Ok Ngaihgiz 3 - Gij Baujcingq Moq Caeuq Geij Bonj Gij Baujcingq Daeuzdaeuz

Cangqdiq baij Mohsih

¹ Mwhde, Mohsih dwg bang goeng boxda de, couh dwg Mijdenq hih goengjsae dajbwiz he heuh Yezdwzloz, bang de ciengx yiengz. (Yezdwzloz caemh heuh Liuzwj.) Miz ngoenz he, de duq gyoengq yiengz bae gyae'gyae, byaij goq aen ndoi he bae daengz aen bya Cangqdiq, couh dwg bya Hozlez, ciengx. (Bya Hozlez caemh heuh bya Sihnaiq.)

² Sawqmwh, bouxcai Yehhozvaz youq mwnq luj luzfeiz he, youq ndaw caz oen dawz feiz yubyub hawj Mohsih raen. Mohsih yawjraen caz oen dawz feiz, hoeng, caz oen dauq mij ngaiz feiz gyemz dawz.

³ De yawjraen yienghneix le, cungj raen geizheih raixcaix bae, couh gag naemj: “Aeq, caz oen vihmaz mbouj ngaiz feiz gyemz dawz nej? Daengj gou goq bae yawjyawj!”

⁴ Yiengq, Yehhozvaz yawjraen de goq daeuj le, couh daj ndaw caz oen heuh de naeuz: “Mohsih! Mohsih!” Mohsih han naeuz: “Aex! Gijmaz saeh lah?”

⁵ Cangqdiq naeuz: “Mwngz mbouj ndaej daeuj gaenh dineix nej! Ij majcangq duet doiq haiz mwngz bae, aenvih mwngz ndwn youq hih mwnq dieg mwnq dwg gou youq he, gaenq gek hwnjdaeuj lo. Mbouj ndaej laizluenh caij haeujdaeuj hih nej.”

⁶ Cangqdiq caiq naeuz: “Gou dwg baujcuk baujyouh cojgoeng mwngz dih Cangqdiq, dwg Yaqbwzlahhanj dih Cangqdiq, Hijsaj dih Cangqdiq, Yajgoz dih Cangqdiq.” Mohsih dingq de yienghneix naeuz le, cungj lau hwj got raeuj bae mbouj gamj yawj de.

⁷ Yehhozvaz vanzlij caiq naeuz: “Gou gaenq yawjraen gij vunz gou youq Ngaihgiz ngaiz souh daengz bwkhaih, souh daengz cienfanh dwgrengz sinhoj he, caemh dingqri gyoengqde ngaiz goeng guenj hong bwk gyoengqde hwj gangznaek daejdanq gouz gouq, caemh rox gyoengqde dih haemzhoj.

⁸ Sojhij gou roengz daeuj couh dwg ij gouq gyoengqde, gouq gyoengqde duet ok gij vunz Ngaihgiz, daiq gyoengqde bae daengz mwnq dieg youh gvangq, doem youh biz he, couh dwg dieg ndei, ndaem gogo cungj ndaej sou, couh dwg mwnq dieg Gyahnamz vunz hah, Hwz vunz hah, Yaqmohliq vunz hah, Bijliqsij vunz hah, Hihveiq vunz hah, caeuq Yehbuqswh vunz hah mwnq dieg mwnq bae.

⁹ “Gou saedsaeh gaenq dingq daengz gij sing gij vunz Hijswzlez daejdanq he; gij sing gyoengqde gaenq cenz daeuj daengz ndaw rwz gou lo. Gou caemh yawjraen Ngaihgiz vunz baenzlawz hangz, baenzlawz haep gyoengqde.

¹⁰ Seizneix gou baij mwngz bae laeng goengjvuengz Ngaihgiz mwnq bae, dawz gij vunz gou, couh dwg Hijswzlez vunz, dajlwh Ngaihgiz daiq okma.”

¹¹ Mohsih dingq le, han naeuz: “Gou dwg guxmaz vunz nex? Gou baenzlawz gamj bae laeng goengjvuengz daiq gij vunz Hijswzlez okma nej?”

¹² Cangqdiq han naeuz: “Gou menhcij buenx mwngz, caeuq mwngz youq. Daengj mwngz daiq gij vunz Hijswzlez okma le, faenhsou ij youq gwnz bya neix baiq gou, sax gou; gij neix couh dwg gou baij mwngz bae hih baengzgawq lo.”

