Majgoj Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh youq ngoenz ngoenzyietbaeg yw ndei vunz fawz vej

¹ Caiq miz baez he, Yehsuh youq ngoenz ngoenzyietbaeg bae veiqdangz. Yiengq youq ndaw veiqdangz mwnq miz boux he cik fawz de vej hwj.

² Yiengq, youq mwnq miz vunz doiq Yehsuh mbouj muenx, couh demq yawj siengj yawj Yehsuh dwg mbouj dwg youq ngoenz ngoenzyietbaeg yw bingh, yw boux fawz vej mwnq, muzdiz dwg siengj ra congxmbongq cimh cingqgiq ma gauq de, aenvih youq ngoenz ngoenzyietbaeg yw bingh couh suenq veizfanj Youzdaiq fazliz lo.

³ Gajlaeng Yehsuh yawj ndaej ok gyoengqde dih yimhmaeuz le, couh doiq boux fawz vej mwnq naeuz: “Daeuj, daeuj dangqnaj vunzlai ndwn hwj.” Yehsuh yienghneix naeuz le, boux de caemh dingq Yehsuh hwj ndwn youq dangqnaj vunzlai.

⁴ Yehsuh yienghneix naeuz le, couh doiq gyoengq vunzlai naeuz: “Gou cam faenhsou, youq ngoenz ngoenzyietbaeg, wnggai guh saeh ndei, cixnaeuz guh saeh yak saeh rwix; gouq vunz cixnaeuz haih vunz nej? Sou naeuz.” Gyoengq vunz dingq de yienghneix cam le, cungj mij saek boux ok sing.

⁵ Yehsuh yawjraen yienghneix le, couh aeuqheiq hwj cimyawj gyoengq vunz, rox naeuz aen sim gyoengqde simgyeng raixcaix le, couh roxnginh siengsim ij rai bae, couh doiq boux fawz vej mwnq naeuz: “Iet gij fawz mwngz okdaeuj.” Boux de dingq le, caemh iet gij fawz de okdaeuj. Boux de baex iet okdaeuj he, cik fawz de couh doq ndeindwt hwnjdaeuj lo.

⁶ Yiengq, doenghheij vunz gaep haeuj Fazliqcaiq baij he raen yienghneix le, cungj ndatheiq hwj ij rai bae, couh majcangq ok veiqdangz ma, bae caeuq doenghgij vunz gaep haeuj Hihliz dangjbaij mwnq doxcimciek hwj ij baenzlaw ndaej cawz Yehsuh bae.

Miz haujlai vunz gaen Yehsuh

⁷ Yiengq Yehsuh rox le, couh caeuq doenghheij lwgsae de daj veiqdangz ok ma bae daengz henz huz. De bae hih mwhde, miz baenx haujlai vunz gaen de bae; gyoengqde dwg daj Gyahliqliq daeuj gaen de he.

⁸ Yiengq caemh miz haujlai vunz dingq daengz gvanhhih Yehsuh soj guh hih saeh le, cungj daj Youzdaiq Saengj hah, Yehluqsajlaengj hah, Hijdujmaij hah, doiqmienh diuz dah Yozdanq hah, simqciq dajlwh Daiqwj hah, Sihdoenq hah, caeuq seiqhenz song aen singz neix hah, cungj daeuj daengz de mwnq cimh de gaen de.

⁹ Yehsuh raen yienghneix vunz daiq lai lai le, couh naeuz gij lwgsae de, hawj gyoengqde ra aen ruz iq he hwj cwnjbiq, mienxndaej ngaiz vunzlai caenx le, couh ndaej hwnj ruz bae lo,

¹⁰ aenvih de yw ndei baenx haujlai vunz bingh, sojhij sojmiz miz bingh hih vunz cungj buekmingh caenx haeujbae dep Yehsuh, siengj dep de mo de.

¹¹ Doenghheij vunz ngaiz fangz doz he raen de le, cungj bomz youq dangqnaj de, hemq naeuz: “Mwngz dwg lwg Cangqdiq! Mwngz dwg lwg Cangqdiq!”

¹² Hoeng, Yehsuh dingq le, dauq mingqlingq gyoengqde, mbouj hawj gyoengqde naeuz de dwg bouxlawz hawj vunz rox.

Yehsuh dingh aeu cibngeih boux dwzbaijyienz

¹³ Gajlaeng, Yehsuh hwnj bya bae. De heuh doenghheij lwgsae de hab'eiq he gaen de bae; gyoengqde caemh gaen de bae.

¹⁴ Yiengq de couh youq ndaw gyoengqde genj aeu cibngeih boux okdaeuj, [an gyoengqde heuh ‘dwzbaijyienz,’] hawj gyoengqde gaen henz ndang de, caemh baij gyoengqde bae cenzgangj Cangqdiq dih ndei siuhsiz,

¹⁵ caemh nyok gij gienz ndaej boenq fangz he hawj gyoengqde.

