Ok Ngaihgiz 30 - Gij Baujcingq Moq Caeuq Geij Bonj Gij Baujcingq Daeuzdaeuz

Guh aen siu yieng dih gveihdingq

¹ “Mwngz ij aeu faex gimhhozvuenh ma doq aen cenmonz siu yieng he.

² Aen neix dwg seiq cingq seiq gok he, gij raez caeuq gij gvangq de cungj dwg doxdoengz seiqcib haj gunghfaenh, gij sang de goujcib gunghfaenh sang. Seiq gij gok dod hwnjdaeuj de caeuq aen siu yieng neix dwg caemh ngauq faex he doq baenz he.

³ Mienh gwnz de hah, seiq gok dod de hah, caeuq seiq bangx de hah cungj ij baux gim hwnjbae; seiqhenz de caemh ij gep miz bien gim hwj.

⁴ Vanzlij guh song aen gyengx gim hwj an youq song bangx henz bien gim hih laj de, hawj diuz ram de ndaej con goq bae ram hwj.

⁵ Diuz ram neix ij aeu faex gimhhozvuenh ma guh, caemh ij baux gim hwnjbae.

⁶ Aen siu yieng ij coengq youq baixrog fanyiemz dangqnaj aen gvih coengq miz baengzgawq mwnq, couh dwg mwnq gou caeuq mwngz doxraen he.

⁷ “Haetnaengz daihcaeux, Yaqlwnz daeuj soujsib gij daeng hih mwhde, ij siu gij yieng rang fwtfwt he.

⁸ Yiengqhaemh daeuj diemj daeng hih mwhde, caemh ij doxdoengz siu gij yieng rang he. Baezneix faenhsou daihdaih cungj ij siu gij yieng neix; mbouj ndaej dingz.

⁹ Mbouj ndaej youq aen siu yieng neix siu daixlingh cungj yieng, caemh mbouj ndaej youq gwnz de coemh noh hwj dajbwiz cixnaeuz baij haeux, baij laeuj dajbwiz.

¹⁰ Yaqlwnz moix it bi ij miz mbat he aeu gij lwed duz bwiz cueg coih mwnq ma hoz haeuj aen siu yieng hih gok dod de bae, hawj aen de yungjyenj ndaej guh aen siu yieng hwj bwiz gou he. Daihdaih cungj ij yienghneix guh; mbouj ndaej dingz. Aen siu yieng neix dwg dwzbez he, caemh dwg bwiz gou, Yehhozvaz cij ndaej yungh he.”

Gien guh aen ranz hab Cangqdiq youq he

¹¹ Yehhozvaz caiq doiq Mohsih naeuz:

¹² “Mwngz gyoebsuenq gij vunz Hijswzlez mwhde, bouxboux cungj ij gyau cueg mingh hih ngaenz hawj gou, mienxndaej mwh geq hih mwhde miz vunz ngaiz beiqciz dawz.

¹³ Daengh miz coh hih cungj dwg ij ciuq aen caengh cangqbungz yungh he ma gyau, it boux ij gyau roek gwz hih ngaenz he hawj gou, Yehhozvaz, guh caenxcingz.” (Roek gwz daengjhih buenq seqgwzlwz; it seqgwzlwz dwg ngeihcib giqlah.)

¹⁴ “Ngeihcib bi doxhwnj dih vunzsai, daengh miz coh hih, cungj ij soengq gij caenxcingz neix hawj gou.

¹⁵ Gyau cueg mingh hih ngaenz, mbouj faen boux fouq caeuq boux gungz. Boux fouq mbouj lai gyau, boux gungz caemh mbouj noix gyau.

¹⁶ Laeng gij vunz Hijswzlez aeu gij ngaenz neix ma dwg ij hawj cangqbungz caeuq gou doxraen he yungh he. Gij neix dwg gyoengqde vih cueg gij mingh bonjfaenh gyoengqde hwj gien he. Gajlaeng gyoengqde couh ndaejgeiq gyoengqde gien hih ngaenz, couh ngeix daengz gyoengqde youq ndaw lwgra gou, Yehhozvaz, gaenq ndaej cueg mingh lo.”

Guh buenz doengz dih gveihdingq

¹⁷ Yehhozvaz vanzlij caiq doiq Mohsih naeuz:

¹⁸ “Mwngz ij aeu doengz ma guh aen buenz dajswiq caeuq aen gyaq coengq buenz he. Dawz aen buenz neix coux raemx rim hwj, coengq youq cangqbungz caeuq gou doxraen he caeuq aen luz dajbwiz hih cungqgyan he hwj.

