Ok Ngaihgiz 4 - Gij Baujcingq Moq Caeuq Geij Bonj Gij Baujcingq Daeuzdaeuz

Cangqdiq soengq bonjsaeh hawj Mohsih

¹ Gajlaeng Mohsih han naeuz: “Gyoengqde gaengjdingq mbouj sinq gou, caemh mbouj dingq gij vah gou. Gyoengqde gaengjdingq naeuz: ‘Yehhozvaz gaenhbaenj mij yienh hawj mwngz raen goq.’”

² Yiengq Yehhozvaz cam Mohsih naeuz: “Ndaw fawz mwngz dawz hih dwg gijmaz lah?” Mohsih han naeuz: “Dwg diuz faexbien duq yiengz he.”

³ Yehhozvaz caiq naeuz: “Mwngz dawz de vwt roengz lajdoem bae.” Yiengq Mohsih couh dawz diuz faexbien neix vwt roengz lajdoem bae. Diuz faexbien neix couh doq majcangq bienqbaenz ndaek duz ngwz he. Mohsih raen le, couh nyungjnyat diuq deuz.

⁴ Yehhozvaz vanzlij caiq doiq de naeuz: “Mwngz majcangq gaemh dawz diuz rieng de.” Mohsih caemh ciuq de gangj hih yienghmwnq bae guh, couh gaemh dawz diuz rieng ngwz. Duz ngwz youq ndaw fawz de youhcaiq bienqbaenz diuz faexbien boiz lo.

⁵ Yehhozvaz caiq naeuz: “Mwngz couh ciuq yienghneix bae guh, gyoengqde couh sinq naeuz Yehhozvaz, boux Cangqdiq cojgoeng gyoengqde, couh dwg Yaqbwzlahhanj, Hijsaj, Yajgoz dih Cangqdiq, dwg yienh hawj mwngz raen goq hih lo.”

⁶ Yehhozvaz caiq doiq de naeuz: “Dawz gij fawz mwngz oet haeuj laj vengqbuh mwngz bae.” Mohsih caemh oet gij fawz haeuj laj vengqbuh bae. Daengj de iet gij fawz de okma mwhde, gij fawz de engq hwnj mazfung hwj bieg supsup.

⁷ De caiq naeuz: “Mwngz caiq dawz gij fawz mwngz oet haeuj laj vengqbuh bae.” Mohsih youhcaiq oet gij fawz de haeuj laj vengqbuh bae, caiq iet gij fawz de okma. Gij fawz de gaenq ndei ndupndup luj gaxgonq de boiz, caeuq gij naengnoh seiqhenz de ityiengh ndei ndwtndwt.

⁸ Yehhozvaz youhcaiq naeuz: “Hauhnaeuz gyoengqde mbouj sinq mwngz, cixnaeuz mbouj dawz haeuj rwz gaiq geizmiuj daixit nex, mwngz couh loengh gij daixngeih hawj gyoengqde yawj; gyoengqde gaengjdingq sinq.

⁹ “Hauhnaeuz gyoengqde daiqlienz song ndaek cungj geizmiuj neix cungj mbouj sinq, caemh mbouj dingq gij vah mwngz nex, yiengq mwngz couh dajlwh ndaw dah aeu di raemx he ma, raix roengz mwnq doem hawq he bae. Yiengq gij raemx mwnq couh bienqbaenz lwed lo.”

¹⁰ Gajlaeng, Mohsih doiq Yehhozvaz naeuz: “Cangqdiq hax! Conghbak gou liglaiz cungj mbouj daiq rox gangj vah geijlai. Daiqlienz mwngz seizneix caeuq gou, bouxhoiq mwngz, gangj vah, gou vanzlij cungj caemh dwg yienghneix. Gou cungj dwg boux gangj vah dwddwd daddad he.”

¹¹ Yehhozvaz caemhcaiq naeuz: “Dwg bouxlawz cauh conghbak boux vunz nex? Dwg bouxlawz ndaej hawj vunz bakngoemx, rwznuk, raraeh, rafangz nex? Doenghgij neix mbouj dwg cungj dwg gou, Yehhozvaz, cauh hih maz?

¹² Bae bax, gou gaengjdingq bang mwngz gangj vah hih, caemh son mwngz wnggai gangj hih vah.”

¹³ Hoeng, Mohsih han naeuz: “Cangqdiq hax, cingj mwngz vanzlij dwg baij daixlingh boux bae bax.”

¹⁴ Gajlaeng Yehhozvaz doiq Mohsih fatheiq hwj naeuz: “Mwngz mbouj dwg miz daeggo mwngz Yaqlwnz maz, caemh dwg caeuq mwngz doxdoengz caemh Liqveiq cuz hih vunz maz? Gou rox conghbak de gaeuq ved hah. De seizneix cingq ok daeuj ciep mwngz lo; de raen mwngz nex, gaengjdingq angq ij rai bae.

