Ok Ngaihgiz 22 - Gij Baujcingq Moq Caeuq Geij Bonj Gij Baujcingq Daeuzdaeuz

Boiz doxgaiq dih gveihdingq

¹ “Hauhnaeuz miz vunz caeg cwz haj cixnaeuz caeg yiengz, mboujguenj de caeg ma gaj cixnaeuz caeg ma hai, caeg duz cwz he ij boiz haj duz cwz, caeg duz yiengz he ij boiz seiq duz yiengz.

² “Hauhnaeuz miz vunzcaeg singjngwnz ndonj haeuj ranz bae caeg doxgaiq, ngaiz gaemh dawz doh rai hih, yiengq boux doh mwnq mbouj suenq miz coih;

³ hauhnaeuz dwg doengxngoenz haeuj ranz bae caeg, ngaiz gaemh dawz doh rai hih, boux doh rai mwnq, couh suenq de gaj vunz miz coih. “Bouxcaeg mwnq caeg ndaej ma hih doxgaiq, bietdingh ij boiz vunz. Hauhnaeuz bouxcaeg mwnq ndaw ranz de it yiengh cungj mbouj miz, yiengq couh ij dawz de hai bae guh hoiq ma dingj guh de soj caeg ndaej hih doxgaiq.

⁴ “Hauhnaeuz de caeg ma hih cwz hah cixnaeuz lawz hah, yiengz hah vanzlij lix youq laeng de nex, de couh ij boiz hawj vunz lai boix he.

⁵ “Hauhnaeuz miz vunz coengq cwz haj cixnaeuz coengq yiengz youq ndaw reih bonjfaenh cixnaeuz ndaw suen buzdauz bonjfaenh, gajlaeng ngaiz doengh duz de ndaenj haeuj ndaw reih vunz bae cix gw cix coekcoek caijcaij nex, yiengq bouxcawj doengh duz mwnq couh ij dawz ndaw reih cixnaeuz ndaw suen buzdauz bonjfaenh de ceiq ndei he sou haeujma boiz vunz.

⁶ “Hauhnaeuz miz vunz youq ndaw reih bonjfaenh gyemz feiz, ngaiz gyemz dawz gij oen henz reih bonjfaenh, yiengq ngaiz gyemz lih dawz gij reih vunz, ndaw reih vunz miz mienh dong cixnaeuz miz mienh mijyaengz gvej hih, boux gyemz feiz mwnq ij ngaiz boiz vunz soj gyemz dawz hih doxgaiq.

⁷ “Hauhnaeuz miz vunz hawj vunz bang de baujguenj ngaenz cixnaeuz gij dijbauj hih doxgaiq, hoeng ngaiz vunz haeuj ranz bae caeg aeu lo, hauhnaeuz ndaej gaemh dawz bouxcaeg nex, bouxcaeg mwnq couh ij ngaiz boiz lai boix he;

⁸ hauhnaeuz mbouj ndaej gaemh dawz bouxcaeg nex, boux bang vunz guenj doxgaiq mwnq couh ij bae hawj boux buenqguenh mwnq buenq, cingqmingz naeuz bonjfaenh de mij caeg aeu gij doxgaiq boux mwnq.

⁹ “Hauhnaeuz miz vunz vih doxgaiq doxceng hih, mboujguenj dwg cwz haj cixnaeuz lawz, yiengz haj cixnaeuz buh, cixnaeuz doxgaiq nyaepyingq mbouj raen hih, song mbiengj cungj ij bae daengz mwnq buenq saeh mwnq, hawj boux buenq saeh mwnq buenq, buenq mbiengjlawz miz coih hih, mbiengjlawz couh ngaiz lai boiz boix he.

¹⁰ “Hauhnaeuz miz vunz dawz lawz hah, cwz hah, yiengz hah, cixnaeuz gak cungj doengh duz cukseng hawj vunz bang yawj, hoeng, doengh duz cukseng ngaiz sieng hah, cixnaeuz ngaiz rai hah, ngaiz vunz ying deuz hah, hoeng, mij vunz raen ndaej cingqmingz,

¹¹ yiengq boux bang yawj mwnq couh ij doiq Cangqdiq fazsiq, baujcingq naeuz bonjfaenh de mij aeu gij doxgaiq vunz; bouxcawj mwnq caemh ij sinq de. Yiengq boux bang vunz yawj mwnq couh mbouj ngaiz boiz lo.

¹² Hoeng, hauhnaeuz doengh duz cukseng dwg boux bang yawj mwnq caeg bae lah, yiengq de couh ij ngaiz boiz hawj bouxcawj mwnq.

