Yajgoz Saw 2 - Gij Baujcingq Moq Caeuq Geij Bonj Gij Baujcingq Daeuzdaeuz

Mbouj ndaej yawj vunz guh saeh

¹ Gak boux beixnuengx hax, giqyienz gyoengqraeuz dwg lwgsae najrongh dih bouxcawj raeuz Yehsuh Gihduz vwz, yiengq couh mbouj ndaej yawj vunz guh saeh lo.

² Beijgangj naeuz miz boux vunz fouq he, gwnz fawz de daenj miz haedfawz gim hwj caemh daenj buh gyaeugyaeu ndeindei hwj haeuj ndaw veiqdangz faenhsou bae. Yiengq caemh miz boux vunz gungz he, gij buh de vaih vadvad, caemh haeuj ndaw veiqdangz faenhsou bae.

³ Yiengq, hauhnaeuz faenhsou riu veujveuq hwj doiq boux vunz fouq mwnq naeuz: “Daeuj, cingj mwngz naengh mwnq daixdaeuz neix,” doiq boux vunz gungz mwnq dauq naeuz: “Mwngz couh ndwn youq mwnq bax!” cixnaeuz doiq de naeuz: “Naengh youq henz daengq gak ha gou bax!”

⁴ Hauhnaeuz dwg yienghneix nex, couh dwg naeuz faenhsou yawj vunz guh saeh, luj doenghheij ndwn mbouj cingq hih saemjbuenqguenh yienghmwnq lo.

⁵ Gak boux beixnuengx hax, cingj faenhsou dingq gou naeuz sou ni: Cangqdiq senj doenghheij vunz vunz yawj gyoengqde dwg vunz gungz hih okdaeuj, hawj gyoengqde sinq Gihduz raixcaix, caemh hawj gyoengqde ndaej gaep haeuj aen guek de; aen guek de dwg de baujcingq hawj gij vunz aiq de he.

⁶ Hoeng, faenhsou dauq yawj doenghgij vunz gungz neix ngawz. Gizsaed, hangz faenhsou haep faenhsou, rag faenhsou bae fazdingz hih dauq dwg doenghgij vunz fouqmiz ngaenz he lah!

⁷ Bangjlaih Yehsuh Gihduz, boux senj faenhsou neix, caemh dwg gyoengqde!

⁸ Hauhnaeuz faenhsou ndaej guh daengz luj ndaw Singqgingh ndaw de soj sij dih gij veijdaq dih fazliz “Aiq vunz caemh ij luj aiq bonjfaenh” yienghneix nex, couh baenz lo.

⁹ Hoeng, caiq hauhnaeuz faenhsou yawj vunz guh saeh hih, faenhsou couh dwg famh coih lo, aenvih faenhsou famh fazliz.

¹⁰ Mboujguenj byawz famh fazliz hih diuz he, yiengq de couh dangq famh fazliz sojmiz hih lo.

¹¹ Cingq luj Cangqdiq naeuz: “Mbouj ndaej guhyoux,” caemh naeuz: “Mbouj ndaej gaj vunz.” Yiengq cungjsuenq naeuz mbouj guhyoux hwjx, hoeng dauq bae gaj vunz, yiengq ciuqyiengh dwg famh fazliz.

¹² Yiengq, giqyienz faenhsou ij souh daengz gij fazliz ndaej hawj vunz swqyouz mwnq dih saemjbuenq vwz, faenhsou soj gangj hih soj guh hih cungj ij hab gij fazliz hawj vunz swqyouz neix.

¹³ Hauhnaeuz faenhsou doiq vunz youqgaenj, yiengq Cangqdiq saemjbuenq faenhsou caemh youqgaenj; hoeng, faenhsou doiq vunz mbouj youqgaenj sim'unq, Cangqdiq saemjbuenq faenhsou caemh sim'unq, sojhij faenhsou gaejyungh lau.

