Ok Ngaihgiz 28 - Gij Baujcingq Moq Caeuq Geij Bonj Gij Baujcingq Daeuzdaeuz

Nyib diuz buh goengjsae dajbwiz dih gveihdingq

¹ “Mwngz ij daj ndaw gij vunz Hijswzlez ndaw de senj aeu daeggo mwngz Yaqlwnz caeuq doengh daeglwg de Nazdaz hah, Yaqbijhuq hah, Hijliqyaqsaj hah, caeuq Hijdahmaj hah okdaeuj, laeb gyoengqde guh goengjsae dajbwiz hwj daeuj swqhaeuh gou.

² Mwngz ij nyib diuz buh swqhaeuh gou cij ndaej daenj he hawj daeggo mwngz, hawj de daenj le, engqgya raen miz vi, cix raen baenxmbauq.

³ Mwngz ij raengq doengh boux gou soengq hawj gyoengqde caixhangz, coengjmingz, fawzsoem he nyib buh hawj Yaqlwnz daenj, hawj de ndaej guh boux cenmonz bang vunz dajbwiz he daeuj swqhaeuh gou.

⁴ Raengq gyoengqde guh baj baiz venj youq aen aek he, caemh nyib hijfuzdwz, caeuq diuz bauz baixrog hah, diuz bauz baixndaw boiqsez he hah, boiq duk raeuj hah, sairwet hah. Gyoengqde ij nyib doenghgij neix hawj daeggo mwngz caeuq doengh daeglwg de daenj, hawj gyoengqde cenmonz guh boux bang vunz dajbwiz he daeuj swqhaeuh gou.

⁵ Doenghgij neix cungj dwg ij aeu maegim hah, maemaz lamz hah, maemaz aeuj hah, maemaz hoengz hah ma daemj hwj nyib.

Nyib hijfuzdwz dih gveihdingq

⁶ “Ij aeu maegim hah, maemaz lamz hah, maemaz aeuj hah, maemaz hoengz hah ma hawj doengh boux fawzsoem he daemj hwj nyib hijfuzdwz.

⁷ Hijfuzdwz hih song diuz banqmbaq ij caeuq hijfuzdwz hih benq dangqnaj caeuq benq baixlaeng de doxciep baenz diuz buh he.

⁸ Diuz sai hijfuzdwz caemh ij yungh doxdoengz hih liuq ma hawj boux fawzsoem he daemj.

⁹ “Aeu song gaiq hungzmajnauj ma dik cibngeih daeglwg Hijswzlez hih coh hwnjbae,

¹⁰ it gaiq dik roek boux hih coh, daj hung daengz iq, ciuq swnqsiq dik hwnjbae.

¹¹ Hawj boux fawzsoem rox dik swhcangh he dik doenghgij coh gij lwg Hijswzlez hwnj gwnz song gaiq baujsig neix bae, caemh ij dawz gaiq baujsig haemq youq gaiq gvang aeu maegim ma san gyaeugyaeu ndeindei he bae.

¹² Gajlaeng, couh dawz song gaiq baujsig neix gep hwnj gwnz hijfuzdwz hih song diuz banqmbaq de bae, guh geiqniemh gij vunz Hijswzlez dih geiqniemh rin. Yiengq song gwnz mbaq Yaqlwnz rap miz gij coh gyoengqde, youq dangqnaj gou, Yehhozvaz guh geiqniemh.

¹³ “Ij aeu gim ma san song gaiq ndaej haemq gij baujsig dik miz doenghgij coh gij lwg Hijswzlez he,

¹⁴ caemh ij aeu gim ma diz song diuz lienh. Diz song diuz lienh neix ij diz luj cag laenz, ij riengh youq gwnz song gaiq haemq miz baujsig mwnq.

Guh baizaek dih gveihdingq

¹⁵ “Ij guh gaiq baizaek ndaej guh gyezdingq he hawj goengjsae dajbwiz, caemh luj guh hijfuzdwz ityiengh, hawj boux fawzsoem caixhangz he aeu maegim hah, maemaz lamz hah, maemaz aeuj hah, maemaz hoengz hah ma guh.

¹⁶ Gaiq baiz neix ij boeb miz song caengz hwj, caemh dwg seiq cingq seiq gok he, cungj dwg cap raez he.

¹⁷ Ij youq gwnz de haemq miz seiq coij baujsig. Coij daixdaeuz gep hungzbaujsig, vangzhiq caeuq hungzhiq;

¹⁸ coij daixngeih gep luzbaujsig, lamzbaujsig caeuq conqsig;

¹⁹ coij daixsam gep swjmajnauj, bwzmajnauj caeuq swjsingh;

²⁰ coij daixseiq gep ceijcanghhiq, hungzmajnauj, bizhiq. Doenghgij neix cungj ij haemq youq aen gvang aeu maegim ma san he.

²¹ Moix it gaiq baujsig hih gwnz de caemh luj dik swhcangh yienghmwnq dik it daeglwg Hijswzlez hih gij coh de hwnjbae; cibngeih gaiq baujsig daiqbiuj Hijswzlez vunz hih cibngeih aen cuz.

^22-23 “Caemh guh song aen gyengx gim hwj riengh youq gaiq baizaek hih song gok gwnz de. [22]Dawz song diuz lienh diz luj cag laenz mwnq,

²⁴ it raeuj riengh youq it aen gyengx gim.

