Ok Ngaihgiz 27 - Gij Baujcingq Moq Caeuq Geij Bonj Gij Baujcingq Daeuzdaeuz

Guh aen luz dajbwiz dih gveihdingq

¹ “Mwngz ij aeu faex gimhhozvuenh ma doq aen luz coemh doenghduz hwj dajbwiz he. Aen de dwg seiq cingq seiq gok he; gij raez de caeuq gij gvangq de cungj dwg song mij sam, gij sang de it mij sam sang.

² Aen luz dajbwiz neix mwnq gok de ij guh miz gok dod hwnjdaeuj he hwj; gok caeuq luz dwg doxlienz he, caemh dwg aeu doengz ma baux hwj.

³ Caemh aeu doengz ma guh doengj coux daeuh hah, fag canj hah, buenz coux lwed hah, fag ca yamx noh hah, buenz coux gyoqfeiz hah. Gwnz aen luz soj yungh hih cungj ij aeu doengz ma guh.

⁴ Caemh ij guh fan vangx doengz he boiq aen luz dajbwiz. Fan vangx neix seiq gok de caemh ij guh miz gyengx doengz.

⁵ Ij ding fan vangx neix youq ndaw aen luz dajbwiz neix daj laj hwnj daeuj dingxfaen he.

⁶ Caemh aeu faex gimhhozvuenh ma guh diuz ram de; diuz ram neix caemh dwg aeu doengz ma baux hwj.

⁷ Dawz diuz faex neix con haeuj song aen gyengx henz de bae le, couh ndaej seizbienh ram lo.

⁸ Aen luz dajbwiz neix cungj dwg aeu faex ma doq; cungqgyan de dwg hoengq he. Mwngz ij ciuq gou youq gwnz bya hawj mwngz raen hih yienghmwnq bae guh.

Guh veizciengz dih gveihdingq

⁹ “Mwngz caemh ij guh veizciengz hawj cangqbungz; ij aeu saeqsaeq nuenxnuenx maemaz ma daemj guh boiq hwj veiz. Mienh baixnamz de gij raez de ij miz seiqcib haj mij raez;

¹⁰ ij aeu ngeihcib diuz dongh daiqlienz ngeihcib aen cap doengz ma guh venj boiq hwj veiz. Doenghgij ngaeu gwnz de caeuq doengh diuz gaq doxciep gwnz de cungj dwg aeu ngaenz ma guh.

¹¹ Mienh baixbaek caemh ij miz seiqcib haj mij raez, caemh ij cap ngeihcib diuz dongh, laj de caemh miz ngeihcib aen cap doengz. Gij ngaeu gwnz de caeuq doengh diuz gaq doxciep gwnz de cungj dwg ij aeu ngaenz ma guh.

¹² “Mienh baixsae de ij miz ngeihcib ngeih mij haj gvangq; ij miz cib diuz dongh daiqlienz aen cap de.

¹³ Mienh baixdoeng de, couh dwg mienh miz bakdou mwnq, ij miz ngeihcib ngeih mij haj gvangq.

^14-15 Bakdou dih song mbiengj de, moix mbiengj caemh ij miz caet mij gvangq caeuq sam diuz dongh daiqlienz aen cap de.

¹⁶ “Bakdou veizciengz caemh ij miz gouj mij gvangq. Fan yiemzdou cungj dwg aeu saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma hawj doengh boux rox daemj boiq he daemj hwj guh, caemh dwg venj youq seiq diuz dongh daiq miz seiq aen cap he.

¹⁷ Doengh diuz gaq baixgwnz ciep doengh diuz dongh veizciengz hih, caeuq gij ngaeu gwnz diuz dongh hih ij aeu ngaenz ma guh; doengh aen cap de ij aeu doengz ma guh.

¹⁸ “Cangqbungz dih veizciengz ij miz seiqcib haj mij raez, ngeihcib ngeih mij haj gvangq, song mij sam sang. Boiq veizciengz ij aeu maemaz ma daemj guh, caemh dwg aeu doengz ma guh aen cap de.

¹⁹ Cangqbungz gak mwnq soj yungh dih doxgaiq hah, doengh diuz ding hah, caeuq sojmiz hih doengh diuz ding veizciengz hah, cungj dwg aeu doengz ma guh.

Diemj daeng dih gveihdingq

²⁰ “Mwngz ij raengq gij vunz Hijswzlez, hawj gyoengqde aeu gij youz makmbi daj ndaw rum daem okdaeuj mij'z youz giek he cenmonz aeu ma diemj daeng he, dawz daeuj hawj mwngz diemj daeng; haemhhaemh cungj ij rongh daeng cij ndaej.

²¹ Yaqlwnz caeuq daeglwg de youq ndaw cangqbungz, baixrog fanyiemz gek hwj coengq miz aen gvih coengq baengzgawq mwnq, daj doengxhaemh daengz doengxhaet youq dangqnaj Cangqdiq diemj aen daeng cangqbungz, hawj aen de seiqseiz rongh. Doenghgij neix gij vunz Hijswzlez seiqseiq daihdaih cungj ij soenhsouj.