Ok Ngaihgiz 33 - Gij Baujcingq Moq Caeuq Geij Bonj Gij Baujcingq Daeuzdaeuz

Yehhozvaz naeuz mbouj caeuq gyoengq vunz bae

¹ Gajlaeng Yehhozvaz doiq Mohsih naeuz: “Mwngz daiq gyoengq mwngz daj Ngaihgiz daiq okma hih vunz daj mwnqneix bae mwnq gou baujcingq goq nyok hawj Yaqbwzlahhanj, Hijsaj, Yajgoz dih doengh daih gajlaeng de hih mwnq dieg mwnq bae.

² Gou ij baij bouxcai he hawj faenhsou daiq roen, boenq dieg mwnq hih Gyahnamz vunz hah, Yaqmohliq vunz hah, Hwz vunz hah, Bijliqsij vunz hah, Hihveiq vunz hah, Yehbuqswh vunz hah, boenq gyoengqde deuz.

³ Mwngz bae hih mwnq dieg mwnq dwg gvangq yubyub, ndaem gogo cungj baenz he. Hoeng, gou mbouj caeuq faenhsou bae, aenvih faenhsou daiq nga'ngangq lai, hoengjlau gou youq dangjroen dawz faenhsou gajrai raeg bae.”

^4-5 Yehhozvaz caiq doiq Mohsih naeuz: “Mwngz ij doiq gij vunz Hijswzlez naeuz: ‘Yehhozvaz naeuz: “Faenhsou dwg nga'ngangq hih vunz; gou baex caeuq faenhsou he, couh ij dawz faenhsou gaj liux bae. Sojhij seizneix faenhsou ij dawz gwnz ndang faenhsou raek miz hih ngaexgim hah, haedfawz hah, hangqlenq hah, dungjdungj duet roengzma, yiengq gou cij rox ij baenzlawz doiq faenhsou.”’” [4]Gyoengq vunz dingqri gij vah neix le, cungj siengsim ij rai bae, gajlaeng couh mij'z vunz daiq ngaexgim hah, haedfawz hah, hangqlenq hah haem lo.

⁶ Couh yienghneix, gij vunz Hijswzlez daj mwh ok bya Sihnaiq (couh dwg bya Hozlez) ma hih mwhmwnq couh mbouj caiq doeng raek sae raek haem lo.

Aen cangqbungz baixrog yingz

⁷ Mwhde, moix it mbat gij vunz Hijswzlez cap yingz, Mohsih cungj youq mwnq liz aen yingz mauqhuz gyae he mwnq dap cangqbungz. De heuh aen cangqbungz neix heuh guh ‘cangqbungz caeuq Cangqdiq doxraen he.’ Famz bouxlawz ij gouzcam Yehhozvaz hih, cungj ij bae daengz baixrog yingz hih aen cangqbungz mwnq bae gouzcam.

⁸ Yiengq moix it mbat Mohsih bae aen cangqbungz neix, gyoengq vunz cungj gag vunz gag ndwn youq bak cangqbungz bonjfaenh yawj, yawj daengz Mohsih haeuj aen cangqbungz neix bae.

⁹ Moix it mbat Mohsih haeuj bae daengz cangqbungz le, cungj miz diuz saeu fwj he roengz bakdou cangqbungz neix daeuj, Yehhozvaz cungj caeuq Mohsih gangj vah.

¹⁰ Yiengq gyoengq vunz bouxboux baex raen diuz saeu fwj dingz youq bak cangqbungz neix he, cungj bomz roengzma sax.

¹¹ Yehhozvaz caeuq Mohsih gangj vah cungj dwg naj doiq naj hwj gangj he, caenh lujnaeuz caeuq baengzyoux gangj vah yienghmwnq. Yiengq Mohsih moix it mbat dauq ma ndaw yingz, boux hauxseng bang de Yozcuhyaq, daeglwg Naenq, de cungj dwg vanzlij youq ndaw cangqbungz neix.

Yehhozvaz dapwngq caeuq gyoengq vunz youq

¹² Yiengq miz mbat he, Mohsih doiq Yehhozvaz naeuz: “Mwngz raengq gou naeuz: ‘Daiq gyoengq vunz bae,’ hoeng, mwngz mij hawj gou rox byawz caeuq gou bae hah. Mwngz caenhgag naeuz: ‘Gou rox mwngz caemh ndiep mwngz,’ gawq neix lax,

¹³ yiengq, hauhnaeuz seizneix mwngz cingqcaen ndiep gou nex, gouz mwngz naeuz gou ni mwngz dih cawjeiq, gou cij ndaej rox ij baenzlaw ciuq gij cawjeiq mwngz bae guh hab'eiq habhoz mwngz hah. Caemh gouz mwngz ndaejgeiq gyoengq vunz neix; gyoengqde cungj dwg gij vunz mwngz.”

¹⁴ Yiengq Yehhozvaz han de naeuz: “Gou gaengjdingq caeuq mwngz bae, hawj mwngz haemq mbouj you, haemq simsoeng.”

¹⁵ Gajlaeng, Mohsih naeuz: “Hauhnaeuz mwngz mbouj caeuq gyoengqraeuz bae nex, gouz mwngz gaejyungh hawj gyoengqraeuz daj mwnqneix senj deuz.

¹⁶ Hauhnaeuz mwngz mbouj caeuq gyoengqraeuz bae, gij vunz baenzlawz rox mwngz ndiep gou caeuq ndiep gij vunz mwngz nej? Mbouj dwg miz mwngz caeuq raeuz bae, cij ndaej hawj gou caeuq gij vunz mwngz caeuq lajmbwn fanh aen minzcuz dih vunz faengek hwnjdaeuj maz?”

¹⁷ Yehhozvaz han Mohsih naeuz: “Ndaej hah, mwngz gouz hih, gou cungj dapwngq mwngz, aenvih gou ndiep mwngz, caemh rox mwngz.”

Gouz caenra raen Cangqdiq

¹⁸ Yiengq Mohsih caiq naeuz: “Gouz mwngz hawj gou caenra raen gij rongh mwngz, ndaej lwi?”

¹⁹ Yehhozvaz caiq han naeuz: “Gou ij yienh gou sojmiz hih ndei youq dangqnaj mwngz hawj mwngz raen, caemh youq dangqnaj mwngz naeuz gij coh gou, Yehhozvaz. Gou ij ndiep byawz, couh ndiep byawz; gou ij cojgvaq byawz, couh cojgvaq byawz.”

²⁰ Yehhozvaz youhcaiq naeuz: “Gou mbouj hawj mwngz raen baj naj gou law, aenvih raen gou hih vunz cungj ij ngaiz rai.”

²¹ Yehhozvaz vanzlij caiq naeuz: “Hoeng, youq henz ndang gou miz ndaek ngauq rin hung he; mwngz ij ndwn hwnj gwnz rin bae.

²² Mwh gij rongh gou goq dangqnaj mwngz bae hih mwhde, gou ij dawz mwngz coengq haeuj ngvamh rin bae, aeu gij fawz gou ma goemq mwngz hwj, daengj gou goq bae.

²³ Goq bae le, gou couh sou gij fawz gou, yiengq mwngz caenhgag ndaej raen baixlaeng gou, mbouj ndaej raen baj naj gou.”