Ok Ngaihgiz 29 - Gij Baujcingq Moq Caeuq Geij Bonj Gij Baujcingq Daeuzdaeuz

Laeb goengjsae dajbwiz dih gveihdingq

¹ “Mwngz ij senj Yaqlwnz caeuq doengh daeglwg de okdaeuj gvi hawj gou, laeb gyoengqde guh goengjsae dajbwiz he daeuj swqhaeuh gou. Yiengq ij baenzlaw guh laeb nej? Couh dwg naeuz, mwngz ij aeu duz cwzlwg daeg he caeuq song duz menzyiengzdaeg, doengh duz de ij dwg ndei ndwtndwt mij miz saek yiengh guxmaz he,

² caemh aeu gij mbamienh ceiq ndei he ma guh sam cungj mij fat goq hih bingj; cungj he dwg gyaux youz he, cungj he dwg cat youz he, cungj he dwg mij gyaux mij cat saek yiengh he.

³ Doenghgij bingj neix, mwngz ij coux haeuj ndaw lamz bae, caiq ying duz cwz caeuq song duz menzyiengzdaeg itheij daiq daeuj bwiz gou.

⁴ “Mwngz caemh ij daiq Yaqlwnz caeuq doengh daeglwg de daeuj bakdou cangqbungz caeuq gou doxraen he daeuj bang gyoengqde swiq ndang.

⁵ Swiq cengh le, couh hawj Yaqlwnz sien daenj diuz bauz baixndaw caeuq diuz bauz baixrog, gajlaeng caiq daenj hijfuzdwz caeuq raek baj baiz dangqnaj aek, caiq cug diuz sai hijfuzdwz daemj gyaeugyaeu ndeindei mwnq.

⁶ Gajlaeng caiq dawz mbaw boiq duk raeuj mwnq duk raeuj hawj de le, cij cug baj baiz aeu gim ma guh mwnq cug youq najbyak hawj de.

⁷ Daenj doenghgij neix ndaej le, caiq aeu youz rang ma raix hwnj gwnz dingjraeuj de bae, laeb de guh goengjsae dajbwiz he.

⁸ Mwngz caemh ij hawj doengh daeglwg Yaqlwnz daenj buhbauz boiqsez,

⁹ gyaeb sairwet, duk raeuj. Yiengq, Yaqlwnz caeuq doengh daeglwg de couh ciuq yungjyenj mbouj bienq dih gveihdingq guh goengjsae dajbwiz he daeuj swqhaeuh gou.

¹⁰ “Mwngz ij ying duz cwzlwg daeg ndei ndwtndwt mwnq bae daengz dangqnaj cangqbungz caeuq gou doxraen he mwnq, hawj Yaqlwnz caeuq doengh daeglwg de aeu fawz oemj hwnj gwnz raeuj duz de bae.

¹¹ Yiengq mwngz couh youq bakdou cangqbungz caeuq gou doxraen he, dangqnaj gou, Yehhozvaz, gaj duz cwz neix.

¹² Gaj le, mwngz couh aeu lwgfawz mwngz demj di lwed he hwj hoz haeuj seiq gok dod aen luz dajbwiz bae. Lij lw hih lwed cungj raix haeuj laj aen luz dajbwiz bae liux bae.

¹³ Caiq dawz gij lauzvangx saej de caeuq aen daep de hih mwnq ceiq ndei de, song aen mak de caeuq gij lauzvangx gwnz de, cungj coengq haeuj ndaw luz dajbwiz bae coemh hwj dajbwiz.

¹⁴ Lij gij naeng de hah, gij noh de hah, caeuq gij yaxsij de hah cungj ij dawz ok rog bae coemh hwj bwiz cueg coih.

¹⁵ “Mwngz caemhcaiq ying duz menzyiengzdaeg he daeuj, hawj Yaqlwnz caeuq doengh daeglwg de oemj fawz hwnj gwnz raeuj duz de bae.

