Majgoj Saw 1 - Gij Baujcingq Moq Caeuq Geij Bonj Gij Baujcingq Daeuzdaeuz

Guh sijlij dih Yozhanq

¹ Daeglwg Cangqdiq Yehsuh Gihduz dih ndei siuhsiz dwg yienghneix heijdaeuz hih,

² cingq luj bonj saw Hijcaiqyaq boux cenz gij vah Cangqdiq neix sij gij vah Cangqdiq naeuz: Neq, gou ij baij bouxcai gou bae gaxgonq mwngz hwj cwnjbiq diuz roen ndei he hawj mwngz.

³ De youq rogndoi hemq naeuz: “Cwnjbiq diuz roen he hawj bouxcawj; coih diuz roen soh hwj hawj de byaij.”

⁴ Gij vah neix cingq lingz okdaeuj lo; cingqgawq Yozhanq ok daeuj lo. De youq rogndoi guh bang vunz sijlij, couh dwg naeuz cenzgangj gvanhhih nginh loek gaij goqma ndaej mienx coih dih sijlij.

⁵ Yiengq sojmiz hih Youzdaiq Saengj caeuq Yehluqsajlaengj Singz hih vunz cungj bae daengz Yozhanq mwnq nginh loek caemh youq diuz dah Yozdanq hawj de bang gyoengqde sijlij.

⁶ Mwhde Yozhanq dwg daenj diuz buh aeu fwn lozdoz ma guh he, rwet gyaeb sai naeng hwj, gw nex, dwg gw duz daek caeuq dangzrwi ndoi he.

⁷ Yozhanq bang gyoengqde sijlij mwhde doiq gyoengq vunzlai gangj naeuz: “Ij miz boux he baezneix ij daeuj. Gannaeuz de daeuj gajlaeng gou lah, hoeng, de beij gou veijdaq ndaej lai lo; de daiqlienz gou bang de riuj haizcauj cungj mbouj lwnz daengz gou hwx.

⁸ Gou cijmboujgoq aeu raemx ma sijlij hawj faenhsou lah. De nej, de dwg yungh Hoenzsaenz Cangqdiq ma hawj faenhsou sijlij hih.”

Yehsuh sijlij

⁹ Mwhde Yehsuh daj Gyahliqliq Saengj dih Mbanj Nazsajlwz daeuj daengz diuz dah Yozdanq mwnq hawj Yozhanq sijlij.

¹⁰ Couh youq mwh de sijlij ndaej daj ndaw raemx hwnj ma hih mwhde, de sawqmwh yawjraen aen mbwn luj boiq mbek yienghmwnq mbek lig gvangq lo, Hoenzsaenz Cangqdiq luj duz roegguqgap yienghmwnq mbin roengz gwnz ndang de daeuj.

¹¹ Caemh miz sing daj gwnzmbwn doiq de naeuz: “Mwngz dwg daeglwg gou. Gou gig aiq mwngz; mwngz hawj gou roxnginh hab'eiq habhoz.”

Yehsuh ngaiz fangzvuengz sawq

¹² Gajlaeng Hoenzsaenz Cangqdiq couh coi de hawj de bae rogndoi;

¹³ yiengq de caemh bae. Couh yienghneix, de youq rogndoi youq seiqcib ngoenz, caemh ngaiz Sajdanq fangzvuengz sawq. Rogndoi mwnq caemh miz nyaen youq, hoeng, de miz bouxcai Cangqdiq swqhaeuh de hwj.

Yehsuh gaihcij cenzgangj gij vah Cangqdiq

¹⁴ Goq mbouj geijlwh caez, Yozhanq ngaiz gyaeng haeuj ndaw lauz bae. Yehsuh couh bae dieg Gyahliqliq cenzgangj Cangqdiq dih ndei siuhsiz.

¹⁵ De naeuz: “Mwhde couh daengz lo; Cangqdiq dih gienzveih couh ij fazveih lo. Faenhsou ij daj ndaw sim nginh loek gaijgoq, sinq Cangqdiq dih ndei siuhsiz.”

