Ok Ngaihgiz 21 - Gij Baujcingq Moq Caeuq Geij Bonj Gij Baujcingq Daeuzdaeuz

¹ “Mwngz ij dawz gij gveihdingq neix cenz naeuz gij vunz Hijswzlez ni.

Doiq bouxhoiq dih gveihdingq

² “Hauhnaeuz mwngz cawx boux Hihbwzlaiz vunz he ma guh hoiq nex, boux de cij guh hong roek bi hawj mwngz; daengz daixcaet bi, de couh ndaej doiqyungz swqyouz lo, mboujyungh aeu ngaenz daeuj cueg okma lo.

³ Hauhnaeuz mwh cawx he, dwg caenhgag cawx boux dog lah, yiengq, daengz mwh de ndaej swqyouz hih mwhde, caemh dwg ndaej de boux dog ok ma lah; hauhnaeuz mwh cawx bae he, de daiq miz yah hih, de caemh ndaej daiq mehyah de ok ma.

⁴ Hauhnaeuz boux cawx de hih aeu yah hawj de, mehyah de caemh seng miz lwg nex, yiengq mehyah de caeuq gij lwg de cungj dwg gvi hawj bouxcawj mwnq, caenhgag ndaej bonjfaenh de boux dog ok ma lah.

⁵ “Hauhnaeuz bouxhoiq bonjfaenh de gag naeuz: ‘Gou haenj bouxcawj gou, caeuq aiq lwg aiq yah gou, mbouj nyienh'eiq gag ok maj,’

⁶ yiengq, bouxcawj de couh ij daiq de bae daengz fazguenh hih bakdou mwnq bae, hawj de ing haeuj begdou bae le, couh aeu cuenq ma cuenq duj rwz de congh he hwj, yienghneix couh dwg cingqmingz naeuz de ij swqhaeuh bouxcawj de baenx seiqvunz lo.

⁷ “Hauhnaeuz miz vunz gag hai dahlwg bonjfaenh hawj vunz guh hoiq nex, yiengq dah de mbouj ndaej luj hoiq vunzsai ndaej doiqyungz swqyouz.

⁸ Hauhnaeuz bouxcawj de siengj aeu de ma guh yah, hoeng, gajlaeng caiq mij haenj de laem lo, yiengq, de couh ndaej cueg okma; bouxcawj caemh mij'z gienz ndaej dawz de hai hawj linghvaih minzcuz hih vunz lo, aenvih bouxcawj coemx de goq.

⁹ Hauhnaeuz bouxcawj de ij aeu de hawj daeglwg bonjfaenh de guh yah nex, doiq dah de caemh ij luj doiq dahlwg bonjfaenh yienghmwnq.

¹⁰ Hauhnaeuz bouxcawj de aeu de le, caiq linghvaih aeu yahnoix nex, yiengq bouxcawj de doiq de caemh ij luj gaxgonq yienghmwnq; de dih gw hah, daenj hah, caeuq caeuqninz hah cungj dwg mbouj ndaej noix.

¹¹ Hauhnaeuz bouxcawj de guh mbouj daengz sam demj neix nex, de couh mboujyungh aeu ngaenz daeuj cueg bonjfaenh; bonjfaenh cungj ndaej seizbienh ok ma.

Fad vunz dih gveihdingq

¹² “Mboujlwnh bouxlawz doh vunz ngaiz rai hih, bouxlawz caemh ngaiz gajrai.

¹³ Hauhnaeuz mbouj dwg guqiq gaj vunz hih, dwg mbouj siujsim ngaiz dwg vunz rai lah, yiengq de ndaej deuz bae daengz mwnq gou cijdingq hih deixfueng he bae.

¹⁴ Hoeng, hauhnaeuz miz vunz guqiq gaj vunz hih, cungjsuenq de deuz bae daengz aen luz dajbwiz gou mwnq, cungj caemh ij gaemh dawz de ma gaj.

¹⁵ “Byawz doh bohmeh hih, caemh bietdingh gajrai bouxlawz.

¹⁶ “Byawz caeg vunz ma hai hih, mboujguenj de caeg ma hai hawj vunz haj cixnaeuz gag louz hawj bonjfaenh hih, couh gajrai byawz.

¹⁷ “Byawz yawj bohmeh ngawz hih, cungj ij dawz de gajrai bae.

¹⁸ “Hauhnaeuz miz song boux vunz doxdub, miz boux he aeu rin cixnaeuz aeu gaemxgyienz ma doh daixlingh boux hwj ngaiz sieng, sieng hwj ngaiz ninz mbouj ndaej hwnq congz,

¹⁹ hoeng, gajlaeng ndaej hwnq congz hwj, cijmboujgoq de ij ngaiz dawz faexdwngx cij ndaej byaij roen, yiengq boux doh vunz sieng mwnq, de mbouj ngaiz guxmaz, hoeng, ij ngaiz hoi nguh hong hih ngaenz hawj boux sieng mwnq, caemh ij bau yw boux de ndei.

