Majgoj Saw 2 - Gij Baujcingq Moq Caeuq Geij Bonj Gij Baujcingq Daeuzdaeuz

Yehsuh yw ndei vunz gyad

¹ Gajlaeng goq geij ngoenz le, Yehsuh caiq haeuj Gyahbwznungz Singz bae. Yiengq, gij vunz dingq naeuz de dauq ma daengz Gyahbwznungz Singz, rox naeuz de youq ndaw ranz youq le,

² couh miz haujlai vunz daeuj laeng de mwnq dingq de gangj gij vah Cangqdiq, daeuj hwj ndaw ranz rim bae, daiqlienz bakdou rog neix cungj miz vunz rim bae.

³ De cingq gangj hih mwhde, miz seiq boux vunz aeu damqgyaq ma ram boux vunz gyad he daeuj hawj de yw.

⁴ Hoeng, vunz daiq lai lai; mij banqfaz ndaej ram haeujbae daengz dangqnaj Yehsuh. Gajlaeng, gyoengqde couh hwnj gwnz dingjranz bae cek vax, couh dawz boux vunz gyad mwnq daiqlienz aen damqgyaq de cungj daj gwnz dingjranz duengq roengz cungqgyan vunzlai bae daengz dangqnaj Yehsuh.

⁵ Yehsuh raen gyoengqde baenxlai miz sinqsim le, couh doiq boux vunz gyad mwnq naeuz: “Baengzyoux hax, gij coih mwngz gaenq ndaej mienx lo.”

⁶ Yiengq doengh boux Youzdaiq fazliz cenhgyah naengh youq mwnq he raen Yehsuh yienghneix naeuz le, ndaw sim couh naemj naeuz:

⁷ “Geizheih, boux vunz bouxn'x dwg byawz nex? Gingqyienz gamj gangj gij vah daekcoih Cangqdiq he! Cawz Cangqdiq ok, mij'z vunz ndaej mienx coih hax.”

⁸ Gyoengqde yienghneix naemj naeuz le, Yehsuh dangjciengz couh rox daengz ndaw sim gyoengqde ngeix gijmaz lo, couh doiq gyoengqde naeuz: “Faenhsou vihmaz ij yienghneix ngeix nej?

⁹ Gou rox faenhsou mbouj sinq gou miz gij gienz Cangqdiq ndaej hawj vunz mienx coih he, aenvih mienx coih, vunz yungh ra ma yawj mbouj raen hih. Hoeng, hauhnaeuz gou heuh hawj vunz ndaej ndwn hwnjdaeuj nex, faenhsou couh rox gou miz gij gienz Cangqdiq lo.

¹⁰ Gou seizneix couh cingqmingz hawj faenhsou yawj, gou, Vunz dih Daiqbiuj, dwg lajmbwn boux miz gienz ndaej mienx coih he dih vunz lo.” De gangj doengh gawq neix sat le, couh doiq boux vunz gyad mwnq naeuz:

¹¹ “Gou naeuz hawj mwngz ndwn hwnjdaeuj! Dawz gij demh ninz mwngz maj ranz lo bax!”

¹² Yehsuh ngamq gangj gawq neix sat, boux vunz gyad mwnq couh doq youq dangqnaj vunzlai ndwn hwnjdaeuj, couh soujsib gij demh ninz de maj ranz lo. Yiengq youq mwnq sojmiz hih vunz raen de ndaej byaij le, cungj yawj hwj ra byaengqbyat bae. Gajlaeng gyoengq vunzlai couh haenh Cangqdiq, caemh naeuz: “Gyoengqraeuz coengzlaiz cungj mij raen miz cungj saeh neix goq!”

Vunz naeuz Yehsuh caeuq vunz vaih gw haeux

¹³ Yehsuh yw boux vunz gyad mwnq ndei le, youhcaiq bae daengz Gyahliqliq Huz. De bae hih mwhde, miz baenx haujlai vunz gaen de bae, yiengq de couh doq bae doq doiq gyoengq vunzlai gangj gvanhhih Cangqdiq dih ndei siuhsiz.

¹⁴ De cingq byaij bae hih mwhde, de yawjraen Liqveiq daeglwg Yaqlwzfeih naengh youq mwnq sou ceiq mwnq guh sou ceiq. De raen le, couh heuh de, doiq de naeuz: “Aex, daeuj! Mwngz daeuj gaen gou bax!” Liqveiq raen Yehsuh yienghneix doiq de naeuz le, couh doq gaen Yehsuh bae lo.

¹⁵ Gajlaeng Yehsuh vanzlij bae ndaw ranz de gw haeux, doengh boux lwgsae de caemh gaen de bae gw. Mwhde caemh miz baenx haujlai vunz guh sou ceiq he caeuq baenx haujlai vunz vaih he caeuq de itheij gw, aenvih luj doengh cungj vunz neix siengzseiz caemh gaen Yehsuh hwj.

