Lozmaj Saw 9 - Gij Baujcingq Moq Caeuq Geij Bonj Gij Baujcingq Daeuzdaeuz

Gij vunz Cangqdiq

^1-3 Gou dwg haeuj gij vunz Gihduz; gou gangj lauxsaed vah naeuz sou ni: [3b]gou vih gij beixnuengx caeuq gou doxcaemh minzcuz he mbouj sinq Gihduz hwj [2]cix simnyap cix siengsim ij rai bae. [3a]Couh vih gyoengqde hwj gou cingxnyienh ngaiz souh daengz mang caeuq ngaiz mbouj ndaej gaen Gihduz hoh luh. [1b]Gou soj gangj hih vah cungj dwg ciuq gou dih liengzsim ma gangj hih, Hoenzsaenz Cangqdiq ndaej cingqmingz hih.

⁴ Hojsik gyoengqde mbouj sinq, aenvih gyoengqde, Hijswzlez vunz, dwg Cangqdiq senj okdaeuj, hawj gyoengqde ndaej suenq dwg gij lwg de, hawj gyoengqde ndaej do gij rongh de. Cangqdiq caemh doiq gyoengqde baujcingq, caemh dingh fazliz hawj gyoengqde, hawj gyoengqde rox gingqbaiq de, caemh hawj gyoengqde ndaej gij baujcingq de.

⁵ Gij cojgoeng gyoengqde, Yaqbwzlahhanj, Hijsaj caeuq Yajgoz, dwg Cangqdiq dwzbez senj okdaeuj he. Gihduz daeuj lajmbwn guh vunz caemh dwg guh Hijswzlez vunz. Boux Gihduz neix dwg dungjguenj sojmiz he dih Cangqdiq, yungjyenj haenh he dih Cangqdiq! Ahmaenz.

⁶ Gou mbouj dwg naeuz Cangqdiq mij doiqyienh gij baujcingq de, hoeng, aenvih daj Hijswzlez seng hih, mbouj itdingh cungj dwg ndaej youq ndaw lwgra Cangqdiq suenq dwg caen dih Hijswzlez vunz;

⁷ Yaqbwzlahhanj dih doengh daih gajlaeng, mbouj itdingh cungj dwg ndaej youq ndaw lwgra Cangqdiq suenq dwg gij lwg Yaqbwzlahhanj. Cangqdiq doiq Yaqbwzlahhanj naeuz goq naeuz: Caenhgag dwg dajlaeng Hijsaj seng hih cij suenq dwg doengh daih gajlaeng mwngz.

⁸ Gij neix couh dwg naeuz, gauq ndangnoh seng hih lwg mbouj suenq dwg lwg Cangqdiq; gauq Cangqdiq dih baujcingq seng okdaeuj hih lwg cij suenq dwg lwg Yaqbwzlahhanj, couh dwg lwg Cangqdiq,

⁹ aenvih Cangqdiq doiq Yaqbwzlahhanj baujcingq goq naeuz: Daengz bimoq hih mwhneix, gou vanzlij caiq daeuj dineix; mehyah mwngz Sajlah caemh ij seng miz daeglwg he hawj mwngz. Daeglwg neix couh dwg heuh Hijsaj.

¹⁰ Mbouj danhcij naeuz yienghneix, vanzlij miz Liqbwzgyah; de caeuq cojgoeng raeuz Hijsaj daeglwg neix gyezvwnh le, vanzlij raek miz doiq suengjseng he.

¹¹ Yiengq youq mwh song laeq lwg neix vanzlij mijyaengz seng, ndei yak vanzlij mijyaengz ndaej guh haem, Cangqdiq vih ij doiqyienh gij giqvaq bonjfaenh de, couh senj laeq lwg iq de;

¹² de couh doiq Liqbwzgyah naeuz: Baezneix daeglwg daeuz mwngz ij swqhaeuh daeglwg iq mwngz. Yiengq, ciuq yienghneix ma gangj, Cangqdiq senj vunz mbouj dwg yawj vunz guh gijmaz hwj ma senj vunz, dauq dwg ciuq gij cawjeiq bonjfaenh de ma senj vunz lah.

¹³ Cingq luj ndaw Singqgingh ndaw de sij naeuz: Gou haenj Yajgoz, yiem Hijsauj.

¹⁴ Yiengq, ciuq luj yienghneix ma gangj, gyoengqraeuz ij baenzlaw naeuz nej? Nanzdauh naeuz Cangqdiq mbouj goengbingz mah? Danghyienz mbouj dwg lo!

¹⁵ Aenvih de doiq Mohsih naeuz goq, naeuz: Gou ij cojgvaq byawz, couh cojgvaq byawz; gou ij hojsik byawz, couh hojsik byawz.

¹⁶ Yiengq, ciuq gij neix ma gangj, Cangqdiq dih gyezdingq mbouj dwg naeuz ciuq byawz muengh guxmaz cixnaeuz ciuq byawz dih roengzrengz ma gyezdingq hih nej, dauq dwg coengz ndaw sim de dih hojsik lah.

¹⁷ Couh dangq ndaw Singqgingh ndaw de sij naeuz Cangqdiq doiq goengjvuengz Ngaihgiz naeuz: Gou laeb mwngz guh vuengz dwg vih ij youq laeng mwngz yienh ok gij bonjsaeh gou, sawjhawj gou ndaej riengzmingz baenx cenz lajmbwn lah.

