Ok Ngaihgiz 23 - Gij Baujcingq Moq Caeuq Geij Bonj Gij Baujcingq Daeuzdaeuz

Ijaeu ndwn ndaej cingq caeuq ij guh vunz ndei

¹ “Mbouj ndaej luenhbangh sauqyauz; mbouj ndaej luenh cingqmingz hwj bang vunz vaih.

² “Mbouj ndaej vunz guh vaihsaeh, mwngz caemh gaen guh vaihsaeh. Mbouj ndaej raen vunzlai naeuz deng mwngz caemh gaen naeuz deng, vunz naeuz mbouj deng mwngz caemh gaen naeuz mbouj deng, yienghmwnq ma boqvaiq saedsaeh.

³ Caemh mbouj ndaej youq gij saeh vunz doxgauq he haeuj vunz gungz.

⁴ “Hauhnaeuz raen duz cwz haj cixnaeuz raen duz lawz boux caeuq mwngz miz haemzcaeuz he loengj roen lo, yiengq mwngz ij bang ying duz de ma hawj de.

⁵ Hauhnaeuz mwngz raen duz lawz boux caeuq mwngz miz caeuz he doz doxgaiq naek ngaiz daenz laemx, yiengq mwngz mbouj ndaej bienq deuz; ij caeuq bouxcawj de buen gij doxgaiq naek de deuz.

⁶ “Youq gwnz fazdingz, mbouj ndaej hawj vunz gungz rap vuengj.

⁷ Mbouj ndaej bangjlaih vunz, caemh mbouj ndaej luenh gaj mbouj miz coih hih vunz; mbouj nex, gou bietdingh ij fad doenghgij vunz guh doenghgij saeh neix he.

⁸ “Vunz oet cienz hawj mbouj ndaej aeu, aenvih gw vunz doxgaiq le, bak unq, aeu vunz doxgaiq le, fawz dinj, aenvih yienghmwnq couh hawj vunz bienqbaenz mbouj faen cingsuj ndei haj yak—ndei bienq rwix, rwix bienq ndei lo.

⁹ “Mbouj ndaej hangz gij vunz daj vaihdieg daeuj doz youq he, aenvih faenhsou caemh doz youq dieg Ngaihgiz youq goq, caemh rox doz youq dieg vunz youq hih haemzhoj.

Yietbaeg dih gveihdingq

¹⁰ “Mwngz ij lienzdaemh genggeng ndaemndaem roek bi dih reihnaz, sou roek bi hih haeuxmienh.

¹¹ Hoeng, daengz daixcaet bi, mbouj ndaej geng, mbouj ndaej ndaem; ij diuh vangh. Ndaw reih soj hwnj hih doenghgo, mwngz mbouj ndaej sou aeu, ndaej hawj gij vunz gungz nyaeb aeu; lij lw hih yiengh hawj doengh duz nyaen gw. Doenghheij suen buzdauz, suen makmbi mwngz hah caemh ciuq yienghneix guh.

¹² “Mwngz moix it aen singhgiz ndaej lienzdaemh guh roek ngoenz hong. Daengz daixcaet ngoenz, mbouj ndaej guh hong lo; ij hawj gij hoiq ndaw ranz mwngz daiqlienz gij lwg hoiq vunzbaz mwnq caeuq daj lingh aen minzcuz goq daeuj guh hong hih ndaej yietbaeg, caeuq ndaej hawj doengh duz cwz hah, lawz hah yietbaeg.

¹³ “Famzsoj dwg gou caeuq faenhsou gangj hih vah, faenhsou cungj ijaeu ndaejgeiq. Mbouj ndaej baiq gizdah cwnz, daiqlienz doenghgij coh de cungj mbouj ndaej dwen.

Sam aen ciet hung

¹⁴ “Vih ij soenhcungq gou, mwngz moix it bi ij souj sam aen ciet.

¹⁵ Mwngz ij souj aen ciet Cawz Yauqmuj he, ciuq gou raengq mwngz hih yienghmwnq ij youq ndwen Yaqbiz ndaw de soj dingh hih saedceij, gw caet ngoenz mij fat goq hih bingj. Bouxlawz cungj mbouj ndaej bi fawz hoengq daeuj bwiz gou, aenvih mwngz dwg youq ndwen neix daj Ngaihgiz ok ma he.

¹⁶ Mwngz caemh ij souj aen ciet Gvejgvej Sousou he, couh dwg youq ndaw reih mwngz dajndaem sou hih gaem daixdaeuz he. Caemh souj aen ciet Gvejsou Sat, sou haeujma diuh hih.

