Yajgoz Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Ij guenj ndei conghbak bonjfaenh

¹ Gak boux beixnuengx hax, faenhsou mbouj wnggai bouxboux cungj ijsiengj guh goengjsae son gij vah Cangqdiq, aenvih faenhsou caemh gag rox Cangqdiq saemjbuenq boux son vunz hih dwg yiemz hih.

² Gizsaed gyoengqraeuz siengzseiz cungj guh loek. Yiengq, hauhnaeuz miz byawz ndaej gag guenj ndei conghbak bonjfaenh, mbouj doeng gangj sae gangj gij mbouj hab gangj he hih, boux de couh dwg boux vunz ndei liuxliux he lo; boux de caemhdangq ndaej gag guenj ndei bonjfaenh lo.

³ Caiq hauhnaeuz gyoengqraeuz siengj hawj duz max he dingq vah, cijaeu mwngz dawz diuz giengmax coengq haeuj ndaw bak duz de bae, couh ndaej cijveih de hawj de dingq vah lo.

⁴ Faenhsou yawj hux, aen ruz hung hux hung, caenhgag rumz hung cij ndaej ci bae lah, hoeng cijaeu miz vunz dawz dihgij dox iq he youq baixlaeng cijveih, couh ndaej ciuq vunz dih cawjeiq goq mwnqlaw mwnqlaw bae lo.

⁵ Caemh doxdoengz, diuz linx gannaeuz iq lah, hoeng, ndaej hawj conghbak vunz ndau vahvah cungj ndaej. Couh luj ceh saizhoj he; gannaeuz ceh de iq lah, hoeng ndaej cwt dawz baenx aen ndoengfaex liux.

⁶ Gou naeuz sou ni hax, diuz linx caemhdangq feiz; gij feiz neix caemh dwg Sajdanq diemj dawz hih. Gannaeuz diuz de youq gwnz ndang vunz ciemq dihdi he lah, hoeng ndaej cauh ok baenx geijlwh cungj doegdoeg siebsieb, cenz baenx boux vunz liux, ndaej boqvaiq baenx boux vunz dih saenghhoz.

⁷ Hawjm'z yawj hux, lajmbwn hih doengh duz cukseng hah, doengh duz roeg mbin hah, doengh duz vuenz he hah, doengh duz ndaw raemx youz hah, vunz cungj ndaej guenjciq gyoengqde.

⁸ Hoeng gangj daengz diuz linx conghbak, vunz dauq mij saek boux ndaej gag guenj ndei; gizsaed diuz linx caenhrox ndau mbouj dingz, daiq doegsieb lai, cungj dwg haih vunz he.

⁹ Hawjm'z yawj hux, gyoengqraeuz yungh conghbak bonjfaenh ma haenh bouxcawj raeuz, Cangqdiq Bohmbwn, caemh gag yungh conghbak bonjfaenh ma mang gij vunz Cangqdiq ciuq bonjfaenh de ma cauh okdaeuj he.

¹⁰ Gak boux beixnuengx, gou naeuz sou ni hax, haenh caeuq mang cungj dwg doengz conghbak he daj conghbak he ok daeuj, daiq mbouj wnggai lo.

¹¹ Caemhdangq naeuz doengz caemh aen mboq he, ndaej danh ok raemx diemz caeuq raemx haemz okdaeuj maz?

¹² Go uzvahgoj ndaej dawz makmbi maz? Go buzdauz ndaej dawz uzvahgoj haz? Mboq raemx ndaengq mbouj ok raemx diemz.

Cangqdiq nyok hawj dih coengjmingz

¹³ Gou naeuz hax, faenhsou miz byawz naeuz bonjfaenh dwg coengjmingz, roxsoq hih, couh mbouj wnggai rasang; wnggai soh semxsemh, wnggai guh gij saeh cingqcuek he cij deng.

¹⁴ Yiengq, hauhnaeuz faenhsou rahoengz vunz, caenh rox daengz bonjfaenh mbouj rox daengz vunz hih, couh mbouj ndaej naeuz bonjfaenh dwg coengjmingz, roxsoq he lo; hauhnaeuz faenhsou naeuz, couh dwg gangj gyajvah, couh dwg ngig saedsaeh.

¹⁵ Luj yienghneix hih coengjmingz roxsoq mbouj dwg Cangqdiq nyok hawj hih nej, dauq dwg haeuj gij vunz lajmbwn, haeuj doenghgij miz lwed miz noh hih, haeuj fangz yak he lah.

¹⁶ Famz mwnqlaw miz rahoengz caeuq caenh rox daengz bonjfaenh mij rox daengz vunz hih, mwnqlaw couh miz luenh caeuq gak cungj vaihsaeh.

¹⁷ Caenhgag Cangqdiq nyok hawj hih coengjmingz, cijyauq dwg hawj vunz lauxsaed, vanzlij miz haenj bingzan hah, soh semxsemh hah, roxsoq hah, rox nyiuz vunz hah, guh ndeisaeh hah, mbouj yawj vunz guh saeh hah, mbouj guh gyaj hah.

¹⁸ Hawj vunz doxhuz doxndei hih vunz, de guh okdaeuj hih saeh couh ndaej hawj haujlai vunz ndwn ndaej cingq.