Ok Ngaihgiz 18 - Gij Baujcingq Moq Caeuq Geij Bonj Gij Baujcingq Daeuzdaeuz

Goeng boxda Mohsih bae cimh Mohsih

¹ Goeng boxda Mohsih Yezdwzloz, dieg Mijdenq dih goengjsae dajbwiz, dingqri naeuz Yehhozvaz daiq gij vunz Hijswzlez ok Ngaihgiz ma hih mwhde de baenzlaw bang Mohsih caeuq baenzlaw bang gij vunz Hijswzlez le,

² couh daiq mehyah Mohsih caeuq song daeglwg de bae daengz aen bya Cangqdiq. Mehyah de heuh Sihbohlah, couh dwg Mohsih gaxgonq soengq maj laeng boxda de he.

³ Song daeglwg de, daeg he gij coh de heuh Gwzcwnq (‘Gwzcwnq’ gij coh neix caeuq gij vah Hihbwzlaiz dih gawq ‘doz youq mwnq’ doeg ijvanh doxdoengz), aenvih Mohsih naeuz goq: “Gou dwg boux doz youq vaihdieg youq he.”

⁴ Lingh daeg dwg heuh Hijliqhijseq (‘Hijliqhijseq’ dwg ‘gou dih Cangqdiq bang gou’ dih iqswh), aenvih Mohsih naeuz goq: “Cangqdiq daxboh gou bang gou goq, hawj gou ndaej duet ok, mbouj ngaiz goengjvuengz Ngaihgiz haih.”

⁵ Yezdwzloz daiq mehyah Mohsih caeuq song daeglwg de bae daengz aen bya Cangqdiq, couh dwg Mohsih youq aen ndoi cap yingz youq hih mwnq.

⁶ Yiengq, Yezdwzloz bae daengz mwnq le, couh sien hawj vunz bae naeuz Mohsih ni naeuz gyoengqde daeuj lo.

⁷ Mohsih dingq le, couh ok bae ciep de, sax de, got de. Gajlaeng, gyoengqde caemh doxdongx le, couh haeuj ndaw cangqbungz bae lo.

⁸ Mohsih couh gangj naeuz de ni, Yehhozvaz gouq gij vunz Hijswzlez okma hih mwhde, baenzlawz doiq goengjvuengz caeuq baenzlawz doiq gij vunz Ngaihgiz, caeuq gij vunz Hijswzlez youq dangjroen roeb daengz dih nanh hah, Yehhozvaz baenzlaw gouq gyoengqde hah cungj gangj naeuz de ni liux.

⁹ Yiengq, de rox naeuz Yehhozvaz dajlwh laeng goengjvuengz Ngaihgiz gouq gij vunz Hijswzlez okma hih mwhde, doiq gij vunz Hijswzlez baenxlai ndei le, cungj angq raixcaix.

¹⁰ De naeuz: “Wnggai haenh Yehhozvaz! Dwg de dajlaeng goengjvuengz caeuq gij vunz Ngaihgiz gouq faenhsou okma!

¹¹ Seizneix gou rox Yehhozvaz beij sojmiz hih vunz baiq hih cwnz ak, aenvih mwh gij vunz Ngaihgiz hangz caeuq yawj mbouj hwnj gij vunz Hijswzlez hih mwhde, Yehhozvaz gouq gyoengqde ok Ngaihgiz ma.”

¹² Gajlaeng goeng boxda Mohsih couh dawz doengh duz cukseng ij coemh hwj dajbwiz he caeuq doenghgij dajbwiz he bae bwiz Cangqdiq. Yaqlwnz caeuq doengh gyoengq Hijswzlez vunz gangj vah couh baenz he cungj daeuj caeuq goeng boxda Mohsih youq dangqnaj Cangqdiq gw haeux.

