Majgoj Saw 5 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh youq dieg Gwzlahsinh boenq fangz

¹ Couh yienghneix, Yehsuh caeuq doengh boux lwgsae de naengh ruz bae daengz hamq huz Gyahliqliq doiqmienh mwnq; mwnq dwg haeuj dieg Gwzlahsinh he.

² Gyoengqde bae daengz le, Yehsuh ngamq baex roengz ruz hwnj hamq he, couh doq miz boux ngaiz fangz doz daj ndaw diegmoh ok ma he byaij goq laeng de mwnq daeuj.

^3-4 Boux de siengzseiz cungj dwg youq ndaw diegmoh youq he. [4]Gannaeuz miz vunz aeu lienh ma lienh fawz lienh ha de goq hwj lah, hoeng, cungj ngaiz de ndaej cengq gat ndaej duet okdaeuj, [3b]cungj mij'z vunz ndaej guenj ndaej goq de.

⁵ De ngwnzngoenz youq ndaw diegmoh caeuq youq rogndoi hemq vauxvaux, caemh aeu rin ma gag heh bonjfaenh.

^6-8 De daj lizgyae raen Yehsuh le, couh riq goqdaeuj. [8]Yehsuh raen le, couh haep duz fangz doz youq gwnz ndang boux de naeuz: “Dihduz fangz yak mwngz, daj gwnz ndang de ok ma!” [6b]Gajlaeng boux de couh gvih bomz youq dangqnaj de, [7]hemq naeuz: “Yehsuh, daeglwg ceiq veijdaq dih Cangqdiq, gou caeuq mwngz miz maz gvanhaeh nex? Gou baengh Cangqdiq hwj gouz mwngz, gaejyungh fad gou hawj gou souh nanh!”

⁹ Yehsuh dingq le, couh cam boux de naeuz: “Mwngz heuh maz coh lah?” Boux de han naeuz: “Gou heuh Gyoengq Bing, aenvih gyoengqraeuz miz baenx gyoengq.”

¹⁰ De yienghneix han de le, vanzlij caiq gouz Yehsuh, gouz sam gouz seiq, gouz mbouj hawj Yehsuh boenq gyoengqde ok mwnq dieg mwnq bae.

¹¹ Yiengq ngamqluj mwhneix, youq mwnq mbouj geijlwh gyae miz ndaek gyoengq mou he youq bangxbya gw doxgaiq;

¹² gyoengq fangz couh gouz Yehsuh naeuz: “Gouz mwngz hawj gyoengqraeuz haeuj laeng gyoengq mou mwnq bae bax.”

¹³ Yiengq Yehsuh caemh dapwngq gyoengqde. Gajlaeng, gyoengq fangz couh daj gwnz ndang boux de ok ma, ndaenj haeuj gwnz ndang gyoengq mou mwnq bae lo. Yiengq gyoengq mou mwnq couh cung roengz ndaw huz bae rai liux lo. Gyoengq mou mwnq daihgaiq miz songcien duz yienghneix.

¹⁴ Gij vunz ciengx mou mwnq raen yienghneix le, couh majcangq riq deuz, riq bae daengz ndaw singz caeuq bae daengz lajmbanj, bae gangj naeuz vunz ni gij saeh neix. Gij vunz dingq le, cungj ok daeuj siengj yawjyawj dauqdaej dwg gijmaz saeh.

¹⁵ Gyoengq vunz daengz Yehsuh mwnq le, yawjraen boux ngaiz fangz doz mwnq gaenq daenj buh ndei seuqset hwj naengh youq mwnq, vunz caemh singqsag lo, couh rox de mij ngaiz gyoengq fangz doz laem lo. Gyoengq vunz raen yienghneix le, cungj lau liux.

¹⁶ Yiengq doengh boux caenra raen gij saeh neix he couh gangj naeuz gyoengq vunzlai ni boux ngaiz fangz doz mwnq caeuq gyoengq mou mwnq hih saeh.

¹⁷ Gyoengq vunz dingq le, cungj lau hwj ij rai bae, couh gouz Yehsuh, hawj Yehsuh bae daixlingh mwnq, mbouj youq mwnq dieg gyoengqde mwnq youq.

¹⁸ Couh yienghneix, Yehsuh couh dauq hwnj ruz bae. Couh ij dauq ma hih mwhde, boux ngaiz fangz doz goq mwnq dauq gouz Yehsuh, ijsiengj gaen Yehsuh bae.

¹⁹ Hoeng, Yehsuh mij dapwngq boux de, dauq doiq boux de naeuz: “Mwngz maj ranz bax; bae naeuz doenghheij beixnuengx caencik mwngz ni Cangqdiq baenzlawz hojsik mwngz caeuq baenzlawz bang mwngz guh baenxlai ndei hih saeh.”

²⁰ Boux de dingq le, caemh ciuq Yehsuh raengq hih yienghmwnq bae guh lo; de bae daengz dieg Dihgyahbohlij le, couh gaihcij cenzgangj Yehsuh baenzlawz doiq de soj guh hih saeh, gangj hwj hawj gij vunz mwnq cungj raen geizheih ij rai bae.

Yehsuh yw binghvunzbaz caeuq gouq dahlwg Yazluj

²¹ Gajlaeng Yehsuh youhcaiq naengh ruz bae baih huz baih de. De ngamq baex hwnj hamq he, couh miz baenx haujlai vunz daeuj gvaengz de.

