Ok Ngaihgiz 37 - Gij Baujcingq Moq Caeuq Geij Bonj Gij Baujcingq Daeuzdaeuz

Guh aen gvih coux doenghgij baengzgawq he

¹ Bijsajlez aeu faex gimhhozvuenh ma doq aen gvih coux doenghgij baengzgawq he. Aen de gij raez de miz itbak itcib sam gunghfaenh, gvangq caeuq sang cungj dwg caetcib gunghfaenh.

² Ndaw rog cungj baux gim hwj, seiqhenz caiq gep miz bien gim.

³ Caiq diz seiq aen gyengx gim hwj ding youq seiq ha de, moix it mbiengj song aen.

⁴ Caemhcaiq aeu faex gimhhozvuenh ma baux gim hwj guh song diuz faex ram de,

⁵ ndaej con haeuj aen gyengx bae ram aen de.

⁶ De aeu cwnz hih gim ma guh fagoemqcoih, couh dwg aen fa aen gvih coengq miz baengzgawq mwnq. Gij raez de miz itbak itcib sam gunghfaenh, gij gvangq de miz caetcib gunghfaenh.

^7-8 Caemh aeu gim ma diz guh song duz gihluqbwz [7b,8a]coengq youq song raeuj fagoemqcoih, [8b]caeuq fagoemqcoih doxnem.

⁹ Song duz gihluqbwz naj doiq naj yawj roengz fagoemqcoih aj fwed hwj goemq aen de.

Guh daiz baij bingj

¹⁰ De aeu faex gimhhozvuenh ma doq aen daiz baij bingj he. Gij raez de goujcib gunghfaenh raez, gij gvangq de seiqcib haj gunghfaenh gvangq, gij sang de caetcib gunghfaenh sang,

¹¹ caemh aeu gim ma baux hwj, seiqhenz de caemh gep miz bien gim.

¹² Seiqhenz daiz caemh guh miz baj fawz gvangq he hih begdaiz, gij begdaiz caemh gep miz bien gim.

¹³ De caemh diz seiq aen gyengx gim hwj ding youq seiq gok ha daiz,

¹⁴ caemh dwg ding dep gij begdaiz, hawj de ndaej con diuz ram haeujbae ram.

¹⁵ De caemhcaiq aeu faex gimhhozvuenh ma guh song diuz faex ram de, caiq baux gim haeujbae hwj.

¹⁶ De vanzlij caiq aeu gim ma guh gwnz daiz soj yungh hih doxgaiq, lujbaenz buenz hah, deb hah, huz coux laeuj hah, cenj caem laeuj hah.

Guh gyaqdaeng

¹⁷ De aeu gim ma guh aen gyaqdaeng he. Aen gyaqdaeng neix hih gij hangx de hah, gij ganj de hah, doengh aen cenj coux youz gwnz de luj duj va caeuq duqva hah, limqva hah, doenghgij neix cungj dwg caemh ngauq gim he diz okdaeuj vanzlij doxnem he.

¹⁸ Aen gyaqdaeng hih it mbiengj iet miz sam nga; song mbiengj itgungh miz roek nga.

¹⁹ It nga miz sam duj luj duj vagingq, caemh miz duqva, limqva. Roek nga neix, nga'nga cungj doxdoengz.

²⁰ Aen gyaqdaeng hih diuz ganj cungqgyan de hih caemh miz seiq duj luj duj vagingq, caemh miz duqva, limqva.

²¹ Gyaqdaeng dih moix song nga doxdoiq hih laj doenj doxgap de cungj miz duq he; gyaqdaeng miz roek nga cungj dwg doxdoengz.

²² Gij duq caeuq gij nga de cungj dwg doxciep, cungj dwg ngauq gim dog diz okdaeuj caemh doxnem he.

²³ De caemh aeu gim ma guh aen gyaqdaeng neix hih caet aen daeng gwnz de caeuq fag nep muenxdaeng de caeuq aen buenz de.

²⁴ De yungh roekcib bet gaen hih gim ma diz guh aen gyaqdaeng caeuq aen daeng soj yungh hih doxgaiq.

Guh aen siu yieng

²⁵ De aeu faex gimhhozvuenh ma guh aen siu yieng he. Aen de dwg seiq cingq seiq gok he; gij raez caeuq gij gvangq de cungj dwg seiqcib haj gunghfaenh, gij sang de goujcib gunghfaenh sang. Seiq gij gok de dod hwnjdaeuj caeuq aen gyaq de doxnem.

²⁶ De caiq aeu gim ma baux mienh gwnz de caeuq seiq gok de; seiqhenz de caemh gep miz bien gim.

²⁷ De vanzlij guh song aen gyengx gim hwj an youq laj song henz bien gim, hawj diuz ram de ndaej con goqbae ram hwj.

²⁸ Diuz ram neix de aeu faex gimhhozvuenh ma guh, caemh baux gim hwj.

Guh youz rang caeuq yieng

²⁹ De caemh ciuq guh yanghceij yienghmwnq ma guh youz rang caeuq gij yieng rang fwtfwt he.