Yozhanq Saw 11 - Gij Baujcingq Moq Caeuq Geij Bonj Gij Baujcingq Daeuzdaeuz

Lahsajluq bingh rai

¹ Youzdaiq Saengj dih aen mbanj Bwzdaqniz miz boux vunz bingh he, gij coh de heuh Lahsajluq. Daeg vunz bingh neix de miz song boux daxce, couh dwg Majdaq caeuq Majliqyaq.

² Boux Majliqyaq neix couh dwg boux aeu gij youz rang fwtfwt he ma cat haeuj gij ha Yehsuh caiq aeu gij byoem bonjfaenh de ma swk hawq gij ha Yehsuh hih boux vunzbaz mwnq lo.

³ Daegnuengx de Lahsajluq bingh le, song daixsiujheiz de couh baij vunz bae naeuz Yehsuh ni naeuz: “Bouxcawj gou hax, mwngz aiq hih Lahsajluq bingh lo.”

⁴ Yehsuh dingq le, couh naeuz: “Lahsajluq bingh, mbouj bingh daengz rai bae law; de bingh dwg vih ij hawj Cangqdiq najrongh caeuq daeglwg Cangqdiq najrongh lah.”

⁵ Yehsuh soqlaiz cungj aiq Majdaq caeuq dahnuengx de caeuq daegnuengx de Lahsajluq.

⁶ Gannaeuz de rox Lahsajluq bingh lo, hoeng, vanzlij youq mwnq lai youq song ngoenz.

⁷ Lai youq song ngoenz le, de cij doiq gij lwgsae de naeuz: “Gyoengqraeuz dauq maj Youzdaiq Saengj bax.”

⁸ Yiengq doengh boux lwgsae de han de naeuz: “Lahbij, duenh gaxgonq, gij vunz Youzdaiq dang lingjdauj he ij aeu rin ma dub mwngz rai; mwngz vanzlij ijsiengj bae mwnq haem haj?”

⁹ Yehsuh han naeuz: “Doengxngoenz mbouj dwg miz cibngeih aen cunghdaeuz maz? Doengxngoenz vunz byaij roen ndaej raen rongh mbouj ngaiz laemx.

¹⁰ Doengxhaemh byaij roen, mbouj miz rongh, couh ngaiz laemx.”

¹¹ De gangj doenghgij vah neix sat le, vanzlij caiq naeuz: “Baengzyoux raeuz Lahsajluq ninz ralaep lo; gou bae heuh de singj gaenq.”

¹² Doengh boux lwgsae de dingq le, caiq naeuz: “Bouxcawj hax, hauhnaeuz de ninz ralaep nex, vanzlij ndaej singj hwnjdaeuj hih.”

¹³ Gizsaed, Yehsuh gangj gij vah neix dih iqswh dwg naeuz Lahsajluq gaenq rai lo; hoeng, doenghgij lwgsae de dauq naemqnaeuz de naeuz de dwg luj bienqnaengz ninz ralaep lah,

¹⁴ guh hwj Yehsuh cij sohsoh naeuz gyoengqde ni naeuz: “Lahsajluq de rai lo;

¹⁵ vih ij hawj faenhsou sinq gou, yienghneix dauq baenz, de mijyaengz rai mwhde, gou mbouj youq henz de. Seizneix gyoengqraeuz bae de mwnq bax.”

¹⁶ Yiengq miz boux lwgsae gij coh de heuh Dohmaj he (gij vunz caemh heuh de Dihdujmaj), de doiq gyoengq lwgsae doih naeuz: “Gyoengqraeuz caemh gaen lauxsae bae, gaen de itheij rai bax.”

Dauqlix caeuq doenj mingh

¹⁷ Yehsuh bae daengz aen mbanj Bwzdaqniz le, rox naeuz Lahsajluq gaenq rai gaenq moek roengz moh bae ndaej seiq ngoenz lo.

¹⁸ Aenvih Bwzdaqniz liz Yehluqsajlaengj mbouj geijlwh gyae, daihgaiq miz roek leix roen yienghneix,

¹⁹ sojhij, miz haujlai vunz daeuj yawj Majdaq caeuq Majliqyaq, vued song boux de.

²⁰ Yiengq Majdaq dingq naeuz Yehsuh daeuj lo, couh ok bae ciep de, hoeng, Majliqyaq dauq naengh youq ndaw ranz.

²¹ Majdaq bae raen Yehsuh le, couh doiq de naeuz: “Bouxcawj gou hax, hauhnaeuz mwhde mwngz youq dineix nex, daegnuengx gou couh mbouj ngaiz rai lo!

