Lozmaj Saw 1 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gou dwg Baujloz, dwg bouxhoiq Yehsuh Gihduz, caemh dwg Cangqdiq senj daeuj guh boux dwzbaijyienz cenzgangj Cangqdiq dih ndei siuhsiz he.

² Gij ndei siuhsiz neix, couh dwg Cangqdiq baujcingq goq hih; gij baujcingq neix, de gaenq senqsi cix hawj doengh boux cenz gij vah de hih youq ndaw Singqgingh sij naeuz goq lo.

³ Gij ndei siuhsiz neix, couh dwg gangj gvanhhih daeglwg de, bouxcawj raeuz Yehsuh Gihduz dih saeh. Aeu de seng youq lajmbwn ma gangj, de dwg Daqveiq goengjvuengz neix dih doengh daih gajlaeng,

⁴ hoeng, aenvih Hoenzsaenz Cangqdiq hawj de daj rai ndaej dauqlix, de yungh gij akak rengzrengz bonjfaenh de ma cingqmingz de, yienghneix couh mingzmingz ndaej hawj vunz rox de dwg daeglwg Cangqdiq, dwg bouxcawj raeuz Yehsuh Gihduz, Cangqdiq baij daeuj dih vuengz.

⁵ Gannaeuz gou mbouj boiqndaej de doiq gou baenxlai haijliengh lah, hoeng, gou ndaej ro de, vih de hwj guh boux dwzbaijyienz he youq lajmbwn cenzgangj gij ndei siuhsiz de, hawj gij vunz linghvaih minzcuz he dingq de, sinq de.

⁶ Daiqlienz doengh boux faenhsou youq Lozmaj Cangqdiq senj he, cungj dwg gvi haeuj gij vunz Yehsuh Gihduz.

⁷ Gou sij fung saenq neix dwg sij hawj gij vunz faenhsou youq Lozmaj Cangqdiq aiq he, caemh dwg Cangqdiq senj ma guh gij vunz de he. Muengh daxboh raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, soengq bingzan hawj faenhsou!

Baujloz docih Cangqdiq

⁸ Youq dineix, gou vih faenhsou hwj dunghgoq Yehsuh Gihduz daeuj docih Cangqdiq, aenvih faenhsou sinq Gihduz dih sinqsim gaenq cenz bae baenx cenz lajmbwn lo.

⁹ Cangqdiq rox gou bienqnaengz haenh de gouz de hih mwhde caemh dwen daengz faenhsou. De ndaej cingqmingz gou soj gangj hih vah dwg saedsaeh hih. Boux Cangqdiq neix couh dwg gou caensim caen'eiq swqhaeuh de, cenzgangj gvanhhih daeglwg de dih ndei siuhsiz he.

¹⁰ Gou caenhrox gouz de, muengh de ciuq gij cawjeiq de hawj gou ndaej miz gihveiq bae yawj faenhsou.

¹¹ Gou muengh ndaej raen faenhsou, ndaej soengq fuk hawj faenhsou, hawj faenhsou sinq Gihduz dih sim ndaej gyenhdingq.

¹² Gou yienghneix naeuz, gizsaed dwg siengj hawj faenhsou caeuq gou cungj caezgya ndaej miz gyenhdingq dih sinqsim sinq Gihduz, ndaej caezgya doxbang doxson.

¹³ Gak boux beixnuengx hax, gou muengh faenhsou rox, gou gaenq miz geij mbat ijsiengj bae faenhsou mwnq, youq faenhsou mwnq ndaej daiq haujlai vunz sinq Yehsuh, caemh luj gou bae daixlingh aen minzcuz yienghmwnq ityiengh. Hoeng, cungj miz gij saeh he gaz dawz hwj mbouj hawj gou bae.

¹⁴ Mboujguenj dwg mbouj dwg Hihlaz vunz, caeuq mboujguenj dwg miz mbouj miz vaenzvaq, caemh mboujguenj dwg vunz gvai cixnaeuz vunz ngawz, gou cungj miz caiq yiemq gyoengqde.

¹⁵ Sojhij gou cungj siengj dawz gij ndei siuhsiz neix cenz hawj faenhsou youq Lozmaj hih vunz.

Miz rengz dih ndei siuhsiz

¹⁶ Gou mbouj roxnginh raen Cangqdiq dih ndei siuhsiz dwg cungj saetnyaenq he nej, aenvih gij ndei siuhsiz neix dwg Cangqdiq gouq sojmiz sinq de hih vunz dih rengz. Gaxgonq dwg sien cenz naeuz gij vunz Youzdaiq ni, gajlaeng cij cenz daengz linghvaih minzcuz hih vunz.