^19-20 Yaqlwnz caeuq doengh daeglwg de haeuj ndaw cangqbungz caeuq gou doxraen he bae [20c]cixnaeuz bae daengz aen luz dajbwiz guh dajbwiz hih mwhde, [19]ij aeu buenz raemx neix ma swiq fawz swiq ha. [20b]Yiengq gyoengqde couh mbouj ngaiz rai lo.

²¹ Gyoengqde ij swiq fawz swiq ha cij ndaej mbouj ngaiz rai. Gij neix dwg de caeuq gij lwglan de yungjyenj ij soenhsouj dih gveihdingq.”

Guh youz rang dih gveihdingq

²² Yehhozvaz vanzlij caiq doiq Mohsih naeuz:

²³ “Mwngz ij aeu gij yanghliuq ceiq ndei he, couh dwg raemx mozyoz cibngeih gaen, gveiqbiz rang roek gaen, canghbuj rang roek gaen,

²⁴ caeuq cibngeih gaen gveiqbiz, ij ciuq aen caengh cangqbungz yungh dih biuhcwnj ma caengh, caemhcaiq aeu bet gaen youz makmbi haem.

²⁵ Ij ciuq guh yanghceij yienghmwnq ma guh gij youz rang caenhgag gou cij ndaej yungh he.

²⁶ Yungh gij youz rang neix ma hoz haeuj aen cangqbungz caeuq gou doxraen he hah, aen gvih coengq miz baengzgawq hah,

²⁷ daiz baij bingj dajbwiz hah, gwnz daiz soj yungh hih doxgaiq hah, caeuq aen daeng daiqlienz aen de soj yungh hih doxgaiq hah, aen siu yieng hah,

²⁸ aen luz coemh doenghduz hwj dajbwiz hah caeuq gwnz luz soj yungh hih doxgaiq hah, buenz dajswiq caeuq gyaq buenz hah.

²⁹ Yiengq hoz goq hih doenghgij neix, couh bienqbaenz dwzbez he, caenhgag ndaej gou yungh he lo. Mboujguenj vunz hah cixnaeuz guxmaz, ngad dawz bungq dawz hih cungj ij gvi hawj gou.

³⁰ “Mwngz caemh ij raix youz rang hwnj gwnz raeuj Yaqlwnz caeuq doengh daeglwg de bae, laeb gyoengqde guh goengjsae dajbwiz daeuj swqhaeuh gou.

³¹ “Mwngz caemh ij naeuz gij vunz Hijswzlez ni, naeuz: ‘Gij youz rang neix dwg faenhsou seiqseiq daihdaih cenmonz vih Yehhozvaz hwj yungh he dih youz.

³² Mbouj ndaej aeu gij youz neix ma raix hwnj gwnz ndang boux mbouj dwg goengjsae dajbwiz he bae, caemh mbouj ndaej yungh cungj fap neix ma boiq cungj youz neix hwj luenh yungh. Gij youz neix dwg Yehhozvaz cij ndaej yungh; dwg dwzbez hih youz.

³³ Hauhnaeuz miz vunz boiq youz caeuq cungj youz neix doxdoengz, cixnaeuz aeu gij youz de ma raix hwnj gwnz ndang boux mbouj dwg goengjsae dajbwiz he bae nex, couh daj ndaw Hijswzlez vunz cawz gij coh de bae, mbouj hawj de miz faenh.’”

Guh yieng dih gveihdingq

³⁴ Yehhozvaz caiq doiq Mohsih naeuz: “Mwngz ij aeu gij rang fwtfwt dih yanghliuq, couh dwg nazdahfuz hah, cwhhijlez hah, hijliqbijnaz hah, doenghgij rang fwtfwt neix hih yanghliuq caeuq cwnz hih yeijyangh, mwngz cungj ij aeu doxdoengz

³⁵ ma gyaux hwj, caiq gya gyu haem, ciuq guh yanghceij yienghmwnq boiqfap ma guh gij yieng cenmonz hawj gou yungh he.

³⁶ Caemh aeu mbangj ma daem mienz hwj dawz daeuj cangqbungz, coengq youq dangqnaj aen gvih coengq miz baengzgawq mwnq, couh dwg mwnq gou caeuq mwngz doxraen he. “Gij yieng neix dwg dwzbez he; faenhsou mbouj ndaej luenh yungh.

³⁷ Sojhij faenhsou mbouj ndaej yungh cungj fap neix ma boiq guh gij yieng bonjfaenh, aenvih gij yieng neix dwg gvi hawj gou he, caenhgag gou cij ndaej yungh he.

³⁸ Hauhnaeuz miz vunz guh doengz cungj yieng neix ma gag yungh hih, couh daj ndaw Hijswzlez vunz cawz gij coh de bae, mbouj hawj de miz faenh.”