijn'x nex, gyoengqde yawj ndaej raen, ndaej rox nex, couh gaij goqma, yiengq gou couh ij ngaiz yw gyoengqde ndei.

⁴¹ Hijcaiqyaq gangj goq gij vah neix dwg aenvih Cangqdiq hawj de ndaej raen Yehsuh najrongh veijdaq; de dwg ceij de gangj hih, sojhij de cij yienghneix gangj.

⁴² Gannaeuz yienghneix lah, hoeng, caemh miz haujlai Youzdaiq vunz dang lingjdauj he sinq Yehsuh, cijmboujgoq gyoengqde mbouj gamj hawj gij vunz gaep haeuj Fazliqcaiq baij he rox, lau gyoengqde boenq ok veiqdangz bae,

⁴³ aenvih gyoengqde yawjnaek vunz haenh, mbouj yawjnaek Cangqdiq haenh.

Sinq daeglwg Cangqdiq couh dwg sinq Cangqdiq

⁴⁴ Miz baez he, Yehsuh hemq goggog naeuz: “Sinq gou hih, gizsaed mbouj dwg sinq gou, dauq dwg sinq boux baij gou daeuj hih lah.

⁴⁵ Yawjraen gou hih couh dangq yawjraen boux baij gou daeuj mwnq lo.

⁴⁶ Gou daeuj dwg ij guh gij rongh lajmbwn, hawj gij vunz sinq gou he mbouj youq ndaw laep.

⁴⁷ “Doenghheij dingqri gij vah gou lo, hoeng, mbouj ciuq gij vah gou bae guh hih, gou mbouj saemjbuenq de nej, aenvih gou daeuj mbouj dwg ij dingh coih hawj vunz, dauq dwg ij gouq vunz lah.

⁴⁸ Doengh boux yiem gou, mbouj nginh gou hih, mbouj siengj dingq gij vah gou hih, couh ij ngaiz saemjbuenq; gou soj gangj hih vah, daengz ngoenz gatsat, couh ndaej cingqmingz de miz coih,

⁴⁹ aenvih gou mbouj dwg ciuq gij cawjeiq gou ma gangj hih; dwg baij gou daeuj hih daxboh hawj gou naeuz gijmaz gou couh naeuz gijmaz. De hawj gou baenzlaw gangj gou couh baenzlaw gangj.

⁵⁰ Gou rox de dih mingqlingq, couh dwg hawj vunz ndaej seiqseiz lix. Sojhij gou gangj hih vah couh dwg daxboh hawj gou gangj hih.”