Ok Ngaihgiz 25 - Gij Baujcingq Moq Caeuq Geij Bonj Gij Baujcingq Daeuzdaeuz

Gien doxgaiq daeuj guh cangqbungz

¹ Yehhozvaz doiq Mohsih naeuz:

² “Mwngz naeuz gij vunz Hijswzlez ni, naeuz hawj gyoengqde soengq doxgaiq daeuj hawj gou. Bouxlawz nyienh'eiq soengq hawj gou hih, faenhsou couh bang gou sou haeujma.

³ Faenhsou ndaej sou hih dwg gim hah, ngaenz hah, doengz hah,

⁴ saeqsaeq nuenxnuenx hih maemaz lamz hah, maemaz aeuj hah, maemaz hoengz hah, caeuq fwn yiengzbya hah,

⁵ naeng yiengzgoeng yomx hoengz hah, naeng haijbauq hah, caeuq faex gimhhozvuenh hah,

⁶ youz daeng hah, caeuq guh youz rang guh yieng dih yanghliuq hah,

⁷ doenghgij aeu ma gep youq hijfuzdwz, diuz buh goengjsae dajbwiz mwnq hah, caeuq aeu ma guh baj baiz venj youq aen aek he hih hungzmajnauj hah, vanzlij miz gak cungj baujsig hah haem, doenghgij neix faenhsou cungj ndaej bang gou sou.

⁸ “Gij vunz ij guh aen ranz hab gou youq he, hawj gou ndaej caeuq gyoengqde youq he.

⁹ Guh cangqbungz caeuq ndaw cangqbungz sojmiz dih doxgaiq, cungj ij ciuq gou hawj mwngz yawj hih gij yiengh mwnq bae guh.

Guh aen gvih coengq miz baengzgawq dih gveihdingq

¹⁰ “Ij aeu faex gimhhozvuenh ma doq aen gvih he. Aen gvih gij raez de ij miz itbak itcib sam gunghfaenh raez, gij gvangq caeuq gij sang de caemh ij miz caetcib gunghfaenh.

¹¹ Aen gvih hih ndaw de caeuq rog de cungj ij aeu cwnz hih gim ma baux liux, gij bien seiqhenz de caemh ij aeu gim ma gep hwj.

¹² Vanzlij daj seiq aen gyengx gim hwj ding youq seiq gij ha de, moix mbiengj song aen.

¹³ Caemh ij yungh faex gimhhozvuenh ma guh song diuz faex ram de; song diuz neix caemh ij aeu gim ma baux hwj.

¹⁴ Song diuz faex neix ij con haeuj aen gvih neix hih song mbiengj gyengx gim he bae, ndaej fungbienh ram.

¹⁵ Song diuz faex neix ij siengzseiz dauh youq ndaw gyengx de; mbouj ndaej yot okma.

¹⁶ Ij dawz baj rin gou sij miz fazliz soengq hawj mwngz hih mwnq, coengq haeuj ndaw de bae.

¹⁷ “Caemh ij aeu cwnz hih gim ma guh fa goemq aen gvih neix; aen fa neix caemh dwg heuh ‘fagoemqcoih.’ Gij raez de itbak itcib sam gunghfaenh, gvangq ij miz caetcib gunghfaenh.

¹⁸ Caemh aeu gim ma diz song duz gihluqbwz, coengq youq fagoemqcoih hih song raeuj de.

¹⁹ It raeuj coengq it duz gihluqbwz, caeuq fagoemqcoih doxnem.

²⁰ Song duz gihluqbwz naj doiq naj yawj roengz fagoemqcoih aj fwed hwj goemq aen de.

²¹ Dawz baj rin sij miz fazliz, gou ij soengq hawj mwngz hih baj rin mwnq, coengq haeuj ndaw gvih bae; caemh dawz fagoemqcoih an youq gwnz gvih de.

²² Gou ij youq mwnq caeuq mwngz doxraen, caemh ij dajlwh cungqgyan song duz gihluqbwz gwnz fagoemqcoih mwnq caeuq mwngz gangj, gangj naeuz gou ij dingh hawj gij vunz Hijswzlez sojmiz dih mingqlingq.

Guh daiz baij bingj dih gveihdingq

²³ “Ij yungh faex gimhhozvuenh ma doq aen daiz he, gij raez de goujcib gunghfaenh, gij gvangq de seiqcib haj gunghfaenh, gij sang de caetcib gunghfaenh.

²⁴ Ij aeu cwnz hih gim ma baux hwj, seiqhenz de caemh ij gep miz gim.

²⁵ Aen daiz dih seiqhenz de ij doq miz luj baj fawz gvangq hih begdaiz; diuz begdaiz de ij gep miz gim.

²⁶ Seiq gok ha daiz, caemh ij ding miz seiq aen gyengx gim.

²⁷ Seiq aen gyengx gim ij ding youq baixrog begdaiz, ding hawj de ndaej con faex ram hwj.

²⁸ Song diuz faex ram daiz ij aeu faex gimhhozvuenh ma guh, caemh ij aeu gim ma baux liux bae.

²⁹ Doenghheij buenz hah, deb hah, huzlaeuj hah, caeuq vanj caem laeuj hah, doengh aen ij coengq youq gwnz daiz neix, cungj ij aeu gim ma guh.

³⁰ Aen daiz neix ij baij youq dangqnaj gou; gwnz daiz ij siengzseiz baij miz bingj.

Guh gyaqdaeng dih gveihdingq

³¹ “Ij yungh cwnz hih gim ma guh aen gyaqdaeng he. Aen gyaqdaeng dih gij hangx de hah, gij ganj de hah, caeuq doengh aen cenj coux youz luj duj va gwnz de hah, duqva caeuq limqva de hah cungj dwg caemh ngauq gim he diz okdaeuj doxlienz he.

³² Aen gyaqdaeng de it mbiengj iet miz sam nga, song mbiengj itgungh miz roek nga.

³³ Moix it nga miz sam duj luj duj va; doengh duj va neix luj vagingq nwih, miz duqva, limqva. Roek nga neix, nga'nga cungj doxdoengz.

³⁴ Aen gyaqdaeng hih diuz ganj cungqgyan de caemh miz seiq duj luj vagingq, miz duqva, miz limqva.

³⁵ Aen gyaqdaeng dih moix song nga doxdoiq hih laj doenj doxgap de cungj miz duj he; aen gyaqdaeng miz roek nga, cungj dwg doxdoengz.

³⁶ Duj va de caeuq gij nga de cungj dwg doxciep; cungj dwg ngauq gim dog diz okdaeuj caemh doxlienz he.

³⁷ Caemh ij guh aen gyaqdaeng neix hih caet aen daeng de. Doengh aen daeng neix ij ciuq yiengq dangqnaj bae.

³⁸ “Aen gyaqdaeng neix hih fag nep muenxdaeng de caeuq aen buenz de cungj dwg ij aeu cwnz hih gim ma guh.

³⁹ Ij aeu roekcib bet gaen cwnz hih gim ma guh aen gyaqdaeng neix caeuq de soj yungh hih gak yiengh.

⁴⁰ Mwngz ijaeu siujsim, ij ciuq gou youq gwnz bya hawj mwngz raen hih, raengq mwngz hih yienghmwnq ma guh.