²⁵ Linghvaih song raeuj, it raeuj riengh it gaiq aeu gim ma san hwj haemq song gaiq baujsig mwnq, gajlaeng caiq riengh hwnj diuz banqmbaq hih dangqnaj bae.

²⁶ Caiq diz song aen gyengx gim riengh youq gaiq baiz linghvaih song gok youq mbiengj baixndaw de dep hijfuzdwz.

²⁷ Vanzlij caiq diz song aen gyengx gim hwj, haeuq haeuj song diuz banq dangqnaj hijfuzdwz hih raeuj laj de dep mwnq doxciep de caeuq baixgwnz diuz sai gyaeu gywtgywt de.

²⁸ Aeu cag lamz ma cug aen gyengx baiz caeuq aen gyengx hijfuzdwz gaenj hwj, hawj gaiq baiz nem youq gwnz diuz sai hijfuzdwz, nem gaenj bae.

²⁹ “Yaqlwnz haeuj bae cangqbungz hih mwhde, ij raek baj baiz gwnz de dik miz cibngeih daeglwg Hijswzlez hih coh hih baj baiz mwnq, raek youq aen aek mwnq dep aen sim mwnq; yienghmwnq gou, Yehhozvaz, couh ndaejgeiq lo.

³⁰ Caemh ij dawz gaiq Uhlingz caeuq Dujmingz coengq youq ndaw baizaek hwj. Yaqlwnz daengz dangqnaj Yehhozvaz mwhde, ij raek youq aen aek, couh dwg youq dangqnaj Yehhozvaz ij siengzseiz dawz gaiq gyezdingqbaiz raek youq aen aek.

Nyib buhbauz dih gveihdingq

³¹ “Mwngz ij nyib diuz buhbauz lamz mbangjmbaek baixrog he daenj youq baixndaw hijfuzdwz.

³² Diuz bauz ij guh miz mwnq ndonj hoz he. Mwnq ndonj hoz de ij san miz bien hwj, mbouj hawj de yungzheih lig.

^33-34 Ij aeu mae lamz hah, mae aeuj hah, mae hoengz hah ma san luj aen maksigsoux hwj riengh haeuj diuz bauz hih gij bing de bae, [33b,34]aen caeuq aen doxgek hih mwnqde caemh miz doengxlingz gim.

³⁵ Yaqlwnz swqhaeuh gou hih mwhde, bietdingh ij daenj diuz bauz neix; daenj le, haeuj cangqbungz bae daengz dangqnaj gou, Yehhozvaz, caeuq de ok ma mwhde, ndaej dingqri doengh aen doengxlingz neix yiengj le, de couh mbouj ngaiz rai lo.

Guh baiz coengq najbyak dih gveihdingq

³⁶ “Mwngz ij aeu gim ma guh baj baiz he, gwnz de ij dik miz ‘Gvi haeuj Yehhozvaz.’

³⁷ Ij aeu diuz cag lamz he ma cug baj baiz neix youq gwnz boiq duk raeuj mwnq najbyak mwnq he.

³⁸ Yaqlwnz dawz baj baiz neix cug youq najbyak couh dangq naeuz de gaenq rap hwnj gij vunz Hijswzlez bwiz gou hih mwhde guh loek he lo. De ij siengzseiz dawz baj baiz neix cug youq najbyak; yienghneix gou, Yehhozvaz, caemh haenj gij vunz Hijswzlez nyok hawj gou hih doxgaiq.

Guh bauz baixndaw, boiq duk raeuj caeuq sairwet dih gveihdingq

³⁹ “Ij aeu saeqsaeq nuenxnuenx maemaz ma daemj guh boiqsez hwj nyib diuz bauz baixndaw, caemh aeu saeqsaeq nuenxnuenx maemaz ma daemj guh boiq duk raeuj, caemh daemj guh diuz sairwet.

⁴⁰ Mwngz caemh ij nyib buhbauz boiqsez caeuq sairwet caeuq boiq duk raeuj hawj doengh daeglwg Yaqlwnz, hawj gyoengqde daenj le, engqgya raen miz vi, cix baenxmbauq.

⁴¹ Mwngz ij hawj daeggo mwngz caeuq doengh daeglwg de daenj doenghgij buh neix, caeuq boiq duk raeuj hah, sairwet hah, caemh raix youz rang hwnj gwnz dingjraeuj gyoengqde hawj gyoengqde gaglingh okdaeuj gvi hawj gou, laeb gyoengqde guh goengjsae dajbwiz he daeuj swqhaeuh gou.

Nyib caeuq daenj vaqdonhboux dih gveihdingq

⁴² “Aeu boiqmaz ma nyib vaqdonhboux hawj gyoengqde.

⁴³ Yaqlwnz caeuq doengh daeglwg de haeuj ndaw cangqbungz caeuq gou doxraen he bae cixnaeuz bae dep aen luz dajbwiz daeuj swqhaeuh gou hih mwhde, cungj ij daenj diuz vaqdonhboux neix youq baixndaw, ndaej cw gyeh ndang laj de, mienxndaej ngaiz daekcoih dawz gou le ngaiz rai. “Gij neix dwg Yaqlwnz caeuq doengh daih gajlaeng de yungjyenj dih gveihdingq.