Yozhanq Saw 10 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh dwg boux ciengxyiengz ndei he

¹ Yehsuh caiq naeuz: “Gou saedsaeh naeuz sou ni, famz mbouj daj bak lanz yiengz haeuj bae, dauq dwg daj lingh gok byenz haeuj bae hih cungj dwg vunzcaeg, dwg caeggeq.

² Daj bak lanz yiengz haeuj bae hih couh dwg boux ciengx yiengz he.

³ Souj bakdou hih hoi dou hawj de, yiengz caemh dingq rox gij sing de. De ciuq coh heuh gyoengq yiengz de, daiq gyoengqde okbae.

⁴ De daiq gyoengq yiengz de okbae le, couh byaij youq gaxgonq daiq gyoengqde. Gyoengqde couh gaen de, aenvih gyoengqde dingq rox gij sing de.

⁵ Gyoengqde gaenhbaenj mbouj gaen gij vunzseng he; mbouj danhcij naeuz mbouj gaen, dauqfanj ij riq deuz, aenvih gyoengqde dingq mbouj rox gij sing de.”

⁶ Yehsuh gangj gij beijgangj neix naeuz gyoengqde ni, hoeng, gyoengqde gaenhbaenj mbouj rox de gangj hih dwg gijmaz iqswh.

⁷ Gajlaeng Yehsuh youhcaiq doiq gyoengqde naeuz: “Gou saedsaeh naeuz faenhsou ni, gou couh dwg bak lanz yiengz.

⁸ Famz daeuj gaxgonq gou hih cungj dwg vunzcaeg, cungj dwg caeggeq; yiengz caemh mbouj dingq gyoengqde.

⁹ Gou couh dwg bakdou; famz daj gou mwnqneix haeuj daeuj hih gaengjdingq ndaej gouq, caemh ndaej seizbienh haeuj ok, ndaej cimh miz nywj gw.

¹⁰ Caeggeq haeuj daeuj, dwg ij caeg, ij gaj, ij boqvaiq. Gou daeuj, dwg ij hawj vunz ndaej miz mingh; mbouj danhcij yienghneix, vanzlij hawj vunz saenghhoz ndaej ndei.

¹¹ “Gou dwg boux ciengxyiengz ndei he, dwg vih yiengz hwj sijndaej diuz mingh bonjfaenh hih.

^12-13 Beijgangj naeuz, boux ciengx yiengz mwnq mbouj dwg bouxcawj de, dwg vunz goq daeuj ciengx hih lah, yiengq, hauhnaeuz miz langz daeuj nex, [13]de gaengjdingq riq deuz, mbouj leix gyoengq yiengz, aenvih gyoengq yiengz mbouj dwg gyoengq yiengz de; de cijmboujgoq dwg boux goq daeuj ciengx yiengz he lah. [12b]Yienghmwnq yiengz gaengjdingq ngaiz langz gaemh dawz, caemh ngaiz boenq sanq deuz liux.

^14-15 “Gou dwg boux ciengxyiengz ndei he. [15a]Cingq luj boh rox gou, gou caemh rox boh. [14b]Caemh doxdoengz, gou rox gij yiengz gou, gij yiengz gou caemh rox gou. [15b]Gou nyienh'eiq vih gyoengqde hwj sijndaej diuz mingh gou.

¹⁶ Gou vanzlij miz yiengz mbouj youq ndaw lanz yiengz neix. Gou bietdingh ij daiq gyoengqde ma; gyoengqde caemh gaengjdingq ij dingq gij vah gou. Gou sojmiz hih yiengz cungj ij gyonj guh buek he, gvi hawj boux ciengx yiengz he.

¹⁷ “Boh aiq gou, aenvih gou sijndaej diuz mingh bonjfaenh gou, vih ij ndaej dauq aeu ma.

¹⁸ Mij'z vunz ndaej dued aeu diuz mingh gou; dwg gou gag sijndaej vwt lah. Gou miz gienz ndaej vwt, caemh miz gienz ndaej aeu dauqma. Gij neix dwg boh gou mingqlingq gou guh hih.”

¹⁹ Gij vunz Youzdaiq dingq gij vah neix le, caiq doxcwngq doxeuq hwnjdaeuj.

²⁰ Miz mbangj hih vunz naeuz: “Vihmaz ij dingq de nej? De ngaiz fangz doz he! Vangh lo!”

²¹ Caemh miz mbangj hih vunz naeuz: “Ngaiz fangz doz hih vunz mbouj rox gangj gij vah neix nej! Fangz ndaej yw rafangz ndei hajx?”