¹⁶ Gyoengqde couh dwg: Sihmaenz (Sihmaenz Yehsuh caemh an coh hawj de heuh Bijdwz),

¹⁷ caemh miz song daeglwg Sihbiqdaiq, Yajgoz caeuq daegnuengx de Yozhanq (Yehsuh caemh an coh hawj song boux de heuh Buenqnizgiz; ‘Buenqnizgiz’ couh dwg ‘daeglwg byajraez’ dih iqswh),

¹⁸ vanzlij miz Anhdwzlez, Feihliz, Bahdohlozmaij, Majdaiq, Dohmaj, caeuq Yajgoz daeglwg Yaqlwzfeih, caeuq Dazdaiq, caeuq Gizcwnq Dangj dih Sihmaenz,

¹⁹ vanzlij miz buenqduz cuzmaiq Yehsuh dih Youzdaq, Gyahloz vunz, couh dwg cibngeih boux neix.

Bangjlaih Yehsuh baengh fangzvuengz

²⁰ Yehsuh senj laebdingh gyoengq neix ndei le, couh roengz bya ma lo. De ngamq baex haeuj ranz he, gyoengq vunzlai couh daeuj gvaengz de, gvaengz hwj cienfanh lai he, guh hwj de caeuq gyoengq lwgsae de mij banqfaz gw haeux bae.

²¹ Yiengq, gij beixnuengx caencik de dingq naeuz miz gij saeh neix le, cungj naeuz de vangh lo. Gajlaeng gyoengqde couh daeuj sujcij de.

²² Yiengq dajlwh Yehluqsajlaengj daeuj hih doengh boux fazliz cenhgyah he engqgya naeuz de naeuz: “De ngaiz Bezsihbuz duz fangzvuengz neix doz youq gwnz ndang de.” Vanzlij caiq naeuz: “De dwg gauq fangzvuengz boenq fangz he.”

²³ Yehsuh rox le, couh heuh gyoengqde goq daeuj, yungh gij beijgangj he ma doiq gyoengqde naeuz: “Fangzvuengz ij baenz gag boenq fangzvuengz nej?

²⁴ Hauhnaeuz aen gueklawz ndaw guek de gag luenh hih, aen guek mwnq couh mbouj baenz maz guek lo; baih liux bae.

²⁵ Caiq hauhnaeuz ranzlawz doxceng doxnauh hih, ranzlawz caemh gaengjdingq ngaiz siksanq liux bae.

²⁶ Caemh doxdoengz, hauhnaeuz fangzvuengz bonjfaenh gag hoenx bonjfaenh, yiengq aen guek de mijyaengz siksanq liux haz?

²⁷ “Mij'z vunz ndaej ndonj haeuj ranz boux akak rengzrengz he bae ciengj aeu gij doxgaiq de, cizfeih sien ndaej dawz boux de goenj hwnjdaeuj, cij ndaej ciengj aeu gij doxgaiq de, mijn'x gaengjdingq mbouj ndaej.

²⁸ “Gou saedsaeh naeuz sou ni, vunz soj famh hih coih caeuq soj gangj gij vah daekcoih hih cungj ndaej nyiuz,

²⁹ hoeng, gangj gij vah daekcoih Hoenzsaenz Cangqdiq hih vunz yungjyenj mbouj ndaej nyiuz, couh ij yungjyenj rap coih.”

³⁰ Yehsuh yienghneix naeuz dwg aenvih gyoengqde bangjlaih de ngaiz fangz doz.

Gyoengq nuengxau Yehsuh caeuq daxmeh de

^31-32 Couh youq mwh Yehsuh gangj doenghgij vah neix hih mwhde, daxmeh de caeuq doenghheij nuengxau de daeuj cimh de, [32a]hoeng, aenvih gij vunz gvaengz naengh youq henz ndang de daiq lai lai, mbouj ndaej haeuj bae dep de, [31b]couh ndwn youq rog neix, hawj vunz haeuj bae naeuz de ni. [32b]Yiengq couh miz vunz naeuz de ni naeuz: “Neq, yawj veiq, daxmeh mwngz caeuq gij beixnuengx mwngz youq rog mwnq, ij cimh mwngz.”

³³ Yehsuh dingq le, dauq han naeuz: “Byawz dwg meh gou? Byawz dwg beixnuengx gou?”

³⁴ Yehsuh gangj doengh gawq neix le, couh yawjyawj doenghgij vunz naengh youq seiqhenz de, couh naeuz: “Faenhsou yawj hux, doenghheij vunz neix couh dwg meh gou, beixnuengx gou!”

³⁵ De vanzlij caiq naeuz: “Famz dingq gij vah Cangqdiq ciuq gij cawjeiq Cangqdiq bae guh hih couh dwg meh gou, beixnuengx gou.”