Ok Ngaihgiz 2 - Gij Baujcingq Moq Caeuq Geij Bonj Gij Baujcingq Daeuzdaeuz

Lwgnding Mohsih

¹ Yiengq, cingq youq mwhneix, miz boux Hijswzlez vunz aen cuz Liqveiq he, de aeu dah caeuq de doxcaemh aen cuz he ma guh yah.

² Gajlaeng dah de seng miz daeg lwgmbauq he. De raen laeq lwgnding neix baenxmbauq raixcaix, couh dawz de yo hwnjdaeuj, yo baenx sam ndwen.

³ Daengz de cingqcaen mij banqfaz yo laeq lwg neix lo, de couh aeu aen loengx gaeu he daeuj duz lizcingh caeuq duz bwzyouz hwj fuengz raemx iemq raemx roh haeujbae. Gajlaeng de couh dawz laeq lwgngez neix coengq haeuj ndaw loengx gaeu neix bae, couh dawz aen loengx gaeu neix bae daengz henz dah, yo haeuj ndaw caz em bae.

⁴ Daxce laeq lwgngez neix dajlwh lizgyae ndwn hwj yawj, yawjyawj daegnuengx de dauqdaej ij baenzlawz yiengh.

⁵ Yiengq ngamqngamq luj dah lwgsau goengjvuengz daeuj ndaw dah swiq ndang. Sawqmwh dah de yawjraen youq ndaw caz em miz aen loengx gaeu he. Dah de yawjraen le, couh hawj dahhoiq he bae dawz ma hawj de yawj. (Mwhde doengh dahhoiq de caemh gaen de daeuj daengz henz dah. Gyoengqde youq henz dah byaijbyaij byakbyak guxcaemz.)

⁶ Dahlwg goengjvuengz baex gwenj yawj he, couh raen ndaw de miz daeg lwgngez he. Yiengq laeq lwgngez neix couh daej hwnjdaeuj lo. De couh hojsik hwj naeuz: “Laeq lwgngez neix gaengjdingq dwg laeq lwg Hihbwzlaiz vunz.”

⁷ Cingq youq mwhneix, daxce laeq lwgngez neix byaij goqbae daengz gyoengqde mwnq, doiq dahlwg goengjvuengz naeuz: “Aex, hawj mbouj hawj gou bae cimh boux Hihbwzlaiz vunz vunzbaz he ma hawj de ciengx de, hawj de gw nauq hax?”

⁸ Dahlwg goengjvuengz han naeuz: “Ox, ndaej hah!” Yiengq dah de couh maj heuh daxmeh de daeuj.

⁹ Meh de daeuj le, dahlwg goengjvuengz couh doiq meh de naeuz: “Mwngz umj laeq lwg neix maj bax, bang gou ciengx de; gou menhcij hawj ngaenz hawj mwngz.” Yiengq meh de couh umj laeq lwg neix maj ciengx lo.

¹⁰ Gajlaeng laeq lwgngez neix haemq hung le, meh de couh daiq laeq de bae laeng dahlwg goengjvuengz. Dahlwg goengjvuengz couh nginh laeq de guh daeglwg bonjfaenh. De naeuz: “Gou dajlwh ndaw raemx rag laeq lwg neix hwnjma, couh an coh hawj de heuh Mohsih bax!” (‘Mohsih’ gij coh neix caeuq gij vah Hihbwzlaiz dih gawq ‘rag hwnjma’ doeg ijvanh doxdoengz.)

Mohsih deuz bae Mijdenq

¹¹ Mohsih hung le, miz baez he, de ok bae laeng gij vunz Hihbwzlaiz caeuq de doxcaemh minzcuz he yawjyawj. Yiengq, de yawjraen gyoengqde guh hong dwgrengz ij rai bae. Youq mwnq, de caemh yawjraen miz boux vunz Ngaihgiz he doh boux caeuq de doxcaemh minzcuz he.

¹² Yiengq Mohsih yawjyawj seiqhenz mij'z vunz, couh hoi fawz doh rai boux Ngaihgiz vunz mwnq, dawz gij seihaiz de moek youq ndaw sa hwj.