¹⁵ Mwngz dawz gij vah mwngz ij gangj hih cenz hawj de. Gou caemh ij soengq hawj mwngz caeuq de hih goujcaiz, youhcaiq son faenhsou baenzlawz guh.

¹⁶ Yiengq, de caemh bang mwngz yiengq gyoengq vunz gangj vah; de dangqguh conghbak mwngz, mwngz dangqguh Cangqdiq de.

¹⁷ Hoeng, mwngz vanzlij daiq diuz faex neix bae, hawj diuz de bienqbaenz ndaek cungj geizmiuj he.”

Mohsih maj Ngaihgiz

¹⁸ Gajlaeng, Mohsih couh maj laeng goeng boxda de Yezdwzloz mwnq, doiq de naeuz: “Gouz mwngz hawj gou maj Ngaihgiz yawjyawj gyoengq goengjlungz nuengxau gou bax, yawjyawj gyoengqde baenzlawz yiengh.” Yiengq Yezdwzloz couh doiq Mohsih naeuz: “Mwngz couh maj bax; muengh mwngz itloh bingzbingz an'an.”

¹⁹ Mwh Mohsih vanzlij youq Mijdenq hih mwhde, Yehhozvaz doiq de naeuz: “Mwngz maj Ngaihgiz bax; doenghheij vunz ij gaj mwngz hih gaenq rai liux lo.”

²⁰ Yiengq Mohsih couh daiq mehyah de caeuq song daeglwg de, hawj gyoengqde gwih hwnj gwnz gumq duz lawz bae, couh maj Ngaihgiz lo. Ndaw fawz Mohsih caemh dawz Cangqdiq hawj de daiq bae hih diuz faexbien duq yiengz mwnq.

²¹ Yehhozvaz caiq doiq Mohsih naeuz: “Mwngz maj daengz Ngaihgiz le, itdingh ij youq dangqnaj goengjvuengz loengh gou soengq hawj mwngz hih bonjsaeh, guh sojmiz hih ndaek cungj geizmiuj mwnq. Hoeng, gou caemh ij hawj aen sim de bienq gyeng luj diet bae caiq akeuq dangqmaz hwj, mbouj coengq gij vunz Hijswzlez okma.

²² Daengz mwhmwnq, mwngz ij doiq goengjvuengz naeuz: ‘Yehhozvaz yienghneix naeuz: “Hijswzlez dwg daeglwg daeuz gou.

²³ Gou doiq mwngz naeuz goq, hawj daeglwg gou bae baiq gou, hoeng mwngz vanzlij mbouj hawj de bae. Mwngz yawj veiq! Gou ij gaj daeglwg daeuz mwngz bae lo.”’”

²⁴ Yiengq caiq dauq gangj daengz Mohsih daiq lwg daiq yah maj Ngaihgiz hih mwhde, de youq buenqroen dap bungz doz haemh hih mwnq deixfueng mwnq, Yehhozvaz couh goq bae ijsiengj gaj de.

²⁵ Yiengq mehyah Mohsih, Sihbohlah, couh majcangq dawz benq hojsiz he ma, couh gvej gij ok nyouh daeglwg de di naeng he okdaeuj, couh demj haeuj baj din de bae, couh naeuz: “Ciuq gou ma naeuz, mwngz couh dangq boux miz lwed hih lwggwiz moq he lo.”

²⁶ (Mehyah Mohsih gangj gawq neix dih iqswh dwg naeuz gaenq gozlij lo.) Yehhozvaz raen yienghneix le, couh mbouj diuqnanz de lo.

²⁷ Mwhde, Yehhozvaz caemh doiq Yaqlwnz naeuz: “Mwngz bae rogndoi bae ciep Mohsih bax.” Yiengq de couh bae gwnz bya Cangqdiq, couh dwg bya Hozlez, ciep Mohsih lo, caemhcaiq got de.

²⁸ Gajlaeng, Mohsih couh dawz Yehhozvaz baij de bae hih mwhde doiq de soj gangj hih vah caeuq soj raengq de baenzlawz guh baenzlawz bienq ndaek cungj geizmiuj he cungj gangj naeuz Yaqlwnz ni liux.

²⁹ Gangj liux le, Mohsih caeuq Yaqlwnz couh bae Ngaihgiz, couh heuh gyoengq vunz Hijswzlez gangj vah couh baenz he daeuj doxcomz.

³⁰ Yiengq Yaqlwnz couh dawz Yehhozvaz doiq Mohsih soj gangj hih vah cungj gangj naeuz gyoengqde ni. De caemh youq dangqnaj gyoengq vunzlai guh ndaek cungj geizmiuj mwnq.

³¹ Gajlaeng gyoengqde couh sinq lo. Gyoengqde rox daengz Yehhozvaz dwzbez aiq dwzbez cauqguq gij vunz Hijswzlez, caiq caemh rox gyoengqde dih haemzhoj le, couh gvih roengzma baiqbaiq saxsax Yehhozvaz.