Ok Ngaihgiz 39 - Gij Baujcingq Moq Caeuq Geij Bonj Gij Baujcingq Daeuzdaeuz

Guh diuz buh goengjsae dajbwiz he

¹ Bijsajlez gyoengqde ciuq Yehhozvaz raengq Mohsih hih yienghmwnq bae aeu maemaz lamz hah, maemaz aeuj hah, maemaz hoengz hah ma daemj hwj nyib diuz buh goengjsae dajbwiz, daengz mwh gyoengqde bae aen ranz Cangqdiq swqhaeuh Cangqdiq hih mwhde daenj. Gyoengqde caemh nyib diuz he hawj Yaqlwnz.

² Yiengq gyoengqde couh aeu maegim hah, saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma daemj hwj guh diuz buh hijfuzdwz.

³ Cungj maegim neix dwg doengh boux fawzsoem he aeu gim ma dub mbangmbang hwj daet baenx diuz baenx diuz saeq setset luj mae hwj ma caeuq maemaz lamz, maemaz aeuj, maemaz hoengz ma daemj hwj guh boiq.

^4-5 Gyoengqde caiq ciuq Yehhozvaz raengq Mohsih hih yienghmwnq, [5a]caemh caeuq guh hijfuzdwz doxdoengz, aeu maegim hah, saeqsaeq nuenxnuenx maemaz lamz hah, maemaz aeuj hah, maemaz hoengz hah ma daemj hwj [4]guh diuz sai gyaeu gywtgywt hijfuzdwz caeuq song diuz banqmbaq ndaej ciep vengq dangqnaj caeuq vengq baixlaeng de.

^6-7 Gyoengqde caiq ciuq Yehhozvaz raengq Mohsih hih yienghmwnq [6]aeu song gaiq hungzmajnauj ma dik luj dik swhcangh yienghmwnq, dik cibngeih daeglwg Hijswzlez hih coh hwnjbae. Gajlaeng caiq haemq haeuj song aen gimgvang bae le, [7a]couh dawz de gep haeuj song diuz banqmbaq hijfuzdwz bae. Gij neix dwg gijnenq gij vunz Hijswzlez dih cibngeih aen cuz.

Guh baizaek

⁸ De caiq hawj boux caixhangz fawzsoem he guh baizaek, caemh luj guh hijfuzdwz yienghmwnq aeu maegim hah, saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma daemj hwj guh.

⁹ Gaiq baizaek dwg boeb miz song caengz, seiq cingq seiq gok he, gij raez de caeuq gij gvangq de cungj dwg cap he.

¹⁰ Gwnz de haemq miz seiq coij baujsig. Daixit coij dwg hungzbaujsig, vangzhiq caeuq hungzhiq;

¹¹ daixngeih coij dwg luzbaujsig, lamzbaujsig, caeuq conqsig;

¹² daixsam coij dwg swjmajnauj, bwzmajnauj caeuq swjsingh;

¹³ daixseiq coij dwg ceijcanghhiq, hungzmajnauj caeuq bizhiq. Doenghgij baujsig neix cungj dwg haemq youq aen gvang aeu maegim ma san.

¹⁴ Moix it gaiq baujsig gwnz de cungj dik miz it daeglwg Hijswzlez hih coh; cibngeih gaiq baujsig daiqbiuj Hijswzlez dih cibngeih aen cuz.

¹⁵ Gyoengqde caiq aeu gim ma diz luj cag laenz yienghmwnq ma guh diuz lienh baizaek.

¹⁶ Caemhcaiq guh song aen gyengx gim caeuq song gaiq gvang aeu maegim ma san he. Song aen gyengx gim youq song gok baizaek,

¹⁷ song diuz lienh neix hih song raeuj con youq song aen gyengx gim,

¹⁸ lij song raeuj guqdingq youq song gaiq gvang aeu gim ma san guh he mwnq, caiq ding haeuj song diuz banqmbaq hijfuzdwz hih mwnq dangqnaj de.

¹⁹ Gyoengqde caiq diz song aen gyengx gim ding youq baizaek hih linghvaih song gok youq mbiengj baixndaw de dep hijfuzdwz,

²⁰ caemhcaiq diz song aen gyengx gim hwj ding youq song diuz banqmbaq dangqnaj hijfuzdwz hih raeuj laj de dep mwnq doxciep de caeuq baixgwnz diuz sai de.

