Yozhanq Saw 1 - Gij Baujcingq Moq Caeuq Geij Bonj Gij Baujcingq Daeuzdaeuz

Gij vah Cangqdiq bienqbaenz boux miz lwed miz noh he

¹ Daj gaihcij mijyaengz cauh mbwn cauh deih haem, cix miz gij vah Cangqdiq lo. Miz Cangqdiq caemh miz gij vah de; gij vah de couh dangq dwg Cangqdiq lo.

² Gij vah neix daj gaihcij cix caeuq Cangqdiq youq lo.

³ Gij vah neix couh dangq dwg boux vunz he. Gwnzmbwn lajdeih sojmiz hih cungj dwg baengh boux de cauh okdaeuj he; mij saek yiengh naeuz mij dwg de cauh.

⁴ Boux neix couh dwg doenj mingh; gij mingh neix couh dwg rongh, ndaej ciuq vunz he.

⁵ Gij rongh neix ciuq haeuj laep bae; laep mbouj ndaej giengz goq gij rongh neix.

⁶ Cangqdiq baij boux he daeuj, gij coh de heuh Yozhanq,

⁷ baij de daeuj cingqmingz gij rongh neix, dwg ij hawj vunz dingq gij siuhsiz de hwj sinq gij rongh neix.

⁸ Hoeng Yozhanq bonjfaenh de mbouj dwg gij rongh neix nej, dauq dwg ij cingqmingz gij rongh neix lah.

⁹ Gij rongh neix dwg saedsaeh hih, de ij ciuq baenx cenz lajmbwn sojmiz hih vunz.

¹⁰ De cauh lajmbwn sojmiz hih, hoeng, de daeuj lajmbwn, lajmbwn hih vunz dauq mij rox de.

¹¹ De daeuj dieg bonjfaenh de, hoeng gij vunz bonjfaenh de dauq mij ciep de.

¹² Yiengq, hauhnaeuz miz vunz ciep de hih, couh dwg doengh boux sinq de he, doengh boux sinq de he de couh nyok gienz hawj doengh boux de, hawj gyoengqde miz gienz ndaej guh lwg Cangqdiq.

¹³ Guh lwg Cangqdiq hih vunz mbouj dwg ciuq swqyienz yienghmwnq seng daeuj hih, cixnaeuz dwg vunz caeuq vunz yienghmwnq miz lwed miz noh miz muengh hih yienghmwnq seng, dauq dwg baengh Cangqdiq ndaej seng daeuj hih lah.

¹⁴ Gij vah Cangqdiq bienqbaenz miz lwed miz noh hih vunz; de youq laeng gyoengqraeuz youq. Gyoengqraeuz yawjraen gij rongh de, gij veijdaq de; gij rongh neix couh dwg daeglwg dog Cangqdiq Bohmbwn cij ndaej he. De dwg sinq ndaej goq he, haijliengh raixcaix he, gig aiq vunz he.

Guh sijlij dih Yozhanq cingqmingz

¹⁵ Guh sijlij dih Yozhanq cingqmingz hawj de hih mwhde, hemq naeuz: “Boux neix couh dwg gaxgonq gou gangj goq hih: ‘De daeuj gajlaeng gou, hoeng beij gou veijdaq, aenvih de youq gaxgonq gou; baenjlaiz de gaenq miz lo.’”

¹⁶ De haijliengh raixcaix, cungj dwg aiq raeuz nyiuz raeuz, nyiuz mbat caiq mbat.

¹⁷ Cangqdiq dunghgoq Mohsih daeuj senhbuq fazliz, hoeng aiq caeuq saedsaeh dwg Yehsuh Gihduz, Cangqdiq baij daeuj dih vuengz, nyok hawj hih.

¹⁸ Coengzlaiz mij'z vunz ndaej raen goq Cangqdiq, ndaej rox Cangqdiq; caenhgag daeglwg dog de youq henz ndang de ndaej raen de goq. De hawj vunz ndaej rox Cangqdiq.

¹⁹ Laj neix dwg Yozhanq baenzlawz han vunz dih vah. Mwhde Youzdaiq vunz dih lingjdauj baij goengjsae dajbwiz caeuq Liqveiq cuz hih vunz daj Yehluqsajlaengj daeuj cimh Yozhanq, cam de naeuz: “Mwngz dwg byawz?”

²⁰ Hoeng Yozhanq it di cungj mbouj yo, couh doq han naeuz: “Gou mbouj dwg Gihduz.”

