Ok Ngaihgiz 9 - Gij Baujcingq Moq Caeuq Geij Bonj Gij Baujcingq Daeuzdaeuz

Rairaq

¹ Yehhozvaz youhcaiq doiq Mohsih naeuz: “Mwngz bae laeng goengjvuengz, naeuz de ni, naeuz: ‘Yehhozvaz, Hihbwzlaiz vunz dih Cangqdiq, yienghneix naeuz: “Coengq gij vunz gou okma, hawj gyoengqde bae baiq gou.

² Hauhnaeuz mwngz ngengh mbouj coengq gyoengqde okma nex,

³ Yehhozvaz couh ij coengq nanh hawj gij doenghduz cukseng mwngz lo, couh dwg sojmiz dih max hah, lawz hah, lozdoz hah, cwz hah, yiengz hah, hawj doengh duz de rairaq bae.

⁴ Hoeng, Yehhozvaz caemh dawz gij cukseng gij vunz Hijswzlez ciengx hih caeuq gij vunz Ngaihgiz ciengx hih cukseng gek okdaeuj; Hijswzlez vunz ciengx hih cukseng it duz cungj mbouj ngaiz rai.”’”

⁵ Yehhozvaz caiq naeuz: “Gou gaenq dingh cizgyenh lo, couh dwg ngoenzcog. Ngoenzcog gou couh ij guh gienh saeh neix lo.”

⁶ Yehhozvaz gangj daengz guh daengz; ngoenz daixngeih, de couh guh gienh saeh neix lo. Gij vunz Ngaihgiz sojmiz dih doengh duz cukseng cungj ngaiz rairaq dawz, rai liux, hoeng, gij vunz Hijswzlez hih doengh duz cukseng mij ngaiz rai saek duz.

⁷ Yiengq goengjvuengz baij vunz bae damqdingq yawjyawj, cij rox naeuz gij vunz Hijswzlez hih doengh duz cukseng it duz cungj mij ngaiz rai. Hoeng, aen sim goeng de ciuqyiengh vanzlij gyeng vanzlij akeuq, mbouj gaengj coengq gij vunz Hijswzlez okma.

Baenz baeznok

⁸ Yehhozvaz caiq raengq Mohsih caeuq Yaqlwnz naeuz: “Faenhsou daj ndaw yiuz aeu geij gaem daeuh ma. Aeu ma le, Mohsih guh youq dangqnaj goengjvuengz vanq gij daeuh neix hwnj gwnzmbwn bae.

⁹ Doenghgij daeuh neix caemh ij luj boenqcingh ityiengh sanqsa youq cenz Ngaihgiz, seiq lengq seiq miz. Gij boenq neix baex bungq dawz vunz caeuq doengh duz cukseng, vunz caeuq doengh duz cukseng cungj ngaiz baenz baez baenz nok.”

¹⁰ Yehhozvaz yienghneix raengq le, gyoengqde couh ciuq de raengq hih yienghmwnq bae aeu daeuh ma, bae daengz dangqnaj goengjvuengz. Mohsih couh dawz gij daeuh vanq hwnj gwnzmbwn bae. Gij daeuh doek roengz gwnz ndang vunz caeuq doengh duz cukseng bae, gyoengqde couh ngaiz baenz baeznok.

¹¹ Ngaihgiz dih doengh bouxsien cungj mij banqfaz ndaej daeuj daengz dangqnaj Mohsih, aenvih gyoengqde caemh luj sojmiz hih Ngaihgiz vunz ityiengh hwnj baenx ndang baeznok.

¹² Hoeng, caemh luj Yehhozvaz doiq Mohsih naeuz goq hih yienghmwnq, de hawj aen sim goengjvuengz gyeng luj diet nwih, caiq akeuq, mbouj gaengj dingq gij vah Mohsih caeuq Yaqlwnz.

Byagcaej

¹³ Yehhozvaz raengq Mohsih naeuz: “Ngoenzcog doengxhaet daihcaeux, mwngz bae laeng goengjvuengz naeuz de ni naeuz: ‘Yehhozvaz, Hihbwzlaiz vunz dih Cangqdiq, naeuz yienghneix: “Coengq gij vunz gou okma, haemq ndei hawj gyoengqde bae baiq gou.

¹⁴ Hoeng, gou gaenq rox, mwngz gaengjdingq mbouj coengq gij vunz gou okma, sojhij mbat neix gou couh dawz sojmiz dih nanh cungj coengq hawj mwngz caeuq gyoengq gaen henz ndang mwngz, vanzlij caeuq gyoengq beksingq mwngz laem. Yiengq mwngz cij rox, youq lajmbwn mij saek boux ndaej beij gou.

¹⁵ Hauhnaeuz gou gaenq yungh ndaek cungj gaeuq doeg gaeuq sieb hih doenghheij bingh yalw mwnq ma haih mwngz caeuq gij beksingq mwngz nex, mwngz caeuq gij beksingq mwngz yaengz senqsi rairaeg raicied haz!

¹⁶ Hoeng, gou mij hawj mwngz rai, vih ij hawj mwngz rox gou ak dangqmaz, caemh sawj gij coh gou riengzmingz baenx cenz lajmbwn.

¹⁷ Hoeng, mwngz vanzlij naemqnaeuz bonjfaenh mwngz cungj ak raixcaix, mbouj fug coengq gij vunz gou okma.