Sinq caeuq guh

¹⁴ Gak boux beixnuengx hax, hauhnaeuz miz vunz gag naeuz bonjfaenh de sinq Cangqdiq, hoeng dauq mij guh gijmaz ndeisaeh okdaeuj ndaej cingqmingz de sinq, yiengq miz maz yungh; gag naeuz sinq couh ndaej gouq bonjfaenh mah?

¹⁵ Caemhdangq naeuz faenhsou raen miz boux beixnuengxlaw mij'z gw mij'z daenj lo,

¹⁶ caemh rox naeuz: “Muengh mwngz bingzan! Muengh mwngz gw ndaej imq, daenj ndaej raeuj hwj,” hoeng, dauq mij bae bang de, mij hawj de ij gw ij yungh he, yiengq miz maz yungh nej?

¹⁷ Caemh doxdoengz, caenhgag naeuz sinq, sinq, sinq, hoeng dauq mij guh saek yiengh ndeisaeh, yiengq caemh daengjhih lingz.

¹⁸ Yiengq, ciuq luj yienghneix ma gangj, gaengjdingq ij miz vunz naeuz: “Mwngz naeuz mwngz sinq, hoeng mwngz caemh mij guh gijmaz ndeisaeh okdaeuj hah; gou mij naeuz gou sinq, hoeng, gou dauq guh ndeisaeh hah. Yiengq mwngz naeuznaeuz yawj dwg bouxlawz sinq lux?”

¹⁹ Mwngz sinq naeuz Cangqdiq cijngamq miz boux Cangqdiq dog. Deng hah, mwngz naeuz ndaej deng hah; hoeng mwngz caenhgag sinq mbouj miz yungh hah, aenvih daiqlienz fangz yak cungj caemh sinq miz boux Cangqdiq dog hah, caemh vanzlij lau de haem hwx.

²⁰ Gij vunz ngawz faenhsou hax! Faenhsou mbouj rox caenhgag naeuz sinq hoeng mij guh ndeisaeh hih dwg mij'z yungh hih mah?

²¹ Gou naeuz sou ni hax, cojgoeng raeuz Yaqbwzlahhanj dawz daeglwg de Hijsaj ma guh gij dajbwiz hwj coengq hwnj gwnz daiz dajbwiz bae bwiz Cangqdiq; nanzdauh de mbouj dwg vih guh gij saeh neix hwj ndaej youq ndaw lwgra Cangqdiq suenq dwg boux mij'z coih hih haz?

²² Faenhsou yawj hux, de yienghneix guh couh ndaej cingqmingz naeuz de sinq hah. Sojhij ciuq luj yienghneix ma yawj, de cix sinq cix guh; sinq caeuq guh doxbangbouj. Vih guh hwj ndaej suenq sinq liuxliux.

²³ Yiengq cingq lingz ok ndaw Singqgingh ndaw de sij naeuz: Aenvih Yaqbwzlahhanj sinq Cangqdiq, yiengq de couh ndaej youq ndaw lwgra Cangqdiq suenq dwg boux mij'z coih he hih vunz. Couh vih yienghneix, de caemh ndaej suenq dwg gij baengzyoux Cangqdiq.

²⁴ Sojhij, ciuq luj yienghneix ma yawj, Cangqdiq yawj vunz suenq dwg boux mij'z coih he hih vunz, dwg yawj boux de soj guh hih lah; mbouj dwg vih boux de gag naeuz de sinq law.

²⁵ Caemh doxdoengz, Lahhoz dah guh lauxgawj neix, aenvih de bang song boux Hijswzlez vunz, hawj song boux de ndoj youq ndaw ranz de, gajlaeng, caiq soengq song boux de goq daixlingh diuz roen okbae, couh vih yienghneix hwj, Cangqdiq couh yawj de suenq dwg boux mij'z coih he dih vunz.

²⁶ Caemhdangq naeuz, aen ndangdaej mbouj miz hoenzsaenz hih, aen de caemhdangq rai lo; caemh doxdoengz, sinq, hwng mbouj guh, caemh daengjhih lingz.