Ok Ngaihgiz 7 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Yehhozvaz dingq le, caiq doiq Mohsih naeuz: “Gou ij hawj mwngz youq dangqnaj goengjvuengz luj gou, Cangqdiq yienghneix, caemh hawj daeggo mwngz Yaqlwnz guh boux bang mwngz cenz gij vah mwngz he.

² Mwngz ij dawz gou raengq mwngz sojmiz dih vah caiq youz daeggo mwngz Yaqlwnz bae naeuz goengjvuengz ni, naeuz hawj de coengq gij vunz Hijswzlez dajlwh mwnq dieg de okma.

³ Hoeng, gou caemh ij hawj goengjvuengz simgyeng caemh akeuq; mboujguenj gou loengh baenx geijlai geizmiuj dih saeh, de vanzlij dwg mbouj dingq gij vah mwngz.

⁴ Yiengq gou couh yungh gij bonjsaeh gou ma fad gij vunz Ngaihgiz, fad hawj gyoengqde ij rai ij lix bae. Gajlaeng, gou couh daiq gij vunz Hijswzlez gou luj bing yienghmwnq baizdeiq hwj cingjcingj cizciz dajlwh mwnq dieg mwnq daiq okma.

⁵ Youq mwh gou yungh gij bonjsaeh gou ma fad gij vunz Ngaihgiz, caiq daiq gij vunz Hijswzlez dajlwh laeng gyoengqde daiq okma dih mwhmwnq, gyoengqde couh rox naeuz gou dwg Yehhozvaz.”

⁶ Yiengq Mohsih caeuq Yaqlwnz caemh ciuq Yehhozvaz raengq gyoengqde hih yienghmwnq bae guh lo.

⁷ Mwh gyoengqde caeuq goengjvuengz gangj dih mwhmwnq, Mohsih ndaej betcib bi, Yaqlwnz ndaej betcib sam bi.

Diuz faexbien Mohsih bienq ngwz

⁸ Gajlaeng, Yehhozvaz caiq doiq Mohsih caeuq Yaqlwnz naeuz:

⁹ “Hauhnaeuz goengjvuengz hawj faenhsou guhbienq yiengh geizmiuj he okdaeuj cingqmingz faenhsou dwg bouxlawz nex, Mohsih, mwngz couh hawj Yaqlwnz dawz diuz faexbien gveng youq dangqnaj goengjvuengz hwj, diuz faex couh gag bienqbaenz duz ngwz lo.”

¹⁰ Yiengq Mohsih caeuq Yaqlwnz couh bae laeng goengjvuengz. Gyoengqde caemh ciuq Yehhozvaz mingqlingq hih yienghmwnq bae guh lo; Yaqlwnz caemh dawz diuz faexbien vwt youq dangqnaj goengjvuengz caeuq gyoengq gaen henz ndang de. Diuz faexbien mwnq couh majcangq bienqbaenz duz ngwz he lo.

¹¹ Goengjvuengz raen yienghneix le, caemh majcangq youq ndaw vangzgungh de heuh doengh bouxsien rox coengqfap hah, boux rox guhbienq doeng yiengh sae yiengh he hah daeuj, hawj gyoengqde daeuj guhbienq luj gyoengq Mohsih guhbienq hih yienghmwnq.

¹² Gyoengqde daeuj le, caemh dawz diuz faexbien gyoengqde gveng roengz doem bae, yiengq diuz faexbien gyoengqde caemh bienq duz ngwz. Hoeng, diuz faexbien Mohsih engqgya gyan diuz faexbien gyoengqde roengzbae.

¹³ Gannaeuz ngaiz yienghneix lah, hoeng aen sim goengjvuengz vanzlij gyeng caiq akeuq dangqmaz, caemh luj Yehhozvaz gaxgonq naeuz goq dih yienghmwnq, mbouj gaengj dingq gij vah Mohsih caeuq Yaqlwnz.

Raemx bienqbaenz lwed

¹⁴ Yehhozvaz doiq Mohsih naeuz: “Goengjvuengz Ngaihgiz nga'ngangq raixcaix, mbouj nyienh coengq gij vunz gou okma.

¹⁵ Haetcog goengjvuengz ij bae henz dah Nizloz. Mwngz caemh ij bae henz dah Nizloz cimh de. Ndaw fawz mwngz caemh ij dawz diuz faexbien rox bienq ngwz goq mwnq bae.

¹⁶ Yiengq mwngz couh ij doiq de naeuz: ‘Yehhozvaz, Hihbwzlaiz vunz dih Cangqdiq, baij gou daeuj naeuz mwngz ni, ij hawj mwngz coengq gij vunz de okma, gyoengqde couh ndaej bae daengz rogndoi baiq de. Hoeng, mwngz itcig cungj mbouj dingq.

^17-18 Mwngz yawj veiq, gou ij yungh diuz faex neix ma moeb gij raemx dah neix; gij raemx dah neix couh ij bienqbaenz lwed. [18]Gij bya ndaw dah cungj ij rai liux bae, gij raemx caemh haeu hwj ij rai, guh hwj gij vunz Ngaihgiz cungj lau gw diuz dah neix bae. [17a]Yiengq mwngz couh rox naeuz de dwg Yehhozvaz lo.’”

¹⁹ Yehhozvaz caiq doiq Mohsih naeuz: “Mwngz ij naeuz Yaqlwnz ni, hawj de dawz diuz faexbien de, yinx haeuj Ngaihgiz sojmiz dih dah hah, rij hah, mieng hah, ceijguq hah, caeuq daemz hah, hawj sojmiz hih raemx cungj bienqbaenz lwed liux bae. Cenz guek dauqcawq cungj dwg lwed, simqciq daiqlienz ndaw doengj raemx, ndaw gang raemx cungj caemh bienq lwed liux.”

²⁰ Yiengq Mohsih caeuq Yaqlwnz caemh ciuq Yehhozvaz raengq hih yienghmwnq bae guh, youq dangqnaj goengjvuengz caeuq gyoengq gaen henz ndang de couh yingx hwnj diuz faex de couh moeb roengz dah bae, yiengq sojmiz dih raemx dah couh majcangq bienqbaenz lwed lo.

²¹ Gij bya ndaw dah caemh majcangq rai liux lo, gij raemx de caemhcaiq haeu saengxsaengx liux. Gij vunz Ngaihgiz mbouj caiq ndaej gw gij raemx neix lo. Youq Ngaihgiz seiq lengq seiq dwg lwed liux.

²² Gajlaeng, goengjvuengz hih doengh bouxsien, couh dwg boux rox coengqfap hah, boux rox bienq doeng yiengh sae yiengh he hah, caemh doengzyiengh hawj gij raemx bienqbaenz lwed, caemh luj Yehhozvaz soj gangj dih yienghmwnq, goengjvuengz vanzlij baenxlai nga'ngangq, mbouj gaengj dingq gij vah Mohsih caeuq Yaqlwnz.

²³ De dauqfanj maj ndaw vangzgungh, caemh mbouj dawz gienh saeh neix coengq youq ndaw sim,

²⁴ guh hwj cenz Ngaihgiz dih vunz vih mbouj ndaej gw gij raemx ndaw dah Nizloz, cungj gag vat henz dah guh mboq hwj cij ndaej aeu gij raemx de ma gw.

²⁵ Dajlwh Yehhozvaz yienghneix doh diuz dah neix le, gij cainanh neix lienzdaemh baenx caet ngoenz.