Yajgoz Saw 4 - Gij Baujcingq Moq Caeuq Geij Bonj Gij Baujcingq Daeuzdaeuz

Mbouj ndaej yawjnaek aen seiqgyaiq neix

¹ Faenhsou doxceng doxdaeuq dwg coengz maz daeuj hih nej? Mbouj dwg daj ndaw sim faenhsou soj muengh soj damsim mbouj rox gaeuq hih maz?

² Faenhsou damsim, siengjmuengh ndaej faenhsou siengj aeu he, hoeng dam mbouj ndaej, muengh mbouj ndaej, couh rahoengz, doxdub doxhangz, simqciq doxgaj. Gizsaed mboujguenj faenhsou baenzlaw, cungj mbouj ndaej gijmaz, aenvih faenhsou mbouj gouz Cangqdiq.

³ Caiq cungjsuenq naeuz faenhsou gouz Cangqdiq hwjx, caemh ciuqyiengh mbouj ndaej law, aenvih faenhsou soj gouz hih cungj dwg vih bonjfaenh faenhsou hih doenghheij yalw siengjmuengh angqangq yangjcouq yangjcouq he lah.

⁴ Doenghheij mbouj gaen Cangqdiq luj guhyoux hih faenhsou hax! Nanzdauh faenhsou mbouj rox, aiq aen seiqgyaiq neix hih couh dwg caeuq Cangqdiq miz haemzcaeuz lo maz? Sojhij, hauhnaeuz faenhsou byawz siengj gaen aen seiqgyaiq neix hih nex, couh dwg Cangqdiq dih dizyinz lo.

⁵ Cingq luj ndaw Singqgingh ndaw de soj sij hih: Cangqdiq soengq hawj raeuz hih Hoenzsaenz, de siengsim raeuz gaen aen seiqgyaiq neix; de muengh raeuz caenhgag gaen de. Gawq neix faenhsou naemqnaeuz dwg gangj guxcaemz hih mah?

⁶ Sojhij de engqgya aiq raeuz bang raeuz, couh luj ndaw Singqgingh ndaw de soj sij hih: Cangqdiq fanjdeiq gij vunz rasang he, dauq bang gij vunz mbouj rasang he.

⁷ Sojhij faenhsou ij dingq Cangqdiq, ij caeuq Sajdanq fangzvuengz doxngig doxdingj; yienghmwnq fangzvuengz couh daj henz ndang faenhsou deuz lo.

⁸ Faenhsou ij wnggai siengzseiz ngeix daengz Cangqdiq, mbouj yiem Cangqdiq, yiengq Cangqdiq couh daeuj dep faenhsou gvansim faenhsou lo. Doenghheij famh coih hih vunz hax, faenhsou wnggai gaij goqma mbouj guh vaihsaeh; doenghheij yaepyaep yuekyuek siengj gaen Cangqdiq hoeng caiq siengj gaen aen seiqgyaiq neix hih vunz hax, faenhsou wnggai gaij gij siengjfap faenhsou, mbouj ndaej siengzseiz ngeix daengz aen seiqgyaiq neix.

⁹ Gou naeuz sou ni hax, faenhsou mbouj wnggai vih aen seiqgyaiq neix hwj riuriu angqangq, dauq ij vih faenhsou mbouj ndaej guh daengz hab'eiq habhoz Cangqdiq hwj ienqienq youyou daejdaej, siengsim siengsim cij deng.

¹⁰ Faenhsou ij wnggai gag roxnginh bonjfaenh mbouj boiqndaej bouxcawj raeuz dih aiq, yienghmwnq, bouxcawj raeuz couh ndaej hawj faenhsou najrongh lo.

Mbouj ndaej gangj vunz vaihvah

¹¹ Gak boux beixnuengx hax, faenhsou mbouj ndaej youq boihlaeng gangj vunz vaihvah. Hauhnaeuz byawz naeuz beixnuengx cixnaeuz youq boihlaeng gangj beixnuengx vaihvah hih, couh dangq naeuz gij fazliz hawj raeuz aiq vunz caemh ij luj aiq bonjfaenh hih diuz gveihdingq neix loek lo. Yiengq, hauhnaeuz faenhsou naeuz fazliz mbouj deng, couh dwg naeuz faenhsou yawj mbouj hwnj fazliz, mbouj ciuq fazliz bae guh lo.

¹² Caenhgag Cangqdiq cij ndaej laeb fazliz caeuq cij ndaej saemjbuenq vunz; couh dwg naeuz caenhgag de cij ndaej gouq vunz caeuq cij ndaej cawz vunz. Hoeng, mwngz dwg byawz nex, gingqyienz gamj gag bingzbuenq vunz nex?

Mbouj ndaej bonjfaenh gag gyezdingq

¹³ Hawjm'z yawj hux, faenhsou miz hih vunz naeuz: “Ox, ngoenzneix haj cixnaeuz ngoenzcog raeuz ij bae aen singz he, youq mwnq youq bi he guh seng'eiq lauh ngaenz.”

¹⁴ Gizsaed gou naeuz sou ni hax, faenhsou gaenhbaenj mbouj rox faenhsou ngoenzcog baenzlaw yiengh. Faenhsou cijmboujgoq luj fwdfauz yienghmwnq, goq yaep he, couh siu liux lo. Lij ij gangj ak guxmaz nex?

¹⁵ Gizsaed faenhsou wnggai naeuz: “Hauhnaeuz bouxcawj raeuz nyienh'eiq, mbouj hawj gyoengqraeuz rai, hawj gyoengqraeuz lix nex, gyoengqraeuz couh ndaej guh gaiq dawz gaiq, guh yiengh dawz yiengh lo.”

¹⁶ Hoeng faenhsou gingqyienz cungj gag cej byongjbyongj naeuz bonjfaenh ak raixcaix. Doegdoeg siebsieb hih vunz cij gangj doenghgij vah neix.

¹⁷ Sojhij, gou naeuz sou ni, hauhnaeuz miz vunz rox gijlaw wnggai guh, hoeng de dauq mij bae guh, yiengq de couh dwg famh coih lo.