Ok Ngaihgiz 24 - Gij Baujcingq Moq Caeuq Geij Bonj Gij Baujcingq Daeuzdaeuz

Cangqdiq dingh baujcingq lienz diuzgyenq hawj gij vunz Hijswzlez

¹ Yehhozvaz doiq Mohsih naeuz: “Mwngz caeuq Yaqlwnz hah, Nazdaz hah, Yaqbijhuq hah, caeuq caetcib boux Hijswzlez vunz gangj vah couh baenz he hwnj daeuj laeng gou neij, hoeng, faenhsou ij daj lizgyae cix gvih roengzma sax gou lo.

² Caenhgag ndaej mwngz daeuj gaenh gou lah; lij lw hih vunz mboujcwnj daeuj gaenh gou, gij vunz caemh mbouj ndaej gaen mwngz hwnj bya daeuj.”

³ Yiengq, Mohsih couh roengz bya ma, dawz Yehhozvaz soj gangj hih vah caeuq soj dingh hih gveihdingq gangj naeuz gij vunz ni. Gyoengq vunz cungj doengxcaez han bak naeuz: “Yehhozvaz soj raengq hih, gyoengqraeuz gaengjdingq ciuq guh!”

⁴ Gajlaeng, Mohsih caemh dawz Yehhozvaz soj mingqlingq hih cungj sij hwnjdaeuj lo. Daengz haet daixngeih daihcaeux, Mohsih couh youq laj dinbya caeb aen luz dajbwiz he, caemh ciuq gij vunz Hijswzlez dih cibngeih aen cuz ma caep cibngeih dongqsaeu,

⁵ caiq hawj gij vunzsai Hijswzlez hih boux haemq hauxseng he bae aeu cwzlwg daeg ma gaj le coemh hwj bwiz Yehhozvaz, caemh vih muengh ndaej doxhuz hwj caemh aeu cwzlwg daeg ma gaj hwj bwiz.

⁶ Mohsih dawz gij lwed cwzlwg daeg coux mbangj youq ndaw buenz, mbangj saj youq gwnz luz dajbwiz le,

⁷ couh dawz Yehhozvaz soj dingh hih doeg naeuz gij vunz ni. Gyoengq vunz dingq le, cungj naeuz: “Yehhozvaz soj dingh hih gveihdingq, gyoengqraeuz gaengjdingq ciuq hengz.”

⁸ Gyoengq vunz gangj sat, Mohsih couh dawz gij lwed ndaw buenz saj hwnj gwnz ndang gyoengq vunzlai bae, naeuz: “Gij neix dwg daiqbiuj Yehhozvaz caeuq faenhsou dingh dih baujcingq lienz diuzgyenq dih lwed.”

⁹ Gajlaeng, Mohsih, Yaqlwnz, Nazdaz, Yaqbijhuq caeuq caetcib boux Hijswzlez vunz gangj vah couh baenz he cungj hwnj bangxbya bae.

¹⁰ Gyoengqde hwnj bae le, yawjraen Hijswzlez dih Cangqdiq, yawjraen laj din de caenh lujnaeuz ndwn youq mwnq aeu lamzbaujsig ma bu roen he nwih, o soemxsoemx, cengh yupyup.

¹¹ Gannaeuz gyoengqde muenghyawj Cangqdiq lah, hoeng, Cangqdiq gaenhbaenj mij sienghaih gyoengqde saek boux. Gajlaeng gyoengqde couh youq mwnq itheij gw.

Mohsih bae gwnz bya Sihnaiq

¹² Gajlaeng Yehhozvaz doiq Mohsih naeuz: “Mwngz hwnj bya laeng gou dineix daeuj, youq dineix youq; gou ij dawz baj rin gou sij miz hih fazliz caeuq mingqlingq soengq hawj mwngz, hawj mwngz dawz ma son gij vunzlai.”

^13-14 Yiengq, Mohsih couh raengq gij vunz Hijswzlez gangj vah couh baenz he, naeuz: “Faenhsou youq dineix daengj gou ma. Dineix miz Yaqlwnz caeuq Huqwj caeuq faenhsou youq; hauhnaeuz beksingq miz maz saeh doxcwngq doxceng hih, couh bae cimh song boux de bax.” 13Gangj sat le, de couh caeuq Yozcuhyaq, boux gaen henz ndang de bang de he hwnj bya Cangqdiq bae lo.

¹⁵ Mohsih hwnj bya bae, baenx aen bya cungj dwg fwj guem liux.

^16-17 Gij ronghndongq Yehhozvaz dingz youq bya Sihnaiq; [17]youq ndaw lwgra gij vunz Hijswzlez, gij rongh caenh lujnaeuz luzfeiz he rongh youq gwnz dingjbya nwih. [16b]Gij fwj guem aen bya baenx roek ngoenz. Daengz daixcaet ngoenz le, Yehhozvaz cij daj ndaw fwj heuh Mohsih.

¹⁸ Yiengq, Mohsih couh haeuj ndaw fwj hwnj dingjbya bae lo. Daj de caeuq Yozcuhyaq hwnj bya bae suenq, itgungh youq gwnz bya youq baenx seiqcib ngwnzngoenz.