Ok Ngaihgiz 14 - Gij Baujcingq Moq Caeuq Geij Bonj Gij Baujcingq Daeuzdaeuz

Hijswzlez vunz goq haij

¹ Yehhozvaz doiq Mohsih naeuz:

² “Mwngz bae raengq gij vunz Hijswzlez, hawj gyoengqde byaij dauqlaeng, bae mwnq heuh Mizdoz caeuq haij hih cungqgyan de, youq dangqnaj Bij-Hahhihluz gaenh Bahliz-Sijfaenh he cap yingz youq,

³ hawj goengjvuengz Ngaihgiz naemqnaeuz gij vunz Hijswzlez ngaiz cahmoz dangj naj le ngaiz loengj roen lah.

⁴ Gou ij hawj aen sim goengjvuengz gyeng hwnjdaeuj caiq akeuq hwj caeuq gyoengq bing de ok daeuj boenq faenhsou. Daengz mwhmwnq, gou couh ndaej youq laeng de caeuq gyoengq bing de mwnq yienh ok gij ak gou, ndaej hawj gou najrongh. Yiengq gij vunz Ngaihgiz couh rox gou dwg Yehhozvaz.” Yiengq, gij vunz Hijswzlez caemh ciuq de soj raengq hih yienghmwnq bae guh lo.

⁵ Goengjvuengz dingqri naeuz gij vunz Hijswzlez gaenq deuz lo le, de caeuq doengh boux gaen henz ndang de couh gaij gij cawjeiq gyoengqde lo, couh naeuz: “Gyoengqraeuz guxmaz ij coengq gij vunz Hijswzlez nej? Coengq gyoengqde le, baezneix bouxlawz daeuj swqhaeuh gyoengqraeuz nej?”

^6-8 Yehhozvaz vanzlij hawj aen sim goengjvuengz cix gyeng cix akeuq, [6]goeng de couh cwnjbiq aen ci hoenxciengq de, caeuq heuh gyoengq bing de daeuj, [7]couh daiq sojmiz hih doenghheij ci hoenxciengq de, daiqlienz roekbak aen ci hoenxciengq ceiq ndei de, cungj dwg cenznaengz youz gywnhguenh cijveih he, [8b]bae boenq gij vunz Hijswzlez. Hoeng, gij vunz Hijswzlez it di cungj mbouj rox, dauq byaij yoekyoek ok Ngaihgiz ma.

⁹ Gyoengq bing Ngaihgiz, lienz cenqmaj hah, ci hoenxciengq hah, caeuq bingmax hah cungj bae boenq gij vunz Hijswzlez, boenq daengz gyoengqde cap yingz youq hih henz haij mwnq gaenh Bij-Hahhihluz caeuq Bahliz-Sijfaenh hih mwnq.

¹⁰ Gyoengq vunz Hijswzlez baex raen goengjvuengz caeuq gyoengq bing de boenq daeuj le, cungj lau hwj dungxmbouq ndangsaenz liux, vaiqdi hemq Yehhozvaz gouz gouq.

¹¹ Gajlaeng, gyoengqde vanzlij doiq Mohsih naeuz: “Nanzdauh youq Ngaihgiz mij dieg ndaej moek gyoengqraeuz maz? Vihmaz ij daiq gyoengqraeuz daeuj daengz rogndoi neix soengqrai nej? Mwngz yawj lux! Mwngz guh gijmaz saeh ndei nex, daiq gyoengqraeuz daj Ngaihgiz okma!

¹² Gyoengqraeuz youq Ngaihgiz mbouj dwg naeuz mwngz ni goq lo maz? Gyoengqraeuz cingxnyienh youq Ngaihgiz swqhaeuh gyoengqde; guh hoiq giengz goq rai youq rogndoi neix!”

¹³ Yiengq, Mohsih han gyoengqde naeuz: “Faenhsou gaejyungh lau! Gaejyungh luenh riq! Yawjyawj Yehhozvaz ngoenz neix baenzlaw gouq faenhsou! Faenhsou caemh mbouj caiq raen gij vunz Ngaihgiz laem lo.

¹⁴ Yehhozvaz de ij vih faenhsou hwj gux hoenxciengq he. Faenhsou caenhrox dingh youq sat lo, gaej hemq.”

¹⁵ Gajlaeng Yehhozvaz doiq Mohsih naeuz: “Mwngz vihmaz gouz gou nej? Mwngz hawj gij vunz Hijswzlez byaij doxbae.

