Ok Ngaihgiz 26 - Gij Baujcingq Moq Caeuq Geij Bonj Gij Baujcingq Daeuzdaeuz

Guh cangqbungz dih gveihdingq

¹ “Mwngz ij yungh cib fuk boiqmaz ma guh cangqbungz; doengh fuk boiqmaz neix fukfuk cungj miz sam cungj saek: saeklamz, saekaeuj, saekhoengz, caemh dwg hawj doengh boux fawzsoem rox daemj boiq he daemj. Doengh fuk neix gwnz de cungj caemh ij daemj miz duz gihluqbwz hwj.

² Moix fuk gij raez de ij miz cibngeih mij raez, gij gvangq de caemh ij miz song mij gvangq; doengh fuk neix ijaeu cikconq doxdoengz.

³ Mwngz ij dawz haj fuk haj fuk doxneb swnj hwnjdaeuj, faen guh song fuk hwj.

^4-5 Song fuk neix hih fuk he gij bien gatsat de caeuq daixlingh fuk hih gij bien daixdaeuz de caemh ij guh miz hajcib gaiq nuk lamz. Doengh gaiq nuk neix cungj ij nuk caeuq nuk doxdoiq.

⁶ Caemh ij guh hajcib gaiq ngaeu gim; yungh doenghgij ngaeu neix ma ngaeu doengh fuk neix le cij ndaej guhbaenz aen cangqbungz he.

⁷ “Mwngz caemh ij aeu fwn yiengzbya ma daemj hwj guh cib'it fuk boiq fwn, aeu ma guh gij goemq cangqbungz.

⁸ Moix fuk dih gij raez de ij miz cibsam mij raez, gij gvangq de caemh ij miz song mij gvangq; cib'it fuk neix dih gij cikconq de caemh dwg doxdoengz.

⁹ Ij dawz haj fuk doxneb swnj hwnjdaeuj guh fuk he, caemh ij dawz roek fuk doxneb swnj hwnjdaeuj guh fuk he. Roek fuk doxneb swnj neix hih buenq fuk gajlaeng de ij boeb hwj goemq youq gwnz bakdou cangqbungz.

¹⁰ Haj fuk doxneb swnj neix dih gij bien gatsat de ij guh miz hajcib gaiq nuk, roek fuk doxneb swnj mwnq dih gij bien daixdaeuz de caemh ij guh hajcib gaiq nuk.

¹¹ Caiq guh hajcib gaiq ngaeu doengz ngaeu youq doengh gaiq nuk mwnq hwj, hawj song fuk mwnq bienqbaenz vangq goemq cangqbungz he.

¹² Vangq goemq cangqbungz neix lij lw hih buenq fuk ij vuih youq cangqbungz hih baixlaeng de.

¹³ Vangq goemq cangqbungz neix hih song henz de, moix it mbiengj lij lw buenq mij, caemh ij vuih youq song henz hwj goemq cangqbungz.

¹⁴ Caemh ij aeu naeng yiengzbya yomx hoengz ma guh fan goemq cangqbungz, caemhcaiq yungh naeng haijbauq ma guh fan goemq ceiq gwnz dingj de.

¹⁵ “Mwngz ij aeu benj gimhhozvuenh ma daengj hwj guh gij ciengz cangqbungz.

¹⁶ Moix it dip benj ijaeu miz seiq mij haj sang, gvangq ijaeu miz caetcib gunghfaenh gvangq.

¹⁷ Moix dip benj hih raeuj he bietdingh ij siuq miz song gij yod; guh ciengz cangqbungz sojmiz hih benj cungj ij yienghneix guh.

¹⁸ Cangqbungz dih mienh baixnamz ij miz ngeihcib dip benj daengj guh ciengz.

¹⁹ Laj daej ciengz ij aeu ngaenz ma guh miz seiqcib congh hwj ndaej cap doengh dip benj neix haeuj bae he, moix dip cap song congh.

²⁰ Cangqbungz hih mienh baixbaek caemh ij aeu ngeihcib dip benj guh ciengz.

²¹ Laj daej ciengz ij aeu ngaenz ma guh seiqcib congh hwj ndaej cap haeujbae he; moix it dip benj boiq miz song congh.

²² Cangqbungz dih mienh baixlaeng de, couh dwg mienh baixsae, ij miz roek dip benj guh ciengz.

^23-24 Cangqbungz hih song gok ciengz baixlaeng de, [23b,24b]it gok ij miz song dip benj doxnem hwj guh gok ciengz; [24a]song dip benj hih gij raeuj de ij aeu gyengx ma gu hwj. Song gok ciengz cungj dwg guh doxdoengz.

²⁵ Couh dwg cangqbungz hih mienh baixlaeng de itgungh miz bet dip benj caeuq cibroek congh aeu ngaenz ma guh he, moix dip hih laj de cungj boiq guh miz song congh.

^26-27 “Mwngz caemh ij aeu faex gimhhozvuenh ma guh diuz lanz vang de, [26b,27a]it mbiengj cangqbungz cang haj diuz, [27b]baixlaeng de caemh cang miz haj diuz.

²⁸ Diuz lanz cungqgyan ij daj raeuj lanz daengz raeuj.

²⁹ Doengh dip benj neix ij aeu gim ma baux hwj, caemh ij aeu gim ma guh gyengx cij ndaej con diuz faex lanz de haeujbae. Diuz faex lanz caemh ij aeu gim ma baux.

³⁰ “Mwngz ij ciuq gou youq gwnz bya hawj mwngz raen hih yienghmwnq bae dap cangqbungz.

³¹ “Mwngz ij aeu saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma hawj doengh boux fawzsoem he daemj hwj guh fanyiemz. Fanyiemz gwnz de caemh ij daemj miz duz gihluqbwz.

³² Ij dawz fanyiemz neix venj youq seiq diuz dongh faex gimhhozvuenh aeu gim ma baux he. Doengh diuz dongh neix gwnz de miz ngaeu gim; seiq diuz dongh cap youq seiq congh aeu ngaenz ma guh he.

³³ Fanyiemz venj youq gij ngaeu gwnz de, roengz gek hwj guh fungh ndaw fungh rog; fungh ndaw dwg gou youq he. Aen gvih coengq miz baengzgawq mwnq coengq youq baixndaw fanyiemz.

³⁴ Caiq dawz fagoemqcoih coengq youq gwnz gvih ndaw fungh hwj.

³⁵ Dawz aen daiz baij bingj an youq fungh baixrog hih mienh baixbaek de; aen gyaqdaeng coengq youq fungh baixrog hih mienh baixnamz de caeuq aen daiz doxdoiq hwj.

³⁶ “Mwngz ij aeu saeqsaeq nuenxnuenx hih maemaz lamz hah, maemaz aeuj hah, maemaz hoengz hah ma hawj doengh boux rox daemj boiq he daemj hwj guh fan yiemzdou cangqbungz.

³⁷ Caemh ij aeu faex gimhhozvuenh ma guh fan yiemzdou neix hih haj diuz dongh de. Doengh diuz dongh neix ij aeu gim ma baux hwj, gwnz de caemh ij guh miz ngaeu gim, caeuq aeu doengz ma guh haj diuz dongh neix hih haj congh cap.