Yozhanq It 2 - Gij Baujcingq Moq Caeuq Geij Bonj Gij Baujcingq Daeuzdaeuz

Gaejyungh famh coih

¹ Cinhngaiq dih lwg gou hax, gou sij doenghgij saeh neix naeuz faenhsou ni dwg vihliux mbouj hawj faenhsou caiq famh coih. Hoeng, hauhnaeuz miz vunz famh coih nex, gyoengqraeuz miz Yehsuh Gihduz, boux mij'z coih neix, daeuj bang gyoengqraeuz, bang gyoengqraeuz youq dangqnaj Bohmbwn gangj vah.

² Yehsuh aeu rai ma cueg gij coih gyoengqraeuz. De mboujdanh caenhgag vih gyoengqraeuz cueg coih, vanzlij caemh vih baenx cenz lajmbwn hih vunz cueg coih.

³ Hauhnaeuz raeuz dingq gij vah Cangqdiq nex, couh suenq gyoengqraeuz gaenq rox de lo.

⁴ Hauhnaeuz miz vunz naeuz: “Gou rox Cangqdiq hwj!” hoeng boux de dauq mij dingq gij vah de, yiengq boux mwnq couh dwg boux gangj gyajvah he, ndaw sim de couh mbouj miz gij saedsaeh Cangqdiq.

⁵ Yiengq, hauhnaeuz miz vunz dingq gij vah Cangqdiq hih, couh dwg naeuz boux de caensim caen'eiq aiq Cangqdiq, caemh ndaej cingqmingz boux de dwg haeuj buek vunz Cangqdiq.

⁶ Sojhij, hauhnaeuz bouxlawz naeuz bonjfaenh de dwg haeuj buek vunz Cangqdiq hih, de couh ij hag Yehsuh.

⁷ Cinhngaiq dih baengzyoux hax, gou sij hawj faenhsou hih mbouj dwg gij mingqlingq moq law; dwg gij faenhsou dajlwh ngamqngamq gaihcij cix dingqri cix rox hih gij mingqlingq gaeuq hih lah.

⁸ Hoeng, gou vanzlij dwg dawz gij neix dangqbaenz gij mingqlingq moq he sij hawj faenhsou. Yienghneix yawj Yehsuh caeuq yawj faenhsou couh yawj ndaej ok gij vah Cangqdiq dwg saedsaeh hih, caemh rox rongh (couh dwg naeuz gij saedsaeh Cangqdiq) gaenq daengz lo; mbwn laep couh ij goq lo.

⁹ Hauhnaeuz miz vunz naeuz bonjfaenh de dwg youq mwnq rongh he, hoeng de vanzlij haemz doenghheij beixnuengx de, yiengq boux mwnq ciuqyiengh vanzlij suenq dwg youq mwnq laep he.

¹⁰ Aiq beixnuengx hih vunz, cij suenq dwg youq mwnq rongh he, cij mbouj miz gijmaz ndaej hawj de ngaiz laemx.

¹¹ Doengh boux haemz beixnuengx hih, couh dwg naeuz de vanzlij dwg boux byaij youq mwnq laep mbouj rox fuengyiengq he, aenvih cehra de yawjraen hih cungj dwg laep saengxsaengx, caenh lujnaeuz rafangz nwih.

¹² Lwg hax, gou sij saenq hawj faenhsou dwg aenvih faenhsou baengh Yehsuh hwj ndaej mienx coih lo.

¹³ Guh boh hih vunz hax, gou sij saenq hawj faenhsou dwg aenvih faenhsou rox boux daj gaihcij cix miz he hih. Hauxseng hih vunz hax, gou sij saenq hawj faenhsou dwg aenvih faenhsou gaenq giengz goq Sajdanq boux doegsieb neix lo. Lwg hax, gou sij saenq hawj faenhsou dwg aenvih faenhsou rox Bohmbwn.

¹⁴ Guh boh hih vunz hax, gou caemh sij saenq hawj faenhsou dwg aenvih faenhsou rox boux daj gaihcij cix miz hih. Hauxseng hih vunz hax, gou sij saenq hawj faenhsou dwg aenvih faenhsou ndwn ndaej cingq. Ndaw sim faenhsou siengzseiz caeng miz gij vah Cangqdiq; faenhsou caemh giengz goq Sajdanq boux doegsieb neix.