¹⁶ Yiengq miz doenghheij gaep haeuj Fazliqcaiq baij he hih fazliz cenhgyah rox le, couh doiq doengh boux lwgsae Yehsuh naeuz: “De vihmaz caeuq doengh boux guh sou ceiq he caeuq doengh boux vunz vaih he gw haeux gw laeuj nej?”

¹⁷ Yehsuh dingq le, couh han naeuz: “Gou daeuj dineix mbouj dwg hawj gij vunz mij'z coih he gaijgoq nej; dwg hawj gij vunz miz coih he nginh loek gaijgoq lah. Couh dwg naeuz, ndang cangq hih vunz mbouj yungh canghyw nej; yungh canghyw hih cungj dwg doenghheij vunz miz bingh hih lah.”

Gangj gvanhhih lekdungx

¹⁸ Yehsuh yienghneix han gyoengqde le, gajlaeng couh miz vunz daeuj cam Yehsuh naeuz: “Yiengq, vihmaz gij lwgsae Yozhanq caeuq gij vunz gaep haeuj Fazliqcaiq baij he, gyoengqde lekdungx, hoeng, gij lwgsae mwngz vihmaz mbouj lekdungx nej?” Boux mwnq yienghneix naeuz dwg aenvih mwhneix ngamqluj gij lwgsae Yozhanq caeuq gij lwgsae gij vunz gaep haeuj Fazliqcaiq baij he lekdungx.

¹⁹ Yehsuh dingq le, couh yungh gij beijgangj he ma doiq gyoengqde naeuz: “Gojyez moq aeu yah cingj laeuj, doengh boux buenx gojyez moq he mbouj ndaej mbouj gw laeuj nej. Cijaeu gojyez moq vanzlij gw, gyoengqde couh gaengjdingq ij buenx gw.

²⁰ Hoeng, baex daengz ngoenz vunz daeuj gaemh dawz gojyez moq bae he, daengz mwhmwnq, gyoengqde couh ij lekdungx lo.”

²¹ Yehsuh caiq naeuz: “Mij'z vunz aeu vangq boiq moq he ma fong haeuj diuz buh gaeuq he bae nej; hauhnaeuz yienghmwnq, vangq boiq moq mwnq cij dawz diuz buh gaeuq mwnq vaih engqgya gvangq.

²² Caemh mij'z vunz dawz laeuj moq coux haeuj daehnaeng gaeuq bae; yienghmwnq ngaiz gij laeuj moq cengq aen daehnaeng gaeuq ceg. Laeuj caemh roh okdaeuj, daeh caemh vaih. Sojhij gij vunz cungj dwg dawz laeuj moq coux haeuj daehnaeng moq bae.”

Gvanhhih ngoenz ngoenzyietbaeg

²³ Miz ngoenz ngoenzyietbaeg he, Yehsuh caeuq gij lwgsae de byaij goq reih mienh he bae. Boux lwgsae de iek le, couh yot aeu riengz mienh ma nu hwj gw.

²⁴ Yiengq, gij vunz gaep haeuj Fazliqcaiq baij he raen le, couh doiq Yehsuh naeuz: “Yawj veiq, gij lwgsae mwngz vihmaz ij youq ngoenz ngoenzyietbaeg yot mienh ma nu hwj gw nej? Nanzdauh gyoengqde mbouj rox youq ngoenz ngoenzyietbaeg guh hong dwg famqfaz hih maz?”

^25-26 Gajlaeng, Yehsuh han naeuz: “Nanzdauh faenhsou mij doeg goq youq ndaw Singqgingh ndaw de sij naeuz hih, [26b]couh dwg mwh Yaqbijyaqdah guh boux goengjsae dajbwiz daeuzdaeuz hih mwhde, [25b]Daqveiq goengjvuengz neix caeuq gyoengq gaen henz ndang de youq mwh iek he guh gijmaz saeh mah? [26a]De haeuj ndaw cangqbungz Cangqdiq bae, [26c]aeu gij bingj baij coengq bwiz Cangqdiq he ma gw, caemh aeu hawj gyoengq gaen henz ndang de gw. Gij bingj dajbwiz mwnq, bouxlawz cungj mbouj ndaej gw, caenhgag goengjsae dajbwiz cij ndaej gw he; bouxlawz gw nex, couh suenq veizfanj Mohsih dih fazliz lo. Doenghgij neix faenhsou mij doeg goq mah?”

²⁷ Yehsuh yienghneix naeuz le, vanzlij naeuz: “Ngoenz ngoenzyietbaeg dwg laeb hawj vunz hih lah, mbouj dwg vunz laeb hawj ngoenz ngoenzyietbaeg law.

²⁸ Sojhij, gvanhhih ngoenz ngoenzyietbaeg, caenhgag gou, Vunz dih Daiqbiuj, cij miz gienz naeuz guxmaz he.”