²¹ Gyoengqde dingq de yienghneix naeuz le, caiq cam naeuz: “Yiengq mwngz dwg byawz nex? Dwg Hijliqyaq haj?” Yozhanq dingq le, caiq han naeuz: “Mbouj dwg hah.” Gajlaeng gyoengqde youhcaiq cam naeuz: “Yiengq mwngz dwg boux cenz gij vah Cangqdiq mwnq haj?” Yozhanq youhcaiq han naeuz: “Caemh mbouj dwg.”

²² Gyoengqde dingq le, vanzlij caiq saemjcam naeuz: “Yiengq mwngz dauqdaej dwg byawz nex? Mwngz gag naeuz bax, naeuz raeuz ni, hawj raeuz haemq ndei maj naeuz doengh boux baij raeuz daeuj he ni.”

²³ Yozhanq dingq gij vah neix le, couh yungh gij vah Hijcaiqyaq boux cenz gij vah Cangqdiq neix ma doiq gyoengqde naeuz: “Gou couh dwg boux youq rogndoi hemq goggog naeuz: ‘Coih roen sohsoh hwj hawj Cangqdiq,’ hih boux mwnq lo.”

²⁴ Gajlaeng doengh boux baij daeuj mwnq ndaw de miz geij boux gaep haeuj Fazliqcaiq baij he

²⁵ couh cam de naeuz: “Giqyienz mwngz mbouj dwg Gihduz, cix mbouj dwg Hijliqyaq caeuq mbouj dwg boux cenz gij vah Cangqdiq mwnq vwz, mwngz miz maz swhgwz bang vunz sijlij nej?”

²⁶ Yozhanq dingq le, youhcaiq han naeuz: “Gou cijmboujgoq dwg aeu raemx ma sijlij hawj vunz lah; youq faenhsou mwnq miz boux he faenhsou mbouj rox de.

²⁷ Gannaeuz de daeuj gajlaeng gou lah, hoeng, daiqlienz gou bang de riuj haizcauj cungj mbouj boiqndaej hwx.”

²⁸ Mwhde gij saeh neix dwg youq diuz dah Yozdanq hih baixdoeng Mbanj Bwzdaqniz fatseng he; mwhde Yozhanq cingq youq mwnq bang vunz sijlij.

Cangqdiq dih yiengzlwg

²⁹ Gajlaeng, daengz daixngeih ngoenz, guh sijlij dih Yozhanq yawjraen Yehsuh byaij goqdaeuj, couh naeuz: “Neq, yawj hax, duz yiengzlwg Cangqdiq, couh dwg boux bang vunz rap coih hih boux mwnq,

³⁰ couh dwg gaxgonq gou naeuz goq: ‘Beij gou daeuj gajlaeng, hoeng de beij gou veijdaq, aenvih baenjlaiz de gaenq miz lo’ dih boux mwnq.

³¹ Gaxgonq gou gaenhbaenj mbouj rox de dwg guxmaz, hoeng seizneix gou daeuj aeu raemx ma hawj vunz sijlij dwg vih ij hawj de yienh okdaeuj hawj gij vunz Hijswzlez rox de lah.”

³² Yozhanq youhcaiq cingqmingz naeuz: “Gou raen Hoenzsaenz Cangqdiq luj duz roegguqgap yienghmwnq daj gwnzmbwn roengz daeuj doz youq gwnz ndang de.

³³ Gou gaenhbaenj mbouj rox de dwg guxmaz, hoeng boux baij gou daeuj hawj gou aeu raemx ma sijlij hawj vunz hih boux mwnq naeuz gou ni: ‘Mwngz raen Hoenzsaenz Cangqdiq roengz gwnz ndang bouxlawz bae nex, bouxlawz couh dwg yungh Hoenzsaenz Cangqdiq ma sijlij hawj vunz lo.’

³⁴ Yiengq gou gaenq raen goq lo, sojhij gou yiengq faenhsou baujcingq, de couh dwg daeglwg Cangqdiq lo.”

Daixit buek lwgsae

³⁵ Yiengq caiq goq ngoenz he, Yozhanq caeuq song boux lwgsae de youq mwnq sijlij mwnq.

³⁶ De raen Yehsuh byaij goqdaeuj le, couh naeuz: “Neq, boux mwnq couh dwg vih ij bang vunz rap coih hwj ngaiz rai hih duz yiengzlwg Cangqdiq lo.”

³⁷ Song boux lwgsae de dingq de yienghneix naeuz le, couh doq bae gaen Yehsuh.

