Lozmaj Saw 16 - Gij Baujcingq Moq Caeuq Geij Bonj Gij Baujcingq Daeuzdaeuz

Gaiqcauq Feihbij

¹ Gou gaiqcauq Feihbij boux beixnuengx vunzbaz neix hawj faenhsou rox; de dwg youq Gyenhgwzlij gyauqveiq guh saeh he.

² Gou cingj faenhsou ciuq gij vunz Cangqdiq wnggai guh hih yienghmwnq bae sou de; mboujguenj de ij aeu gijmaz cungj ij bang de, aenvih de bang goq haujlai vunz, caemh bang goq gou.

Baujloz cam vunz ndei

³ Caemh cingj faenhsou cam Bwzgihlah caeuq Yaqgihlah ndei; song boux de cungj dwg caeuq gou doxdoengz guh gij hong Yehsuh Gihduz he.

⁴ Gyoengqde vih ij gouq gou, vwt mingh cungj mbouj lau. Mbouj danhcij naeuz gou ij docih gyoengqde, daiqlienz lingh minzcuz dih gyauqveiq cungj docih gyoengqde.

⁵ Caemh cingj faenhsou cam youq ndaw ranz gyoengqde doxcomz hih gyauqveiq ndei. Caemhcaiq cingj faenhsou cam cinhngaiq dih Hijbaiqnizduj baengzyoux gou ndei; de dwg aen saengj Yaqsiqyaq sinq Gihduz dih boux daixdaeuz he.

⁶ Caemh cingj faenhsou cam Majliqyaq ndei; de vih faenhsou hwj guh hong dwgrengz sinhoj ij rai.

⁷ Cingj faenhsou cam Anhdohnizguj caeuq Youznizyaq ndei; gyoengqde dwg caeuq gou doxcaemh minzcuz he, caemh dwg caeuq gou ngaiz vunz gyaeng haeuj ndaw lauz bae goq he. Gyoengqde sinq Gihduz beij gou vanzlij caeux, caemh dwg youq ndaw gyoengq dwzbaijyienz ndaw de dwg boux miz mingz he.

⁸ Caemh cingj faenhsou cam doxdoengz gaep haeuj Gihduz dih baengzyoux Amqbwzliq ndei.

⁹ Caemh cam caeuq gyoengqraeuz doxdoengz guh gij hong Gihduz dih Wjbahnuz caeuq gou cinhngaiq dih baengzyoux Swqdaqguj ndei.

¹⁰ Caemh cam Yaqbijliq ndei; de dwg boux gaujniemq goq ndaej hab'eiq habhoz Gihduz he dih vunz he. Caemh cam Yaqliqdohbuq cenz ranz ndei.

¹¹ Caemh cam caeuq gou doxcaemh minzcuz hih Hihlozdanh ndei caeuq cam ndaw ranz Nazgizsuq doengh boux gvi haeuj bouxcawj raeuz he ndei.

¹² Gou vanzlij caiq cingj faenhsou cam Dujfeihnaz caeuq Dujfuqsaj ndei; song boux vunzbaz neix guh gij hong bouxcawj raeuz cungj dwg gaenzgaenz gaenjgaenj he. Caemh cam Bijsiz boux vih guh gij hong bouxcawj raeuz hwj gaenz guh hih boux baengzyoux neix ndei.

¹³ Caemh cam boux bouxcawj raeuz senj okdaeuj hih Lujfuz caeuq daxmeh de ndei. Daxmeh de caemhdangq daxmeh gou.

¹⁴ Caemhcaiq cingj faenhsou cam Yaqsoenhgizswq, Fuzlwzganq, Hwzmij, Bazlozbah, Hwzmaj caeuq caeuq gyoengqde youq itheij dih beixnuengx ndei.

¹⁵ Caemh cam Feihlozlozguj caeuq Youzliqyaq, caeuq Nizliqyaq caeuq dahnuengx de caeuq Ahlimzbah caeuq caeuq gyoengqde itheij hih doenghheij lwgsae he ndei.

¹⁶ Faenhsou ij miz Cangqdiq dih aiq hwj doxdongx ndei. Gihduz dih gak aen gyauqveiq cungj cam faenhsou ndei.

Ceiqhaeuq raengq geij gawq vah

¹⁷ Gak boux beixnuengx hax, gou gienq faenhsou ij daezfuengz doenghheij vunz hawj faenhsou nauh mbouj doxndei daiq faenhsou byaij loek roen he, fanjdeiq faenhsou soj hag goq he. Doenghheij vunz neix faenhsou mbouj ndaej cimyex haeujbae, ij liz gyoengqde,

¹⁸ aenvih cungj vunz neix mbouj swqhaeuh bouxcawj raeuz Gihduz, caenh rox daengz bonjfaenh lah. Gyoengqde cungj dwg gangj doenghgij vah ndeidingq he ma coemx doenghheij vunz lauxsaed he.

¹⁹ Daixgya cungj rox faenhsou dingq gij vah Cangqdiq, sojhij gou vih faenhsou hwj sim'angq. Gou muengh faenhsou doiq ndeisaeh singqsag, doiq vaihsaeh moengxcwenx.

²⁰ Nyok bingzan dih Cangqdiq couh ij dawz Sajdanq caij benj youq laj din faenhsou lo. Muengh bouxcawj raeuz Yehsuh Gihduz siengzseiz doiq faenhsou haijliengh!

Cam ndei caeuq docih

²¹ Caeuq gou itheij guh gij hong Cangqdiq hih Dizmohdaiq caeuq caeuq gou doxcaemh minzcuz hih Luqgyiuz, Yehsoenh caeuq Sojsihbahdwz cam faenhsou ndei.

²² Gou, Dwzdiuh, bang Baujloz sij fung saenq neix caemh cam faenhsou ndei.

²³ Boux daih gou, caemh hawj gyauqveiq youq ndaw ranz de doxcomz dih Gaihyouz caemh cam faenhsou ndei.

²⁴ Cenmonz guenj aen singz neix cienzngaenz dih Hijlahduh cam faenhsou ndei; Gvazduj boux beixnuengx neix caemh cam faenhsou ndei.

²⁵ Cangqdiq ndaej yungh gou soj cenzgangj hih gvanhhih Yehsuh Gihduz dih ndei siuhsiz hwj hawj faenhsou ndaej sinqsim gyenhdingq. Gij ndei siuhsiz neix coengzlaiz cungj mij'z vunz rox goq,

²⁶ hoeng, seiqseiz lix dih Cangqdiq ciuq gij cawjeiq bonjfaenh de ma hawj boux cenz gij vah de sij okdaeuj hawj vunz rox. De yienghneix guh dwg siengj hawj lajmbwn sojmiz hih minzcuz cungj sinq de dingq de.

²⁷ Muengh dunghgoq Yehsuh Gihduz, najrongh yungjyenj gvi hawj gaiqgaiq cungj rox hih caenhgag de cij dwg Cangqdiq hih! Ahmaenz.