Ok Ngaihgiz 6 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Yiengq Yehhozvaz couh doiq Mohsih naeuz: “Mwngz couh ijvanh yawjraen gou baenzlawz soujsib goengjvuengz lo. Gou ij yungh gij rengz, gij ak gou ma yaz de, ep de coengq gyoengqde okma, mbouj danhcij naeuz coengq okma, vanzlij ep de boenq gyoengqde ok mwnq dieg de ma.”

Cangqdiq raengq Mohsih

² Cangqdiq caiq doiq Mohsih naeuz: “Gou dwg Yehhozvaz.

³ Gou doenghbaez yienh hawj Yaqbwzlahhanj, Hijsaj caeuq Yajgoz raen hih cungj dwg akak rengzrengz gaiqgaiq cungj ndaej guh daengz dih Cangqdiq, hoeng, gij coh Yehhozvaz gou, gou cungj mij hawj gyoengqde rox goq.

⁴ Gou caeuq gyoengqde dingh goq, ij dawz gyoengqde doz youq goq dih dieg Gyahnamz soengq hawj gyoengqde.

⁵ Gou caemh dingqri gij vunz Hijswzlez youq Ngaihgiz souh daengz gij vunz Ngaihgiz bwkhaih le gangz naek gangz nanh daejdanq dih sing. Gou nej, gou caemh mbouj lumz gou doiq gyoengqde baujcingq goq hih vah.

⁶ “Sojhij, mwngz ij dawz gij vah gou naeuz gij vunz Hijswzlez ni, naeuz: ‘Gou dwg Yehhozvaz. Gou ij daj gij vunz Ngaihgiz yaz hawj faenhsou dih diuz rap naek neix daiq faenhsou okma, dajlwh ndaw diuz lienh suj faenhsou mwnq gouq faenhsou okma. Gou ij yungh gij bonjsaeh miz gienz gou ma fad hawj gyoengqde ij rai ij lix bae ma cueg faenhsou.

⁷ Gou ij dawz faenhsou dangqguh gij beksingq bonjfaenh gou, gou caemh guh faenhsou dih Cangqdiq. Yienghneix faenhsou couh rox naeuz gou dwg Yehhozvaz, faenhsou dih Cangqdiq, dwg dajlwh laj diuz rap naek gij vunz Ngaihgiz yaz hawj faenhsou mwnq daiq faenhsou okma he dih Cangqdiq.

⁸ Gou ij daiq faenhsou bae daengz gou gaxgonq baujcingq soengq hawj Yaqbwzlahhanj, Hijsaj caeuq Yajgoz dih mwnq dieg mwnq, soengq hawj faenhsou aeu ma guh gyadangq. Gou dwg Yehhozvaz.’”

⁹ Yiengq Mohsih couh dawz doenghgij vah neix naeuz gij vunz Hijswzlez ni, hoeng, gyoengqde gaenhbaenj mbouj dingq gij vah de, aenvih gyoengqde ciencien fanhfanh dwgrengz sinhoj, caenh lij saijhoz yaengz gat hoh lo, sawjhawj gyoengqde cungj saetsim liux lo.

¹⁰ Gajlaeng, Yehhozvaz caiq doiq Mohsih naeuz:

¹¹ “Mwngz bae naeuz goengjvuengz Ngaihgiz ni, naeuz de bietdingh ij coengq gij vunz Hijswzlez ok dieg Ngaihgiz ma.”

¹² Yiengq Mohsih han naeuz: “Gij vunz Hijswzlez cungj mbouj dingq gij vah gou, goengjvuengz baenzlawz dingq gou nej? Baenzlawz dingq conghbak ngawz ngadngad gou nej?”

¹³ Hoeng, vih ij hawj gij vunz Hijswzlez dajlwh dieg Ngaihgiz ok ma, Yehhozvaz ngengh ij hawj Mohsih caeuq Yaqlwnz dauq bae daengz gij vunz Hijswzlez caeuq goengjvuengz Ngaihgiz mwnq, hawj song boux de doiq gyoengqde caeuq goengjvuengz naeuz, song boux de ij daiq gij vunz Hijswzlez ok Ngaihgiz ma.