³⁸ Yiengq Yehsuh rox song boux de gaen youq gajlaeng de le, couh veq goqma doiq song boux de naeuz: “Faenhsou ijsiengj guh gijmaz?” Song boux de dingq le, han naeuz: “Lahbij, mwngz youq mwnqlaw youq lah?” (‘Lahbij’ couh dwg ‘lauxsae’ dih iqswh.)

³⁹ Yehsuh han naeuz: “Faenhsou gaen gou bae yawj bax.” Song boux de dingq le, couh gaen de bae, siengj yawj de youq mwnqlaw youq. Mwhde daihgaiq dwg yaquj seiq diemjcung yienghneix; ngoenz mwnq song boux de cungj dwg gaen de youq baenxngoenz.

⁴⁰ Gajlaeng, song boux mwnq miz boux he, gij coh de heuh Anhdwzlez, dwg daegnuengx Sihmaenz-Bijdwz,

⁴¹ de couh majcangq bae cimh daeggo de Sihmaenz naeuz de ni naeuz: “Gyoengqraeuz ndaej raen Mizcaiqyaq hwj!” (‘Mizcaiqyaq’ couh dwg ‘Gihduz’ dih iqswh.)

⁴² De yienghneix naeuz le, vanzlij daiq daeggo de Sihmaenz bae laeng Yehsuh. Yehsuh raen le, couh cimyawj Sihmaenz naeuz: “Mwngz couh dwg Sihmaenz daeglwg Yozhanq laj; baezneix mwngz ij gaij coh heuh Gihfaz ndaej lo.” (‘Gihfaz’ caemh dwg ‘Bijdwz;’ gij iqswh de couh dwg ‘rin.’)

⁴³ Goq ngoenz he le, Yehsuh gyezdingq bae Gyahliqliq Saengj. Bae hih mwhde, dingjlingz nyangz Feihliz, yiengq de couh doiq Feihliz naeuz: “Daeuj, gaen gou bax.”

⁴⁴ Boux Feihliz neix dwg Mbanj Bwzcaiqdaq he, dwg caeuq Anhdwzlez caeuq Bijdwz doxcaemh mbanj he.

⁴⁵ Gajlaeng Feihliz caemh bae cimh Nazdanqnez, cimh de naeuz de ni naeuz: “Youq ndaw saw Mohsih caeuq ndaw saw doengh boux cenz gij vah Cangqdiq soj sij hih boux mwnq hax, gyoengqraeuz ndaej raen de hwj, couh dwg Yehsuh, daeglwg Yozswz; de dwg aen mbanj Nazsajlwz vunz he.”

⁴⁶ Nazdanqnez dingq le, couh naeuz: “Aen mbanj Nazsajlwz ij ndaej ok miz gijmaz ndei hwj?” Feihliz dingq le, han de naeuz: “Mwngz mbouj sinq, daeuj yawj veiq!”

⁴⁷ Song boux de yienghneix gangj le, couh byaij goq bae yawj Yehsuh. Couh youq mwh Yehsuh yawjraen Nazdanqnez byaij goq laeng de daeuj hih mwhde, de naeuz: “Neq, yawj veiq, boux mwnq cingqcaen dwg vunz Hijswzlez; de dwg boux lauxlaux saedsaed mij coemx vunz goq he.”

⁴⁸ Yiengq Nazdanqnez dingq Yehsuh yienghneix naeuz le, couh cam de naeuz: “Mwngz baeq rox gou hwj?” Yehsuh han naeuz: “Feihliz mijyaengz bae cimh mwngz haem gou cix raen mwngz youq laj go uzvahgoj lux.”

⁴⁹ Gajlaeng Nazdanqnez naeuz: “Ox! Lahbij! Mwngz dwg daeglwg Cangqdiq, dwg Hijswzlez dih vuengz!”

⁵⁰ Yehsuh dingq de yienghneix naeuz le, couh doiq de naeuz: “Gou naeuz gou raen mwngz youq laj go uzvahgoj goq, mwngz couh sinq laj? Baezneix mwngz ij raen gij beij gij saeh neix engqgya hung haem hwx.”

⁵¹ Yehsuh vanzlij caiq naeuz: “Gou saedsaeh naeuz sou ni lo, faenhsou gaengjdingq ndaej yawjraen aen dou mbwn hoi, bouxcai Cangqdiq ij youq gwnz ndang Vunz dih Daiqbiuj hwnjhwnj roengzroengz.”