Ok Ngaihgiz 35 - Gij Baujcingq Moq Caeuq Geij Bonj Gij Baujcingq Daeuzdaeuz

Ngoenzyietbaeg dih gveihdingq

¹ Gajlaeng, Mohsih heuh gij vunz Hijswzlez daeuj doxcomz, doiq gyoengqde naeuz: “Faenhsou ij ciuq gij vah Yehhozvaz bae guh,

² couh dwg faenhsou ndaej guh roek ngoenz hong; ngoenz daixcaet dwg ngoenzyietbaeg, dwg gvi hawj Yehhozvaz guh ngoenz yietbaeg he. Mboujguenj byawz youq ngoenz neix guh hong hih couh ij gajrai byawz.

³ Youq ngoenz ngoenzyietbaeg, mboujguenj youq ndaw ranz bonjfaenh cixnaeuz youq mwnqlawz cungj mbouj ndaej hoi feiz caux feiz.”

Soengq hawj Cangqdiq

⁴ Mohsih doiq sojmiz hih Hijswzlez vunz naeuz: “Yehhozvaz yienghneix naeuz:

⁵ ‘Faenhsou ij soengq caenxcingz hawj gou, Yehhozvaz. Famz dwg nyienh'eiq soengq hih, couh dwg ndaej soengq gim hah, ngaenz hah, doengz hah,

⁶ maemaz lamz hah, maemaz aeuj hah, maemaz hoengz hah, caeuq fwn yiengzbya hah,

⁷ naeng yiengzgoeng yomx hoengz hah, naeng haijbauq hah, faex gimhhozvuenh hah,

⁸ youz daeng hah, guh youz rang caeuq guh yieng hih yanghliuq hah,

⁹ aeu ma gep diuz buh hijfuzdwz caeuq baj baizaek hih hungzmajnauj hah caeuq gak cungj baujsig hah.’

Cangqbungz dih doxgaiq

¹⁰ “Faenhsou bouxlawz fawzsoem caixhangz hih cungj ij daeuj guh Yehhozvaz soj raengq hih,

¹¹ couh dwg cangqbungz caeuq fan goemq cangqbungz hah, gij ngaeu de hah, benj hah, diuz faex lanz vang he hah, diuz dongh hah, congh cap he hah,

¹² aen gvih coengq miz baengzgawq caeuq diuz faex ram de hah, fagoemqcoih caeuq fanyiemz gek fungh hah,

¹³ aen daiz baij bingj dajbwiz caeuq diuz faex ram de hah, vanzlij miz gwnz daiz sojmiz hih doxgaiq hah, gij bingj dajbwiz he hah,

¹⁴ aen gyaqdaeng caeuq de hih gak yiengh doxgaiq, daeng caeuq youz hah,

¹⁵ aen siu yieng caeuq diuz faex ram de hah, youz rang caeuq yieng hah, fanyiemz bakdou cangqbungz hah,

¹⁶ aen luz coemh doenghduz hwj dajbwiz caeuq gij vangx doengz gwnz de hah, diuz faex ram de hah, caeuq de sojmiz hih doxgaiq hah, buenz dajswiq caeuq gyaq coengq buenz hah,

¹⁷ boiq veizciengz hah, doengh diuz dongh caeuq doengh congh cap diuz dongh de hah, fan yiemzdou veizciengz hah,

¹⁸ cangqbungz caeuq veizciengz hih doengh diuz ding de caeuq doengh diuz cag de hah,

¹⁹ vanzlij miz goengjsae dajbwiz soj daenj hih buh hah, couh dwg Yaqlwnz caeuq doengh daeglwg de youq ndaw veizciengz cangqbungz guh dajbwiz swqhaeuh Yehhozvaz daenj hih buh hah.”

Gij vunz soengq hih doxgaiq

²⁰ Gij vunz Hijswzlez dajlaeng Mohsih mwnq sanq le,

²¹ doengh boux nyienh'eiq soengq doxgaiq hawj Yehhozvaz hih cungj daeuj soengq hwj hemq bae, soengq hawj guh cangqbungz caeuq Cangqdiq doxraen he soj yungh hih hah, diuz buh goengjsae dajbwiz daenj hih hah.

²² Moix it boux nyienh'eiq soengq hih vunzsai vunzbaz cungj dawz gim daeuj lo: nep gim hah, ngaexrwz gim hah, haedfawz gim hah, gim hangqlenq hah, doenghgij neix, cungj soengq daeuj hawj Yehhozvaz.

²³ Bouxlawz miz maemaz lamz hah, maemaz aeuj hah, maemaz hoengz hah, fwn yiengzbya hah, naeng yiengzgoeng yomx hoengz hah, naeng haijbauq hah cungj dawz daeuj soengq.

²⁴ Famz bouxlawz miz ngaenz caeuq miz doengz ndaej soengq hawj Yehhozvaz hih cungj dawz daeuj lo. Famz bouxlawz miz faex gimhhozvuenh ndaej guh gijmaz hih caemh cungj dawz daeuj lo.

²⁵ Doenghgij vunzbaz fawzsoem, caixhangz, rox laenz mae hih, couh dwg aeu maemaz lamz hah, maemaz aeuj hah, maemaz hoengz hah ma laenz hih caemh dawz daeuj soengq lo.

²⁶ Gyoengqde caemh aeu fwn yiengzbya ma laenz mae.

²⁷ Gij vunz Hijswzlez hih doengh boux dang ak he caemh dawz hungzmajnauj hah, gak cungj baujsig hah, doenghgij ndaej aeu ma gep hwnj gwnz hijfuzdwz caeuq gij baizaek bae hih daeuj lo.

²⁸ Gyoengqde caemh aeu gij ndaej guh yieng hih liuh hah, youz daeng hah, caeuq guh youz rang hih liuh hah daeuj.

²⁹ Gij vunz Hijswzlez mboujguenj vunzsai haj cixnaeuz vunzbaz, famz nyienh'eiq soengq doxgaiq hawj Yehhozvaz hih cungj soengq daeuj lo, soengq daeuj aeu ma guh Yehhozvaz raengq Mohsih soj ij guh dih saeh.

Song goengjsae

³⁰ Mohsih doiq gij vunz Hijswzlez naeuz: “Yehhozvaz gaenq senj Bijsajlez lo; Bijsajlez dwg aen cuz Youzdaq he, dwg daeglwg Uhliq, caemh dwg daeglan Huqwj.

³¹ Gij Hoenzsaenz Yehhozvaz caemh hwnj gwnz ndang de, hawj de cix caixhangz cix coengjmingz, gijmaz hong cungj ndaej guh,

³² lujbaenz veh doz hah, aeu gim, aeu ngaenz, aeu doengz hah ma diz gak cungj doxgaiq hah,

³³ caemh ndaej dik ndaej baux baujsig hah, dik faex hah, caemhcaiq rox gak cungj dinfawz hah.

³⁴ Yehhozvaz caemhcaiq hawj de caeuq Yaqhozliqyaqbwz boux neix (de dwg ndaw cuz Danq he, dwg daeglwg Yaqhihsajmaz) hawj song boux de miz bonjsaeh ndaej son vunz.

³⁵ Yehhozvaz hawj gyoengqde miz bonjsaeh, caixhangz, coengjmingz, ndaej guh gak cungj hong. Mboujguenj dik doxgaiq haj cixnaeuz veh doz, cixnaeuz aeu maemaz lamz, maemaz aeuj, maemaz hoengz hah ma daemj boiq cungj ndaej.”