²² Hoeng, mboujguenj seizlaw gou cungj rox, rox mwngz gouz Cangqdiq gijmaz, Cangqdiq cungj hawj mwngz gijmaz.”

²³ Yehsuh dingq le doiq de naeuz: “Daegnuengx mwngz gaengjdingq ndaej dauqlix.”

²⁴ Majdaq dingq le, naeuz: “Gou rox, youq ngoenz ciqgyaiq gatsat, vunz dauqlix hih mwhde, de gaengjdingq dauqlix.”

²⁵ Gajlaeng, Yehsuh caiq naeuz: “Gou couh dwg dauqlix, couh dwg doenj mingh; sinq gou hih vunz, gannaeuz rai hoh lah, hoeng, cungj vanzlij ndaej dauqlix.

²⁶ Famz sinq gou hih vunzlix, de gaengjdingq yungjyenj mbouj rox rai. Mwngz sinq lwi?”

²⁷ Majdaq dingq le, couh han de naeuz: “Bouxcawj gou hax, gou sinq hah. Gou sinq mwngz dwg Gihduz, dwg lwg Cangqdiq, dwg Cangqdiq baij daeuj lajmbwn hih.”

²⁸ Majdaq gangj sat gij vah neix le, couh dauq ma caegcaeg naeuz dahnuengx de Majliqyaq ni, naeuz: “Lauxsae daeuj huh; de heuh mwngz bae.”

²⁹ Majliqyaq dingq le, couh nyungjnyat vaiq riq bae cimh Yehsuh.

³⁰ Mwhde, Yehsuh vanzlij mijyaengz haeuj mbanj, vanzlij youq mwnq Majdaq bae ciep de hih mwnq.

³¹ Yiengq gij vunz daeuj vued Majliqyaq hih doenghgij vunz mwnq raen de nyungjnyat riq okbae le, couh gaen bae, naemqnaeuz de bae aen moh daegnuengx de mwnq daej lah.

³² Majliqyaq bae daengz Yehsuh mwnq le, couh bomz roengz dangqnaj Yehsuh bae daej naeuz: “Bouxcawj gou hax, hauhnaeuz mwngz senqsi cix youq dineix nex, daegnuengx gou couh mbouj ngaiz rai lo.”

³³ Yehsuh raen Majliqyaq daej caeuq doenghheij vunz gaen de daeuj mwnq daej le, cungj gangznaek siengsim ij rai bae,

³⁴ couh cam naeuz: “Faenhsou dawz de moek youq mwnqlaw lah?” Gyoengqde han naeuz: “Bouxcawj hax, cingj mwngz daeuj yawj bax.”

³⁵ Yehsuh yienghneix cam le, caemh siengsim hwj daej lo.

³⁶ Gij vunz Youzdaiq raen de daej le, couh naeuz: “Yawj hax, de baenxlai aiq Lahsajluq!”

³⁷ Hoeng, miz mbangj hih vunz engq naeuz: “Giqyienz de ndaej hawj rafangz bienq raraeh vwz, nanzdauh de mbouj ndaej hawj vunz mbouj rai haj?”

Hawj Lahsajluq dauqlix

³⁸ Yehsuh dingq daengz gij vunz gangj gij vah neix le, engqgya siengsim. Gajlaeng de bae daengz henz moh Lahsajluq. Aen moh de dwg youq ndaw conghgamj he; bakcongh de miz ngauq rin he caet hwj.

³⁹ Yehsuh raen yienghneix le, couh naeuz: “Nod ngauq rin deuz!” Gajlaeng daxce Lahsajluq Majdaq doiq Yehsuh naeuz: “Bouxcawj gou hax, de gaenq rai ndaej seiq ngoenz lo, gaenq haeu lo.”

⁴⁰ Yehsuh dingq de yienghneix naeuz le, couh naeuz: “Gou mbouj dwg naeuz mwngz ni goq lo maz, cijaeu mwngz sinq, couh ndaej raen gij akak rengzrengz bonjsaeh Cangqdiq lo mah?”

⁴¹ Gij vunz dingq Yehsuh yienghneix naeuz le, couh nod ngauq rin deuz. Yehsuh couh ngiengx raeuj hwnjdaeuj yawj hwnj gwnzmbwn bae, couh gouz Cangqdiq naeuz: “Boh hax, gou docih mwngz, aenvih mwngz gaenq dingq gou gouz mwngz lo.

⁴² Gizsaed gou rox mwngz siengzseiz cungj dingq gou gouz mwngz hih. Gou yienghneix naeuz cungj dwg vih gij vunz youq seiqhenz ndang gou lah, dwg vih ij hawj gyoengqde sinq gou dwg mwngz baij daeuj hih.”