¹³ Daengz daixngeih ngoenz, Mohsih caiq ok bae. De raen miz song boux Hihbwzlaiz vunz doxceng doxdub. Yiengq, de couh doiq boux mij dauhleix mwnq naeuz: “Mwngz vihmaz ij hangz caeuq mwngz doxcaemh minzcuz he dih vunz nex?”

¹⁴ Boux mwnq han naeuz: “Hwx, mwngz dwg byawz nex? Byawz baij mwngz daeuj guh raeuz dih daeuzdaeuz caeuq raeuz dih fazguenh nex? Nanzdauh mwngz ij gaj gou, caemh luj gaj boux Ngaihgiz vunz mwnq?” Mohsih baex dingqri gawq neix he le, cungj lau hwj ij rai, ndaw sim de gag naemj: “Ojx, gij saeh neix vunz aiq rox dinghluh!”

¹⁵ Gajlaeng goengjvuengz rox naeuz gienh saeh neix le, couh ij gaj Mohsih. Yiengq Mohsih couh deuz bae daengz Mijdenq, ndoj youq Mijdenq youq.

Mohsih youq Mijdenq

¹⁶ Gajlaeng, miz ngoenz he, Mohsih naengh youq henz cingjraemx, raen caet dah lwgsau daeuj daek raemx, coux raemx haeuj ruh bae rim hwj ij hawj gyoengq yiengz daxboh gyoengqde gw. (Daxboh gyoengqde couh dwg Mijdenq hih goengjsae dajbwiz he.)

¹⁷ Hoeng, miz gij vunz ciengx yiengz he goq daeuj ij boenq gyoengqde deuz. Mohsih raen le, couh goq bae haeuj gyoengqde, caemh bang gyoengqde aeu raemx hawj yiengz gw.

¹⁸ Gajlaeng, gyoengqde maj ranz. Daxboh gyoengqde Liuzwj raen gyoengqde ma ndaej baenx vaiq, couh cam gyoengqde naeuz: “Ngoenzneix guxmaz ma ndaej baenz caeux?”

¹⁹ Yiengq gyoengqde han naeuz: “Ox, ngoenzneix miz boux Ngaihgiz vunz he bang gyoengqraeuz, bang raeuz boenq gij vunz ciengx yiengz daeuj hangz raeuz he deuz, caemhcaiq bang raeuz daek raemx hawj yiengz gw.”

²⁰ Liuzwj dingq le, caiq cam doengh dahlwg de naeuz: “Yiengq de seizneix youq mwnqlaw? Faenhsou vihmaz mbouj leixlangh de? Bae hawj de daeuj laeng raeuz gw haeux bax!”

²¹ Gajlaeng, Liuzwj vanzlij caiq cingj Mohsih laeng de youq; Mohsih caemh nyienh'eiq. Gajlaeng Liuzwj vanzlij hawj dahlwg de Sihbohlah haq hawj Mohsih guh yah.

²² Gajlaeng Sihbohlah seng miz daeglwg he. Mohsih naeuz: “Gou dwg boux vunzseng ro dieg vunz doz youq he,” yiengq de couh an coh hawj daeglwg de heuh Gwzcwnq. (‘Gwzcwnq’ gij coh neix caeuq gij vah Hihbwzlaiz dih gawq ‘doz youq mwnq’ doeg ijvanh doxdoengz.)

Cangqdiq gietsim bang Hijswzlez vunz

²³ Goq haujlai bi le, goengjvuengz Ngaihgiz rai lo. Hoeng gij vunz Hijswzlez vanzlij dwg guh hong dwgrengz, goq vaiz max cungj mbouj luj dih saenghhoz. Aenvih gyoengqde cungj dwg gig dwgrengz, caemh gangznaek hwnjdaeuj, gangzgangz danqdanq, gij sing gangz de cungj cenz bae daengz Cangqdiq mwnq.

²⁴ Yiengq Cangqdiq dingqri le, couh ngeix daengz gaxgonq de caeuq gij cojgoeng gyoengqde Yaqbwzlahhanj, Hijsaj caeuq Yajgoz dingh dih doenghgij mwnq.

²⁵ De yawjraen gij vunz Hijswzlez guh hwj ij rai ij lix bae le, couh dawz gij saeh neix coengq youq ndaw sim hwj.