Lizsij dih Gaihcij 48 - Gij Baujcingq Moq Caeuq Geij Bonj Gij Baujcingq Daeuzdaeuz

Hoh fuk hawj song laeq lwg Yozswz

¹ Goq duenh he le, miz vunz naeuz Yozswz ni naeuz daxboh de bingh lo, yiengq de couh daiq song daeglwg de Majnazsih caeuq Hijfazlenz bae yawj daxboh de.

² Yiengq, Yajgoz rox naeuz Yozswz daeuj yawj de lo le, couh cengqgengz hwnq hwnjdaeuj,

³ doiq Yozswz naeuz: “Mwh gou youq dieg Gyahnamz dep aen haw Luqswh mwnq, akak rengzrengz gaiqgaiq cungj ndaej guh daengz dih Cangqdiq yienh hawj gou raen goq, vanzlij hoh fuk hawj gou.

⁴ De doiq gou naeuz: ‘Gou ij soengq hawj mwngz haujlai haujlai lwglwg lanlan, hawj aen cuz mwngz hwngqhwngq seiqseiq, doengh daih gajlaeng mwngz bienqbaenz aen minzcuz hunghung he. Gou caemh dawz mwnq dieg neix soengq hawj doengh daih gajlaeng mwngz; mwnq dieg neix couh yungjyenj dwg gyoengqde dih gyadangq.’”

⁵ Yajgoz caiq naeuz: “Gou mijyaengz daeuj Ngaihgiz mwhde, mwngz youq dineix seng song daeglwg; gyoengqde ij gvi hawj gou, caemh luj Lijbenq caeuq Sihmenj ityiengh dwg lwg gou, faen ndaej faenh gyahcanj he.

⁶ Hauhnaeuz baezneix mwngz lij miz hih lwg, vanzlij dwg gvi hawj mwngz, hoeng, gyoengqde ndaej laeng Hijfazlenz caeuq Majnazsih hih gyadangq aeu ndaej faenh dieg he.

⁷ Gou yienghneix guh dwg aenvih gou aiq daxmeh mwngz Lahgyez. Mwh gou dajlwh Bahdanj-Yaqlanz maj ranz hih mwhmwnq, de youq buenqroen gaenq rai lo, couh dwg youq mwnq Gyahnamz, liz Hijfazdah mbouj geij gyae hih mwnq. Gou cungj siengsim ij rai, caemh dawz de moek youq henz roen bae Hijfazdah hih diuz roen mwnq lo.” (Hijfazdah couh dwg Bwzliqhaengz.)

⁸ Gajlaeng, Yajgoz raen song daeglwg Yozswz, couh cam de naeuz: “Gyoengqde dwg byawz lah?”

⁹ Yozswz han naeuz: “Dwg song daeglwg gou he, dwg gou daeuj daengz Ngaihgiz le, Cangqdiq soengq hawj gou he.” Yajgoz caiq naeuz: “Mwngz daiq gyoengqde daeuj gaenh dangqnaj gou hwj, daengj gou hoh fuk hawj gyoengqde.”

¹⁰ Mwhde, aenvih Yajgoz daiq laux lai lo, ra cixcaemh va foenjfoenj lo, Yozswz dingq le, couh daiq song daeglwg de bae daengz dangqnaj Yajgoz. Yiengq, Yajgoz youh got youh cup song daeg de.

¹¹ Gajlaeng Yajgoz doiq Yozswz naeuz: “Siengj mbouj daengz gou seiqvunz neix vanzlij ndaej raen daengz mwngz! Cangqdiq mbouj caenhgag hawj raeuz bohlwg ndaej doxraennaj, doxcomz, vanzlij ndaej hawj gou raen gij lan gou.”

¹² Gajlaeng Yozswz daj song henz raeujhoq daxboh de ying song daeglwg de okma le, couh youq dangqnaj daxboh de bomz roengz doem bae baiq de sax de.

¹³ Baiq le, Yozswz youhcaiq daiq song daeglwg de goqdaeuj daengz dangqnaj Yajgoz, fawz gvaz ying Hijfazlenz daeglwg ngeih hawj de ndwn youq baihswix Yajgoz, fawz swix ying Majnazsih daeglwg daeuz hawj de ndwn youq baixgvaz Yajgoz, aenvih baixgvaz daiqbiuj ceiq ndei ceiq git he.

¹⁴ Hoeng, Yajgoz engq coengq fawz gvaz youq gwnz raeuj daegngeih, fawz swix coengq youq gwnz raeuj daegdaeuz, song fawz engq camjca hwj.

¹⁵ De yienghneix coengq le, couh doiq Yozswz naeuz: “Lwg hax! Cangqdiq itcig doiq gij cojgoeng raeuz ndei. Gij cojgoeng raeuz Yaqbwzlahhanj caeuq Hijsaj siengzseiz dingq de gaen de. De caemh itcig cauqguq gou, ciengx gou baenx seiqvunz,

¹⁶ hawj gou mij'z maz sienghaih.” De yienghneix naeuz sat le, couh hoh fuk hawj song daeglwg Yozswz naeuz: “Muengh Cangqdiq soengq fuk hawj doenghheij lwg neix! Muengh gij fuk yienzlaiz Cangqdiq soengq hawj gou caeuq cojgoeng gou Yaqbwzlahhanj caeuq Hijsaj hih fuk cenz hawj song daeglwg neix, hawj gyoengqde lwglwg lanlan laenjlaenj hwngqhwngq seiqseiq, seiq lengq seiq miz.”

¹⁷ Yozswz raen daxboh de aeu fawz gvaz ma coengq haeuj gwnz dingjraeuj Hijfazlenz bae le, ndaw sim de mbouj angq, couh dawz gij fawz gvaz daxboh de siengj coengq haeuj gwnz raeuj Majnazsih bae.

¹⁸ De doiq daxboh de naeuz: “Boh, mbouj deng nej! Boh hax, loek lo! Boux neix cij dwg daeglwg daeuz lax; mwngz wnggai coengq fawz gvaz hwnj gwnz raeuj de bae cij deng.”

¹⁹ Hoeng, Yajgoz gaenhbaenj mbouj dingq de, couh naeuz: “Lwg hax lwg, gou rox, gou rox leuz. Majnazsih dih doengh daih gajlaeng caemh ndaej fat baenz aen cuz hung he, gyoengqde caemh ak hah, hoeng, daegnuengx de beij de engqgya ak. Daegnuengx de hih doengh daih gajlaeng engqgya fatdad cauh ndaej haujlai haujlai aen cuz hung.”

²⁰ Ngoenz mwnq, Yajgoz hoh fuk hawj gyoengqde naeuz: “Gij vunz Hijswzlez ij yungh gij coh faenhsou ma hoh fuk hawj vunz. Gyoengqde ij naeuz: ‘Muengh Cangqdiq sawjhawj mwngz ndaej luj Hijfazlenz caeuq Majnazsih ityiengh.’” Couh yienghneix, Yajgoz hawj Hijfazlenz baiz youq gaxgonq Majnazsih.

²¹ Yajgoz caiq doiq Yozswz naeuz: “Mwngz rox lwi, gou mbouj geij caez couh ij rai gvaqseiq lo, hoeng Cangqdiq siengzseiz caeuq faenhsou youq; de ij daiq faenhsou maj daengz mwnq dieg cojgoeng mwnq bae.

²² Gou hawj dieg hawj mwngz beij gij goengjlungz nuengxau mwngz lai faenh he. Gij dieg mwnq dwg gou aeu giemq caeuq naqgung dajlwh laeng gyoengq Yaqmohliq vunz dued ma he.”