Lizsij dih Gaihcij 47 - Gij Baujcingq Moq Caeuq Geij Bonj Gij Baujcingq Daeuzdaeuz

Yajgoz youq dieg Gohsanh youq

^1-2 Yozswz daj gyoengq beixnuengx de genj aeu haj boux beixnuengx okdaeuj daiq gyoengqde caeuq daxboh de bae laeng goengjvuengz. [1]Bae le, de couh sien haeuj bae bauq naeuz goengjvuengz ni naeuz: “Daxboh gou caeuq gyoengq beixnuengx gou dajlwh dieg Gyahnamz daiq cwzcwz yiengzyiengz caeuq sojmiz dih gyadangq daeuj daengz dineix, youq dieg Gohsanh youq.”

³ Yozswz bauq le, goengjvuengz caemh raen gyoengq beixnuengx de lo, couh cam gyoengqde naeuz: “Faenhsou dwg guh gijmaz hong lah?” Gyoengqde han naeuz: “Goengjvuengz, gyoengqraeuz dajlwh coj goenggoeng geqgeq raeuz daengz seizneix, gyoengqraeuz cungj dwg ciengx yiengz goq saedceij he.

⁴ Aenvih dieg Gyahnamz iekvangh daiq youqgaenj lai, mij dieg nywj ndaej ciengx yiengz, raeuz cij daeuj daengz dineix camqciz youq lah. Seizneix raeuz gouz mwngz hawj gyoengqraeuz youq dieg Gohsanh youq, ndaej lwi?”

⁵ Goengjvuengz dingq gyoengqde yienghneix naeuz le, couh doiq Yozswz naeuz: “Daxboh mwngz caeuq gyoengq beixnuengx mwngz gaenq daeuj daengz mwngz dineix lo.

⁶ Gij dieg Ngaihgiz couh youq dangqnaj mwngz. Youzcaih mwngz genj, genj mwnq dieg ceiq ndei hih hawj gyoengqde cungj ndaej; gyoengqde ij youq dieg Gohsanh youq caemh ndaej. Hauhnaeuz mwngz rox naeuz gyoengqde miz byawz caixhangz hih, couh baij byawz daeuj guenj gij doenghduz cukseng gou.”

⁷ Gajlaeng Yozswz daiq daxboh de haeuj bae laeng goengjvuengz; daxboh de caemh gangj gij hoh fuk hih vah ma dongx goengjvuengz.

⁸ Yiengq goengjvuengz cam de naeuz: “Vunzlaux, mwngz ndaej geijlwh bi lah?”

⁹ Yajgoz han naeuz: “Seiqvunz gou seizneix gaenq ndaej baksam bi lo. Seiqvunz gou youh dinj youh dwgrengz, mbouj ndaej beij cojgoeng gou miz hih vunz lix ndaej caez.”

¹⁰ Yajgoz caiq hoh fuk hawj goengjvuengz, couh ok ma lo.

¹¹ Yozswz ciuq goengjvuengz raengq hih yienghmwnq bae nganhbaiz daxboh de caeuq gyoengq beixnuengx de, dawz ndaw guek Ngaihgiz ceiq ndei hih dieg, couh dwg Gohsanh, hawj gyoengqde. (Gohsanh couh dwg Lanzswz.)

¹² De caiq hawj haeux hawj ndaw ranz daxboh de caeuq ndaw ranz gyoengq beixnuengx de, mboujguenj miz geijlai vunz cungj hawj geijlai vunz.

Yozswz bang goengjvuengz cawx dieg

¹³ Iekvangh yied ngoenz yied yiemzcungq, dauqcawq cungj mij saek ceh haeux. Ngaihgiz vunz caeuq Gyahnamz vunz cungj iek hwj ndangdaej nyieg liux, guh hwj ngunh bae,

¹⁴ hoeng gyoengq vunz caemh mij ngaenz cawx haeux lo. Yozswz caemh sou ndaej baenx cenz Ngaihgiz caeuq baenx cenz Gyahnamz sojmiz hih ngaenz, dawz gij ngaenz neix gyau hawj vangzgungh.

¹⁵ Gij vunz Ngaihgiz caeuq gij vunz Gyahnamz cungj yungh ngaenz liux le, gij vunz Ngaihgiz couh bae cimh Yozswz, gouz de naeuz: “Gij ngaenz raeuz liux lo; cingj mwngz caiq hawj raeuz di haeux he bax! Nanzdauh mwngz yawj raeuz rai iek youq dangqnaj mwngz hoh lajx?”

¹⁶ Yozswz han naeuz: “Gij ngaenz faenhsou yungh liux lo, yiengq couh aeu doengh duz cukseng daeuj vuenh haeux sat leqx!”

¹⁷ Gajlaeng, gyoengqde couh daiq cwz hah, yiengz hah, max hah, lawz hah, daeuj caeuq Yozswz vuenh haeux. Bi mwnq, Yozswz aeu haeux vuenh ndaej gij vunz sojmiz dih doengh duz cukseng liux.

