Ok Ngaihgiz 20 - Gij Baujcingq Moq Caeuq Geij Bonj Gij Baujcingq Daeuzdaeuz

Cib diuz fazliz

¹ Laj neix dwg Cangqdiq soj raengq dih vah:

² “Gou dwg Yehhozvaz, mwngz dih Cangqdiq; dwg gou daj Ngaihgiz, couh dwg mwngz youq Ngaihgiz guh hoiq hih mwnq, daiq mwngz okma he.

³ Cawz gou ok, mwngz mbouj ndaej bae baiq daixlingh boux cwnz.

⁴ Mbouj ndaej vih bonjfaenh hwj dik guxmaz you. Mboujguenj dwg gwnzmbwn, lajdeih, ndaw raemx sojmiz dih doeng yiengh sae yiengh, faenhsou cungj mbouj ndaej ciuq gij de ma dik.

⁵ Mbouj ndaej baiq gak cungj you, aenvih gou dwg Yehhozvaz, mwngz dih Cangqdiq; gou dwgcaengz caeuq gou doxdoiqdingj hih cwnz. Gij vunz haenq gou hih, gou gaengjdingq ij fad de, simqciq fad daengz sam seiq daih gajlaeng de bae.

⁶ Aiq gou hih, soenhsouj gou mingqlingq hih vunz, gou couh ndiep gyoengqde, simqciq ndiep daengz cien daih bae.

⁷ Mbouj ndaej luenhbangh yungh gij coh gou, Yehhozvaz, mwngz dih Cangqdiq; bouxlawz luenh yungh Yehhozvaz gij coh neix nex, gou gaengjdingq dingh coih hawj de.

⁸ Ij geiqniemh ngoenzyietbaeg dwg ngoenz dwzbez he.

⁹ Miz roek ngoenz ndaej guh hong,

¹⁰ hoeng, daixcaet ngoenz dwg gvi hawj gou, Yehhozvaz, mwngz dih Cangqdiq, guh ngoenzyietbaeg. Ngoenz neix mwngz caeuq doenghheij lwg mwngz hah, gij hoiq mwngz hah, doengh duz cukseng mwngz hah, caeuq youq dieg mwngz doz youq hih doenghheij hek hah cungj mbouj ndaej guh saek yiengh hong.

¹¹ Aenvih roek ngoenz ndaw de, gou cauh mbwn, cauh deih, cauh haij caeuq cauh sojmiz hih; yiengq, daixcaet ngoenz couh yietbaeg lo. Sojhij, gou soengq fuk hawj ngoenz ngoenzyietbaeg, dingh ngoenz neix guh ngoenz dwzbez he.

¹² Mwngz ij yawjdij bohmeh; yienghneix mwngz cij ndaej youq mwnq gou, mwngz dih Cangqdiq, soengq hawj mwngz hih mwnq dieg mwnq ndaej yangjcouq roengzbae ndaej caez.

¹³ Caemh mbouj ndaej gaj vunz.

¹⁴ Mbouj ndaej guhyoux.

¹⁵ Mbouj ndaej guxcaeg.

¹⁶ Mbouj ndaej guh gyaj cingqgiq ma bangjlaih vunz.

¹⁷ Mbouj ndaej dam aeu gij gyadangq vunz, caemh mbouj ndaej loeglienh mehyah vunz hah, bouxhoiq vunz hah, cwz hah, lawz hah, caeuq gak cungj doxgaiq.”

Gyoengq vunz lau Cangqdiq

¹⁸ Yiengq, caiq dauq gangj daengz gij vunz Hijswzlez youq laj dinbya, gyoengqde dingqri sing byajraez, gij sing gywnhhauh yiengj raez rangxrangh mwnq, caeuq raen byajmyig, raen gwnz bya hoenz ngaujngauq le, cungj lau hwj ndwn youq gyae'gyae, ndang saenz dedded liux.

¹⁹ Yiengq, gyoengqde doiq Mohsih naeuz: “Gouz mwngz dingj Cangqdiq caeuq gyoengqraeuz gangj vah bax; gyoengqraeuz gaengjdingq dingq mwngz. Gaejyungh hawj Cangqdiq caeuq gyoengqraeuz gangj vah; mbouj nex, gyoengqraeuz gaengjdingq ngaiz rai.”

²⁰ Gajlaeng, Mohsih doiq gyoengqde naeuz: “Gaejyungh lau; Cangqdiq daeuj dwg ij gaujniemq faenhsou lah, hawj faenhsou seiqseiz yawjnaek de, dingq de, mbouj guh loek lah.”

²¹ Hoeng, gyoengq vunz vanzlij dwg ndwn youq gyae'gyae he; caenhgag Mohsih byaij bae gaenh gij fwj Cangqdiq youq he mwnq lah.

Guh luz dajbwiz dih gveihdingq

²² Yehhozvaz doiq Mohsih naeuz: “Mwngz ij naeuz gij vunz Hijswzlez ni, naeuz: ‘Faenhsou gaenq yawjraen gou daj gwnzmbwn caeuq faenhsou gangj vah lo.

²³ Faenhsou caenhgag ndaej gingqbaiq gou; mbouj ndaej aeu gim hah cixnaeuz ngaenz hah ma guh duz you hwj baiq.

²⁴ “‘Faenhsou ij aeu naez ma cuk aen luz dajbwiz he hawj gou, aeu ma guh baij doengh duz cwz hah, yiengz hah youq gwnz de coemh hwj bwiz gou, caeuq vih doxhuz hwj bwiz. Gou dingh hawj faenhsou gingqbaiq hih moix it mwnq deixfueng, gou cungj ij bae, caemh ij soengq fuk hawj faenhsou.

²⁵ Hauhnaeuz faenhsou aeu rin ma caep aen luz dajbwiz hawj gou nex, mbouj ndaej aeu siuq goq hih rin, aenvih siuq goq hih rin dwg mbouj hab aeu ma caep aen luz dajbwiz hih.

²⁶ Mbouj ndaej caep aen luz dajbwiz miz baenx mbaek maxdaeuz he hawj gou, mienxndaej faenhsou byaij hwnj mbaeklae bae hih mwhde, caeghangx faenhsou ngaiz loh okdaeuj.’