⁴³ De gangj sat doenghgij vah neix le, couh hemq naeuz: “Lahsajluq, ok ma!”

⁴⁴ Yehsuh yienghmwnq naeuz le, Lahsajluq boux vunzrai mwnq couh ok ma lo. Gij fawz gij ha de miz boiq gyuj hwj, baj naj de caemh aeu boiq ma gyuj hwj. Yehsuh raen yienghneix le, couh doiq gyoengq vunz naeuz: “Gej gij boiq gyuj de bae; hawj de maj bax!”

Geiqmaeuz haih Yehsuh

⁴⁵ Gajlaeng, miz haujlai vunz daeuj yawj Majliqyaq he raen Yehsuh soj guh hih saeh le, couh sinq de lo.

⁴⁶ Hoeng, caemh miz mbangj hih vunz engq dawz Yehsuh soj guh hih saeh bae gangj naeuz doenghgij vunz gaep haeuj Fazliqcaiq baij he ni.

⁴⁷ Gajlaeng doenghheij vunz gaep haeuj Fazliqcaiq baij he caeuq doenghheij goengjsae dajbwiz he couh doxcomz hwnjdaeuj cimciek naeuz: “Boux vunz bouxn'x, guh baenx haujlai geizmiuj hih saeh, gyoengqraeuz ij baenz guh nej?

⁴⁸ Hauhnaeuz hawj de yienghneix guh roengzbae nex, hoengjlau sojmiz hih vunz cungj sinq de hwj nauh luenh lah. Daengz mwhmwnq, gij bing Lozmaj gaengjdingq daeuj ciemq aeu gunghdenq Cangqdiq, ciengj aeu gij vunz raeuz.”

⁴⁹ Yiengq doenghheij vunz mwnq ndaw de miz boux he, gij coh de heuh Gaihyaqfaz, couh dwg bi mwnq hih boux goengjsae dajbwiz daeuzdaeuz he. De naeuz: “Faenhsou gijmaz cungj mbouj rox!

⁵⁰ Faenhsou mbouj rox haj, de, boux vunz he ndaej dingj baenx cenz minzcuz hih vunz rai, mbouj hawj gyoengqde rai. Nanzdauh faenhsou yawj mbouj ok de rai doiq faenhsou miz ik haj?”

⁵¹ Gizsaed boux de gangj gij vah neix gaenhbaenj mbouj dwg gij cawjeiq bonjfaenh de, dauq dwg vih de bi mwnq guh goengjsae dajbwiz daeuzdaeuz, Cangqdiq hawj de ma gangj goq naeuz Yehsuh baezneix ij dingj gij vunz Youzdaiq rai;

⁵² mbouj danhcij naeuz dingj gyoengqde rai, vanzlij ij dawz faensanq youq gak dieg hih gij lwg Cangqdiq doxcomz hwnjdaeuj gaep guh buek vunz he.

⁵³ Couh yienghneix, daj mwhmwnq hwnj, doenghheij vunz mwnq couh gaihcij doxyuk hwnjdaeuj giqvaq ij gaj Yehsuh lo.

⁵⁴ Gajlaeng Yehsuh rox daengz yienghneix le, de couh mbouj caiq seizbienh youq dieg Youzdaiq byaij haem lo. De couh bae aen singz gaenh aen ndoi he, aen singz neix heuh Hijfazlenz he, bae mwnq caeuq gyoengq lwgsae youq.

⁵⁵ Youzdaiq vunz hih aen ciet Bienqgoqbae mwnq couh ij daengz lo. Gij vunz cungj daj lajmbanj bae Yehluqsajlaengj, cwnjbiq ij youq goq aen ciet neix cihsenz guh ndei gancengh ngiqsiz.

⁵⁶ Gij vunz daengz Yehluqsajlaengj le, cungj dauqcawq bae cimh Yehsuh, hoeng, cimh mbouj raen de. Gajlaeng gij vunz cungj youq gunghdenq Cangqdiq mwnq doxcam naeuz: “Mwngz raen baenzlaw yiengh hax; Yehsuh mbouj daeuj goq ciet lo mah?”

⁵⁷ Gizsaed mwhde doenghheij goengjsae dajbwiz caeuq doenghheij gaep haeuj Fazliqcaiq baij hih vunz cungj senqsi cix doiq gij vunz naeuz goq hauhnaeuz miz bouxlawz rox Yehsuh youq mwnqlaw hih, couh ij bauqgauq naeuz gyoengqde ni, hawj gyoengqde haemq ndei ndaej bae gaemh dawz de.