Ok Ngaihgiz 19 - Gij Baujcingq Moq Caeuq Geij Bonj Gij Baujcingq Daeuzdaeuz

Gij vunz Hijswzlez youq bya Sihnaiq

¹ Gij vunz Hijswzlez ok Ngaihgiz ma hih daixsam ndwen dih cojit, couh bae daengz aen ndoi Sihnaiq lo.

² Gyoengqde daj Liqfeihdingh bae daengz ndoi Sihnaiq, youq laj bya Sihnaiq cap yingz youq.

³ Gajlaeng Mohsih hwnj bya bae cimh Yehhozvaz Cangqdiq. Yiengq Yehhozvaz daj gwnz bya heuh de naeuz: “Mwngz ij yienghneix naeuz gij vunz Hijswzlez ni, naeuz:

⁴ ‘Faenhsou gaenq caenra raen gou, faenhsou dih Cangqdiq, baenzlawz doiq gij vunz Ngaihgiz lo. Gou daiq faenhsou okma hih mwhde, caenh luj duz yiuh yienghmwnq baujhuq gij lwg de mbin ok Ngaihgiz ma, ma daengz dineix guh gij vunz gou.

⁵ Hauhnaeuz faenhsou dingq gou, soenhsouj gij gou dingh hawj faenhsou he, faenhsou couh suenq dwg gij vunz gou ceiq haenj he. Gannaeuz lajmbwn sojmiz hih cungj dwg gij gou liux lah, hoeng, aenvih faenhsou dwg gou daj gak aen minzcuz senj okdaeuj he,

⁶ faenhsou ij gvi hawj gou, guh gij vunz aen guek gou, guh gij vunz dajbwiz gou.’ Doenghgij vah neix mwngz ij naeuz gij vunz Hijswzlez ni.”

⁷ Yiengq, Mohsih couh bae heuh gij vunz Hijswzlez gangj vah couh baenz he daeuj doxcomz, dawz gij vah Yehhozvaz raengq de hih naeuz gyoengqde ni.

⁸ Gajlaeng gij vunz Hijswzlez dingq naeuz gij saeh neix le cungj caezcup hwj han naeuz: “Gyoengqraeuz gaengjdingq ciuq Yehhozvaz raengq hih yienghmwnq bae guh.” Gajlaeng Mohsih couh maj daengz Yehhozvaz mwnq, ij dawz gij vah gyoengqde hoiz naeuz de ni.

⁹ Hoeng, Yehhozvaz youhcaiq doiq Mohsih naeuz: “Gou ij roengz bae laeng mwngz; gou roengz bae hih mwhde, dwg youq ndaw fwj ndaw de hih, dwg ij hawj gij vunz Hijswzlez dingqri gou caeuq mwngz gangj vah, yienghneix hawj gyoengqde baezneix yungjyenj sinq mwngz.” Yehhozvaz yienghneix gangj sat le, Mohsih couh dawz gyoengq vunz gangj hih vah gangj naeuz Yehhozvaz ni.

¹⁰ Yehhozvaz caiq doiq Mohsih naeuz: “Mwngz bae naeuz gij vunz Hijswzlez ni, hawj gyoengqde ngoenzneix caeuq ngoenzcog guh ndei cwnjbiq hwj, vanzlij hawj gyoengqde lawh buh saeg buh haem, cwnjbiq ciep gou.

¹¹ Daengz ngoenzrawz ij cwnjbiq ndei, aenvih ngoenz mwnq, gou, Yehhozvaz, ij daj gwnzmbwn roengz bya Sihnaiq ma hawj vunzlai raen.

¹² Mwngz ij youq seiqhenz bya veh diuz sienq he gek hwnjdaeuj hwj, naeuz gij vunz ni, mbouj ndaej cauhgoq diuz sienq neix, caemh mbouj ndaej hwnj bya bae; bouxlawz dek aen bya neix, couh hawj bouxlawz rai.

¹³ Mboujlwnh vunz haj cixnaeuz doengh duz cukseng famh hih, cungj ngaiz dawz bae gajrai. Mbouj ndaej aeu fawz bae mo boux famh mwnq; ij aeu rin ma dub rai cixnaeuz yungh naqgung ma dwk rai. Mwngz ij raengq gyoengqde, hawj gyoengqde youq rog sienq daengj, daengj daengz dingqri miz sing gywnhhauh yiengj raez rangxrangh le, gyoengqde cij ndaej daeuj gaenh doenjbya gaenh diuz sienq mwnq.”

¹⁴ Gajlaeng, Mohsih couh roengz bya bae, naeuz gyoengq vunz ni, hawj gyoengqde guh ndei cwnjbiq, hawj gyoengqde lawh buh saeg buh.

¹⁵ Mohsih doiq gyoengqde naeuz: “Daengz daixsam ngoenz ij cwnjbiq ndei, caemh mbouj ndaej dep vunzbaz.”

¹⁶ Couh yienghneix, daengz daixsam ngoenz dih doengxhaet daihcaeux, gwnz bya byajmyig, byajraez, gij fwj fan foedfoed, gij sing gywnhhauh mwnq yiengj gog saxsax. Gij vunz ndaw cangqbungz dingq le, cungj lau hwj saenz dedded liux.

¹⁷ Yiengq Mohsih couh daiq gyoengq vunz okdaeuj daengz laj dinbya cimh Cangqdiq.

¹⁸ Baenx cenz bya Sihnaiq cungj hoenz ngaujngauq fan foedfoed, luj oenq yiuz nwih, aenvih Yehhozvaz caeuq feiz roengz daeuj gwnz bya, guh hwj baenx aen bya cungj doengh fwenxfwenx bae.

¹⁹ Gij sing yiengj mwnq yied yiengj yied gog. Couh youq mwhneix, Mohsih couh caeuq Cangqdiq gangj vah; Cangqdiq couh yungh gij sing luj byajraez he ma dap de.

²⁰ Yehhozvaz roengz daengz gwnz dingj bya Sihnaiq le, couh heuh Mohsih hwnj gwnz dingjbya bae; Mohsih couh hwnj bya bae.

²¹ Yehhozvaz doiq Mohsih naeuz: “Mwngz roengz bae naeuz gyoengq vunz ni, mbouj ndaej roemx cauhgoq diuz sienq daeuj yawj gou, hoengjlau gyoengqde rai vunz daiq lai lai.

²² Caemh hawj doengh boux cenmonz guh dajbwiz mwnq cwnjbiq ndei, caemh ij swiq cengh bonjfaenh hwj daeuj gaenh gou; mbouj nex, gou lienz gyoengqde cungj gaj.”

²³ Gajlaeng, Mohsih doiq Yehhozvaz naeuz: “Gyoengq vunz mbouj roemx cauhgoq diuz sienq hwnj bya daeuj law, aenvih mwngz gaenq gingjgauq goq raeuz, ij youq seiqhenz bya veh sienq gek hwnjdaeuj, hawj aen bya neix suenq dwg aen bya dwzbez he lo.”

²⁴ Yehhozvaz doiq Mohsih naeuz: “Mwngz roengz maj bax, roengz maj daiq Yaqlwnz itheij hwnj daeuj, hoeng, gyoengq vunz caeuq doengh boux cenmonz guh dajbwiz he mbouj ndaej cauhgoq diuz sienq mwnq hwnj daeuj daengz dangqnaj gou, hoengjlau gou sawqmwh gaj gyoengqde.”

²⁵ Yiengq Mohsih couh roengz ma, dawz gij vah Yehhozvaz gangj naeuz gij vunz Hijswzlez ni.