¹⁷ Ndaw ranz mwngz sojmiz hih vunzsai, binaengz daengz sam aen ciet neix caemh ij daeuj bwiz gou, bouxcawj sou Yehhozvaz.

¹⁸ “Mwngz mbouj ndaej aeu gij lwed doengh duz cukseng caeuq fat goq hih bingj doxcaeuq dawz daeuj bwiz gou. Gij lauz doengh duz cukseng dajbwiz mwnq caemh mbouj ndaej louz daengz ngoenz daixngeih daihcaeux.

¹⁹ “Mwngz soj sou ndaej haeujma hih ij aeu gij sou ceiq daixdaeuz he, dawz bae soengq hawj gou, Yehhozvaz, mwngz dih Cangqdiq. “Mbouj ndaej aeu nauq yiengzmeh ma cawj duz yiengzlwg bonjfaenh de.

Baujcingq caeuq mingqlingq

²⁰ “Gou ij baij bouxcai he youq dangqnaj mwngz daiq roen, itloh bae baujhuq mwngz, daiq mwngz bae daengz mwnq dieg gou gaenq cwnjbiq ndei hawj mwngz he.

²¹ De dwg hij gij mingzhiq gou daeuj he; faenhsou ij soenhcungq de, ij dingq gij vah de, mbouj ndaej nga'ngangq goq lingh gok bae, aenvih de mbouj nyiuz gij coih faenhsou law.

²² Hauhnaeuz mwngz saedsaeh dingq gij vah de, ciuq gou soj gangj hih vah bae guh nex, gou caemh yawj boux caeuq mwngz miz caeuz he caemhdangq boux caeuz gou.

²³ Gou hawj bouxcai gou youq dangqnaj mwngz daiq roen, daiq mwngz bae daengz mwnq dieg Yaqmohliq vunz hah, Hwz vunz hah, Bijliqsij vunz hah, Gyahnamz vunz hah, Hihveiq vunz hah, Yehbuqswh vunz hah youq hih mwnq dieg mwnq bae; gou caemh ij cawz gyoengqde bae.

²⁴ Mwngz mbouj ndaej baiq caeuq swqhaeuh gyoengq cwnz gyoengqde, dauqfanj ij dub soiq doengh dongqsix gyoengqde baiq he bae.

²⁵ “Faenhsou ij swqhaeuh gou, Yehhozvaz, faenhsou dih Cangqdiq. Hauhnaeuz faenhsou yienghneix guh, gou gaengjdingq soengq fuk hawj faenhsou, nyok gij gw caeuq raemx hawj faenhsou, hawj faenhsou ndangdaej giencangq, mij saek yiengh bingh,

²⁶ gij vunzbaz faenhsou mbouj miz saek boux naeuz ngaiz siujcanj hah cixnaeuz mbouj mizseng hah yienghmwnq. Gou vanzlij ij hawj faenhsou ndaej souhyienz.

²⁷ “Mboujguenj mwngz bae daengz mwnq dieglawz, gou cungj ij hawj gij vunz dieg mwnq simvueng ndangsaenz; gij vunz caeuq mwngz miz haemzcaeuz he riq deuz hwj maetlaenq bae.

²⁸ Gou ij hawj duz dinz mbin bae gaxgonq mwngz boenq doenghgij Hihveiq vunz hah, Gyahnamz vunz hah, Hwz vunz hah deuz bae.

²⁹ Hoeng, gou mbouj veiq youq bi he boenq gyoengqde deuz liux law; hauhnaeuz youq bi he boenq deuz liux nex, hoengjlau doenghheij dieg reih bienqbaenz dieg vangh le, doengh duz nyaen fat lai hwj daeuj haih mwngz.

³⁰ Gou ij baez di baez di boenq gyoengqde deuz, daengj daengz gij vunz mwngz fat lai le, caemh ndaej gag guenj gij dieg mwnq le, gou cij boenq gyoengqde deuz liux bae.

³¹ “Daengz mwhmwnq, gou couh ij veh sienq gat hawj mwngz, couh dwg dajlwh Hungz Haij daengz Feihliqswq Haij, caiq dajlwh cahmoz daengz dah hung. Gou caemh ij dawz gij vunz dieg mwnq gyau hawj mwngz, mwngz caemh ij boenq gyoengqde deuz.

³² Mwngz mbouj ndaej caeuq gyoengqde cixnaeuz caeuq gij cwnz gyoengqde doxdingh gijmaz.

³³ Mbouj ndaej hawj gyoengqde youq laeng dieg mwngz youq, hoengjlau gyoengqde hawj mwngz gaen ciuq gij laehbeih gyoengqde guh le, bae baiq gij cwnz gyoengqde hwj mwngz couh yied gaen yied yinx.”