Ok Ngaihgiz 31 - Gij Baujcingq Moq Caeuq Geij Bonj Gij Baujcingq Daeuzdaeuz

Song goengjsae

¹ Yehhozvaz youhcaiq doiq Mohsih naeuz:

² “Mohsih, gou naeuz mwngz ni, gou gaenq daj ndaw cuz Youzdaq genj aeu Bijsajlez okdaeuj lo; Bijsajlez couh dwg daeglan Huqwj, laeq lwg Uhliq.

³ Gou gaenq hawj gij Hoenzsaenz gou hawj de lo, hawj de ndaej miz coengjmingz, caixhangz, fawzsoem ndaej guh gak cungj dinfawz he,

⁴ lujbaenz veh doz hah, aeu gim, aeu ngaenz, aeu doengz hah ma diz gak cungj doxgaiq hah,

⁵ caemh rox dik rox baux baujsig hah, rox dik faex hah, caiq rox guh doenghgij saeqmaed dih doxgaiq hah.

⁶ “Gou caiq daj aen cuz Danq genj aeu Yaqhozliqyaqbwz, couh dwg daeglwg Yaqhihsajmaz, genj okdaeuj bang de. Gou caemh nyok fawzsoem hawj doenghheij vunz caixhangz he, hawj gyoengqde ndaej guh doenghgij gou raengq mwngz he,

⁷ couh dwg aen cangqbungz caeuq gou doxraen he hah, aen gvih coengq miz baengzgawq hah caeuq aen fa de, couh dwg fagoemqcoih hah, ndaw aen cangqbungz caeuq gou doxraen he soj yungh dih doxgaiq hah,

⁸ daiz baij bingj dajbwiz caeuq gwnz daiz soj yungh hih doxgaiq, daeng gim caeuq daeng gim soj yungh hih doxgaiq, aen siu yieng hah,

⁹ aen luz coemh hwj dajbwiz hah caeuq gwnz luz soj yungh hih doxgaiq hah, aen buenz dajswiq hah caeuq gyaq buenz hah,

¹⁰ Yaqlwnz caeuq doengh daeglwg de guh goengjsae dajbwiz daenj hih doenghgij buh gyaeugyaeu ndeindei he hah,

¹¹ gij youz rang hah, caeuq ndaw cangqbungz soj yungh hih yieng hah, doenghgij neix gyoengqde cungj ij ciuq gou raengq mwngz hih yienghmwnq bae guh.”

Souj ngoenzyietbaeg

¹² Yehhozvaz youhcaiq doiq Mohsih naeuz:

¹³ “Mwngz ij naeuz gij vunz Hijswzlez ni, naeuz: ‘Faenhsou bietdingh ij soenhsouj ngoenzyietbaeg gou, aenvih ngoenz neix dwg gou dingh hawj faenhsou seiqseiq daihdaih guh geiqniemh he, dwg hawj faenhsou rox dwg gou, Yehhozvaz, senj aeu faenhsou he.

¹⁴ Faenhsou bietdingh ij soenhsouj ngoenzyietbaeg. Bouxlawz mbouj dawz haeuj rwz ngoenzyietbaeg, yawj mbouj hwnj ngoenzyietbaeg nex, couh gaj bouxlawz. Bouxlawz youq ngoenzyietbaeg vanzlij guh hong hih, couh mbouj suenq dwg gij vunz gou lo.

¹⁵ Faenhsou miz roek ngoenz ndaej guh hong, hoeng, daixcaet ngoenz dwg ngoenzyietbaeg, dwg ngoenz dwzbez gvi hawj gou he; mbouj ndaej guh hong. Bouxlawz youq ngoenzyietbaeg guh hong hih, couh gaj bouxlawz.

¹⁶ Sojhij, gij vunz Hijswzlez seiqseiq daihdaih cungj ij soenhsouj gou dingh hawj gyoengqde dih ngoenzyietbaeg.

¹⁷ Gij neix dwg gou caeuq gij vunz Hijswzlez yungjyenj dih baengzgawq. Aenvih roek ngoenz ndaw de, gou, Yehhozvaz, cauh mbwn cauh deih, daixcaet ngoenz sat hong yietbaeg lo.’”

¹⁸ Yehhozvaz youq bya Sihnaiq caeuq Mohsih gangj doenghgij vah neix sat le, couh dawz song baj rin aeu lwgfawz de ma dik miz hih fazliz, gyau hawj Mohsih.