Yaqlwnz caeuq Mohsih dih gyabouh

¹⁴ Laj neix geiq miz Hijswzlez minzcuz dih mbangj aen cuz dih cuzcangj: Daeglwg daeuz Hijswzlez Lijbenq dih lwg dwg Hahnoz, Fazluq, Hihswhlwnz caeuq Gyahmij. Gyoengqde couh dwg Lijbenq cuz.

¹⁵ Daeglwg ngeih Hijswzlez Sihmenj dih lwg dwg Yehmujliq, Yajminj, Ayaz, Yajginh, Sojyaz caeuq Saujloz. Daxmeh Saujloz dwg lwgsau Gyahnamz vunz. Gyoengq neix couh dwg Sihmenj cuz.

¹⁶ Laj neix geiq miz daeglwg sam Hijswzlez Liqveiq dih doengh daih gajlaeng de: Gyoengq lwg Liqveiq couh dwg Gwzswnq, Gohyaz caeuq Mijlahliq. Liqveiq de souh ndaej daengz itbak samcib caet bi.

¹⁷ Gij lwg Gwzswnq couh dwg Lizniz caeuq Siqmeij.

¹⁸ Gyoengq lwg Gohyaz dwg Amqlanz, Hijswhhah, Hihbwzlwnz caeuq Uhceh. Gohyaz de souh ndaej daengz itbak samcib sam bi.

¹⁹ Gij lwg Mijlahliq dwg Mazliq caeuq Mujsiq. Gyoengq neix couh dwg Liqveiq dih doengh daih gajlaeng de.

²⁰ Lan Liqveiq Amqlanz gag aeu daxgo bonjfaenh de Yozgihbez ma guh yah. De seng miz Yaqlwnz caeuq Mohsih. Amqlanz de souh ndaej daengz itbak samcib caet bi.

²¹ Gyoengq lwg Hijswhhah dwg Gojlah, Nizfeih caeuq Siqgihliq.

²² Gyoengq lwg Uhceh dwg Mijcahliq, Hijliqsajfanj caeuq Sihdizliq.

²³ Yaqlwnz aeu Hijliqcahbah ma guh yah. Hijliqcahbah dwg dah lwgsau Yaqmijnazdaz, dwg dahnuengx Nazswnq. De seng miz Nazdaz, Yaqbijhuq, Hijliqyaqsaj caeuq Hijdahmaj.

²⁴ Gyoengq lwg Gojlah dwg Yaqsiz, Hijliqgyahnaz caeuq Yaqbijyaqsaj. Gyoengqde dwg Gojlah cuz dih gak aen gyahcuz dih cojgoeng.

²⁵ Daeglwg Yaqlwnz Hijliqyaqsaj laeng Bujdez aeu dah lwgsau he ma guh yah. De seng miz Feihnizhah. Doengh gyoengq gwnz neix cungj dwg Liqveiq cuz dih cuzcangj, cungj dwg ciuq baenx aen gya baenx aen gya ma baiz he.

²⁶ Yaqlwnz caeuq Mohsih song boux neix couh dwg Yehhozvaz mingqlingq song boux de goq, naeuz: “Bae daiq gyoengq Hijswzlez minzcuz dih gak aen cuz, baenx buek baenx buek daiq ok Ngaihgiz ma!” dih song boux mwnq lo.

²⁷ Bae doiq goengjvuengz Ngaihgiz naeuz ij daiq gij vunz Hijswzlez dajlwh Ngaihgiz daiq okma dih couh dwg Mohsih caeuq Yaqlwnz.

Cangqdiq hawj Yaqlwnz bang Mohsih gangj vah

²⁸ Caiq gangj daengz Yehhozvaz doiq Mohsih naeuz hih,

²⁹ de naeuz: “Gou dwg Yehhozvaz! Mwngz bae dawz gou caeuq mwngz soj gangj dih vah naeuz goengjvuengz Ngaihgiz ni liux bae.”

³⁰ Hoeng Mohsih han naeuz: “Mwngz caemh rox gou dwg boux mbouj rox gangj vah he dih vunz; goengjvuengz baenzlawz dingq gij vah gou nej?”