Majgoj Saw 7 - Gij Baujcingq Moq Caeuq Geij Bonj Gij Baujcingq Daeuzdaeuz

Cangqdiq dih fazliz caeuq vunz dih laehbeih

¹ Miz ngoenz he, gij vunz gaep haeuj Fazliqcaiq baij he caeuq geij boux Youzdaiq fazliz cenhgyah he daj Yehluqsajlaengj daeuj daengz Yehsuh mwnq doxcomz.

² Yiengq gyoengqde yawjraen gij lwgsae Yehsuh miz hih vunz mij ciuq gij laehbeih Fazliqcaiq baij vunz yienghmwnq swiq fawz cij gw haeux hih yienghmwnq, couh nginhnaeuz yienghmwnq mbouj hab he.

³ (Yienzlaiz Youzdaiq vunz, dwzbez dwg doenghheij gaep haeuj Fazliqcaiq baij dih Youzdaiq gyauqbaij he, gyoengqde cungj dwg ciuq dangqlaux dih laehbeih, ij swiq fawz cij ndaej gw haeux,

⁴ caeuq hauhnaeuz bae gai cawx gij gw ma, mbouj sien saj raemx hawj gij de suenq dwg hab gij laehbeih gyoengqde nex, caemh mbouj gw gij de. Mbouj danhcij naeuz yienghneix, vanzlij miz baenx haujlai laehbeih haem, beijgangj naeuz: cenj hah, guenq hah, doengh aen aeu doengz ma guh hih doengh aen dajcoux he hah, cungj ij yomx raemx hawj aen de mbaeq hwj bienqbaenz hab gij laehbeih gyoengqde bae.)

⁵ Gyoengqde yawjraen yienghneix le, couh gvaiq Yehsuh naeuz: “Vihmaz gij lwgsae mwngz mbouj ciuq gij laehbeih dangqlaux yienghmwnq swiq fawz le cij gw haeux nej?”

^6-7 Yehsuh dingq le, couh han gyoengqde naeuz: [6c]“Hijcaiqyaq boux cenz gij vah Cangqdiq neix youq ndaw Singqgingh ndaw de doiq doengh cungj vunz gyajcang guh simndei simsoh hih faenhsou naeuz goq naeuz: Cangqdiq naeuz: ‘Doenghgij vunz neix conghbak naeuz soenhgingq gou, hoeng, ndaw sim gyoengqde dauq mbouj leix gou. [7]Gyoengqde engq dawz vunz dih laehbeih caeuq gveihdingq ma dangqbaenz gij mingqlingq gou. Gyoengqde baiq gou dwg mij'z yungh hih.’ [6b]De naeuz hih doengh gawq neix dwg deng hih.”

⁸ Yehsuh gangj daengz dineix le, vanzlij caiq naeuz: “Faenhsou caenhrox yawjnaek gij laehbeih vunz dingh okdaeuj he, dauq mij leix gij mingqlingq Cangqdiq.”

⁹ De vanzlij caiq naeuz: “Faenhsou vih ij ciuq gij laehbeih faenhsou hwj yungh cungj banjdaeuz he ma vwt gij mingqlingq Cangqdiq.

¹⁰ Cangqdiq dunghgoq Mohsih hwj hawj de naeuz goq, naeuz: Ij yawjdij bohmeh. Caemh naeuz: Famz ndaq bohmeh hih, boux de gaengjdingq ij ngaiz gajrai.

¹¹ Hoeng, faenhsou nej? Faenhsou dauq naeuz: Hauhnaeuz miz vunz doiq bohmeh naeuz: ‘Gou gaenq dawz baenjlaiz ij ciengx ij hawj faenhsou hih, gaenq aeu bae soengq hawj Cangqdiq lo,’

¹² boux de yienghneix naeuz, faenhsou couh naeuz boux de mboujyungh yauqgingq bohmeh lo.

¹³ Faenhsou yienghneix guh caemhdangq dawz gij laehbeih faenhsou ma dingj gij vah Cangqdiq lo. Faenhsou vanzlij guh baenx haujlai luj yienghneix dih saeh.”

¹⁴ Couh vih yienghneix, Yehsuh heuh gyoengq vunzlai daeuj doxcomz, doiq gyoengqde naeuz: “Faenhsou ij dingq gij vah gou, caemh ijaeu rox,

¹⁵ couh dwg naeuz daj rog haeuj bae daengz gwnz ndang vunz hih mbouj ndaej hawj Cangqdiq dwgcaengz nej; hawj Cangqdiq dwgcaengz hih dauq dwg daj gwnz ndang vunz ok daeuj cij ndaej hawj Cangqdiq dwgcaengz lah.”

¹⁶ [Yehsuh yienghneix doiq gyoengq vunz gangj sat le, couh naeuz: “Daxbaenh gou soj gangj hih faenhsou ijaeu dawz haeuj rwz.”]

¹⁷ Yehsuh gangj sat doengh gawq neix le, couh haeuj ranz maj lo. Haeuj maj le, gyoengq lwgsae de couh cam de gij beijgangj de dwg gijmaz iqswh.

¹⁸ Yiengq Yehsuh couh doiq gyoengq lwgsae de naeuz: “Faenhsou caemh luj gyoengqde mbouj rox haj? Faenhsou mbouj rox daj rog gw doxhaeuj hih mbouj ndaej hawj Cangqdiq dwgcaengz haj?

