Ok Ngaihgiz 8 - Gij Baujcingq Moq Caeuq Geij Bonj Gij Baujcingq Daeuzdaeuz

Duz goep

¹ Yehhozvaz caiq doiq Mohsih naeuz: “Mwngz bae laeng goengjvuengz Ngaihgiz, doiq de naeuz: ‘Yehhozvaz yienghneix naeuz: “Coengq gij vunz gou okma, hawj gyoengqde bae baiq gou.

² Hauhnaeuz mwngz mbouj gaengj coengq gyoengqde okma, gou couh ij hawj aen guek mwngz dauqcawq cungj miz goep.

³ Diuz dah Nizloz cenznaengz cungj dwg goep liux. Doenghheij goep neix ij haeuj ndaw gunghdenq mwngz, ndaw rug mwngz, gwnz congz mwngz, daiqlienz gyoengq gaen henz ndang mwngz caeuq gyoengq beksingq mwngz dih ndaw ranz de bae. Dauqcawq cungj miz goep vuenz; gyoengqde vuenz haeuj ndaw cauq hah, ndaw buenz gaenx mienh hah bae,

⁴ simqciq diuq hwnj gwnz ndang gyoengq gaen henz ndang mwngz caeuq gij beksingq mwngz bae.”’”

⁵ Yehhozvaz caiq doiq Mohsih naeuz: “Naeuz Yaqlwnz ni, hawj de dawz diuz faexbien yinx haeuj sojmiz dih dah hah, rij hah, mieng hah, ceijguq hah, caeuq daemz hah bae, hawj gij goep ok daeuj, cenz Ngaihgiz sojmiz dih dieg cungj miz hwj.”

⁶ Yiengq Yaqlwnz couh dawz diuz faexbien yinx haeuj sojmiz dih raemx bae. Gij goep couh diuq hwnjdaeuj; cenz Ngaihgiz hih dieg cungj vuenz miz rim bae.

⁷ Ngaihgiz hih doengh bouxsien mwnq caemh loengh hawj miz goep ok daeuj.

⁸ Gajlaeng, goengjvuengz heuh Mohsih caeuq Yaqlwnz daeuj naeuz: “Cingj faenhsou bang gou gouz Yehhozvaz, hawj de boenq doenghheij goep neix dajlaeng gou caeuq dajlaeng doenghgij vunz gou deuz bae. Gou couh coengq doenghgij vunz Hijswzlez, hawj gyoengqde bae bwiz Yehhozvaz lo.”

⁹ Mohsih han naeuz: “Caih mwngz aiq. Mwngz dingh cizgyenh bax. Gou nyienh'eiq bang mwngz caeuq gyoengq gaen henz ndang mwngz hah, gij beksingq mwngz hah gouz Cangqdiq, gouz de hawj gij goep cungj rai liux, caenhgag hawj ndaw dah Nizloz vanzlij miz.”

¹⁰ Gajlaeng goengjvuengz naeuz: “Couh ngoenzcog bax.” Mohsih caemh han naeuz: “Ndaej hah, ndaej ciuq gij vah mwngz bae guh hah. Yienghmwnq ndaej hawj mwngz rox, mij'z byawz ndaej beij Yehhozvaz, raeuz dih Cangqdiq;

¹¹ de ndaej hawj gij goep deuz ok mwngz hah, vangzgungh hah, gyoengq gaen henz ndang mwngz hah, caeuq gij beksingq mwngz hah, caenhgag ndaej youq ndaw dah Nizloz lah.”

¹² Gangj daengz dineix sat le, Mohsih caeuq Yaqlwnz couh dajlaeng goengjvuengz ok ma. Mohsih couh vih Yehhozvaz baij gij goep daeuj hawj goengjvuengz souh mbouj ndaej mwnq gouz Yehhozvaz, hawj de cawz gij goep mwnq bae.

¹³ Yiengq Yehhozvaz couh ciuq Mohsih gouz hih yienghmwnq bae guh lo, couh hawj doenghgij goep youq ndaw ranz hah, daxhongh hah, ndaw naz hah cungj rai liux bae lo.

¹⁴ Gij vunz Ngaihgiz couh dawz gij goep rai dong hwnjdaeuj, dong hwj baenx dong baenx dong, guh hwj Ngaihgiz cenz guek cungj haeu saengxsaengx liux, hoj mup ij rai bae.

¹⁵ Hoeng, goengjvuengz de baex raen ndaw guek de gij goep cungj rai liux lo, raen haemq rwnh le, de caemh luj Yehhozvaz gaxgonq soj gangj dih yienghmwnq, aen sim de youhcaiq gyeng caiq akeuq hwnjdaeuj lo, mbouj caiq dingq gij vah Mohsih caeuq Yaqlwnz laem lo.

Duz raeu

¹⁶ Yehhozvaz youhcaiq doiq Mohsih naeuz: “Mwngz naeuz Yaqlwnz ni, naeuz hawj de dawz diuz faexbien moeb roengz gij boenqcingh lajdoem bae, hawj gij boenqcingh cungj bienqbaenz duz raeu liux bae.”

¹⁷ Yiengq gyoengqde couh yienghneix guh lo; Yaqlwnz couh dawz diuz faexbien moeb roengz gij boenqcingh lajdoem bae. Moeb le, cenz Ngaihgiz sojmiz dih boenqcingh cungj bienqbaenz duz raeu liux, gwnz ndang vunz caeuq gwngz ndang doengh duz cukseng cungj vuenz hwj rim bae.