Gaejyungh aiq lajmbwn caeuq lajmbwn sojmiz hih

¹⁵ Faenhsou gaejyungh aiq lajmbwn caeuq lajmbwn sojmiz hih; hauhnaeuz faenhsou aiq nex, ndaw sim faenhsou couh mbouj aiq Bohmbwn lo,

¹⁶ aenvih famz dwg lajmbwn sojmiz hih—couh luj ndangnoh yienghmwnq siengjmuengh hah, ra yawjraen le siengjmuengh hah, caeuq vunz sojmiz hih rasang naemqnaeuz bonjfaenh ak raixcaix hih hah, doenghgij neix—cungj mbouj dwg Bohmbwn dih cawjeiq; dwg daj lajmbwn gag fat hih lah.

¹⁷ Aen seiqgyaiq neix caeuq sojmiz siengjmuengh hih, couh ij menhmenh byoeng lo. Caenhgag gij vunz ciuq gij cawjeiq Cangqdiq bae guh hih mbouj ngaiz byoeng, ndaej seiqseiz lix hoh lo.

Boux caeuq Gihduz doxngig

¹⁸ Lwg hax, lajmbwn couh ij daengz ngoenz gatsat hih lo. Faenhsou gaenq dingqri naeuz goq boux caeuq Yehsuh Gihduz doxngig hih boux mwnq ij daeuj, hoeng seizneix gaenq miz haujlai boux caeuq de doxngig hih daeuj lo, sojhij gyoengqraeuz rox lajmbwn dih ngoenz gatsat couh ij daengz lo.

¹⁹ Doenghgij vunz neix mbouj dwg gaep buek vunz raeuz law. Hauhnaeuz dwg gaep buek vunz raeuz nex, couh mbouj daj ndaw gyoengqraeuz ok bae lo; daj ndaw gyoengqraeuz ok bae hih, couh mbouj suenq dwg gij vunz raeuz lo.

²⁰ Faenhsou gaenq ndaej Gihduz soengq hawj hih Hoenzsaenz Cangqdiq lo, sojhij, faenhsou cungj rox gij saedsaeh de.

²¹ Gou sij saenq hawj faenhsou, mbouj dwg naeuz vih faenhsou mbouj rox gij saedsaeh Cangqdiq, dauq dwg vih faenhsou cungj rox gij saedsaeh de, caemh rox sojmiz gyaj hih mbouj dwg daj ndaw saedsaeh de ok daeuj.

²² Yiengq, byawz dwg boux gangj gyajvah he nej? Mbouj dwg boux mbouj nginh Yehsuh dwg Gihduz, Cangqdiq baij daeuj hih vuengz hih maz? Mbouj nginh Bohmbwn caeuq mbouj nginh daeglwg de hih, couh dwg boux caeuq Gihduz doxngig he lo.

²³ Famz mbouj nginh daeglwg Bohmbwn hih, couh dwg mbouj haeuj buek vunz Bohmbwn lo; nginh daeglwg Bohmbwn hih, couh dwg haeuj buek vunz Bohmbwn lo.

²⁴ Sojhij faenhsou ij dawz gij daj gaihcij cix dingqri dih gij siuhsiz mwnq geiq youq ndaw sim. Hauhnaeuz ndaw sim faenhsou siengzseiz cungj caeng miz gij daj gaihcij cix dingqri hih gij siuhsiz mwnq nex, faenhsou couh ndaej caeuq Yehsuh caeuq boh de Cangqdiq caemh buek vunz he lo.

²⁵ Gij neix couh dwg de baujcingq hawj raeuz dih seiqseiz lix hih lo.

²⁶ Gou sij doenghgij saeh neix naeuz faenhsou ni dwg ceij doenghheij vunz ij coemx faenhsou hih lah.

²⁷ Hoeng gangj daengz faenhsou, Yehsuh gaenq dawz Hoenzsaenz Cangqdiq nyok hawj faenhsou lo, hawj de doz youq gwnz ndang faenhsou; sojhij faenhsou couh mboujyungh hawj vunz son faenhsou lo, aenvih de dawz sojmiz hih saeh cungj son faenhsou, caemh cungj dwg son gij saedsaeh he, mbouj dwg son gij gyaj he. Sojhij faenhsou couh ij ciuq de son, siengzseiz gaen de.

²⁸ Lwg hax, faenhsou ij siengzseiz baengh Yehsuh gaen Yehsuh cij ndaej. Yienghmwnq, daengj daengz de caiq yienh okdaeuj hih mwhde, gyoengqraeuz couh miz sinqsim, couh mbouj miz maz mboujeiqseiq lo.

²⁹ Giqyienz faenhsou rox de ndwn ndaej cingq he, yiengq faenhsou couh ij wnggai rox, ndwn ndaej cingq hih vunz cungj dwg lwg Cangqdiq.