¹⁷ Aenvih gij ndei siuhsiz neix ndaej hawj vunz rox baenzlaw ndaej youq ndaw lwgra Cangqdiq bienqbaenz boux mij'z coih he. Gij neix cungj dwg gauq sinq yiengh dog cij ndaej, caemh luj ndaw Singqgingh sij naeuz: Youq ndaw lwgra Cangqdiq bienqbaenz boux mij'z coih he, cungj dwg gauq sinq cij ndaej miz mingh he.

Dwg vunz couh miz coih

¹⁸ Gienz akak rengzrengz dih Cangqdiq hawj vunz rox, de aeuqheiq raixcaix, ij fad doenghheij yawj mbouj hwnj de he, guh gij doegdoeg siebsieb he ma muenz saedsaeh he,

¹⁹ aenvih de gaenq mingzmingz hawj vunz rox cingsuj vunz wnggai rox hih, gvanhhih de dih saeh hih.

²⁰ Daj cauh mbwn cauh deih doxdaeuj, gij saedsaeh Cangqdiq, couh dwg naeuz gij akak rengzrengz mbouj rox cied de caeuq gij cinhfaenq de, gannaeuz ra yawj mbouj raen lah, hoeng, baengh gij de soj cauh hih, couh ndaej hawj vunz mingzmingz rox. Gij neix vunz mbouj ndaej laih naeuz mbouj rox hih.

²¹ Gij vunz gan rox miz Cangqdiq, hoeng dauq mbouj haenh de, mbouj docih de; couh vih yienghneix, gyoengqde couh bienq ngawz, sim mazmwnh mbouj singqsag.

²² Gyoengqde gag naeuz bonjfaenh coengjmingz raixcaix, gizsaed ngawz dangqmaz.

²³ Gyoengqde mbouj baiq veijdaq hih mbouj rox rai hih Cangqdiq, dauq bae baiq duz you, couh dwg doenghheij you ciuq doenghheij rox rai hih vunz hah, duz roeg mbin hah, duz byaij he hah, duz vuenz he hah, gij yienghceij de baenj okdaeuj hih you lah.

²⁴ Sojhij Cangqdiq ajcaih gyoengqde vangraeh, caih ndaw sim gyoengqde siengj gij ndaengndwet caeuq vunz guh gij hawj vunz gangj mbouj ndaej ok bak he daeuj doxuq aen ndang bonjfaenh.

²⁵ Gyoengqde yiem gij saedsaeh Cangqdiq, dauq sinq gij gyaj he; gyoengqde bae baiq bae swqhaeuh doenghgij Cangqdiq cauh okdaeuj he, dauq mbouj baiq mbouj swqhaeuh Cangqdiq, boux guh cauh sojmiz okdaeuj hih boux Cangqdiq neix. Caenhgag miz de cij dwg wnggai yungjyenj haenh hih. Ahmaenz.

²⁶ Couh vih yienghneix, Cangqdiq ajcaih gyoengqde ndwet vangraeh, gij vunzbaz mbouj ciuq liglaiz roengzdaeuj hih vunzsai caeuq vunzbaz yienghmwnq doxcaeuq ninz, dauq vunzbaz caeuq vunzbaz doxcaeuq ninz lah.

²⁷ Gij vunzsai caemh dwg yienghmwnq, mbouj caeuq vunzbaz doxcaeuq ninz, dauqfanj vunzsai caeuq vunzsai ninz, ndwet hux ndwet, guh gij yalw saetnaj saetnyaenq mbouj ndaej gangj ok bak hih saeh he, guh hwj gag haex rih haeuj guengq.

²⁸ Gyoengqde giqyienz naemqnaeuz mboujyungh nginh Cangqdiq, yiengq Cangqdiq couh ajcaih ndaw sim gyoengqde vaih vangraeh, ajcaih gyoengqde guh gij mbouj sam mbouj seiq mbouj wnggai guh he.

²⁹ Ndaw sim gyoengqde cungj dwg doegdoeg siebsieb, damsim, sim yalw, cungj dwg rahoengz rahwngq, doxhangz doxgaj, yaeuhyaeuh coemxcoemx, haemzhaemz haenqhaenq, haenj gangj vunz hih saeh,

³⁰ cungj dwg doxbangjlaih, boihlaeng gangj vunz, haenq Cangqdiq, cix rasang, yawj vunz mbouj hwnj rwz, gag haenh bonjfaenh, gag cauh guh vaihsaeh, mbouj dingq bohmeh,

³¹ mbouj rox faenbied ndei caeuq yak, gangj vah mbouj gw vah, mbouj rox aiq beixnuengx, mbouj rox hojsik vunz.

³² Gyoengqde gan rox Cangqdiq naeuz goq luj yienghneix guh hab ngaiz rai, hoeng gyoengqde ngengh ij yienghneix guh; mbouj danhcij naeuz yienghneix, vanzlij haenj gij vunz yienghneix guh.