¹⁶ Yiengq, mwngz couh gaj duz yiengz neix. Aeu gij lwed de saj haeuj seiqhenz aen luz dajbwiz bae le,

¹⁷ mwngz couh heh duz yiengz neix baenx gaiq baenx gaiq bae. Caemhcaiq swiq gij daepdungx yaxsij de caeuq gij ha de cengh bae le, couh dawz doenghgij neix caeuq ndaek raeuj de

¹⁸ coengq haeuj ndaw luz dajbwiz bae, coemh hwj bwiz gou, Yehhozvaz; gij heiq rang de hawj gou roxnginh haenjheiq.

¹⁹ “Mwngz caiq ij ying daixlingh duz menzyiengzdaeg daeuj laem. Yaqlwnz caeuq doengh daeglwg de caemh ij oemj fawz hwnj gwnz raeuj duz de bae.

²⁰ Mwngz caemh ij gaj duz yiengz neix. Gaj le, couh aeu di lwed he hoz haeuj Yaqlwnz caeuq doengh daeglwg de dih naenhrwz baixgvaz de bae, caiq hoz haeuj lwgfawzmeh baixgvaz caeuq lwgdinmeh baixgvaz gyoengqde bae. Lij lw hih lwed, saj haeuj seiqhenz luz dajbwiz bae.

²¹ Caemhcaiq aeu di youz rang he daeuj, caiq daj gwnz aen luz dajbwiz aeu di lwed he ma saj hwnj gwnz ndang Yaqlwnz caeuq doengh daeglwg de daiqlienz doenghheij buh gyoengqde bae. Yiengq doengh diuz buh gwnz ndang gyoengqde couh caeuq gyoengqde doxdoengz, gaglingh okdaeuj gvi hawj gou.

²² “Mwngz caemh ij aeu gij lauz duz yiengz neix caeuq diuz rieng de, gij lauzvangx saej de, caeuq aen daep de hih mwnq ceiq ndei he hah, song aen mak de caeuq gij lauzvangx gwnz de hah, caeuq bangqha gvaz de hah (aenvih duz yiengz neix dwg aeu ma bwiz hwj laeb goengjsae dajbwiz he),

²³ caiq daj ndaw lamz soengq hawj gou hih aeu aen bingj mij fat goq he, aen bingj gyaux youz mij fat goq he caeuq aen bingj cat youz he,

²⁴ aeu doenghgij neix hawj Yaqlwnz caeuq doengh daeglwg de aeu ma youq dangqnaj gou, Yehhozvaz, vad hwj dajbwiz.

²⁵ Gajlaeng, mwngz couh dajlaeng gyoengqde ciep aeu doenghgij neix ma coengq haeuj aen luz dajbwiz bae coemh, coemh hwj bwiz gou. Gij heiq rang coemh hwj dajbwiz neix hawj gou roxnginh haenjheiq.

²⁶ “Mwngz ij aeu gij noh'aek duz yiengz mwh laeb Yaqlwnz guh boux swqhaeuh gou, soengq hawj gou hih, aeu ma guh vad hwj bwiz gou. Gajlaeng gij noh dajbwiz neix couh dwg gij mwngz lo.

²⁷ “Couh dwg naeuz laeb guh boux swqhaeuh gou dajbwiz dih gij noh'aek caeuq gij nohha yiengz, vad hwj dajbwiz goq he, doenghgij neix couh bienqbaenz dwg dwzbez he lo, couh ij gvi hawj Yaqlwnz caeuq doengh daeglwg de.

²⁸ Famzsoj baezneix gij vunz Hijswzlez vih doxhuz hwj bwiz gou, Yehhozvaz, hih gij noh'aek caeuq gij nohha de, cungj dwg gvi hawj Yaqlwnz caeuq gij lwglan de.

²⁹ “Yaqlwnz rai le, sojmiz gaxgonq de daenj hwj guh goengjsae dajbwiz hih cungj ij cenz hawj gij lwglan de, daihdaih cenz roengzbae, daengz mwh laeb gyoengqde guh goengjsae dajbwiz he daenj.

³⁰ Gij lwglan Yaqlwnz mboujguenj bouxlawz ciep guh boux goengjsae dajbwiz swqhaeuh gou he, cungj ij bae aen cangqbungz caeuq gou doxraen he bijlienz daenj doenghgij neix caet ngoenz.

