Ok Ngaihgiz 10 - Gij Baujcingq Moq Caeuq Geij Bonj Gij Baujcingq Daeuzdaeuz

Duz daek

¹ Yehhozvaz caiq doiq Mohsih naeuz: “Mwngz bae laeng goengjvuengz. Gou ij hawj aen sim de caeuq gyoengq vunz gaen henz ndang de gyeng caemh akeuq. Gou yienghneix guh couh dwg ij youq laeng gyoengqde guh doenghgij geizmiuj neix.

² Gou caemh ij hawj mwngz dawz gou youq laeng gij vunz Ngaihgiz mwnq baenzlaw loengh baenzlaw yaeujyak gyoengqde gaijmbwq, caeuq baenzlaw loengh doenghgij geizmiuj he, naeuz doengh daih lwg, daih lan, daih laenj mwngz ni, hawj daixgya rox gou dwg Yehhozvaz.”

³ Yehhozvaz yienghneix naeuz le, Mohsih caeuq Yaqlwnz couh haeuj bae laeng goengjvuengz doiq de naeuz: “Yehhozvaz, Hihbwzlaiz vunz dih Cangqdiq, yienghneix naeuz: ‘Mwngz ij daengz seizlaw bae cij fug gou nej? Cij fug coengq gij vunz gou okma, hawj gyoengqde bae baiq gou nej?

⁴ Hauhnaeuz mwngz vanzlij mbouj coengq gij vunz gou okma nex, ngoenzcog gou couh hawj duz daek haeuj ndaw guek mwngz daeuj,

⁵ hawj ndaw guek mwngz dauqcawq cungj miz, lai hwj nana netnet mbouj raen doem bae. Gyoengqde gw doengh go youq ndaw reihnaz byagcaej dub mbouj dawz lij lw hih doenghgo, lienz faex hah cungj gw liux.

⁶ Ndaw vangzgungh mwngz caeuq ndaw ranz doengh boux gaen henz ndang mwngz cungj miz rim bae; sojmiz dih ndaw ranz gij vunz Ngaihgiz cungj ngaiz duz daek ciemq liux. Daj doengh dangq cojgoeng, goenggoeng geqgeq mwngz daengz seizneix cungj mijyaengz raen goq miz gij daek lai luj yienghneix baenxlai yiemzcungq, baenxlai nanh.’” Mohsih yienghneix gangj sat le, couh baetluet dajlaeng goengjvuengz ok ma lo.

⁷ Gajlaeng, doengh boux gaen henz ndang goengjvuengz doiq goengjvuengz naeuz: “Mohsih boux vunz neix vanzlij ij haih gyoengqraeuz geijlwh caez laem? Cingj mwngz coengq doenghgij vunz neix okbae, hawj gyoengqde bae baiq Yehhozvaz, gyoengqde dih cwnz bax! Nanzdauh mwngz mbouj rox haz, Ngaihgiz cungj ijvanh baih liux lo?”

⁸ Yiengq Mohsih caeuq Yaqlwnz youhcaiq ngaiz goengjvuengz heuh bae. Goengjvuengz doiq gyoengqde naeuz: “Faenhsou bae baiq Yehhozvaz, faenhsou dih cwnz. Hoeng, dauqdaej ij dwg gij vunzlawz bae nex?”

⁹ Mohsih han naeuz: “Gyoengqraeuz baenx gyoengq sojmiz dih vunz, mboujlwnh bouxlaux, lwgngez, vunzsai, vunzbaz cungj bae liux, vanzlij daiq cwzcwz yiengzyiengz doengh duz cukseng itheij bae laem, aenvih gyoengqraeuz ij guh aen ciet baiq Yehhozvaz he.”

¹⁰ Goengjvuengz dingq le, couh fatheiq hwj naeuz: “Gou senqsi cix rox naeuz faenhsou dih gveijmaj lo; yied daek yied laeg hoh lo. Gaej muengh naeuz gou coengq faenhsou bae liux huh.

¹¹ Ciuq faenhsou gaxgonq gouz hih yienghmwnq bae guh; gou caenhgag hawj gij vunzsai hung he bae lah. Lij lw hih vunz, gou haengzbaengzlaengz cungj mbouj hawj bae.” Gangj sat, de couh boenq Mohsih caeuq Yaqlwnz okma.

¹² Gajlaeng, Yehhozvaz caiq doiq Mohsih naeuz: “Mwngz dawz diuz faexbien yinx haeuj Ngaihgiz cenz guek sojmiz dih dieg bae. Gou ij hawj Ngaihgiz sojmiz dih dieg cungj miz daek, gw gij byagcaej dub roengzma lij lw hih doenghgo, gw liux bae.”