¹⁶ Yingx diuz faexbien mwngz hwnjdaeuj, yinx haeuj ndaw haij bae. Gij raemx haij couh faen song mbiengj hwj miz ndaek lueng he lo. Gij vunz Hijswzlez couh roengz ndaw haij bae, daj mwnq hawq he byaij goq bae.

¹⁷ Gou ij hawj gij vunz Ngaihgiz akeuq caiq simgyeng le, roengz ndaw haij bae boenq faenhsou. Hoeng, gou ij hawj goengjvuengz caeuq gyoengq bing de hah, ci hoenxciengq de hah, gyoengq bingmax de hah, rox gou giengz goq gyoengqde, ak goq gyoengqde; yiengq gou couh ndaej miz naj.

¹⁸ Gou hoenxbaih gyoengqde mwhmwnq, gij vunz Ngaihgiz couh rox gou dwg Yehhozvaz lo.”

¹⁹ Bouxcai Cangqdiq gaxgonq byaij youq dangqnaj gyoengq Hijswzlez daiq roen, seizneix cienq goqma byaij youq baixlaeng. Diuz saeu fwj caemh daj dangqnaj cienq goq baixlaeng ma lo,

²⁰ cienq goqma gek gij vunz Ngaihgiz caeuq gij vunz Hijswzlez hwj, hawj gij vunz Ngaihgiz youq ndaw laep, dauqfanj rongh hawj gij vunz Hijswzlez, guh hwj baenxngwnz, song mbiengj cungj mbouj ndaej doxgaenh.

²¹ Yiengq Mohsih couh iet fawz yiengq ndaw haij bae, Yehhozvaz couh fan raq rumz doeng hunghung rengzrengz he, ci baenxngwnz, ci hawj gij raemx haij doiq faen song mbiengj bae, ndaej raen gij daej haij hawq bae.

²² Gij vunz Hijswzlez couh roengz ndaw haij bae, byaij mwnq hawq de. Gij raemx haij lujnaeuz song ngauh ciengz nwih, lanz youq song mbiengj gyoengqde.

²³ Gij vunz Ngaihgiz boenq gyoengqde hih cenqmaj hah, ci hoenxciengq hah, caeuq bingmax hah cungj roengz ndaw haij bae.

²⁴ Daengz doengxhaet ranz fuemxluemj mwhde, Yehhozvaz daj ndaw diuz saeu feiz yawj gyoengq bing Ngaihgiz, yawj hawj gyoengqde cungj luenh liux bae,

²⁵ caiq hawj gij ci hoenxciengq gyoengqde loem roengz ndaw naez bae, hoj gyingj bae. Yiengq gij vunz Ngaihgiz couh naeuz: “Gyoengqraeuz doiq dauqlaeng bax! Mboujyungh caeuq gyoengq Hijswzlez hoenxciengq lo! Yehhozvaz bang gyoengqde hoenx gyoengqraeuz hwj!”

²⁶ Yehhozvaz caiq doiq Mohsih naeuz: “Mwngz iet fawz yiengq ndaw haij bae, hawj gij raemx haij doiqyungz hob boiz, hawj raemx dumh muenx goq gij vunz Ngaihgiz caeuq doenghheij ci hoenxciengq, doenghheij bingmax gyoengqde bae.”

²⁷ Mohsih couh iet fawz yiengq ndaw haij bae; ranzrongh mwhde, gij raemx youh doiqyungz luj gaxgonq boiz lo. Gij vunz Ngaihgiz ijsiengj daj ndaw raemx hwnj ma, hoeng, cungj ngaiz Yehhozvaz nyoengx gyoengqde laemx youq ndaw haij liux.

²⁸ Raemx haij hob boiz, dumh muenx gyoengq bing Ngaihgiz, ci hoenxciengq caeuq gyoengq bingmax, it boux cungj mbouj lw, rai liux.

²⁹ Hoeng, gij vunz Hijswzlez byaij goq ndaw haij mwnq hawq de, gij raemx haij youq song mbiengj gyoengqde luj song ngauh ciengz nwih.

³⁰ Ngoenz mwnq, Yehhozvaz daiq gij vunz Hijswzlez dajlaeng gij vunz Ngaihgiz gouq okma hih mwhde, gij vunz Hijswzlez raen gij seihaiz gyoengq vunz Ngaihgiz baij lexleh youq henz hamq haij.

³¹ Mwh gij vunz Hijswzlez yawjraen Yehhozvaz yungh gij akak rengzrengz de ma hoenxhingz gyoengq Ngaihgiz le, gyoengqde couh lau Yehhozvaz, caemh sinq de, caeuq sinq Mohsih bouxhoiq de.