Yozhanq It 3 - Gij Baujcingq Moq Caeuq Geij Bonj Gij Baujcingq Daeuzdaeuz

Gij lwg Cangqdiq

¹ Faenhsou yawj hux, Bohmbwn baenxlai aiq gyoengqraeuz, aiq daengz naeuz gyoengqraeuz suenq dwg lwg de bae—gizsaed gyoengqraeuz caemh dwg lwg de raix! Yiengq aen seiqgyaiq neix hih vunz vihmaz mbouj rox gyoengqraeuz nej? Dwg aenvih gyoengqde mbouj rox boh gyoengqraeuz, Cangqdiq.

² Cinhngaiq dih baengzyoux hax, seizneix gyoengqraeuz gaenq dwg lwg Cangqdiq lo, hoeng gyoengqraeuz lij mbouj rox guh lwg de ij baenzlaw yiengh; caenhgag rox daengj daengz mwh he, gyoengqraeuz couh ndaej luj de baenx ndei, aenvih gyoengqraeuz gaengjdingq ndaej raen de cingsuj.

³ Famz muengh ijsiengj luj de hih vunz cungj dwg gag gaij ndei, gaij luj de yienghmwnq ndei.

⁴ Famz famh coih hih couh dwg fanj Cangqdiq, aenvih coih couh dwg sauqfanj.

⁵ Faenhsou caemh rox, Yehsuh dwg mij'z coih hih. De daeuj lajmbwn dwg vih ij hawj vunz youq ndaw lwgra Cangqdiq bienqbaenz mij'z coih he.

⁶ Sojhij, doengh boux siengzseiz gaen de baengh de hih cungj mbouj famh coih; doengh boux caenhrox famh coih hih couh dwg mij raen de goq, caemh mbouj rox de goq.

⁷ Lwg hax, gaejyungh ngaiz vunz coemx; ndwn ndaej cingq hih vunz cij dwg vunz simndei simsoh, caemh luj Yehsuh yienghmwnq simndei simsoh.

⁸ Caenhrox famh coih hih couh dwg caemh buek fangzvuengz he, aenvih fangzvuengz daj gaihcij cix famh coih lo. Couh vih yienghneix, daeglwg Cangqdiq cij yienh okdaeuj, dwg ij boqvaiq fangzvuengz soj guh hih.

⁹ Lwg Cangqdiq dwg mbouj famh coih hih, aenvih gyoengqde miz gij singqciz Cangqdiq; giqyienz Cangqdiq dwg daxboh gyoengqde, gyoengqde couh mbouj famh coih.

¹⁰ Cangqdiq dih lwg caeuq fangzvuengz dih lwg dwg mbouj doxdoengz hih; doengh boux mbouj ndwn ndaej cingq hih, mbouj aiq gij beixnuengx bonjfaenh hih, couh mbouj dwg lwg Cangqdiq.

Gyoengqraeuz ij doxaiq

¹¹ Faenhsou daj gaihcij cix dingqri hih, couh dwg gyoengqraeuz ij caezgya doxaiq.

¹² Gyoengqraeuz mbouj ndaej luj Gaihyinj yienghmwnq. De dwg haeuj buek fangzvuengz he; de gajrai daegnuengx bonjfaenh. De vihmaz gaj daegnuengx de nej? Aenvih de guh doeg guh sieb, daegnuengx de dauq dwg guh soh guh ndei he.

¹³ Sojhij, gak boux beixnuengx hax, hauhnaeuz gij vunz haenq faenhsou nex, faenhsou gaejyungh geizheih.

¹⁴ Aenvih gyoengqraeuz aiq beixnuengx, sojhij couh rox gyoengqraeuz gaenq caeuq rai doxbiek, caeuq lix doxdep lo; doengh boux mbouj rox aiq he couh dwg vanzlij youq ndaw rai de.

¹⁵ Famz dwgcaengz gij beixnuengx bonjfaenh hih couh dangq gaj vunz; faenhsou caemh rox, famz gaj vunz hih couh mbouj ndaej seiqseiz lix.

¹⁶ Yehsuh Gihduz vih gyoengqraeuz rai. Aeu gij neix ma yawj, gyoengqraeuz couh rox gijmaz dwg aiq. Yiengq gyoengqraeuz caemh wnggai vih beixnuengx hwj sijndaej diuz mingh bonjfaenh.

¹⁷ Hauhnaeuz miz vunz raen beixnuengx miz nanh, de caemh guh ndaej daengz bang de hwj, hoeng de cungj mbouj leix mbouj langh hih, yiengq ij baenzlawz naeuz de dwg aiq Cangqdiq nej?

¹⁸ Lwg hax, gyoengqraeuz doxaiq mbouj dwg naeuz bak lai myaiz led; wnggai saedsaeh guh okdaeuj cij ndaej.

^19-20 Yienghneix gyoengqraeuz couh rox gyoengqraeuz dwg haeuj gij saedsaeh he lo. [20a]Cungjsuenq naeuz ndaw sim gyoengqraeuz gag gvaiq bonjfaenh hwjx, [19b]gyoengqraeuz youq dangqnaj Cangqdiq caemh roxnginh sim'onj hah, [20b]aenvih Cangqdiq beij aen sim gyoengqraeuz vanzlij ak; de yawj gijmaz cingx goq gingq bohliz bae.

²¹ Sojhij, cinhngaiq dih baengzyoux hax, hauhnaeuz gyoengqraeuz guh hih cungj dwg doiq ndaej hwnj aen liengzsim bonjfaenh hih, yiengq youq Cangqdiq mwnq gyoengqraeuz couh mij maz lau lo.

²² Yienghmwnq, mboujguenj gyoengqraeuz gouz de gijmaz, de cungj nyok hawj raeuz, aenvih gyoengqraeuz dingq gij vah de, guh gij hab'eiq habhoz de.

²³ Gij vah de couh dwg hawj gyoengqraeuz sinq daeglwg de Yehsuh Gihduz, ciuq de raengq hih yienghmwnq bae doxaiq.

²⁴ Byawz dingq gij vah Cangqdiq hih, byawz couh ndaej gaep haeuj buek Cangqdiq; Cangqdiq caemh caeuq de youq. Aenvih Cangqdiq soengq Hoenzsaenz de hawj gyoengqraeuz, sojhij gyoengqraeuz couh rox Cangqdiq caeuq gyoengqraeuz youq.