²⁰ “Famz miz vunz aeu faex ma doh bouxhoiq bonjfaenh hih, mboujlwnh hoiq vunzsai haj cixnaeuz hoiq vunzbaz, doh hwj dangjciengz ngaiz rai hih, boux doh vunz mwnq couh ngaiz buenqhingz.

²¹ Hauhnaeuz bouxhoiq ngaiz bouxcawj de doh, doh goq ngoenz daengz song ngoenz le cij ngaiz rai hih, yiengq bouxcawj de couh mbouj ngaiz guxmaz, aenvih bouxhoiq mwnq caemh suenq gij saizcanj de, caemhdangq naeuz de ngaiz saet caiz sat lo.

²² “Hauhnaeuz miz vunz doxdub, mbouj siujsim ngaiz bungq dawz meh daiqndang he, bungq hwj de ngaiz siujcanj, hoeng, gajlaeng meh de caemh mij maz sienghaih hih, yiengq boux bungq dawz de mwnq couh ij ngaiz ok cienz hawj de, couh dwg ciuq goengjgvan de heuh aeu geijlai ma hawj geijlai, hoeng, caemh ij dunghgoq buenqguenh ma buenq gyezdingq hawj de ok geijlai he.

²³ Hauhnaeuz meh daiqndang mwnq ngaiz sieng, yiengq caemh ij fad hawj boux bungq dawz de sieng mwnq sieng boiz. Couh dwg naeuz, rai boiz rai,

²⁴ doh ra boiz ra, doh faenz boiz faenz, doh fawz boiz fawz, doh ha boiz ha;

²⁵ log boiz log, doh boiz doh, fad boiz fad.

²⁶ “Hauhnaeuz miz vunz doh fangz cehra bouxhoiq bonjfaenh, mboujlwnh hoiq vunzsai haj cixnaeuz hoiq vunzbaz dih cehra he, couh ij ngaiz coengq bouxhoiq mwnq okma guh dingj boiz cehra de.

²⁷ Hauhnaeuz miz vunz doh doek diuz faenz bouxhoiq bonjfaenh, mboujlwnh hoiq vunzsai haj cixnaeuz hoiq vunzbaz hih diuz faenz he, couh ij ngaiz coengq bouxhoiq mwnq okma guh dingj boiz diuz faenz de.

²⁸ “Hauhnaeuz miz cwz gving vunz rai hih, mboujlwnh rai vunzsai haj cixnaeuz rai vunzbaz, couh aeu rin ma boemz duz de rai. Hoeng, mbouj ndaej gw gij noh de; bouxcawj duz cwz mwnq caemh mij'z coih.

²⁹ Hauhnaeuz duz cwz mwnq siengzseiz cungj dwg gving vunz he, caemh miz vunz naeuz bouxcawj de ni lo, hoeng, bouxcawj mwnq vanzlij mbouj lamh duz de ndei, guh hwj duz de gving vunz rai, yiengq couh ij aeu rin ma boemz duz de rai; bouxcawj mwnq caemh ngaiz buenq rai.

³⁰ Hauhnaeuz fad de aeu ngaenz ma cueg diuz mingh de nex, de caemh ij ciuq fad de deng geijlai ngaenz ma boiz.

³¹ Hauhnaeuz cwz gving rai lwg vunzsai haj cixnaeuz lwg vunzbaz, caemh ij ciuq gwnz neix dih guhfap ma guh.

³² Hauhnaeuz miz cwz gving rai vunzhoiq, mboujlwnh rai hoiq vunzsai haj cixnaeuz hoiq vunzbaz, bietdingh ij aeu caet liengx hih ngaenz hawj bouxcawj bouxhoiq mwnq, caemh aeu rin ma boemz rai duz cwz mwnq.

³³ “Hauhnaeuz miz vunz gwenj aen cingj, cixnaeuz vat cingj mbouj goeb, miz cwz haj cixnaeuz miz lawz ngaiz doek roengzbae rai,

³⁴ yiengq, bouxcawj aen cingj mwnq couh ij aeu ngaenz hawj bouxcawj doengh duz cukseng mwnq; duz cukseng couh gvi hawj bouxcawj aen cingj mwnq.

³⁵ “Hauhnaeuz duz cwz he gving rai lingh duz cwz, yiengq, song mbiengj couh dawz duz cwz lix mwnq hai bae. Hai le, couh bingz faen gij ngaenz de; gij noh cwz rai mwnq caemh faen song mbiengj doxdoengz.

³⁶ Hauhnaeuz gaenq rox naeuz duz cwz neix haenj doxgoed lo, hoeng, bouxcawj de vanzlij mbouj lamh ndei, yiengq bouxcawj de ij aeu duz cwz lix he boiz hawj bouxcawj duz cwz ngaiz rai mwnq; duz cwz rai mwnq couh gvi hawj boux boiz cwz mwnq.