Ok Ngaihgiz 38 - Gij Baujcingq Moq Caeuq Geij Bonj Gij Baujcingq Daeuzdaeuz

Guh aen luz coemh doenghduz hwj dajbwiz he

¹ Bijsajlez de aeu faex gimhhozvuenh ma doq aen luz coemh doenghduz hwj dajbwiz. Aen neix dwg seiq cingq seiq gok he; gij raez caeuq gij gvangq de cungj dwg song mij sam, gij sang de miz it mij sam sang.

² Gij gok de guh miz gok dod hwnjdaeuj he; seiq gok dod caeuq aen luz dajbwiz neix doxlienz, caemh dwg aeu doengz ma baux.

³ Aen neix hih doengj coux daeuh hah, buenz coux lwed hah, fag canj hah, fag ca yamx noh hah, caeuq buenz coux gyoqfeiz hah, doenghgij doxgaiq neix cungj dwg aeu doengz ma guh.

⁴ De caiq guh fan vangx doengz he, ding youq aen luz coemh doenghduz hwj dajbwiz neix hih daj laj doxhwnj dingxfaen.

⁵ Seiq gok de caemh guh miz gyengx doengz hwj ndaej con diuz ram goqbae,

⁶ caemh aeu faex gimhhozvuenh ma baux doengz hwj guh diuz ram de,

⁷ dawz diuz ram neix con haeuj song aen gyengx bangx henz de bae, hawj de ndaej ram. Aen luz coemh doenghduz hwj dajbwiz neix dwg aeu benj ma doq he; cungqgyan de dwg hoengq he.

Guh buenz doengz dajswiq

⁸ De aeu doenghheij gingq doengz doengh boux vunzbaz youq bakdou cangqbungz guh swqhaeuh he ma guh buenz doengz dajswiq caeuq aen gyaq coengq buenz de.

Guh veizciengz

⁹ De aeu saeqsaeq nuenxnuenx hih maemaz ma daemj guh boiq hwj guh veizciengz cangqbungz. Mbiengj veizciengz baixnamz de miz seiqcib haj mij raez,

¹⁰ miz ngeihcib diuz dongh caeuq miz ngeihcib aen cap aeu doengz ma guh he. Gij ngaeu gwnz de caeuq doengh diuz gaq doxciep gwnz de dwg aeu ngaenz ma guh.

¹¹ Mienh veizciengz baixbaek caemh caeuq mienh veizciengz baixnamz doxdoengz, gij raez de miz seiqcib haj mij raez, caemh miz ngeihcib diuz dongh caeuq ngeihcib aen cap aeu doengz ma guh he. Gij ngaeu gwnz de caeuq doengh diuz gaq doxciep gwnz de dwg aeu ngaenz ma guh.

¹² Mienh veizciengz baixsae hih gij gvangq de miz ngeihcib ngeih mij haj gvangq, caemh miz cib diuz dongh caeuq cib aen cap de. Doenghgij ngaeu gwnz de caeuq doengh diuz gaq doxciep gwnz de caemh dwg aeu ngaenz ma guh.

¹³ Veizciengz hih mienh baixdoeng, couh dwg veizciengz hih mienh dangqnaj de, gij gvangq de miz ngeihcib ngeih mij haj gvangq.

^14-15 Bakdou hih song mbiengj de moix mbiengj cungj dwg doxdoengz, miz caet mij gvangq, caeuq miz sam diuz dongh caeuq miz sam aen cap de.

¹⁶ Veizciengz hih boiq cungj dwg aeu saeqsaeq nuenxnuenx hih maemaz ma daemj hwj guh he.

¹⁷ Aen cap diuz dongh cungj dwg aeu doengz ma guh he; gij ngaeu gwnz diuz dongh caeuq diuz gaq doxciep gwnz de cungj dwg aeu ngaenz ma guh. Gwnz dingj diuz dongh cungj dwg aeu ngaenz ma baux he. Veizciengz sojmiz hih dongh cungj dwg miz diuz gaq doxciep aeu ngaenz ma guh he.

¹⁸ Fanyiemz bakdou veizciengz dwg aeu saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma daemj guh he. Gij gvangq de miz gouj mij gvangq; gij sang de caeuq veizciengz doxdoengz sang caemh dwg song mij sam sang.

¹⁹ Fan de dwg venj youq seiq diuz dongh miz cap aeu doengz ma guh he. Gij ngaeu gwnz dongh hah, gij baux dingj dongh hah, caeuq doengh diuz gaq doxciep gwnz de hah cungj dwg aeu ngaenz ma guh he.

²⁰ Cangqbungz caeuq veizciengz sojmiz hih ding cungj dwg aeu doengz ma diz guh he.

^21-23 Yehhozvaz doiq Mohsih soj raengq hih saeh, cungj dwg youz aen cuz Youzdaq dih Bijsajlez, daeglan Huqwj, couh dwg daeglwg Uhliq guh he. [23]Boux bang de Yaqhozliqyaqbwz dwg daeglwg Yaqhihsajmaz, aen cuz Danq. De dwg boux rox dik, dik gijmaz cungj rem he, caemh dwg boux sezgiqswh he, cix rox aeu saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma daemj he. [21]Laj neix dwg Hijdahmaj, daeglwg Yaqlwnz, ciuq Mohsih dih mingqlingq ma cijveih gij vunz Liqveiq, hawj gyoengqde suenq ndei hwnq aen cangqbungz coengq miz baengzgawq mwnq soj yungh dih doxgaiq:

Ranz Cangqdiq soj yungh hih gim, ngaenz, doengz

²⁴ Soengq daeuj guh aen ranz Cangqdiq youq he soj yungh hih gim, ciuq aen caengh cangqbungz ma suenq, miz songcien gaen.

²⁵ Daj ndaw bonjbouh geiq hwnjdaeuj gij vunz soj gien hih ngaenz, ciuq aen caengh cangqbungz ma suenq, itgungh miz roekcien betbak seiqcib gaen.

²⁶ Daengh youq ndaw bonjbouh ngeihcib bi doxhwnj hih vunzsai, miz roekcib fanh lingz samcien hajbak hajcib vunz. Ciuq aen caengh cangqbungz ma suenq, bingzgvwnh moix it boux vunzsai gien hawj hih ngaenz miz roek gwz.

²⁷ Gyoengqde aeu roekcien betbak gaen hih ngaenz mwnq ma diz guh aen cap cangqbungz caeuq guh aen cap ndaw cangqbungz doengh diuz dongh venj fanyiemz mwnq he, moix it aen cap yungh bae roekcib bet gaen, itgungh miz bak aen;

²⁸ aeu seiqcib gaen mwnq ma diz guh gij ngaeu dongh caeuq diuz gaq doxciep gwnz de, caemh aeu ma baux gwnz dingj dongh.

²⁹ Gij vunz soengq hawj hih doengz itgungh ndaej seiqcien betbak itcib haj gaen.

³⁰ Aeu doenghgij doengz neix ma diz guh bakdou cangqbungz caeuq Cangqdiq doxraen he hih aen cap dongh hah, caeuq aen luz coemh doenghduz hwj dajbwiz daiqlienz fan vangx caeuq aen de sojmiz hih doxgaiq.

³¹ Vanzlij guh veizciengz caeuq bakdou veizciengz hih doengh aen cap laj de, caeuq cangqbungz, veizciengz soj yungh hih ding.