²² Yiengq, youq mwnq miz boux heuh Yazluj he; de dwg dieg mwnq hih boux veiqdangz daeuzdaeuz he. De daeuj daengz dangqnaj Yehsuh couh gvih bomz roengz dangqnaj Yehsuh bae,

²³ couh gouz hux gouz de naeuz: “Lauxsae, lauxsae, dahniq gou bingh hwj cienfanh youqgaenj he, ij rai senxsenx lo! Gouz mwngz vaiq bae oemj fawz haeuj laeng de bae yw de, gouq de.”

²⁴ Yehsuh dingq boux de yienghneix naeuz le, couh gaen boux de bae. Hoeng, Yehsuh bae hih mwhde, miz baenx haujlai vunz gvaengz de gaen de, gvaengz hwj nyaed yubyub bae.

²⁵ Couh youq mwhneix, miz boux vunzbaz he, de ndwennaengz miz gij doxgaiq mwnq daeuj, cungj daeuj mbouj dingz goq, gaenq yienghneix baenx cibngeih bi lo.

²⁶ Gannaeuz de vah bae sojmiz hih ngaenz bae hawj canghyw yw lah, hoeng, cungj mij saek boux canghyw yw ndaej ndei de; mbouj gangjnaeuz yw ndaej ndei lo, vanzlij engqgya hojyouq, vanzlij engqgya yied ngoenz yied youqgaenj.

^27-28 Yiengq de dingq naeuz gvanhhih Yehsuh dih saeh le, [28]ndaw sim de couh gag naemj: “Cijaeu gou ndaej mo dawz gij buh de, gou couh ndaej ndei lo.” [27b]De yienghneix naemj le, couh domh mwhneix caenx bae daengz baixlaeng Yehsuh, couh mo diuz buh de.

²⁹ De ngamq baex mo he, gij doxgaiq couh majcangq doq dingz lo, de caemh roxnginh gij bingh de gaenq ndei lo.

³⁰ Couh youq mwhneix, Yehsuh caemh majcangq rox gij bonjsaeh ndaej yw bingh de daj gwnz ndang de mwg okbae lo. De couh veq ndang goqma cam gyoengq vunzlai naeuz: “Byawz mo diuz buh gou lah?”

³¹ Yiengq gij lwgsae de raen de yienghneix cam le, dauj cam de naeuz: “Lauxsae, hawjm'z yawj hux, miz baenx lai vunz daeuj gvaengz mwngz caenx mwngz; mwngz ij baenz naeuz miz vunz mo mwngz nej?”

³² Hoeng, Yehsuh vanzlij dwg dauqcawq yawjyawj, siengj yawj boux vunzbaz mo de mwnq.

³³ Boux vunzbaz mwnq dingq le, rox naeuz muenz mbouj goq Yehsuh lo, couh saenz dedded hwj goq dangqnaj de daeuj gvih bomz roengzbae, naeuz de ni bonjfaenh de vihmaz ij mo de, caeuq mo de le couh majcangq ndei he, gij saeh neix.

³⁴ Yehsuh dingq le, couh doiq boux vunzbaz mwnq naeuz: “Dahniq hax, gij sinqsim mwngz ndaej gouq mwngz lo. Gij bingh mwngz gaenq ndei liux lo; mwngz couh coengqsim maj bax!”

³⁵ Couh youq mwh Yehsuh gangj doenghgij vah neix hih mwhde, miz vunz daj ndaw ranz Yazluj veiqdangz dih daeuzdaeuz he daeuj naeuz Yazluj ni, naeuz: “Dahlwg mwngz gaenq rai lo; mboujyungh mazfanz lauxsae lo bax.”

³⁶ Yehsuh dingq le, couh doiq Yazluj naeuz: “Gaejyungh lau; cijaeu sinq!”

³⁷ Couh yienghneix, Yehsuh daiq Bijdwz caeuq Yajgoz caeuq Yozhanq daegnuengx Yajgoz bae ndaw ranz Yazluj lo, hoeng, de mbouj hawj gizdah vunz gaen de bae, caenhgag daiq sam boux neix sat lo.

³⁸ De bae daengz ranz de le, yawjraen ndaw ranz de gij vunz luenh yobyob, daej hwj gog saxsax.

³⁹ Yehsuh raen yienghneix le, couh haeuj ndaw ranz de bae doiq gyoengq vunz naeuz: “Faenhsou vihmaz daej hwj nauhyied foenxfoenx bae nej? Dahlwg neix mij dwg rai law; dwg ninz ralaep lah.”

⁴⁰ Gyoengq vunz dingq de yienghneix naeuz le, engq riu de. Gajlaeng Yehsuh couh boenq gyoengqde okbae, caenhgag hawj bohmeh dah de caeuq sam boux lwgsae de gaen de haeuj ndaw fungh dah de bae sat lo.

⁴¹ De haeuj bae daengz le, couh rag dawz gij fawz dah de, couh doiq de naeuz: “Daqliqdaq, gujmij!” Gawq neix dih gij iqswh de dwg naeuz: “Dahniq hax, gou naeuz hawj mwngz hwnq!”

⁴² Yehsuh ngamq gangj gawq neix sat bak, dah de couh majcangq hwnq hwnjdaeuj, couh doq byaij lo. (Mwhde dah de gaenq ndaej cibngeih bi lo.) Bohmeh de caeuq sam boux lwgsae gaen haeuj bae mwnq raen yienghneix le, cungj doeksaet hwj ij rai bae, baenxlai geizheih.

⁴³ Gajlaeng, Yehsuh couh raengq bohmeh dah de caeuq doengh boux lwgsae de, raengq gyoengqde ciengeiz mbouj ndaej gangj naeuz vunz ni gij saeh neix. De caemh raengq naeuz aeu doxgaiq hawj dah de gw.