¹⁸ Daengj daengz ngoenzcog dih mwhneix, mwngz couh rox lo, gou couh hawj gij byagcaej doek roengzma. Dajlwh laeb aen guek Ngaihgiz daengz seizneix, coengzlaiz mijyaengz miz byagcaej baenx hung, baenxlai youqgaenj goq.

¹⁹ Seizneix mwngz ij baij vunz bae duq doenghheij doengh duz cukseng haeuj ndaw ranz ma, caeuq dawz ndaw reihnaz sojmiz dih sou haeuj ranz ma. Hauhnaeuz youq ndaw reihnaz mbouj haeuj ma hih, mboujguenj vunz haj cixnaeuz doengh duz cukseng caeuq doxgaiq cungj ij ngaiz byagcaej dub dawz byaeu liux bae.”’”

²⁰ Gajlaeng Mohsih bae doiq goengjvuengz gangj doenghgij vah neix hih mwhde, gyoengq gaen henz ndang goengjvuengz miz mbangj hih vunz dingqri Yehhozvaz dih gij vah neix le, cungj lau liux, couh hawj gyoengq hoiq caeuq doengh duz cukseng haeuj ranz ma.

²¹ Hoeng, caemh miz mbangj hih vunz mbouj dawz haeuj rwz gij vah Yehhozvaz, hawj gyoengq hoiq caeuq gyoengq doengh duz cukseng de youq ndaw reihnaz, cungj mij hawj gyoengqde haeuj ranz ma haem.

²² Yehhozvaz caiq doiq Mohsih naeuz: “Mwngz dawz diuz faexbien yinx hwnj gwnzmbwn bae, yiengq baenx cenz Ngaihgiz cungj miz byagcaej doek roengzma, dub dawz gij vunz Ngaihgiz caeuq doengh duz cukseng caeuq ndaw reihnaz sojmiz hih doenghgo.”

²³ Mohsih caemh ciuq Yehhozvaz gangj hih yienghmwnq bae guh, yinx diuz faexbien hwnj gwnzmbwn bae. Yehhozvaz couh hawj byajmyig, byajraez, byajcek caeuq byagcaej doek roengzma, doek roengz Ngaihgiz sojmiz dih dieg.

²⁴ Byajmyig, byajraez, byagcaej mbouj dingz; byagcaej doek hwj yungyiemj raixcaix, dajlwh laeb guek doxdaeuj, coengzlaiz mijyaengz miz goq.

²⁵ Byagcaej dub roengz sojmiz hih dieg Ngaihgiz. Sojmiz youq ndaw reih, ndaw naz, rogndoi mbouj sou haeujma hih doenghgo, daiqlienz faex caeuq vunz caeuq doenghduz youq rog he mbouj haeuj ma ranz hih cungj dub dawz liux.

²⁶ Caenhgag gij vunz Hijswzlez soj youq hih dieg Gohsanh mij ngaiz byagcaej dawz hoh lo.

²⁷ Yiengq, goengjvuengz couh hawj vunz bae heuh Mohsih caeuq Yaqlwnz daeuj, couh doiq gyoengqde naeuz: “Mbat neix gou famh coih lo. Gou caeuq gij beksingq gou cungj dwg yakrwix he; Yehhozvaz cij dwg deng he.

²⁸ Raeuz dingx mbouj ndaej ciengz byagcaej, byajraez, byajmyig neix lo. Cingj faenhsou gouz Yehhozvaz, gou couh coengq faenhsou okmaj, mbouj caiq hawj faenhsou youq mwnqneix youq lo.”

²⁹ Gajlaeng Mohsih han de naeuz: “Gou baex ok singz couh yingx fawz hwnjdaeuj gouz Yehhozvaz. Gouz le, byajmyig, byajraez couh dingz, caiq mbouj roengz byagcaej laem lo. Yienghneix mwngz cij rox naeuz lajmbwn cungj dwg Yehhozvaz hih.

³⁰ Hoeng, gou caemh rox mwngz caeuq gyoengq gaen henz ndang mwngz caeuq gij beksingq mwngz vanzlij mbouj lau Yehhozvaz, raeuz dih Cangqdiq.”

³¹ Mwhde, gomaz gaenq hoi va, cungj mienhhung haemq caeux gaenq ok riengz lo, cungj ngaiz byagcaej dub dawz yungz liux.

³² Hoeng, cungj mienh'iq caeuq cungj mienhco haemq laeng, mij ngaiz dub dawz.

³³ Gajlaeng Mohsih couh dajlaeng goengjvuengz ok singz bae, couh yingx fawz hwnjdaeuj gouz Yehhozvaz. Yiengq, byajmyig hah, byajraez hah, byagcaej hah, fwn hah caemh dingz lo.

³⁴ Yiengq goengjvuengz raen fwn hah, byajmyig hah, byajraez hah dingz lo, byagcaej caemh mbouj doek laem lo le, de caeuq gyoengq gaen henz ndang de aen sim youhcaiq gyeng hwnjdaeuj, caemhcaiq akeuq,

³⁵ caemh luj Yehhozvaz doiq Mohsih soj gangj dih yienghmwnq lo, mbouj gaengj coengq gij vunz Hijswzlez okma.