Yehsuh gaihcij sou lwgsae

¹⁶ Yiengq miz ngoenz he, Yehsuh ndij goq henz huz Gyahliqliq bae, de yawjraen Sihmaenz caeuq daegnuengx de Anhdwzlez youq ndaw huz dwk bya. (Song boux de dwg canghdwkbya he.)

¹⁷ Yehsuh raen le, couh doiq song boux de naeuz: “Faenhsou daeuj gaen gou bax! Gou ij hawj faenhsou bienqbaenz daixlingh cungj canghbya, ij hawj faenhsou ndaej vunz, mbouj dwg ndaej bya.”

¹⁸ Song boux de dingq le, muengxbya hah, gijmaz hah cungj mbouj aeu, couh gaen Yehsuh bae lo.

¹⁹ Yehsuh doiq song boux de yienghneix naeuz le, gajlaeng de caiq byaij bae di he. Yiengq de caiq yawjraen song daeglwg Sihbiqdaiq, Yajgoz caeuq Yozhanq; song boux de youq gwnz ruz fong vangx.

²⁰ De raen le, couh heuh song boux de. Song boux de raen de heuh le, couh majcangq hwnj ma gaen Yehsuh bae, ajcaih daxboh gyoengqde caeuq doengh boux guq daeuj dwk bya mwnq youq gwnz ruz lo.

Yehsuh boenq fangz yak

²¹ Couh yienghneix, gajlaeng Yehsuh caeuq doengh boux de bae Gyahbwznungz Singz. Daengz ngoenz ngoenzyietbaeg, de couh bae veiqdangz son vunz.

²² Yiengq gij vunz dingq de gangj hih vah cungj raen geizheih ij rai, baenxlai miz vi, caeuq doenghheij fazliz cenhgyah mwnq gangj hih mbouj doengz.

²³ Couh youq mwhneix, miz boux ngaiz fangz doz he. Boux de youq ndaw veiqdangz sawqmwh hemq Yehsuh naeuz:

²⁴ “Aex! Mbanj Nazsajlwz dih Yehsuh, mwngz daeuj dineix guxmaz nex? Mwngz ijsiengj daeuj cawz gyoengqraeuz haj? Gou rox mwngz dwg byawz hah; mwngz couh dwg boux gvi hawj Cangqdiq he hih boux vunz mwnq he!”

²⁵ Yehsuh dingq le, ndaq de naeuz: “Haep bak! Mboujcwnj gangj vah! Majcangq daj gwnz ndang de ok ma!”

²⁶ Yehsuh ngamq ndaq gawq neix sat bak, duz fangz couh hawj boux vunz mwnq fatbanghmou, saenz dwddwd hwj hemq vauxvaux, gajlaeng couh daj gwnz ndang de ok ma lo.

²⁷ Gyoengq vunz raen yienghneix le, cungj raen geizheih ij rai bae, couh lwnh naeuz: “Geizheih lo! Gijn'x dwg gijmaz saeh nex? Mij rox naeuz miz vunz ndaej yienghneix guh! Cingqcaen dwg miz cungj gienz he; de gingqyienz miz cungj gienz miz rengz he ndaej mingqlingq fangz, fangz caemh dingq de nex!”

²⁸ Couh yienghneix, gvanhhih Yehsuh dih siuhsiz cungj cenz bae baenx cenz Gyahliqliq goqdoh.

Yehsuh yw bingh boenq fangz

²⁹ Gajlaeng Yehsuh daj veiqdangz ok ma le, couh caeuq Yajgoz caeuq Yozhanq bae daengz ndaw ranz Sihmaenz caeuq Anhdwzlez.

³⁰ Mwhde mehdai Sihmaenz ngaiz fatbingh fatndat, ninz youq gwnz congz. Yehsuh ngamq baex daengz he, couh miz vunz naeuz de ni.

