Yozhanq It 5 - Gij Baujcingq Moq Caeuq Geij Bonj Gij Baujcingq Daeuzdaeuz

Giengz goq lajmbwn

¹ Famz sinq Yehsuh dwg Gihduz, Cangqdiq baij daeuj dih vuengz hih, cungj dwg lwg Cangqdiq. Aiq boh hih vunz caemh aiq lwg boh de.

² Hauhnaeuz gyoengqraeuz aiq Cangqdiq, caemh dingq gij vah de, yiengq gyoengqraeuz couh rox gyoengqraeuz aiq gij lwg de lo.

³ Dingq gij mingqlingq Cangqdiq couh dwg aiq Cangqdiq. Gij mingqlingq Cangqdiq mbouj dwg hawj vunz dingx mbouj ndaej,

⁴ aenvih lwg Cangqdiq cungj ndaej giengz goq lajmbwn sojmiz hih. Hawj gyoengqraeuz ndaej giengz goq lajmbwn hih couh dwg gyoengqraeuz hih sinq Gihduz dih sim.

⁵ Yiengq, byawz ndaej giengz goq lajmbwn nej? Mbouj dwg caenhgag sinq Yehsuh dwg daeglwg Cangqdiq hih cij ndaej giengz goq hih maz?

Cangqdiq cingqmingz daeglwg de

⁶ Boux Yehsuh Gihduz daeuj lajmbwn guh vunz neix, de dwg dunghgoq sijlij dih raemx caeuq rai dih lwed; de mbouj danhcij naeuz dunghgoq raemx, vanzlij dwg dunghgoq raemx caeuq lwed. Hoenzsaenz Cangqdiq caemh ndaej cingqmingz gij neix dwg saedsaeh he, aenvih Hoenzsaenz Cangqdiq couh dwg saedsaeh.

⁷ Ndaej cingqmingz gij neix hih miz sam cungj,

⁸ couh dwg Hoenzsaenz Cangqdiq, raemx caeuq lwed; sam cungj neix cungj dwg cingqmingz doxdoengz he.

⁹ Yiengq, giqyienz gyoengqraeuz cungj sinq gij cingqmingz vunz lo, gij cingqmingz Cangqdiq mbouj engqgya miz yungh haz, aenvih gij cingqmingz neix dwg Cangqdiq vih daeglwg de hwj cingqmingz hih.

¹⁰ Sojhij, byawz sinq daeglwg Cangqdiq, ndaw sim byawz couh sinq gij cingqmingz neix; byawz mbouj sinq Cangqdiq, couh dwg dangq naeuz Cangqdiq gangj gyajvah, aenvih de mbouj sinq gij cingqmingz Cangqdiq.

¹¹ Gij cingqmingz neix couh dwg: Cangqdiq nyok hawj gyoengqraeuz ndaej seiqseiz lix hih mingh; seiqseiz lix hih mingh dwg youz daeglwg de hawj he.

¹² Ndaw sim byawz miz daeglwg Cangqdiq hih, byawz couh miz gij mingh neix; byawz mbouj miz daeglwg Cangqdiq hih, byawz couh mbouj miz gij mingh neix.

Seiqseiz lix hih mingh

¹³ Gou sij doenghgij saeh neix naeuz faenhsou sinq daeglwg Cangqdiq hih vunz ni, hawj faenhsou rox faenhsou ndaej seiqseiz lix.

¹⁴ Cingq vih yienghneix, gyoengqraeuz youq dangqnaj Cangqdiq cungj dwg mbouj you mbouj heiq hih, couh dwg naeuz gyoengqraeuz rox, hauhnaeuz gyoengqraeuz ciuq gij cawjeiq de ma gouz nex, de couh dingq gyoengqraeuz lo.

¹⁵ Giqyienz gyoengqraeuz rox de dingq gyoengqraeuz soj gouz hih, yiengq gyoengqraeuz caemh rox gyoengqraeuz gouz de hih, de gaengjdingq soengq hawj raeuz.

¹⁶ Hauhnaeuz miz vunz raen beixnuengx famh coih mbouj daeng hab rai hih, couh ij bang de gouz Cangqdiq, Cangqdiq couh nyok mingh hawj boux de; hoeng doenghheij famh coih daeng hab rai hih, faenhsou couh mboujyungh vih de hwj gouz Cangqdiq lo.

¹⁷ Sojmiz mbouj deng dih saeh cungj dwg coih, hoeng caemh miz mbouj daeng hab rai hih coih.

¹⁸ Gyoengqraeuz rox gij lwg Cangqdiq mbouj dwg caenhrox famh coih hih, aenvih daeglwg Cangqdiq hen gyoengqde hwj, mbouj hawj Sajdanq, boux guh doeg guh sieb neix, haih gyoengqde.

¹⁹ Gyoengqraeuz rox, gannaeuz aen seiqgyaiq neix hih vunz cungj dwg ngaiz boux guh doeg guh sieb neix guenjciq lah, hoeng gyoengqraeuz mbouj ngaiz de guenjciq; gyoengqraeuz vanzlij dwg gij vunz Cangqdiq.

²⁰ Gyoengqraeuz rox daeglwg Cangqdiq gaenq daeuj lo. De vanzlij soengq coengjmingz hawj gyoengqraeuz, hawj gyoengqraeuz rox caen dih Cangqdiq. Gyoengqraeuz caemh dwg haeuj buek vunz caen dih Cangqdiq, caemh dwg haeuj buek vunz daeglwg de, Yehsuh Gihduz—de couh dwg caen dih cwnz, caemh dwg gij mingh mbouj rox rai he.

²¹ Lwg hax, faenhsou mbouj ndaej dep duz you!