Senj saemjbuenqguenh

¹³ Daixngeih ngoenz, Mohsih naengh youq cungqgyan gyoengq vunzlai hwj saemj saeh. Gij vunz lai raixcaix; Mohsih daj doengxhaet buenq daengz doengxhaemh, nyungj ij rai, mbouj dingz goq.

¹⁴ Yiengq, goeng boxda de raen yienghneix le, couh doiq Mohsih naeuz: “Mwngz vih gyoengq vunzlai banh gijmaz saeh nej? Vihmaz baenx lai vunz, gyoengqde daj doengxhaet daeuj mwnqneix daengj mwngz, hoeng, mwnqneix caenhgag miz mwngz boux dog nej?”

¹⁵ Mohsih han naeuz: “Aenvih gyoengqde daeuj laeng gou dineix gouzcam Cangqdiq.

¹⁶ Gyoengqde song mbiengj miz maz saeh hih, couh daeuj cimh gou buenq hawj gyoengqde, buenq yawj byawz deng byawz mbouj deng. Gou caemh naeuz gyoengqde ni, hawj gyoengqde rox, ij soenhsouj gij gveihdingq Cangqdiq.”

¹⁷ Gajlaeng goeng boxda de naeuz: “Mwngz yienghneix guh mbouj gaeuq ngamj geijlai.

¹⁸ Gij hong neix daiq lai lai; mwngz boux vunz dog banh mbouj liux. Yienghmwnq mwngz caeuq gyoengq vunz cungj ij ngaiz naet hwj dingx mbouj ndaej bae.

¹⁹ Seizneix mwngz dingq gou naeuz, gou ok gij cawjeiq he hawj mwngz; gou muengh Cangqdiq bang mwngz. Mwngz ij bang gij vunz dawz gyoengqde doxgauq doxceng hih saeh cenz naeuz Cangqdiq ni,

²⁰ caemh ij dawz Cangqdiq dih gveihdingq cenz naeuz gyoengqde ni, son gyoengqde, hawj gyoengqde rox, youq saenghhoz ndaw de ij baenzlawz hengz.

²¹ Cawz yienghneix, mwngz caemh ij dajlaeng gyoengq vunz ndaw de genj aeu doengh boux coengjmingz caemh caixhangz he, caemh dwg yawjnaek Cangqdiq, lauxsaed, vunz oet cienz caemh mbouj aeu he hih vunz ma guenj gij vunz Hijswzlez; moix it cien vunz ij miz boux he dungjguenj, cien vunz ndaw de caemh faen bak boux, hajcib boux, cib boux, caemh miz vunz guenj.

²² Hawj doengh boux vunz neix bang gyoengq vunz buenq saeh. Saeh iq hih, gyoengqde ndaej gag buenq; saeh hung hih cij hawj mwngz buenq. Yienghneix, gyoengqde ndaej bang mwngz dan di he; mwngz couh mbouj baenq dwgrengz lo.

²³ Hauhnaeuz mwngz yienghneix guh, caemh dwg Cangqdiq ij raengq hawj mwngz yienghneix guh he, yienghmwnq mwngz couh mbouj roxnginh naet, gyoengq vunz dih saeh caemh ndaej gaijgyez ndaej vaiq, vunz caemh roxnginh sim'angq.”

²⁴ Gajlaeng, Mohsih caemh dingq goeng boxda de ok dih cawjeiq, ciuq de soj gangj hih yienghmwnq bae guh lo.

²⁵ Mohsih couh dajlaeng gyoengq vunz Hijswzlez genj aeu boux coengjmingz caixhangz he, hawj gyoengqde guh cien vunz, bak vunz, hajcib vunz caeuq cib vunz hih boux dang daeuz he.

²⁶ Gyoengqde caemh bang gyoengq vunz buenq saeh. Roeb daengz gij saeh haemq hoj buenq he, couh gyau hawj Mohsih buenq; gij saeh iq he, gyoengqde couh gag buenq.

²⁷ Gajlaeng, goeng boxda de couh gag maj dieg bonjfaenh de lo.