²¹ Caiq aeu cag lamz ma dawz aen gyengx baizaek caeuq aen gyengx hijfuzdwz doxcug hwj, hawj gaiq baizaek caeuq diuz sai hijfuzdwz doxnem hwj mbouj yungzheih luet. Gij neix dwg ciuq Yehhozvaz raengq Mohsih hih yienghmwnq bae guh hih.

Guh goengjsae dajbwiz hih gizdah buh

²² Gyoengqde caiq daemj boiqmaz lamz ma nyib buhbauz hijfuzdwz.

²³ Diuz bauz neix hih mwnq ndonj hoz de gep miz bien hwj mbouj yungzheih lig.

^24-26 Gyoengqde caiq aeu saeqsaeq nuenxnuenx maemaz lamz hah, maemaz aeuj hah, maemaz hoengz hah ma san guh luj maksigsoux hwj, [25,26a]caemh aeu gim ma guh doengxlingz gim hwj, aen gek aen hwj [24b]ding haeuj diuz bauz hih gij bing laj de bae, [26b]daengj daengz swqhaeuh Yehhozvaz hih mwhde daenj. Doenghgij neix cungj dwg ciuq Yehhozvaz raengq Mohsih hih yienghmwnq bae guh he.

^27-29 Gyoengqde caiq ciuq Yehhozvaz raengq Mohsih hih yienghmwnq [27a]aeu saeqsaeq nuenxnuenx hih maemaz ma daemj hwj nyib buh baixndaw hah, [28]boiq duk raeuj hah, vaq hah, [29a]caemhcaiq aeu saeqsaeq nuenxnuenx maemaz lamz hah, maemaz aeuj hah, maemaz hoengz hah ma daemj hwj guh diuz sairwet he hawj Yaqlwnz caeuq daeglwg de.

³⁰ Gyoengqde caiq aeu gim ma diz guh baj baiz he, gwnz de dik miz ‘Gvi haeuj Yehhozvaz.’

³¹ Gajlaeng couh aeu cag lamz ma cug baj baiz neix youq gwnz boiq duk raeuj mwnq najbyak mwnq. Doenghgij neix cungj dwg ciuq Yehhozvaz raengq Mohsih hih yienghmwnq bae guh he.

Mohsih gyenjcaz

³² Couh yienghneix, gij vunz Hijswzlez ciuq Yehhozvaz raengq Mohsih hih yienghmwnq bae guhbaenz cangqbungz, couh dwg cangqbungz caeuq Cangqdiq doxraen he lo.

³³ Gyoengqde couh dawz cangqbungz dih gak yiengh doxgaiq dawz bae hawj Mohsih yawj: Ngaeu hah, benj hah, diuz lanz vang he hah, diuz dongh hah, aen cap hah,

³⁴ yomx hoengz hih fan naeng yiengzgoeng goemq dingj he hah, fan naeng haijbauq goemq ceiq gwnz dingj he hah, fanyiemz gek guh fungh ndaw fungh rog he hah,

³⁵ aen gvih coengq miz baengzgawq caeuq diuz faex ram de hah, fagoemqcoih hah,

³⁶ daiz baij bingj hah caeuq gwnz daiz de soj yungh hih doxgaiq hah, bingj dajbwiz hah,

³⁷ aen gyaqdaeng gim caeuq de soj yungh hih gak yiengh doxgaiq hah, youz daeng hah,

³⁸ aen aeu gim ma guh hwj siu yieng hah, gij youz rang dwzbez he hah, gij yieng rang fwtfwt he hah, fanyiemz bakdou cangqbungz hah,

³⁹ aen luz aeu doengz ma guh hwj coemh doenghduz hwj dajbwiz caeuq fan vangx doengz de hah, diuz faex ram de caeuq aen de soj yungh hih doxgaiq hah, buenz doengz dajswiq caeuq aen gyaq coengq buenz de hah,

⁴⁰ veizciengz hih boiq hah, doengh diuz dongh caeuq aen cap de hah, fanyiemz bakdou veizciengz hah, cag hah, ding hah, caeuq ndaw cangqbungz—couh dwg cangqbungz caeuq Cangqdiq doxraen he—soj yungh hih doxgaiq hah,

⁴¹ vanzlij miz Yaqlwnz caeuq daeglwg de youq ranz Cangqdiq guh goengjsae dajbwiz daenj hih buh hah.

⁴² Doenghgij neix cungj dwg ciuq Yehhozvaz raengq Mohsih hih yienghmwnq bae guh he.

⁴³ Mohsih raen gij vunz Hijswzlez cungj dwg ciuq Yehhozvaz raengq hih bae guh ndei lo, yiengq de couh hoh fuk hawj gyoengqde.