¹⁸ Ngaihgiz dih doengh bouxsien mwnq caemh ijsiengj guhbienq duz raeu, hoeng bienq mbouj ndaej okdaeuj. Mwhmwnq sojmiz dih vunz caeuq doengh duz cukseng dih gwnz ndang cungj cenznaengz raeu, vuenz hwj rim bae.

¹⁹ Yiengq Ngaihgiz dih doengh bouxsien mwnq couh doiq goengjvuengz naeuz: “Gij neix dwg Cangqdiq guh he!” Hoeng, caemh luj Yehhozvaz naeuz goq hih yienghmwnq, aen sim goengjvuengz cienfanh gyeng cienfanh akeuq he, gyeng luj diet nwih, mbouj gaengj dingq Mohsih caeuq Yaqlwnz dih vah.

Nengznyaen

²⁰ Yehhozvaz caiq doiq Mohsih naeuz: “Ngoenzcog doengxhaet daihcaeux, goengjvuengz bae henz dah Nizloz. Yiengq mwngz caemh ij bae daengz henz dah Nizloz cimh de, doiq de naeuz: ‘Yehhozvaz yienghneix naeuz: “Coengq gij vunz gou okma, hawj gyoengqde ndaej bae baiq gou.

²¹ Hauhnaeuz mwngz mbouj coengq gij vunz gou okma nex, gou couh hawj baenx raq baenx raq nengznyaen mbin hwnj gwnz ndang mwngz hah, gyoengq gaen henz ndang mwngz hah, gij beksingq mwngz hah bae. Ranzranz hohhoh cungj miz, comz hwj rim bae; cenz Ngaihgiz dauqcawq cungj miz, nana netnet bae.

²² Hoeng, gij vunz gou soj youq hih dieg Gohsanh, dauqfanj mbouj miz. Gou yienghneix guh dwg hawj mwngz rox gou dwg youq dineix fazveih gij gienzveih gou dih Yehhozvaz.

²³ Daengz mwhmwnq, gou caemh ij dawz gij vunz gou caeuq gij beksingq mwngz faengek okdaeuj. Cungj geizmiuj ndaej bienq neix, ngoenzcog couh raen lo.”’”

²⁴ Couh yienghneix, gajlaeng Yehhozvaz couh hawj baenx buek baenx buek baenx raq baenx raq nengznyaen mbin haeuj ndaw vangzgungh goengjvuengz caeuq gyoengq gaen henz ndang de hih ndaw ranz de bae. Ngaihgiz cenz guek dauqcawq cungj dwg nengznyaen, guh hawj vunz cungj souh mbouj ndaej bae,

²⁵ guh hwj goengjvuengz heuh Mohsih caeuq Yaqlwnz daeuj bae. Goeng de doiq gyoengqde naeuz: “Bae bax, faenhsou couh youq ndaw guek gou bwiz boux Cangqdiq faenhsou bax.”

²⁶ Mohsih dingq le han naeuz: “Yienghneix guh nwjhwh ndaej hwj? Aenvih gyoengqraeuz dawz hih doengh duz cukseng daeuj bwiz Yehhozvaz, raeuz dih Cangqdiq, cungj dwg Ngaihgiz vunz soj dwgcaengz hih doengh duz cukseng, dwg famh gyoengqde hih. Hauhnaeuz gyoengqraeuz dawz gij gyoengq Ngaihgiz vunz dwgcaengz dih doengh duz cukseng daeuj youq dangqnaj gyoengqde guh gij dajbwiz nex, yiengq gyoengqraeuz mijyaengz ngaiz gij vunz Ngaihgiz aeu rin ma ndek rai haz?

²⁷ Gyoengqraeuz ij bae rogndoi cij ndaej, ij byaij sam ngoenz dih roen, caemh bietdingh ij ciuq Yehhozvaz, raeuz dih Cangqdiq, raengq raeuz hih yienghmwnq bae bwiz de cij ndaej.”

²⁸ Gajlaeng goengjvuengz naeuz: “Gou bihcwnj hawj faenhsou bae rogndoi bwiz Yehhozvaz, sou dih Cangqdiq, hoeng faenhsou mbouj ndaej bae baenqlai gyae. Faenhsou caemh ij bang gou gouz Cangqdiq.”

²⁹ Mohsih han naeuz: “Gou ok bae couh gouz Yehhozvaz, gouz de ngoenzcog couh hawj gij nengznyaen dajlwh laeng mwngz hah, gyoengq gaen henz ndang mwngz hah, gij beksingq mwngz hah deuz bae. Hoeng, mwngz mbouj ndaej caiq coemx gyoengqraeuz laem lo; mbouj ndaej mbouj hawj gyoengqraeuz bae bwiz Yehhozvaz hoh.”

³⁰ Yiengq Mohsih couh dajlaeng goengjvuengz ok bae gouz Yehhozvaz.

³¹ Yehhozvaz couh ciuq Mohsih gouz hih yienghmwnq bae guh lo. Gij nengznyaen couh dajlwh laeng goengjvuengz hah, gyoengq gaen henz ndang de hah, gyoengq beksingq de hah, deuz okbae; it duz cungj mbouj lw laem lo.

³² Hoeng, mbat neix aen sim goengjvuengz ciuqyiengh vanzlij gyeng vanzlij akeuq, mbouj coengq gij vunz Hijswzlez okma.