¹³ Gajlaeng, Mohsih cam Cangqdiq naeuz: “Hauhnaeuz gou bae daengz gij vunz Hijswzlez mwnq, naeuz: ‘Gou dwg Cangqdiq baij daeuj he, dwg baujcuk baujyouh cojgoeng faenhsou dih Cangqdiq baij gou daeuj dineix lah,’ yiengq, hauhnaeuz gyoengqde cam gou naeuz: ‘Gij coh de heuh maz,’ gou ij baenzlawz naeuz nej?”

¹⁴ Yiengq Cangqdiq han naeuz: “Gou couh dwg boux gag miz seiqseiz miz he.” De caiq doiq Mohsih naeuz: “Mwngz ij yienghneix doiq gij vunz Hijswzlez naeuz: ‘Boux gag miz mwnq baij gou daeuj laeng faenhsou dineix lah.’”

¹⁵ Cangqdiq caiq doiq Mohsih naeuz: “Mwngz ij doiq gij vunz Hijswzlez yienghneix naeuz: ‘Yehhozvaz dwg cojgoeng faenhsou dih Cangqdiq, couh dwg Yaqbwzlahhanj hah, Hijsaj hah, Yajgoz hah dih Cangqdiq; dwg de baij gou daeuj daengz laeng faenhsou dineix.’ Yehhozvaz dwg gij coh gou, seiqseiq daihdaih yungjyenj cungj dwg yienghneix heuh.

¹⁶ “Mwngz bae heuh gij vunz Hijswzlez gangj vah couh baenz he daeuj, doiq gyoengqde naeuz: ‘Yehhozvaz, cojgoeng faenhsou dih Cangqdiq, Yaqbwzlahhanj dih Cangqdiq, Hijsaj dih Cangqdiq, Yajgoz dih Cangqdiq, de yienh hawj gou raen goq. De naeuz: “Gou gaenq cuqhiq daengz faenhsou lo, gaenq yawjraen gij vunz Ngaihgiz baenzlawz doiq faenhsou lo.

¹⁷ Gou itdingh daiq faenhsou ok Ngaihgiz ma, daiq faenhsou bae daengz mwnq dieg gvangq yubyub doem cix biz he, ndaem gogo cungj baenz he, couh dwg Gyahnamz vunz hah, Hwz vunz hah, Yaqmohliq vunz hah, Bijliqsij vunz hah, Hihveiq vunz hah, Yehbuqswh vunz hah youq he dih mwnq dieg mwnq bae.”’

¹⁸ “Mwngz yienghneix naeuz, gyoengqde gaengjdingq dingq gij vah mwngz, yiengq mwngz couh ij daiq gyoengq vunz Hijswzlez gangj vah couh baenz he bae laeng goengjvuengz Ngaihgiz, doiq de naeuz: ‘Yehhozvaz, couh dwg Hihbwzlaiz vunz dih Cangqdiq, yienh hawj gyoengqraeuz raen goq. Seizneix cingj mwngz hawj gyoengqraeuz byaij sam ngoenz roen bae daengz rogndoi bae bwiz Yehhozvaz, raeuz dih Cangqdiq.’”

¹⁹ Cangqdiq caiq doiq Mohsih naeuz: “Hoeng, gou caemh rox, cizfeih gou bwk de, mijn'x de mbouj veiq coengq gyoengqsou okma law.

²⁰ Gou ij yungh gij gienz ak gou ma guh gak cungj geizmiuj daeuj fad gyoengq vunz Ngaihgiz, yiengq goengjvuengz Ngaihgiz gajlaeng vanzlij dwg coengq faenhsou hih.

²¹ “Gou ij hawj gij vunz Ngaihgiz doiq faenhsou ndei, soenhgingq faenhsou; mwh faenhsou ok ma mwhde, couh mbouj ngaiz baet fawz hoengq ma lo,

²² hoeng, moix it boux Hijswzlez hih vunzbaz cungj ij bae laeng gekleiz, couh dwg gij vunzbaz Ngaihgiz caeuq gij hek vunzbaz youq ndaw ranz gyoengqde he, laeng gyoengqde heuh gyoengqde hawj doenghgij aeu gim ma guh he hah, aeu ngaenz ma guh he hah, doenghgij neix caeuq buh hah, aeu ma hawj gyoengq lwg bonjfaenh. Yienghneix, faenhsou couh ndaej dued aeu gij vunz Ngaihgiz dih gyadangq lo.”