³¹ Yehsuh dingq gyoengqde naeuz le, couh bae daengz henz ndang mehdai de, yawj de, couh rag dawz gij fawz de raeuz de hwnq. De ngamq baex hwnq he, gij ndat couh majcangq doiq lo, mehdai de couh doq ndei lo. Ndei le, couh ok daeuj daih gyoengqde.

³² Ngoenz mwnq gyangjngoenz doek le, miz haujlai vunz daiq doenghheij vunz miz bingh he, mboujguenj bingh maz, caeuq doenghheij vunz ngaiz fangz doz he, cungj daiq daeuj hawj Yehsuh, hawj de yw.

³³ Yiengq baenx cenz singz hih vunz cungj caemh daeuj bakdou mwnq comz.

³⁴ Yehsuh raen yienghneix le, couh yw ndei doenghheij vunz bingh mwnq, caemh bang vunz boenq fangz, vanzlij haep mbouj hawj doenghheij fangz he gangj vah, aenvih gyoengqde rox de dwg byawz.

Yehsuh youq Gyahliqliq dih gak aen veiqdangz cenzgangj ndei siuhsiz

³⁵ Daengz ngoenz daixngeih ranz mijyaengz rongh haem, Yehsuh couh ok bae lo. De bae daengz rogndoi mwnq fwz mij vunz he gag gouz Cangqdiq haenh Cangqdiq.

³⁶ Yiengq, Sihmaenz caeuq linghvaih sam boux gaen de mwnq cungj dauqcawq bae cimh de.

³⁷ Gajlaeng, cimhraen de le, couh doiq de naeuz: “Lauxsae, gyoengqraeuz daixgya cungj cimh mwngz.”

³⁸ Yehsuh dingq le, han naeuz: “Gyoengqraeuz bae doenghheij seiqhenz mbanj mwnq bae; gou haemq ndei ndaej youq mwnq cenzgangj gij ndei siuhsiz Cangqdiq, aenvih gou dwg vih gij saeh neix hwj ok daeuj he.”

³⁹ Couh yienghneix, Yehsuh byaij baenx cenz Gyahliqliq Saengj goqdoh, bae gak aen veiqdangz cenzgangj gij vah Cangqdiq, caemh bang vunz boenq fangz.

Yehsuh yw vunz mazfung

⁴⁰ Yiengq, miz baez he, miz boux hwnj mazfung he daeuj cimh Yehsuh. De daeuj le, couh youq dangqnaj de gvih hwj gouz de naeuz: “Goengjsae hax, gouz mwngz yw ndei gou bax! Hauhnaeuz mwngz haenj nex, mwngz gaengjdingq ndaej yw gou ndei hih!”

⁴¹ Yehsuh raen de yienghneix le, couh hojsik hwj iet fawz oemj laeng de bae naeuz: “Gou haenj yw mwngz hah; mwngz ndei lo bax!”

⁴² Yehsuh ngamq baex gangj gawq neix sat bak he, gij bingh mazfung boux de couh doq ndei lo.

⁴³ Boux de ndei le, Yehsuh couh hawj de maj lo. De hawj de maj hih mwhde, vanzlij naeuz boux de naeuz:

⁴⁴ “Mwngz ciengeiz mbouj ndaej gangj gij saeh neix naeuz vunz ni; mwngz caenh bae laeng boux guh dajbwiz he, hawj de gyenjcaz yawj, caemh ij ciuq Mohsih dih gveihdingq dawz gij dajbwiz bae bwiz Cangqdiq, hawj gij vunzlai cingqmingz naeuz mwngz bingh ndei lo, couh ndaej lo.”

⁴⁵ Yehsuh gan yienghneix naeuz lah, hoeng, boux de maj le, ciuqyiengh gangj naeuz vunz ni gij saeh neix, guh hawj de mij banqfaz caiq ndaej seizbienh haeuj singz bae haem lo. Sojhij, de cij ndei youq rogndoi youq lo, hoeng, gij vunz ciuqyiengh daj gak dieg daeuj cimh de.