¹³ Gajlaeng, Mohsih couh yingx diuz faexbien yinx haeuj Ngaihgiz sojmiz dih dieg bae. Yehhozvaz couh hawj rumz doeng ci haeuj Ngaihgiz bae, ci baenxngoenz baenxngwnz. Daengz doengxhaet daihcaeux, gij daek caeuq rumz doeng cungj ci daeuj daengz Ngaihgiz.

¹⁴ Ngaihgiz sojmiz dih dieg cungj dwg daek, nana netnet bijhuzcih bae, gaeuq youqgaenj lo. Doenghbaez mijyaengz miz yienghneix goq, baezneix caemh mbouj caiq miz.

¹⁵ Gij daek youq lajdoem nana netnet ndaem ruprup bae. Gyoengqde gw doengh go byagcaej dub lij lw hih byaek hah, gij mak gwnz faex hah—mboujguenj faex haj cixnaeuz ndaw reihnaz, fanjcingq doengh go heu yeuj he cungj gw liux bae, it di cungj mbouj lw.

¹⁶ Gajlaeng goengjvuengz cungj gaenjgib hwj heuh Mohsih caeuq Yaqlwnz daeuj, naeuz: “Gou daekcoih Yehhozvaz, faenhsou dih cwnz lo, caemh daekcoih faenhsou.”

¹⁷ Goengjvuengz yienghneix naeuz le, couh doiq Mohsih naeuz: “Seizneix gou gouz mwngz, cingj mwngz nyiuz gou mbat neix, caemh gouz Yehhozvaz gaejyungh dawz gij nanh hwj ij aeu mingh he bae hih gvi hawj gou.”

¹⁸ Mohsih dingq le, couh dajlaeng goengjvuengz ok ma gouz Yehhozvaz,

¹⁹ yiengq Yehhozvaz couh fan rumz sae. Gij rumz ci hwj hung hux hung, dawz gij daek cungj ci haeuj ndaw Hungz Haij bae. Cenz Ngaihgiz sojmiz dih dieg cungj mij lw saek duz.

²⁰ Hoeng, Yehhozvaz ciuqyiengh hawj aen sim goengjvuengz gyeng caiq akeuq, mbouj coengq gij vunz Hijswzlez okma.

Laep

²¹ Gajlaeng, Yehhozvaz caiq doiq Mohsih naeuz: “Mwngz dawz diuz faexbien yinx hwnj gwnzmbwn bae, hawj Ngaihgiz sojmiz hih dieg cungj laep saengxsaengx liux bae, laep hwj iet fawz cungj mbouj ndaej raen haj lwgfawz bae.”

²² Yiengq, Mohsih couh dawz diuz faexbien yinx hwnj gwnzmbwn bae. Ngaihgiz sojmiz hih dieg couh majcangq laep saengxsaengx liux, lienzdaemh laep baenx sam ngoenz baenx lai.

²³ Bouxlawz cungj mbouj raen bouxlawz, bouxlawz cungj mbouj gamj ok bak ranz bonjfaenh. Caenhgag gij vunz Hijswzlez soj youq hih dieg rongh sat lo.

²⁴ Goengjvuengz raen yienghneix le, caiq heuh Mohsih daeuj, naeuz: “Bae baiq faenhsou dih Yehhozvaz bax! Lwgngez hah, vunzbaz hah cungj ndaej caeuq faenhsou bae; caenh lij lw cwz hah, yiengz hah, louz youq dineix mbouj ndaej bae.”

²⁵ Yiengq, Mohsih han naeuz: “Mwngz ceiq gijmaj cungj ij hawj raeuz dawz gij dajbwiz dajcoemh hih doengh duz cukseng bae bwiz Yehhozvaz raeuz dih Cangqdiq haj.

²⁶ Doengh duz cukseng, raeuz cungj ij daiq bae liux cij ndaej, it duz cungj mbouj lw, aenvih gyoengqraeuz ij daj ndaw doengh duz cukseng genj okdaeuj aeu ma bwiz Yehhozvaz raeuz dih Cangqdiq; raeuz caemh dwg ij bae daengz mwnqde le, cij rox naeuz ij genj aeu duzlaw hah.”

²⁷ Hoeng, Yehhozvaz vanzlij dwg hawj aen sim goengjvuengz gyeng, akeuq, mbouj gaengj coengq gij vunz Hijswzlez okma.

²⁸ Goeng de hujheiq hwj doiq Mohsih naeuz: “Mwngz vaiqdi deuz! Vaiqdi ok bae! Hoeng, mwngz ij siujsim, gaejyungh caiq hawj gou raen mwngz. Hauhnaeuz caiq hawj gou raen mwngz laem nex, mwngz gaengjdingq ij ngaiz rai.”

²⁹ Mohsih han naeuz: “Mwngz naeuz ndaej deng lo; gou gaengjdingq mbouj caiq raen mwngz laem lo.”