Yehsuh nginh bonjfaenh de dwg daeglwg Cangqdiq

^22-23 Miz baez he seizdoeng, [22]ngamqluj youq Yehluqsajlaengj miz aen ciet Hingqcuz Coih Gunghdenq Cangqdiq he. [23b]Yehsuh byaij goq gunghdenq Cangqdiq dih Sojlozmaenz soujlangz hih mwhde,

²⁴ gij vunz Youzdaiq daeuj gvaengz de, doiq de naeuz: “Mwngz ij hawj raeuz nanq mwngz geijlwh caez hax? Hauhnaeuz mwngz dwg Gihduz nex, couh naeuz raeuz ni bax!”

²⁵ Yehsuh dingq le, han naeuz: “Gou gaenq naeuz faenhsou ni goq lo, hoeng, faenhsou mbouj sinq. Gou hij gij coh daxboh gou ma soj guh hih saeh ndaej cingqmingz gou hah.

²⁶ Cijmboujgoq faenhsou mbouj dwg gij yiengz gou, sojhij faenhsou mbouj sinq gou.

²⁷ Gij yiengz gou dingq rox gij sing gou, gou caemh rox gyoengqde, gyoengqde caemh gaen gou.

²⁸ Gou hawj gyoengqde ndaej seiqseiz lix, yungjyenj mbouj rox rai; byawz cungj mbouj ndaej daj ndaw fawz gou dued aeu gyoengqde.

²⁹ Boux soengq gyoengqde hawj gou hih daxboh beij sojmiz hih veijdaq. Mij'z vunz ndaej daj ndaw fawz daxboh gou dued aeu gyoengqde.

³⁰ Gou caeuq boh caemhdangq dwg boux he.”

³¹ Gij vunz Youzdaiq dang lingjdauj he dingqri de yienghneix han naeuz le, couh aeu rin ma ij dub de rai.

³² Gajlaeng de couh cam gyoengqde naeuz: “Gou youq dangqnaj faenhsou guh baenx haujlai yiengh ndeisaeh, dwg daxboh hawj gou guh hih; mbouj rox hih faenhsou dwg vih yienghlaw hwj ij aeu rin ma dub gou?”

³³ Yiengq gyoengqde han naeuz: “Gyoengqraeuz mbouj dwg vih mwngz soj guh hih saeh hwj ij aeu rin ma dub mwngz nej, dauq dwg vih mwngz gangj gij vah daekcoih Cangqdiq he lah; mwngz cijmboujgoq dwg vunz hwj mah, dauq dawz bonjfaenh dangq guhbaenz Cangqdiq hwj lah!”

³⁴ Gajlaeng Yehsuh naeuz: “Gij saw fazliz faenhsou ndaw de mbouj dwg sij naeuz: ‘Gou naeuz goq faenhsou dwg cwnz’ mah?

³⁵ Yiengq, giqyienz Cangqdiq cungj naeuz doenghheij dingq daengz gij vah de hih vunz dwg cwnz vwz—gij vah ndaw Singqgingh couh mbouj ndaej duz bae lo—

³⁶ gangjnaeuz dwg gou hwx, gou couh dwg daxboh senj okdaeuj baij daeuj lajmbwn he. Gou gag naeuz gou dwg daeglwg Cangqdiq, faenhsou vihmaz ij naeuz gou daekcoih Cangqdiq nej?

³⁷ Yiengq, hauhnaeuz gou mbouj dwg guh gij saeh daxboh gou nex, faenhsou couh mboujyungh sinq gou hah.

³⁸ Hoeng, hauhnaeuz gou dwg guh gij saeh daxboh gou nex, cungjsuenq naeuz faenhsou mbouj sinq gou hwjx, caemh wnggai sinq gou soj guh hih saeh haj. Yienghneix faenhsou couh rox cingsuj, gou caeuq daxboh dwg dangq boux he; daxboh caeuq gou caemh dwg dangq boux he.”

³⁹ Gyoengqde dingq Yehsuh yienghneix naeuz le, couh ijsiengj gaemh dawz de, hoeng, de dauq ndaej ndoj deuz lo.

⁴⁰ Gajlaeng, Yehsuh couh bae diuz dah Yozdanq hih baixdoeng de, couh dwg mwnq gaxgonq Yozhanq youq mwnq sijlij hawj vunz hih mwnq youq.

⁴¹ Yiengq miz haujlai vunz bae de mwnq naeuz: “Gannaeuz Yozhanq mij guh gijmaz geizmiuj hih saeh lah, hoeng, de gangj gvanhhih boux vunz neix sojmiz hih saeh cungj dwg saedsaeh hih.”

⁴² Gajlaeng mwnq miz haujlai vunz cungj sinq Yehsuh.