³¹ “Mwngz ij dawz mwh laeb guh boux swqhaeuh gou bwiz gou hih gij nohyiengz mwnq bae mwnq dieg dwzbez gou cawj.

³² Yiengq, Yaqlwnz caeuq doengh daeglwg de ij youq bakdou cangqbungz caeuq gou doxraen he gw gij noh duz yiengz neix caeuq gij bingj ndaw lamz.

³³ Caenhgag gyoengqde cij ndaej gw doenghgij neix; aenvih mwh laeb gyoengqde guh boux swqhaeuh gou hih mwhde, gaenq yungh gij noh neix caeuq gij bingj neix ma cueg gij coih bonjfaenh gyoengqde lo, sojhij mbouj dwg goengjsae dajbwiz hih, cungj mbouj ndaej gw.

³⁴ Hauhnaeuz ngoenz mwnq gij noh dajbwiz caeuq gij bingj dajbwiz gw mbouj liux nex, ij dawz ma coemh bae; mbouj ndaej diuh daengz ngoenz daixngeih gw laem lo, aenvih doenghgij neix gaenq gvi hawj gou lo.

³⁵ “Mwngz ij ciuq gou raengq mwngz hih yienghmwnq bae bang Yaqlwnz caeuq doengh daeglwg de guh doenghgij saeh neix, couh dwg laeb gyoengqde guh goengjsae dajbwiz dih hong, ij bijlienz guh caet ngoenz.

³⁶ Mwngz ngoenznaengz cungj ij aeu duz cwzdaeg he daeuj bwiz cueg coih caeuq hawj aen luz dajbwiz bienqbaenz hab'eiq habhoz gou he, caemh hoz youz rang haeuj aen luz dajbwiz bae, hawj aen de gvi hawj gou.

³⁷ Mwngz ij bijlienz yienghneix guh caet ngoenz, hawj aen luz dajbwiz bienqbaenz dwzbez hwj gaglingh gek okdaeuj he. Mboujguenj vunz haj cixnaeuz guxmaz, bungq dawz ngad dawz aen de hih, cungj ij gvi hawj gou.

³⁸ “Mwngz ngoenznaengz cungj ij dawz song duz bi he dih yiengzlwg daeg ma dajbwiz,

³⁹ doengxhaet duz he, yiengqhaemh duz he.

⁴⁰ Doengxhaet bwiz hih duz yiengz mwnq, caemh ij aeu song gaen youz makmbi ndei he gyaux song gaen mbamienh ndei he hwj, caiq aeu song gaen laeuj buzdauz he daeuj doxcaeuq bwiz.

⁴¹ Daengz yiengqhaemh bwiz hih duz daixngeih caemh ij luj doengxhaet yienghmwnq doxdoengz guh hwj bwiz; cungj dajbwiz hawj gou neix, gij rang de hawj gou roxnginh simsoeng, haenjheiq.

⁴² “Gij neix dwg faenhsou seiqseiq daihdaih cungj ij ciuq yienghneix youq bakdou cangqbungz caeuq Cangqdiq doxraen he coemh hwj dajbwiz gou; mwnq caemh dwg gou caeuq faenhsou Hijswzlez vunz doxraen raengq mwngz he.

⁴³ Gou youq mwnq caeuq gij vunz gou doxraen, gij rongh gou rongh hwj mwnq dieg mwnq youq ndaw lwgra gou bienqbaenz mwnq dwzbez he.

⁴⁴ “Gou ij hawj aen cangqbungz caeuq gou doxraen he caeuq aen luz dajbwiz gvi hawj gou. Yaqlwnz caeuq doengh daeglwg de caemh ij gvi hawj gou guh goengjsae dajbwiz he daeuj swqhaeuh gou.

⁴⁵ Gou ij youq ndaw Hijswzlez vunz youq, guh gyoengqde dih Cangqdiq.

⁴⁶ Gou ij hawj gyoengqde rox gou dwg Yehhozvaz, gyoengqde dih Cangqdiq. Gou daj Ngaihgiz daiq gyoengqde okma, couh dwg ij caeuq gyoengqde youq. Gou dwg Yehhozvaz, gyoengqde dih Cangqdiq.