Lizsij dih Gaihcij 9 - Gij Baujcingq Moq Caeuq Geij Bonj Gij Baujcingq Daeuzdaeuz

Cangqdiq doiq Nozyaq baujcingq

¹ Cangqdiq soengq fuk hawj Nozyaq caeuq gij lwg de, doiq gyoengqde naeuz: “Faenhsou ij seng haujlai haujlai lwg, sawj doengh daih gajlaeng faenhsou youq lajmbwn dauqcawq cungj miz rim bae.

² Hawj lajmbwn sojmiz hih doengh duz cukseng hah, duz nyaen duz yex hah, doengh duz roeg mbin gwnz mbwn he hah, doengh duz vuenz lajdoem he hah, caeuq ndaw haij sojmiz hih bya hah cungj lau faenhsou, vanzlij caemh ngaiz faenhsou guenj.

³ “Seizneix gou ij dawz sojmiz hih doenghduz neix hawj faenhsou aeu ma guh gij gw he; gaxgonq gou caenhgag hawj doenghgo hawj faenhsou aeu ma guh gij gw, hoeng seizneix gou daiqlienz doenghduz cungj hawj faenhsou aeu ma guh gij gw.

⁴ Hoeng, faenhsou mbouj ndaej gw gij noh daiq lwed he, aenvih ndaw lwed miz mingh.

^5-6 “Famzsoj bouxlawz haih vunz rai hih, bouxlawz couh ij ngaiz vunz gaj; hauhnaeuz miz doenghduz haih vunz rai hih, [5a]yiengq doenghduz caemh ij ngaiz vunz gaj, [6b]aenvih gou, Cangqdiq, cauh vunz dwg ciuq luj bonjfaenh gou ma cauh hih.

⁷ “Faenhsou ij seng lwg lailai hwj, hawj gij lwglwg lanlan doengh daih gajlaeng faenhsou fatdad hwngqhwngq seiqseiq hwj lajmbwn dauqcawq cungj miz bae.”

⁸ Cangqdiq caiq doiq Nozyaq caeuq doengh daeglwg de naeuz:

⁹ “Gou seizneix ij doiq faenhsou caeuq doenghheij lwglwg lanlan doengh daih gajlaeng faenhsou baujcingq,

¹⁰ vanzlij caemhcaiq caeuq lajmbwn sojmiz hih doenghduz, couh dwg doengh duz gaen mwngz haeuj ndaw ruz bae hih doengh duz mwnq baujcingq.

¹¹ Couh dwg naeuz, gou baujcingq baezneix mbouj caiq raemx dumh mbwn, mbouj caiq cawz sojmiz miz mingh hih lo.”

¹² Cangqdiq youhcaiq naeuz: “Gou ij guh gij geiqhauh he, geiqhauh gou caeuq faenhsou caeuq sojmiz miz mingh hih yungjyenj baujcingq.

¹³ Couh dwg gou dawz saijdoengz coengq youq ndaw fwj, aeu saijdoengz ma guh geiqhauh, geiqhauh gou caeuq seiqgyaiq dih baujcingq.

¹⁴ Hauhnaeuz gou hawj gwnzmbwn gvaq fwj caeuq miz saijdoengz yienh youq ndaw de nex,

¹⁵ gou couh ndaejgeiq gou caeuq faenhsou caeuq lajmbwn sojmiz miz mingh hih baujcingq, couh mbouj hawj fwn doek hwj dumh daengz cawz lajmbwn sojmiz miz mingh hih bae lo.

¹⁶ Caenhnaeuz gou raen saijdoengz yienh youq ndaw fwj nex, gou couh ndaejgeiq gou doiq faenhsou caeuq lajmbwn sojmiz miz mingh hih yungjyenj mbouj rox bienq dih baujcingq lo.

¹⁷ Gij neix couh dwg gou geiqhauh gou caeuq lajmbwn sojmiz miz mingh hih baujcingq.”

Nozyaq caeuq doengh daeglwg de

¹⁸ Gaen Nozyaq daj ndaw ruz ok ma hih doengh daeglwg de couh dwg Cenj, Hamz caeuq Yajfuz. (Hamz dwg daxboh Gyahnamz.)

¹⁹ Gajlaeng sam daeglwg Nozyaq hih doengh daih gajlaeng cungj faensanq youq seiqgyaiq hih gak dieg.

²⁰ Nozyaq dwg boux nungzminz he, yiengq de ok ruz ma le, couh sien guh aen suen he hwj ndaem buzdauz.

²¹ Miz mbat he, de gw laeuj fiz le, loxgenz loxgangh hwj ninz youq ndaw cangqbungz.

²² Gajlaeng ngaiz Hamz (couh dwg daxboh Gyahnamz) raen de loxgenz loxgangh hwj, couh ok bae naeuz song boux beix de ni.

²³ Yiengq Cenj caeuq Yajfuz dingq le, couh dawz diuz buhbauz raez he ma bangj youq song hongzmbaq bonjfaenh gyoengqde hwj, doenq dauqlaeng byaij haeuj ndaw cangqbungz bae, dawz diuz buhbauz raez neix goemq youq gwnz ndang daxboh gyoengqde. Gyoengqde cungj dwg veq naj doxok, mij yawjraen daxboh loxgenz loxgangh.

²⁴ Gajlaeng, Nozyaq laeuj singj le, rox naeuz Hamz, daeglwg ceiq iq de, raen de loxgenz loxgangh, caemhcaiq bae naeuz song boux beix de ni,

²⁵ couh mang Hamz dih daeglwg iq de Gyahnamz, naeuz: “Gyahnamz caeuq doengh daih gajlaeng de wnggai ngaiz mang! Gyahnamz baezneix ij ngaiz guh Cenj caeuq Yajfuz dih ceiq cuij ceiq yaez dih hoiq, daiqlienz doengh daih gajlaeng de cungj dwg yienghneix.”

²⁶ De caiq naeuz: Gou wnggai haenh Yehhozvaz, Cenj dih Cangqdiq! Gyahnamz caemh ij guh Cenj dih hoiq.

²⁷ Muengh Cangqdiq sawj Yajfuz fatdad! Muengh de caeuq Cenj yungjyenj doxndei roengzbae! Gyahnamz caemh guh hoiq de.

²⁸ Raemxdumh goq le, Nozyaq vanzlij souh ndaej sambak haj bi.

²⁹ De rai mwhde ndaej goujbak haj bi.