¹⁸ Fanjcingq, Cangqdiq ij cojgvaq byawz, couh cojgvaq byawz; ij hawj byawz nga'ngangq, couh hawj byawz nga'ngangq.

Cangqdiq dih aeuqheiq caeuq cojgvaq

¹⁹ Yiengq mwngz gaengjdingq ij doiq gou naeuz: “Giqyienz dwg Cangqdiq dih cawjeiq vwz, byawz cungj mbouj ndaej dingj, yiengq vihmaz Cangqdiq vanzlij ij gvaiq vunz nej?”

²⁰ Ox! Gou naeuz mwngz hax, mwngz suenq guxmaz vunz nex, gingqyienz gamj dingj Cangqdiq? Couh dwg naeuz, cauh okdaeuj hih, ij baenz doiq boux cauh de naeuz: “Mwngz vihmaz ij cauh gou cauh baenz yienghneix nej?”

²¹ Nanzdauh cangh guh vanj hih, de mij'z gienz ndaej daj ndaw ngauq naez he aeu naez ma baenj guh song aen vanj maz, aen he dwg dijbauj he, aen he dwg yaez he?

²² Cangqdiq cauh vunz caemh dwg yienghneix; miz hih dwg vih ij yienh ok de dih fatheiq caeuq gij rengz de. Doenghheij vunz neix couh dangq aen vanj yaez he, Cangqdiq naenxsim yungh le, couh dawz de vwt bae; de cauh aen de dih muzdiz couh dwg ij yienghneix guh. Yiengq, giqyienz vunz caemh dwg Cangqdiq cauh okdaeuj he, miz byawz gamj naeuz de yienghneix guh mbouj ndaej nej?

²³ Lij miz hih vunz, Cangqdiq cauh gyoengqde dwg vih ij yienh ok de dih veijdaq; de hojsik gyoengqde couh senqsi cix gyezdingq ij hawj gyoengqde najrongh lo. Doenghgij vunz neix couh dangq aen vanj gyaeundei he; Cangqdiq yawjdij de, insik de. Yiengq, giqyienz vunz dwg Cangqdiq cauh okdaeuj he vwz, miz byawz gamj naeuz de mbouj ndaej yienghneix guh nej?

²⁴ Cangqdiq soj cojgvaq hih couh dwg gyoengqraeuz; gyoengqraeuz dwg Cangqdiq daj ndaw Youzdaiq vunz caeuq linghvaih minzcuz ndaw de senj okdaeuj dih vunz.

²⁵ Cingq luj de hawj Hozsih'ah boux cenz gij vah Cangqdiq neix youq ndaw Singqgingh ndaw de sij naeuz goq naeuz: Baenjlaiz mbouj dwg gij vunz gou, gou caemh ij cwng gyoengqde: “Dwg gij vunz gou.” Baenjlaiz gou mbouj aiq hih, gou caemh ij naeuz: “Gou aiq hih.”

²⁶ Gou gaxgonq youq mwnqlaw doiq gyoengqde naeuz: “Faenhsou mbouj dwg gij vunz gou,” gajlaeng gou caemh ij youq mwnqde doiq gyoengqde naeuz: “Faenhsou dwg seiqseiz lix dih Cangqdiq dih lwg!”

²⁷ Hoeng, de caemh vanzlij caiq hawj Hijcaiqyaq boux cenz gij vah de neix doiq gij vunz Hijswzlez hemq goggog naeuz: Gij vunz Hijswzlez gannaeuz lai luj gij sa henz haij lah, hoeng, cijngamq miz dihdi vunz he ndaej gouq lah,

²⁸ aenvih Cangqdiq couh ij doiqyienh gij vah de, ij sawqmwh saemjbuenq gij vunz lajmbwn lo.

²⁹ Caemh luj Hijcaiqyaq naeuz goq naeuz: Hauhnaeuz mbouj dwg guenj cien bing fanh max dih Cangqdiq baujhuq gij cojgoeng raeuz, gyoengqraeuz senqsi cix luj Sojdohmaj caeuq Ngozmohlah song aen singz neix ngaiz byoeng lo.

Gij vunz Hijswzlez mbouj sinq

³⁰ Yiengq, ciuq luj yienghneix ma gangj, ij baenzlaw naeuz nej? Doenghgij linghvaih minzcuz hih vunz baenjlaiz mbouj haeuj uk bonjfaenh dwg mbouj dwg miz coih, hoeng Cangqdiq dauq yawj gyoengqde dwg mij'z coih hih vunz, couh dwg aenvih gyoengqde sinq de.

³¹ Hoeng, fanjgoqma doenghheij vunz Hijswzlez gauq soenhsouj fazliz siengj guh boux youq ndaw lwgra Cangqdiq dwg mij'z coih hih, dauq guh mbouj daengz.

³² Vihmaz nej? Aenvih gyoengqde mbouj sinq Cangqdiq, dauq gauq bonjfaenh dih guhfap ma ij guh vunz mij'z coih, hoeng cungj miz yiengh he gaz dawz,

³³ cingq luj ndaw Singqgingh ndaw de sij naeuz: Yawj veiq! Gou youq Cizanh coengq ngauq rin he, hawj vunz daemjndoet laemx. Hoeng, sinq de baengh de dih vunz couh miz muengh.