¹⁹ Aenvih daj rog gw doxhaeuj hih mbouj dwg haeuj ndaw sim, dauq dwg roengz dungx lah. Gw roengz dungx hih cungj ij baiz okdaeuj.” (Yehsuh yienghneix naeuz dwg ceij sojmiz hih gij gw youq ndaw lwgra Cangqdiq suenq dwg hab ndaej gw he.)

²⁰ De vanzlij caiq naeuz: “Hawj Cangqdiq dwgcaengz hih cungj dwg dajlaeng vunz ok daeuj hih,

²¹ aenvih dajlaeng vunz ok daeuj couh dwg daj ndaw sim vunz ok daeuj hih gak cungj doegdoeg siebsieb hih siengjfap. Gij siengjfap neix ndaej hawj vunz famh coih guh gij hawj vunz gangj mbouj ndaej ok bak he,

²² guxcaeg hah, gaj vunz hah, guhyoux hah, damsim hah, guh doeg guh sieb hah, yaeuh vunz coemx vunz hah, siengj doenghgij ndaengndwet yalw he hah, rahoengz hah, bangjlaih vunz hah, gyauhngauq hah, guh gij saeh ngawz he hah.

²³ Sojmiz hih doenghgij doegsieb yalw neix cungj dwg daj ndaw sim vunz ok daeuj hih; cungj dwg ndaej hawj Cangqdiq dwgcaengz hih.”

Boux vunzbaz linghvaih minzcuz he dih sinqsim

²⁴ Gajlaeng Yehsuh daj mwnq okdin bae dieg Daiqwj. De bae daengz le, couh haeuj aen ranz he bae youq. Baenjlaiz de mbouj siengj hawj vunz rox de youq mwnq hih, hoeng, cungj muenz mbouj goq.

^25-26 Yiengq, mwnq miz boux vunzbaz Hihlaz vunz linghvaih minzcuz he, dwg youq Siqliqfeihnizgih seng he, [25]dahlwg de ngaiz fangz doz. De rox naeuz Yehsuh youq mwnq le, couh bae cimh Yehsuh, bae daengz dangqnaj de bomz roengz doem bae [26b]gouz de, hawj de bang dahlwg de boenq duz fangz doz youq gwnz ndang de okdaeuj.

²⁷ Yehsuh raen yienghneix le, couh doiq de naeuz: “Sien hawj gyoengq lwg gw imq gaenq; dawz gij gw gyoengq lwg gveng hawj ma gw dwg mbouj hab hih.”

²⁸ Boux vunzbaz mwnq dingq le, couh han naeuz: “Dwg hah, bouxcawj hax; mwngz naeuz ndaej deng hih. Hoeng, duz ma youq laj daiz caemh ndaej gw gij loenq lwgngez doek youq laj daiz hih hah.”

²⁹ Yehsuh dingq de yienghneix han de le, couh naeuz: “Mwngz maj bax; baengz gawq vah mwngz neix, duz fangz doz youq gwnz ndang dahlwg mwngz gaenq ok ma lo.”

³⁰ Gajlaeng boux vunzbaz mwnq couh maj lo. Maj le, raen dahlwg de ninz youq gwnz congz, cingqgawq mij fangz doz haem lo.

Yehsuh yw ndei boux vunz youh nuk youh ngoemx he

³¹ Gij saeh neix goq le, Yehsuh caiq daj dieg Daiqwj ok ma byaij goq Sihdoenq dauq ma daengz dieg Dihgyahbohlij dih Gyahliqliq Huz.

³² Yiengq, mwnq miz vunz daiq boux youh nuk youh ngoemx he daeuj cimh Yehsuh, daeuj gouz de hawj de oemj fawz hawj boux nukngoemx mwnq, yw de.

³³ Yehsuh raen le, couh daiq boux nukngoemx mwnq liz gyoengq vunzlai, goq henz he bae, mbouj siengj hawj vunz rox, couh aeu lwgfawz bonjfaenh bae yaek haeuj duj rwz boux nukngoemx mwnq bae, caiq byiq myaiz swk haeuj diuz linx boux de bae.

³⁴ De yienghneix guh le, couh muengh hwnj mbwn bae, diem ndaek gaemz heiq naek he, couh doiq boux de naeuz: “Hijfazdaq!” Yehsuh naeuz gawq neix dih iqswh dwg naeuz: “Ndei lo.”

³⁵ Yehsuh ngamq baex naeuz gawq neix sat bak he, boux de duj rwz de couh doq ndaej dingqri, diuz linx de caemh doq unq, ndaej gangj vah okdaeuj lo.

³⁶ Gajlaeng Yehsuh couh raengq doengh boux rox gij saeh neix he naeuz mbouj hawj gyoengqde dawz gij saeh neix cenz okbae; hoeng, mboujguenj Yehsuh baenzlawz raengq, gyoengqde engqgya yied cenz gij saeh neix.

³⁷ Sojmiz dingq daengz gij saeh neix hih vunz cungj raen geizheih ij rai, cungj naeuz: “De soj guh hih saeh baenz hwx! Gingqyienz ndaej hawj rwznuk ndaej dingqri, ngoemx ndaej gangj vah!”