¹³ Hauhnaeuz ngaiz doengh duz nyaen haeb rai nex, boux bang vunz yawj mwnq couh ij dawz duz rai de ma guh baengzgawq; yiengq, de couh mboujyungh ngaiz boiz lo.

¹⁴ “Hauhnaeuz miz vunz laeng vunz ciq doengh duz cukseng, ciq ma le, ngaiz rai haj cixnaeuz ngaiz sieng, bouxcawj de caemh mbouj youq henz de raen, yiengq, boux ciq mwnq ij ngaiz boiz vunz.

¹⁵ Hauhnaeuz bouxcawj de youq henz de raen nex, couh mboujyungh ngaiz boiz; hauhnaeuz dwg co aeu lah, yiengq gij ngaenz co de caemh ngamqluj aeu ma dienz.

Gvanhhih dauqdwz dih gveihdingq

¹⁶ “Hauhnaeuz miz byawz vunzsai yaeuh hawj lwgsau mijyaengz dingqvwnh caeuq mijyaengz ngaiz vunzsai yaek goq haem cix haenj de hwj caeuq de ninz lo, yiengq, boux vunzsai mwnq couh ij ngaiz soengq laex hawj ndaw ranz dah lwgsau mwnq, aeu dah de ma guh yah.

¹⁷ Hauhnaeuz daxboh dah de mbouj dungziq hawj dah lwgsau de haq laeng de, de caemh ij ngaiz ciuq gij vunz aeu yah, aeu gij lwgsau mijyaengz caeuq vunzsai ninz goq he soengq hih laex ma soengq ngaenz hawj de.

¹⁸ “Famz rox coengqfap gimq vunz hih vunzbaz, cungj ij ngaiz gajrai bae.

¹⁹ “Caeuq doenghduz doxgwih hih vunz, ij gajrai boux vunz mwnq bae.

²⁰ “Mbouj dwg caenhgag bwiz Yehhozvaz, vanzlij caiq bwiz linghvaih hih cwnz hih, cungj ij ngaiz gajrai bae.

²¹ “Mbouj ndaej hangz gij vunz daj vaihguek daeuj he; faenhsou ijaeu ndaejgeiq, faenhsou caemh dwg doz youq laeng dieg Ngaihgiz youq goq he.

²² “Mbouj ndaej yawj mehmaiq cixnaeuz lwggyax ngawz.

²³ Hauhnaeuz yawj gyoengqde ngawz, gyoengqde gouz gou nex, gou gaengjdingq dingqri.

²⁴ Daengz mwhmwnq, gou couh aeuqheiq faenhsou, yiengq couh aeu cax ma gaj faenhsou, caemh hawj mehyah faenhsou bienqbaenz mehmaiq, gij lwg faenhsou bienqbaenz lwggyax.

²⁵ “Hauhnaeuz mwngz ciq ngaenz hawj gij vunz gou hih gij vunz gungz he nex, mwngz mbouj ndaej luj coengqcaiq yienghmwnq laeng de suenq aeu leih.

²⁶ Hauhnaeuz mwngz ciq ngaenz hawj vunz gungz le, aeu diuz buhdox de ma guh dijyaz, yiengq, mwngz bietdingh ij youq gyangjngoenz mijyaengz doek cihsenz aeu hawj de boiz; mbouj ndaej gyangjngoenz doek le cij aeu hawj de,

²⁷ aenvih de caenhgag miz diuz buhdox neix, gauq diuz buh neix ndaej daenj raeuj lo. Hauhnaeuz mbouj miz diuz buh neix, de baenzlawz ndaej ninz nej? Daengz mwhmwnq, de gouz gou bang de, gou gaengjdingq bang de, aenvih gou dwg boux sim'unq he.

²⁸ “Mboujcwnj gangj gij vah doegsieb he ma ndaq Cangqdiq, caemh mbouj ndaej mang beksingq dih lingjdauj.

²⁹ “Ij dawz mwngz ngamq sou haeujma dih haeux hah, laeuj hah, caeuq youz hah daeuj soengq hawj gou; ij haijliengh, mbouj ndaej simsenz. “Daeglwg daeuz mwngz caemh ij gvi hawj gou;

³⁰ cwz hah, yiengz hah sojmiz hih duz daixdaeuz de caemh dwg ij gvi hawj gou. Cwzdaeg hah, yiengzdaeg hah, doengh duz daixdaeuz ngamq seng ndaej caet ngoenz ndaw de ndaej gaen duz meh de; daengz daixbet ngoenz le, couh ij gvi hawj gou.

³¹ “Faenhsou ij guh gij vunz gou, sojhij, doengh duz cukseng youq ndaw reih ngaiz duz nyaen haeb rai hih, gij noh de, faenhsou mbouj ndaej gw; ij gveng hawj ma gw.