¹⁸ Daengz bi daixngeih, gij vunz caiq daeuj gouz Yozswz naeuz: “Goeng'ak hax, raeuz mbouj muenz mwngz, saedsaeh naeuz mwngz ni, gij ngaenz raeuz cungj yungh caenhbouh liux lo, daiqlienz doengh duz cukseng cungj hawj mwngz lo. Seizneix cawzok aen ndang bonjfaenh caeuq reihnaz, gyoengqraeuz cingqcaen mbouj miz saek yiengh lo, gungzgungz ndangjndangj liux lo.

¹⁹ Nanzdauh mwngz yawj gyoengqraeuz vwt dieg vangh, vunz cixcaemh ngaiz rai iek hoh lajx? Gouz mwngz aeu haeux ma vuenh gyoengqraeuz caeuq gij reihnaz raeuz bax! Gij reihnaz gvi hawj goengjvuengz, gyoengqraeuz caemh nyienh'eiq guh hoiq de. Cingj mwngz hawj haeuxceh hawj gyoengqraeuz, yiengq gyoengqraeuz caemh mbouj ngaiz rai iek, reihnaz caemh mbouj ngaiz vwt vangh lo.”

²⁰ Gyoengq vunz iek hwj ij rai, gak vunz cungj gag hai reihnaz hwj hemq bae. Yozswz bang goengjvuengz soucawx cenz Ngaihgiz dih dieg. Yiengq, cenz Ngaihgiz hih dieg cungj gvi hawj goengjvuengz liux,

²¹ cenz Ngaihgiz hih vunz cungj caemh bienqbaenz goengjvuengz hih hoiq.

²² Caenhgag gij dieg gyoengq goengjsae dajbwiz he mij ngaiz soucawx ma lo, aenvih gyoengqde cungj dwg guqdingq dajlwh laeng goengjvuengz lingx saenghhozfeiq he, sojhij gyoengqde mbouj ngaiz hai gij dieg bonjfaenh.

²³ Yozswz doiq gij beksingq Ngaihgiz naeuz: “Gou gaenq bang goengjvuengz cawx faenhsou caeuq gij dieg faenhsou lo. Seizneix, gou hawj haeuxceh hawj faenhsou, hawj faenhsou dajgeng dajndaem.

²⁴ Daengz ndaej daeng sou le, faenhsou ij dawz faenhsou sou ndaej hih haj faenh cih it gyau hawj goengjvuengz; lij lw hih haj faenh cih seiq, aeu ma diuh hwj guh ceh caeuq faenhsou cenz ranz dih goujliengz.”

²⁵ Gij vunz han naeuz: “Ox, goeng'ak hax, mwngz gouq gyoengqraeuz dih mingh! Cijaeu mwngz haenj, gyoengqraeuz cingxnyienh hawj goengjvuengz guh hoiq.”

²⁶ Gajlaeng Yozswz dingh diuz he gvanhhih gij dieg Ngaihgiz dih fazliz, couh dwg sou ndaej dih haj faenh cih it gyau hawj goengjvuengz. Diuz fazliz neix itcig daengz seizneix cungj lij miz yungh. Caenhgag gij dieg doengh goengjsae dajbwiz mbouj ngaiz gvi hawj goengjvuengz hoh luh.

Yajgoz mbouj haenj moek bonjfaenh de youq Ngaihgiz

²⁷ Ranz Yajgoz youq aen guek Ngaihgiz dih mwnq dieg he heuh Gohsanh. Gyoengqde youq mwnq cauh gyadangq, lwglwg lanlan hwngqhwngq seiqseiq.

²⁸ Yajgoz youq mwnq youq baenx cibcaet bi; de souh ndaej itbak seiqcib caet bi.

²⁹ De ijvanh rai mwhde, de baij vunz bae heuh Yozswz, heuh de daeuj daengz bakcongz de, doiq de naeuz: “Hauhnaeuz mwngz ndiep gou nex, couh dawz gij fawz mwngz coengq haeuj luengqha gou daeuj baujcingq, baujcingq doiq gou simndei, lauxsaed, gangj daengz guh daengz: mbouj ndaej dawz gou moek youq Ngaihgiz.

³⁰ Daengz gou rai nex, cingj mwngz daiq gou dajlwh Ngaihgiz maj daengz ranz cojgoeng gou, dawz gou moek youq gij diegmoh cojgoeng mwnq, caeuq cojgoeng doxcaeuq youq.” Yajgoz yienghneix naeuz le, Yozswz couh han naeuz: “Gou gaengjdingq ciuq gij vah mwngz bae guh.”

³¹ Yajgoz caiq naeuz: “Yiengq mwngz ij yiengq gou baujcingq cij ndaej.” Yozswz couh yiengq de baujcingq; Yajgoz caemh youq gwnz congz baex sax he.